Eitem ar yr agenda

Ystyried adroddiad gan y Rheolwr Rhaglenni Corfforaethol (copi ynghlwm) ynglŷn ag Adolygiad Perfformiad Blynyddol drafft 2013/14.

Roedd copi o adroddiad y Rheolwr Rhaglen Gorfforaethol, ar Adolygiad Perfformiad Blynyddol y Cyngor ar gyfer 2013/14, wedi ei gylchredeg cyn y cyfarfod.

Cyflwynwyd yr adroddiad gan y Cynghorydd B.A. Smith a’r Pennaeth Busnes, Gwella a Moderneiddio. Eglurwyd ei bod yn ofynnol i'r Cyngor gyhoeddi adroddiad blynyddol o'i berfformiad erbyn 31 Hydref ac felly bod angen penderfyniad i gymeradwyo'r Adolygiad Perfformiad Blynyddol 2013-14 drafft, Atodiad I.

Roedd Cynllun Corfforaethol 2012/17 y Cyngor yn nodi cyfeiriad strategol y Cyngor a’i flaenoriaethau dros gyfnod o bum mlynedd. Mae manylion bwriad y Cyngor i gyflawni’r blaenoriaethau wedi eu nodi yn y Cynlluniau Gwasanaeth Blynyddol ac yn Nogfen Darparu Blynyddol y Cynllun Corfforaethol, ac mae cyfres o Gytundebau Canlyniad wedi eu cytuno arnynt gyda Llywodraeth Cymru.  

Roedd yr Adolygiad Perfformiad Blynyddol yn darparu gwerthusiad ôl-syllol o lwyddiant y Cyngor wrth gyflawni yn erbyn y cynlluniau yma yn ystod 2013-14, ac yn dangos p’un ai yw’r Cyngor wedi llwyddo i gyflawni ei rwymedigaeth gogyfer â gwneud trefniadau i sicrhau gwelliannau parhaus yn llwyddiannus ai peidio.

Mae’r Tîm Gwella Corfforaethol wedi datblygu’r adroddiad mewn ymgynghoriad â gwasanaethau eraill y Cyngor. Mae’r wybodaeth perfformiad yn y ddogfen wedi ei darparu gan wasanaethau a’i thynnu o system rheoli perfformiad Verto. Ymgynghorwyd â’r Uwch Dîm Arweinyddiaeth, y Cabinet a’r Pwyllgor Archwilio Perfformiad cyn cyflwyno’r adroddiad ger bron y Cyngor Sir i’w gymeradwyo.

Mae’r risg o gael adroddiadau negyddol sylweddol gan reolyddion allanol wedi ei nodi yn y Gofrestr Risg Corfforaethol. Byddai methu cyhoeddi’r Adolygiad Blynyddol erbyn y dyddiad terfyn o 31 Hydref yn debygol o arwain at argymhellion statudol gan Swyddfa Archwilio Cymru, gyda goblygiadau sylweddol ar gyfer enw da’r Cyngor.

Roedd y Cynllun Corfforaethol a’r Adolygiad Perfformiad Blynyddol yn elfennau allweddol o Raglen Cymru ar gyfer Gwella (2010), a oedd yn cael ei gefnogi gan ofynion statudol Deddf Llywodraeth Leol 1999 a Mesur Llywodraeth Leol (Cymru) 2009.

Cyfeiriodd y Cynghorydd E.A. Jones at Safle Strategol Allweddol Bodelwyddan a gofynnodd am sicrwydd y byddai dyraniad o 26 hectar o dir cyflogaeth yn cael ei ddefnyddio at ddibenion cyflogaeth, ac nid yn cael ei gadw i’w werthu neu i adeiladu tai arno yn y dyfodol. Eglurodd y Cynghorydd B.A. Smith fod y tir dan sylw wedi ei ddynodi fel tir cyflogaeth yn y Cynllun Datblygu Lleol, a oedd wedi ei fabwysiadu gan y Cyngor, ac y byddai'n rhaid i'r Cyngor gymeradwyo unrhyw newid. 

Cadarnhaodd y Cynghorydd H.H. Evans fod trafodaethau ar y gweill rhwng swyddogion a datblygwyr hyd nes caiff Cais Cynllunio mewn perthynas â'r safle Bodelwyddan ei gyflwyno. Eglurodd fod cyllid gan y Bwrdd Uchelgais, sy’n canolbwyntio ar safleoedd cyflogaeth, wedi ei ddyrannu i ymchwilio i feysydd allweddol ar draws y Sir. Awgrymodd y Cynghorydd E.W. Williams y gallai’r tir cyflogaeth fod yn fater i'w ystyried gan Grŵp Gweithredu’r Cynllun Datblygu Lleol.

Esboniodd y Prif Weithredwr fod y tir cyflogaeth ym Modelwyddan wedi ei nodi'n glir yn y Cynllun Datblygu Lleol, ac y byddai'n cael ei nodi yn y Cais Cynllunio perthnasol. Fodd bynnag, awgrymodd fod y tir cyflogaeth, a'r gwaith priodol sydd i’w wneud, yn fater i'w ystyried o bosibl gan y Pwyllgor Archwilio.

Cyfeiriodd y Prif Weithredwr at Sesiwn Friffio Cyngor, lle awgrymwyd y byddai Sir Ddinbych yn parhau i ymrwymo i gyflawni'r Cynllun Corfforaethol ac y byddai hyn yn cael ei ddatblygu os caiff ei gadarnhau. Esboniodd fod yn rhaid i’r Cyngor dderbyn a chymeradwyo Adolygiad Perfformiad Blynyddol 2013-14, a ystyriwyd yn flaenorol gan y Pwyllgor Archwilio. Dywedwyd wrth yr Aelodau y byddai penderfyniadau ynglŷn â’r gyllideb yn effeithio ar berfformiad ac y byddai'r rhain yn gofyn am ymarfer mapio yn erbyn materion perfformiad. Rhoddwyd sicrwydd i'r Aelodau bod y meysydd sy'n profi gostyngiad mewn lefelau perfformiad, o ganlyniad i doriadau yn y gyllideb, yn cael eu nodi'n glir, ac y byddai'r Cynllun Gwella yn cael ei adolygu i adlewyrchu penderfyniadau o'r fath.          

Mewn ymateb i gwestiwn gan y Cynghorydd J.A. Davies, cadarnhaodd y Cynghorydd B.A. Smith fod darparu cyrbau isel wedi ei nodi fel blaenoriaeth yn y Cynllun Corfforaethol, i'w weithredu dros gyfnod o bum mlynedd. Eglurodd y Cynghorydd D.I. Smith fod arolwg yn ymwneud â chyrbau isel yn cael ei gynnal ac y byddai'r canlyniad yn cael ei adrodd i'r Grwpiau Ardal yr Aelodau perthnasol.

Cyfeiriodd y Cynghorydd H.H. Evans at y Seilwaith Cludiant a chadarnhaodd fod agweddau ar yr Uchelgais Economaidd a Chymunedol wedi ei dynnu'n ôl oherwydd diffyg adnoddau, gyda'r ffocws rŵan ar feysydd o effaith. Esboniodd fod TAITH wedi ei ganoli a bod penderfyniadau sy'n ymwneud â datblygu seilwaith bellach yn fater i Lywodraeth Cymru.

Cytunodd y Pennaeth Busnes, Gwella a Moderneiddio i adolygu cywirdeb byrfoddau a ddefnyddir yn fersiwn Gymraeg y ddogfen Adolygiad Perfformiad Blynyddol.

Yn dilyn trafodaeth bellach, ac o'i roi i bleidlais, cytunwyd â’r argymhelliad yn yr adroddiad:-

34 o blaid ac 1 yn erbyn.

PENDERFYNWYD - bod y Cyngor yn cymeradwyo Adolygiad Perfformiad Blynyddol 2013-14 drafft er mwyn ei gyfieithu a’i gyhoeddi cyn 31 Hydref 2014.