Eitem ar yr agenda

Ystyried adroddiad gan y Pennaeth Cyfathrebu, Marchnata a Hamdden (copi ynghlwm) sy'n ystyried y cynigion ar gyfer ailddatblygu Canolfan Nova Prestatyn.

 

 

Roedd copi o adroddiad y Pennaeth Cyfathrebu, Marchnata a Hamdden, a oedd yn gofyn i’r Cyngor gymeradwyo argymhelliad y Grŵp Buddsoddi Strategol i fwrw ymlae,n ag ailddatblygu Canolfan Nova Prestatyn, wedi ei gylchredeg cyn y cyfarfod. Croesawodd y Cadeirydd gynrychiolwyr Gwasanaethau Hamdden Alliance i'r cyfarfod.

         

Gyda chymorth cyflwyniad PowerPoint cyflwynodd y Pennaeth Cyfathrebu, Marchnata a Hamdden yr adroddiad. Eglurodd fod y Cabinet wedi ystyried canfyddiadau’r adolygiad diwydrwydd dyladwy i Hamdden Clwyd Cyf ym mis Ionawr 2014 gan ddod i'r casgliad ei fod yn ormod o risg i'r Cyngor gymryd y cwmni drosodd. Penderfynwyd rhoi'r gorau i gyllido Hamdden Clwyd o 1 Ebrill 2014 ymlaen oherwydd pryderon ynghylch ansawdd a lefel y gwasanaeth a ddarperir. O ganlyniad i hyn, rhoddodd y cwmni’r gorau i fasnachu ar unwaith.

 

Ym mis Mawrth 2014 cyflwynwyd adroddiad i’r Cabinet yn amlinellu’r argymhellion a oedd yn codi o arfarniad manwl o gyflwr yr adeiladau a'r dadansoddiad manteision cost mewn perthynas â'r gwahanol opsiynau rheoli dros dro ar gyfer y cyfleusterau; tra bod yr achos busnes ar gyfer cynnig hamdden llawer gwell ar yr arfordir yn cael ei ddatblygu ymhellach. Cytunodd y Cabinet i argymell bod Canolfan Nova yn aros ar gau hyd nes y cytunir ar gynigion ailddatblygu Gwasanaethau Hamdden Alliance ym mis Mai 2014.

 

Comisiynwyd ymarfer dichonolrwydd ac achos busnes amlinellol ar gyfer ailddatblygu’r ganolfan i gael ei ystyried gan y Grŵp Buddsoddi Strategol, ac mae manylion y broses wedi ei darparu. Cyflwynwyd yr astudiaeth dichonolrwydd a’r achos busnes amlinellol i'r Grŵp Buddsoddi Strategol a'r Cabinet ym mis Mehefin 2014 er mwyn sicrhau cyllid i symud y prosiect yn ei flaen at y cam dylunio manwl. Cymeradwywyd y cynnig i symud ymlaen i’r cam nesaf, gan ddyfarnu £108 mil ar gyfer y cam dylunio manwl i gael sicrwydd cost ar gyfer y prosiect. Mewn partneriaeth â Sir Ddinbych, cwblhaodd Gwasanaethau Hamdden Alliance pob arolwg manwl gan ddarparu costau manwl i'r Grŵp Buddsoddi Strategol yn seiliedig ar gymysgedd o gyfleusterau, fel y cytunwyd yn y briff dichonoldeb gwreiddiol (gweler Atodiad 1). Dywedwyd wrth yr Aelodau y byddai'r cyfleuster yn hunangynhaliol trwy wasanaethu ei gostau ynni ei hun.

 

Mae'r arolygon manwl wedi nodi nifer o faterion y mae angen eu datrys er mwyn sicrhau cynaliadwyedd hirdymor yr adeilad ar gyfer cyfnod yr achos busnes, yn seiliedig ar yr incwm posibl, ac ymrwymiad ariannol y Cyngor. Mae angen offer mecanyddol a thrydanol newydd ac mae arolwg to wedi amlygu nifer o broblemau. Mae'r cynnydd yn y costau o’r cam amlinellol i’r cam dylunio manwl yn cynrychioli cynnydd o 15% mewn costau datblygu cyffredinol. Byddai modd cynnal y cynnydd o fewn yr amlen fforddiadwyedd gyffredinol dros gyfnod yr achos busnes.

 

Eglurwyd bod y datblygiad yn elfen bwysig o weledigaeth y Cyngor ar gyfer gwell hamdden a chynnig twristiaeth ar hyd yr arfordir, fel y nodir yn y Strategaeth Uchelgais Economaidd. Mae Cynllun MAWR 2011 - 2014 yn ceisio cyrraedd nifer o ganlyniadau, yn arbennig o ran dymuniad y Cyngor i annog pobl Sir Ddinbych i fyw bywydau iach.

 

Y costau cyn y cam dylunio manwl oedd oddeutu £3.6 miliwn. Mae’r costau diwygiedig, oherwydd y to a’r gofynion mecanyddol a thrydanol, wedi cynyddu i £4,217,001. Mae swyddogion a thîm prosiect Hamdden Alliance wedi bod trwy 'broses gwerth peirianneg' fanwl i adolygu'r costau a’r fanyleb i leihau'r costau cymaint â phosibl heb beryglu’r datblygiad cyfan. Yn yr achos busnes gwreiddiol nodwyd bod angen cyfanswm o £256,311 i wasanaethu’r benthyca cyffredinol sy'n ofynnol ar gyfer y datblygiad. O ganlyniad i'r cynnydd yn y cyfalaf sydd ei angen ar gyfer y datblygiad, mae'r costau benthyca darbodus wedi cynyddu i daliad blynyddol o £284,680, sy'n cynrychioli cynnydd o £28,369 y flwyddyn. Cafodd hyn ei gyfyngu o fewn fforddiadwyedd y prosiect a’i ystyried a’i graffu’n llawn gan y Grŵp Buddsoddi Strategol a'r Bwrdd Cyfleusterau Arfordirol. Cadarnhaodd Pennaeth Cyfathrebu, Marchnata a Hamdden fod y prosiect yn awr wedi cael sicrwydd cost ac y byddai’n rhaid i Hamdden Alliance gwrdd ag unrhyw risg yn sgil newid y cynllun.

 

Mae rhagolwg cyllideb wedi ei gynnwys yn Atodiad 2, gyda sylwebaeth ariannol yn Atodiad 3 a datganiad ariannol llawn gan ein Rheolwr Cyllid a Sicrwydd ynghlwm wrth Atodiad 4. Mae'r rhagolwg cyllideb yn dangos colled weithredol ym mlwyddyn 1 o £68,223, colled o £6,447 yn yr ail flwyddyn a gwarged o £11,785 yn y drydedd flwyddyn. Dros gyfnod o bum mlynedd byddai’r Ganolfan wedi gwneud colled weithredol o £23,440, yn ychwanegol at yr adnoddau sydd ar gael i redeg y cyfleuster, ond mae hyn yn cymryd yn ganiataol ein bod ni’n gwireddu 70% o’r galw diddigwydd cyffredinol.

 

Os nad yw’r datblygiad yn mynd rhagddo, mae’r adeilad yn debygol o aros yn ei gyflwr presennol hyd nes caiff dewisiadau pellach eu harchwilio. Byddai'r Ganolfan yn costio oddeutu £71,000 y flwyddyn i’w gadw ar gau. Mae hyn yn cynnwys Trethi Annomestig Cenedlaethol, costau diogelwch, gwaith trwsio a chostau cynnal a chadw, fel y nodir yn yr opsiynau yn Atodiad 5 (tudalen 6 o'r achos busnes). Os bydd yr eiddo yn cael ei adael yn ei gyflwr presennol byddai'n costio oddeutu £355,000 dros y pum mlynedd nesaf. Byddai dymchwel yr adeilad yn costio oddeutu £1 miliwn, ac mae crynodeb manwl wedi ei gynnwys.

 

Mewn ymateb i gwestiynau gan yr Aelodau, eglurwyd bod yr achos busnes, Atodiad 5, wedi ei graffu arno a'i gymeradwyo gan y Grŵp Buddsoddi Strategol. Roedd y Grŵp yn argymell y dylai’r Cyngor fwrw ymlaen â datblygiad y Ganolfan Nova. Ymgynghorwyd â Chyngor Tref Prestatyn, y Bwrdd Arfordirol a Grŵp Aelodau Ardal Prestatyn drwy gydol y camau datblygu. Mynegodd yr Aelodau eu gwerthfawrogiad o ran manylder y broses ymgynghori a gynhaliwyd. Mae’r Asesiad o Effaith ar Gydraddoldeb ynghlwm wrth Atodiad 6. 

 

Os caiff ei gymeradwyo, byddai cost adeiladu'r cynllun yn sefydlog, fel y nodwyd yn y fframwaith partner datblygu. Bydd unrhyw wyriad oddi wrth y swm cyfalaf a gytunwyd yn cael ei dalu gan Wasanaethau Hamdden Alliance, oni bai bod y costau yn ganlyniad i unrhyw gais arall gan y Cyngor yn ychwanegol at y cwmpas gwaith a gytunwyd arno. Cadarnhawyd bod yr opsiynau wedi eu trafod gyda'r Grŵp Buddsoddi Strategol, ac wrth ystyried sut y bydd y risg yn cael ei reoli, maent wedi cytuno i argymell datblygu, yn amodol ar gymeradwyaeth y Cyngor.

 

Canmolodd y Cynghorydd H.Ll. Jones y gwaith a wnaed gyda Hamdden Alliance. Eglurodd fod Canolfan Nova yn un o dri phrosiect ailddatblygu yn yr ardal. Y prosiect cyntaf yw’r Ganolfan Fowlio ym Mhrestatyn, sydd wedi ei gwblhau’n ddiweddara, a’r trydydd prosiect yw prosiect yr Heulfan, y Rhyl. Cyfeiriodd y Cynghorydd H.H. Evans at y broses graffu fanwl a gynhaliwyd wrth ddatblygu'r prosiect, a oedd wedi ystyried pob agwedd posibl ar y cynllun. Roedd yn teimlo bod Sir Ddinbych wedi arwain y ffordd yng Nghymru drwy hyrwyddo darpariaeth gwasanaethau hamdden, a allai yn ei dro leihau'r pwysau ar y Gwasanaeth Iechyd.

 

Cyfeiriodd y Cynghorydd C.H. Williams at y posibilrwydd o golli cae chwarae Ysgol Gynradd Llandrillo. Dywedodd y Pennaeth Cyfathrebu, Marchnata a Hamdden bod y strategaeth hamdden yn glir ynghylch pentrefi bychain ac ardaloedd gwledig yn elwa o fuddsoddiad. Esboniodd, oherwydd ffigyrau poblogaeth a'r anhawster wrth gynyddu hyfywedd masnachol, y byddai’n rhaid ariannu rhai ardaloedd o'r Sir gan feysydd gwasanaeth lle mae disgwyliadau wedi eu rhagori.     

 

Yn dilyn y drafodaeth a ddilynwyd, darparodd y Pennaeth Cyfathrebu, Marchnata a Hamdden yr ymatebion canlynol i gwestiynau a materion a godwyd gan yr Aelodau:-

 

-                  Byddai deiliad prydles Parc Hwyl Traeth y Ffrith yn cael ei gynnwys yn y trafodaethau sy'n ymwneud â datblygu’r Ganolfan Nova a datblygu’r tir rhwng y Ffrith a’r Ganolfan Fowlio.

-                  Cyfeiriwyd at y cynnydd posibl mewn cyflogaeth yn yr ardal a’r hwb i'r economi leol a'r diwydiant twristiaeth ar draws yr ardal arfordirol.

-                  Darparwyd manylion ynglŷn â'r amserlen adeiladu.

-                  Amlygwyd pwysigrwydd gwasanaethau hamdden i'r Rhaglen Gofal Cymdeithasol.

-                  O ran darparu sleid ddŵr yng Nghanolfan Nova, yn ystod arfarniad y cynnig hamdden a phan ystyriwyd y cyfleusterau posibl ar hyd yr arfordir, cytunwyd y byddai’n well lleoli gweithgareddau dŵr hwyliog yn y Rhyl, gyda'r cyfleuster ym Mhrestatyn yn canolbwyntio mwy ar nofio ffurfiol. 

-                  Darparodd Pennaeth Cyfathrebu, Marchnata a Hamdden fanylion y fframwaith a’r contract gyda Hamdden Alliance. Cadarnhaodd fod Sir Ddinbych wedi elwa ar fframwaith proffesiynol o wasanaethau sy'n rhoi gwybod i'r Cyngor am y gwasanaethau sydd ar gael a gofynion y farchnad.

-                  Darparodd y Pennaeth Cyfathrebu, Marchnata a Hamdden amlinelliad o'r consesiynau a gynigir o ran yr unedau manwerthu. Eglurodd mai'r nod oedd marchnata Canolfan Nova fel cyrchfan ar gyfer ymwelwyr i Brestatyn a'r ardal arfordirol. Cadarnhawyd bod penderfynu ar y dewis gorau posibl o ran y cynnig bwyd a diod, trwy'r cyfleuster bwyty, yn hanfodol i lwyddiant y Ganolfan.

-                  Nid yw gwasanaeth dwyieithog wedi ei ddarparu yn flaenorol gan fod y cyfleuster wedi ei weithredu gan gwmni annibynnol hyd braich. Fodd bynnag, mae’r ddarpariaeth yn y dyfodol wedi cael sylw. Cadarnhaodd Pennaeth Cyfathrebu, Marchnata a Hamdden y byddai staff Cymraeg yn cael eu cyflogi lle bynnag y bo’n bosibl. Fodd bynnag, mae'r angen i benodi staff achrededig cyfyngu hyn.

-                  Mewn ymateb i gais gan yr Aelodau, cadarnhaodd y Pennaeth Cyfathrebu, Marchnata a Hamdden y gellir darparu gwerthusiad blynyddol ar gynnydd y Ganolfan Nova, yn erbyn y Cynllun Gwella a bennwyd ar gyfer y Strategaeth Hamdden.

-                  Mae’r angen i ddefnyddio gweithwyr a chyflenwyr lleol lle bo modd wedi ei nodi yn fframwaith y contract gyda Hamdden Alliance.

-                  Darparodd y Pennaeth Cyfathrebu, Marchnata a Hamdden fanylion y mesurau amddiffyn rhag llifogydd a stormydd ar gyfer yr adeilad, a oedd yn cynnwys gwelliannau i'r promenâd a’r morglawdd.

 

Diolchodd y Cadeirydd a'r Aelodau i Bennaeth Cyfathrebu, Marchnata a Hamdden, ei staff a Gwasanaethau Hamdden Alliance, am y gwaith ardderchog a wnaed mewn perthynas â'r prosiect yn ystod y graddfeydd amser cyfyngedig.

 

Yn dilyn trafodaeth bellach ac o'i roi i bleidlais, cytunwyd â’r argymhelliad yn yr adroddiad:-

 

38 o blaid ac 1 yn ymatal.

 

PENDERFYNWYD - bod y Cyngor yn cymeradwyo'r cynnig £4.217 miliwn i adnewyddu Canolfan Nova Prestatyn.