Eitem ar yr agenda

Ystyried adroddiad ac Atodiad Cynrinachhol gan y Pennaeth Cyllid ac Asedau (copi wedi’i amgáu) sy'n rhoi diweddariad ar y broses i gyflawni'r gyllideb refeniw ar gyfer 2015/16.

Roedd adroddiad, ac atodiad cyfrinachol, gan y Pennaeth Cyllid ac Asedau, a oedd yn rhoi diweddariad ar y broses i gyflawni'r gyllideb refeniw ar gyfer 2015/16, wedi ei ddosbarthu eisoes.

RHAN II

GWAHARDD Y WASG A’R CYHOEDD

PENDERFYNWYD - dan ddarpariaethau Adran 100A Deddf Llywodraeth Leol 1972 i wahardd y Wasg a’r Cyhoedd o’r cyfarfod ar gyfer yr eitemau a ganlyn, ar y sail ei bod yn debygol y bydd gwybodaeth eithriedig yn cael ei datgelu, fel y'i diffinnir ym mharagraffau 14 a 15, Rhan 4, Atodlen 12A Deddf Llywodraeth Leol 1972.

Eglurodd y Cynghorydd J. Thompson-Hill bod diweddariad pellach wedi'i ddarparu i sesiwn Friffio’r Cabinet a bod pob cyfarfod cyllideb Rhyddid a Hyblygrwydd wedi ei gwblhau.  Fodd bynnag, roedd elfennau o'r Adran Amgylchedd a Phriffyrdd wedi eu gohirio.  Roedd y rhestr o gyfarfodydd wedi eu cynnwys yn Nhabl 2 yn yr adroddiad, a byddai cam nesaf y broses yn cynnwys y tri Gweithdy Cyllideb i Aelodau.  Roedd manylion digwyddiadau, dyddiadau a statws allweddol wedi eu cynnwys yn yr adroddiad.

Ym mhob cyfarfod, roedd dadansoddiad manwl o'r gyllideb gwasanaeth wedi ei ystyried a set o ganlyniadau wedi’u cytuno.  Roedd enghraifft o'r dadansoddiad gwasanaeth a'r canlyniadau sy'n ymwneud â Gwasanaethau Oedolion a Busnes wedi ei hamgáu fel Atodiad 1 ac Atodiad 2. O'r canlyniadau, roedd cyfres o daflenni gwybodaeth manwl wedi eu cynhyrchu i amlygu ystod ac amseriad arbedion posibl, yr effaith, risgiau a gofynion ymgynghori a awgrymir, gydag enghraifft wedi'i chynnwys yn Atodiad 3.  Cadarnhaodd y Cynghorydd Thomson-Hill y byddai manylion yn ymwneud â phob un o'r gwasanaethau priodol yn cael eu darparu yng Ngweithdai’r Gyllideb i Aelodau, a amlinellwyd manylion y broses i'w mabwysiadu.  

Mewn ymateb i gwestiynau gan Aelodau, eglurwyd y byddai'r wybodaeth i gael ei chyflwyno i weithdai’r gyllideb ym mis Gorffennaf yn seiliedig ar yr atodiadau amgaeedig, a fyddai'n rhoi manylion pob un o'r gwasanaethau perthnasol.  Byddai barn y Pwyllgor Llywodraethu Corfforaethol, mewn perthynas â fformat a manylder y wybodaeth a gynhwysir yn yr atodiadau, yn allweddol o ran llywio'r broses wrth iddi barhau i ddatblygu.  

Darparodd y PG yr ymatebion canlynol i gwestiynau a godwyd gan Aelodau:-

-                  O ran Atodiad 1 a’r ffaith fod y golofn "canran bras yr adnoddau a ddyrennir i gydran" wedi ei gadael yn wag, roedd dau ddull gwahanol wedi eu mabwysiadu ar gyfer y ddau ymarfer peilot.  Eglurwyd nad oedd y ffordd yr oedd y gyllideb wedi ei strwythuro bob amser wedi rhoi adlewyrchiad clir o'r gweithgaredd a bod y farn hon wedi ei gadael i Benaethiaid Gwasanaeth.

-                  Nodwyd pryderon a fynegwyd mewn perthynas ag anghysondeb y manylion a ddarparwyd mewn perthynas â'r ffigurau a gynhwyswyd o dan wahanol benawdau a gwasanaethau.  Teimlai Mr Whitham y dylai sylw neu eglurhad gael ei gynnwys at ddibenion eglurder.

-                  Cytunodd y PG i edrych ar y posibilrwydd o ddarparu manylion i Weithdai’r Aelodau ar raniad grant ac incwm arall.  Pwysleisiodd yr Aelodau bwysigrwydd cael gwybod am ffynhonnell incwm ar gyfer darpariaeth gwasanaeth a'i gynaliadwyedd.

-                  Hysbyswyd yr Aelodau, er bod nifer o fodiwlau o'r system PARIS yn gweithredu'n foddhaol, nad oedd y modiwl cyllideb wedi ei gyflwyno eto.

-                  Cyfeiriodd y Cynghorydd M.L. Holland at yr angen i sicrhau bod unrhyw systemau newydd a gyflwynir yn cael eu defnyddio’n llawn gan y Cyngor, cymeradwyodd y PG y farn bod adolygiad o reolaeth y Cyngor o systemau a phrosesau TG yn cael ei wneud, o bosibl gyda throsolwg y Pwyllgor Llywodraethu Corfforaethol.

-                  Mewn ymateb i bryderon a godwyd gan y Cynghorydd G.M. Kensler mewn perthynas â materion Hawliau Lles, eglurodd y PG mai un o'r canlyniadau oedd cynnal adolygiad o grantiau a delir drwy’r gyllideb Gofal Cymdeithasol.

-                  Cyfeiriodd Mr P. Whitham at reolaeth yr elfen risg o’r posibilrwydd na fydd y Cyngor yn gallu bodloni disgwyliadau'r cyhoedd yn y dyfodol yn wyneb y gostyngiad o ran adnoddau sydd ar gael, a'r angen i roi gwybod i'r cyhoedd am yr amgylchiadau i liniaru unrhyw risg yn y dyfodol.  

Yn ystod y drafodaeth a ddilynodd gofynnodd y Cadeirydd bod yr Aelodau yn cael copïau papur o'r adroddiadau sydd i'w cyflwyno i'r Gweithdai Aelodau.

PENDERFYNWYD - bod y Pwyllgor Llywodraethu Corfforaethol yn derbyn ac yn nodi cynnwys yr adroddiad.

Ailddechreuodd y Pwyllgor RHAN I ar yr adeg hon yn y cyfarfod.

RHAN I