Eitem ar yr agenda

Ystyried adroddiad gan Reolwr y Tîm Gwella Corfforaethol (copi’n amgaeëdig) yn gofyn am gymeradwyo Adroddiad Perfformiad Blynyddol drafft y Cyngor ar gyfer 2011-12.

Dosbarthwyd copi o adroddiad gan y Rheolwr Tîm Gwella Corfforaethol, a oedd yn gofyn am gymeradwyo ffurf drafft Adroddiad Perfformiad Blynyddol 2011-12 y Cyngor, â phapurau’r cyfarfod.

Mae’n ofynnol i’r Cyngor gyhoeddi adroddiad blynyddol ar ei berfformiad erbyn 31 Hydref bob blwyddyn, ac roedd angen penderfyniad i gymeradwyo’r Adolygiad Perfformiad Blynyddol 2011-12, a gynhwyswyd fel Atodiad I i’r adroddiad. 

Cyflwynwyd yr adroddiad gan yr Aelod Arweiniol Moderneiddio a Pherfformiad, y Cynghorydd B.A. Smith, ac esboniodd bod Cynllun Corfforaethol 2009-12 yn gosod cyfeiriad strategol yr Awdurdod a bod cyhoeddi’r Ddogfen Cyflawni’r Cynllun Corfforaethol 2011-12 yn amlinellu sut y bwriedir cyfrannu at gyflawni’r Cynllun Corfforaethol yn ystod y flwyddyn ariannol dan sylw. Gwnaeth pob gwasanaeth yn y Cyngor gynhyrchu cynllun gwasanaeth ar gyfer 2011-12 yn disgrifio sut roedd yn bwriadu cyfrannu at gyflawni’r deilliannau cytunedig ar gyfer cymunedau Sir Ddinbych. Roedd yr adroddiad Perfformiad Blynyddol yn darparu gwerthusiad yn edrych yn ôl ar lwyddiant y Cyngor yn cyflawni yn erbyn y cynlluniau yn ystod 2011-12, ac yn dangos a wnaeth y Cyngor lwyddo i gyflawni ei ymrwymiad i wneud trefniadau i sicrhau gwella parhaus.  

Roedd yr Adolygiad Perfformiad Blynyddol yn cynnwys gwerthusiad penodol o lwyddiant y Cyngor o ran cyflawni ei flaenoriaethau corfforaethol. Arfarnwyd y perfformiad mewn perthynas â dangosyddion perfformiad a mesuryddion perfformiad allweddol, gan nodi sut roedd y blaenoriaethau corfforaethol wedi cael effaith yn lleol yn chwe ardal Sir Ddinbych. Roedd y Cyngor wedi gwireddu ei addewid i fod yn Gyngor sy’n perfformio ar lefel uchel, yn agos at ei gymuned, ac esboniodd y Cynghorydd Smith y llwyddwyd â’r nod o ddarparu trosolwg gonest a chytbwys o berfformiad y Cyngor. Roedd nifer o heriau’n parhau, ac roedd y rhain wedi ffurfio sylfaen datblygu’r Cynllun Corfforaethol newydd.  

Cynhwyswyd manylion am yr ymgynghoriadau a gynhaliwyd yn yr adroddiad. Fodd bynnag, cadarnhawyd na chynhaliwyd Asesiad o’r Effaith ar Gydraddoldeb yng nghyswllt yr adroddiad hwn. 

Darparwyd yr ymatebion a ganlyn i gwestiynau a materion gan yr Aelodau:-

·        Tudalen 22 – cytunodd y swyddogion i sicrhau y byddai’r adran yn cyfeirio at ieithoedd yn yr Adroddiad Blynyddol yn cael ei diwygio gyda’r Gymraeg wedi ei gosod o flaen y Saesneg, yn unol â pholisi’r Cyngor.

·        Tudalen 24, Ffyrdd a chynlluniau Atal rhag Llifogydd – cytunodd y swyddogion gael eglurhad a darparu manylion ynghylch cyllid Llywodraeth Cymru i gynlluniau lleddfu llifogydd yn y Rhyl a Chorwen. 

·        Tudalen 25, Meysydd Blaenoriaeth, Priffyrdd – Hysbysodd y Prif Weithredwr yr Aelodau y byddai argymhelliad yn cael ei gyflwyno i’r Pwyllgor Craffu Partneriaethau a’r Cabinet i beidio â bwrw ymlaen â chyfuno Adrannau Priffyrdd Sir Ddinbych a Chonwy. Cadarnhaodd na fyddai hyn yn effeithio ar y buddsoddiad a wnaed gan Sir Ddinbych, a sicrhaodd yr Aelodau y byddai’r prosiect dan sylw yn ddiogel. Ymatebodd y Prif Weithredwr i bryderon a fynegwyd gan yr Aelodau, ac esboniodd na ddylid cyfleu’r sefyllfa fel cydweithredu’n methu, ond yn hytrach edrych arno fel Sir Ddinbych wedi bod yn rhagweithiol wrth asesu ac ymateb i’r opsiynau ar gael.  

·        Tudalen 63, Ardal Dinbych – cytunwyd y byddai swyddogion yn cael eglurhad ac yn darparu manylion ynghylch cyllid Tai Clwyd ar gyfer y datblygiad yn ymwneud ag adleoli’r Gwasanaeth Ieuenctid. Cadarnhaodd y Cynghorydd C.L. Hughes nad oedd y cyllid wedi ei sicrhau hyd yma.

·        Tudalen 25, Maes blaenoriaeth, Priffyrdd – Esboniodd y Prif Weithredwr nad oedd safbwynt y Llywodraeth o ran cyflwyno cydweithredu wedi newid, ac onibai ei fod yn cael ei ddatblygu’n wirfoddol gellid gorfodi hyn mewn ffyrdd eraill. Diben y cydweithredu oedd cyflawni arbedion sylweddol. Fodd bynnag, byddai goblygiadau ariannol ynghlwm â chyfuno i ddechrau, ac yn achos yr adrannau Priffyrdd ystyriwyd bod y rhain yn anghynaliadwy. Hefyd byddai angen cefnogaeth wleidyddol a gweithredol gan yr holl bartïon yn ymwneud â hyn er mwyn sicrhau llwyddiant. 

·        Cyfeiriodd y Cynghorydd J. Butterfield at Ddangosyddion Perfformiad a oedd yn datgelu na chyrhaeddwyd blaenoriaethau, a bod disgyblion wedi gadael yr ysgol heb gymwysterau priodol. Cefnogodd y Cynghorydd E.W. Williams y farn a fynegwyd gan y  Cynghorydd J. Butterfield ynghylch yr angen i roi’r gwelliannau yn Ysgol Uwchradd y Rhyl ar gwrs carlam ac awgrymodd anfon sylwadau at Lywodraeth Cymru yn gofyn am ryddhau cyllid ar gyfer y gwaith gwella’r ysgol. 

·        Tudalen 30, Cyngor sy’n perfformio ar lefel uchel, yn agos at ei gymunedau – cadarnhaoedd y Rheolwr Gwella Corfforaethol y farn a fynegwydd gan y Cynghorydd J. Butterfield am bwysigrwydd gwella’r berthynas waith rhwng Aelodau etholedig a swyddogion y Cyngor a’r gymuned. 

·        Tudalen 15, Adfywio – Esboniodd y Rheolwr Gwella Corfforaethol bod mesuriadau perfformiad yng nghyswllt y tai aml-feddiannaeth a aeth trwy’r broses drwyddedu wedi eu cynnwys fel gwyrdd oherwydd goresgyn y targed a osodwyd. Fodd bynnag, esboniodd y byddai’r holl ddangosyddion a mesuriadau yn cael eu hadolygu i’w cynnwys yn y Cynllun Corfforaethol newydd mewn ymgais i sicrhau’r trothwy sy’n ofynnol ar gyfer rhagoriaeth. 

·        Tudalen 19, Newid Demograffig – Eglurwyd bod y Dangosydd Perfformiad ynghylch Pobl â gefnogir o dan 60% y llinell tlodi, a ddangoswyd yn goch, yn gamarweiniol gan ei fod yn mesur gweithgarwch yr Uned Hawliau Lles yn unig, ac nid oedd yn cynnwys y gwaith partneriaeth sy’n cael ei wneud. Cyfeiriodd y Pennaeth Busnes, Cynllunio a Pherfformiad at y gwaith sy’n cael ei wneud mewn ardaloedd Cymunedau’n Gyntaf, a nodwyd fel blaenoriaeth, ynghyd â’r Prosiect Cronfa Gymdeithasol Ewrop sy’n cael ei hyrwyddo gan y Bwrdd Gwasanaethau Lleol. 

·        Mesuriadau Perfformiad, Pobl a gefnogir o dan 60% y llinell dlodi. Mae’r Tîm Hawliau Lles yn gweithio’n dda â Chyngor ar Bopeth. Dylai Siop Cyngor ar Fudd-daliadau’r Rhyl ddarparu mwy o gymorth ac adnabod ac ymdrin â’r newidiadau i fudd-daliadau. 

·        Tudalen 66, Rhuthun, Prosiect Cae Ddol – cytunodd y Rheolwr Gwella Corfforaehtol i adolygu’r sefyllfa o ran Cael Ddol er mwyn sicrhau cywirdeb.  

·        Tudalen 35, Newid Demograffig – Mewn ymateb i gwestiwn oddi wrth y Cynghorydd Feeley ynghylch y gwahaniaeth rhwng y data a’r targed ar gyfer Taith i Waith: Nifer y bobl a gefnogwyd fel nad ydynt heb fod mewn addysg, hyfforddiant neu gyflogaeth cytunwyd i adrodd yn ôl ar hyn wrth y Cynghorydd Feeley. Amlinellodd y Cyfarwyddwr Corfforaethol: Moderneiddio a Lles y problemau o ran sicrhau cyllid Ewropeaidd, yn enwedig yng nghyd-destun y sefyllfa economaidd, a chyfeiriodd at y targedau penodol a amlinellir yn yr adroddiad.  

·        Tudalen 61, Canolfan y Dderwen, Y Rhyl – cytunodd y Rheolwr Gwella Corfforaethol i adolygu’r sefyllfa o ran Canolfan y Dderwen, y Rhyl, a sicrhau cynnwys y wybodaeth ddiweddaraf yn yr adroddiad. 

·        Mewn ymateb i bwyntiau a godwyd gan y Cynghorydd C. Guy-Davies am swmp y wybodaeth fanwl a gynhwysir yn yr Adroddiad Perfformiad Blynyddol, esboniodd y Pennaeth Busnes, Cynllunio a Pherfformiad bod Swyddfa Archwilio Cymru yn ei gwneud yn ofynnol i Gyngor Sir Ddinbych gyhoeddi gwybodaeth a’i bod yn anodd cynnal cydbwysedd. Serch hynny, gellid ystyried darparu crynodeb i gyd-fynd â’r Adroddiad Perfformiad Blynyddol yn y dyfodol. 

Diolchodd y Cadeirydd i’r swyddogion am y gwaith caled a wnaed i gynhyrchu’r fath adroddiad cynhwysfawr.

PENDERFYNWYD – yn amodol ar y newidiadau uchod, bod y Cyngor yn cymeradwyo ffurf drafft yr Adroddiad Perfformiad Blynyddol 2011-12 er mwyn galluogi ei gyfieithu a’i gyhoeddi cyn 31 Hydref 2012.