Eitem ar yr agenda

Derbyn cyflwyniad gan gynrychiolwyr Bwrdd Iechyd Prifysgol Betsi Cadwaladr ynghylch cynlluniau ar gyfer darparu gwasanaethau yn Inffyrmari Dinbych yn y dyfodol.

10.10 a.m. – 10.45 a.m.

 

Estynnodd y Cadeirydd groeso i Gyfarwyddwr Gwasanaethau Clinigol – Therapïau a Chyfarwyddwr Cynorthwyol Gwasanaethau Cymunedol Bwrdd Iechyd Prifysgol Betsi Cadwaladr i’r cyfarfod i drafod dyfodol y gwasanaethau yn Ysbyty Dinbych. Derbyniwyd ymddiheuriadau gan y Cyfarwyddwr Rhanbarth: Canol BIPBC (Bethan Jones).

 

Wrth roi’r cyflwyniad darparodd Gyfarwyddwr Cynorthwyol Gwasanaethau Cymunedol y Bwrdd Iechyd drosolwg bras o gefndir cau’r ward yn Ysbyty Dinbych, gan gynnwys gwybodaeth am yr archwiliadau a’r arolygon tân manwl, a’r canlyniadau a arweiniodd at gomisiynu gwaith i ganfod y costau a’r raddfa amser ar gyfer gwneud y ward yn addas i’r diben eto. Nododd y gwaith hwn wyth dewis posibl ar gyfer dyfodol y gwasanaethau yn yr ysbyty. Sef:

 

·         Ailwampio’r llawr gwaelod a’r llawr cyntaf i ddarparu 14 gwely, a fydd yn costio rhwng £10 ac £11 miliwn ac yn cymryd oddeutu 3 blynedd

·         Dymchwel ac ailgodi’r llawr gwaelod a’r llawr cyntaf i ddarparu 16 gwely, a fydd yn costio rhwng £11 ac £12 miliwn ac yn cymryd oddeutu 3 blynedd

·         Symud yr Adran Ffisiotherapi i ran arall o’r ysbyty er mwyn creu 4 bae gwely, a fydd yn costio rhwng £1.2 ac £1.4 miliwn ac yn cymryd oddeutu dwy flynedd

·         Codi ward 5 gwely newydd rhwng yr Ystafelloedd MacMillan ac adeilad y clinig, a fydd yn costio rhwng £1.2 ac £1.3 miliwn ac yn cymryd oddeutu 2 flynedd

·         Codi ward 6 gwely newydd, a fydd yn costio rhwng £4.5 a £5 miliwn ac yn cymryd oddeutu 3 blynedd

·         Dymchwel y gegin a’r ward uchod a chreu ward 6 gwely newydd, a fydd yn costio rhwng £3.5 a £4 miliwn ac yn cymryd oddeutu 3 blynedd

·         Addasu’r ystafell wydr wrth ymyl y ward MacMillan yn uned un ystafell wely heb ystafell ymolchi, a fydd yn costio oddeutu £100,000 ac yn cymryd oddeutu 12 mis

·         Symud yr ystafell mamolaeth i’r llawr gwaelod, a fydd yn costio rhwng £350,000 a £400,000 ac yn cymryd oddeutu 12 mis

 

Mae’r dewisiadau hyn yn destun gwaith pellach.

 

Os gwneir penderfyniad, yn dilyn dadansoddiad manwl o’r dewisiadau, i ail-ddarparu’r ward cyfan yna byddai angen cau’r ysbyty i gyd er mwyn ymgymryd â’r gwaith. I sicrhau bod digon o wlâu cymunedol yn yr ardal yn ystod cyfnod y gwaith adeiladu, ni fydd modd cychwyn y gwaith tan y bydd Ysbyty Gogledd Sir Ddinbych wedi agor. Serch hynny, byddai modd ymgymryd â rhywfaint o waith ar y safle yn y cyfamser. Mae cynghorwyr sir lleol a Chynghrair Cyfeillion yr Ysbyty yn awyddus i sicrhau nad yw’r ward yn wag yn y cyfamser oherwydd y byddai hynny yn lledaenu’r neges anghywir o ran dyfodol y safle. Felly, mae’r Bwrdd Iechyd a’r Cyngor Sir wedi cytuno i leoli aelodau o dîm Adnoddau Cymunedol Iechyd a Gofal Cymdeithasol ar y Cyd Ardal Dinbych ar Ward Lleweni tan y bydd unrhyw waith ailwampio yn barod i’w wneud. Byddai’r Tîm Adnoddau Cymunedol yn symud i rywle arall cyn i’r gwaith ddechrau.

 

Dywedodd Cyfarwyddwr Cynorthwyol y Gwasanaethau Cymunedol bod swyddogion y Bwrdd Iechyd wedi cwrdd â Grŵp Ardal Aelodau Dinbych yn ddiweddar i drafod dyfodol yr ysbyty. Yn ystod y cyfarfod gofynnodd yr aelodau i’r Bwrdd Iechyd ystyried dewisiadau ehangach ar gyfer y safle gyda Chyngor Sir Ddinbych a sefydliadau partner eraill. Ers y cyfarfod hwnnw mae’r Bwrdd iechyd wedi llwyddo i sicrhau rhywfaint o gyllid y Gronfa Gofal Integredig ar gyfer gwaith ymchwil i fapio gweledigaeth ar y cyd ar gyfer gwasanaethau iechyd, lles a gofal cymdeithasol integredig yn ardal Dinbych.

 

Mewn ymateb i gwestiynau aelodau, gwnaethpwyd y sylwadau canlynol gan gynrychiolwyr y Bwrdd Iechyd –

 

·         Mae ystyriaeth wedi’i roi, pan gaewyd Ward Lleweni, i'r posibilrwydd o ail-ddarparu gwlâu ar sail dros dro mewn unedau symudol arbenigol.

Oherwydd nad oes llawer o le ar y safle, a’r angen i barhau i ddarparu gwasanaethau eraill yn yr ysbyty, nid yw ail-ddarparu gwlâu mewn unedau symudol yn addas. Os penderfynir dymchwel ac ailgodi wardiau’r llawr gwaelod a chyntaf, ni fyddai’n briodol ceisio darparu gwasanaethau cleifion mewnol yr ysbyty mewn unedau symudol ar safle a fyddai’n safle adeiladu. Yn ogystal, byddai ar wardiau/cleifion mewnol angen mynediad hawdd at wasanaethau ategol, ond ni fyddai hynny'n bosibl os ydynt ar safle adeiladu.

·         Byddai gan y Bwrdd Iechyd fwy o drosoledd i sicrhau cyllid cyfalaf Llywodraeth Cymru ar gyfer datblygu safle Ysbyty Dinbych petai unrhyw brosiect arfaethedig yn fenter ar y cyd gyda’r awdurdod lleol at ddibenion darparu gwasanaethau iechyd, gofal cymdeithasol a lles integredig.

Petai’r cynnig yn golygu ailwampio’r adeilad presennol, yna byddai’r Bwrdd Iechyd yn llai tebygol o sicrhau cyllid Llywodraeth Cymru ac felly yn gorfod cwrdd â’r costau yn defnyddio’i gyllideb ei hun. Mae Cyngor Sir Ddinbych a Grŵp Cynefin yn rhan o’r trafodaethau hyn, gyda’r golwg o ddatblygu gweledigaeth iechyd a gofal ar gyfer Dinbych fel sail i lunio achos busnes cadarn i ymgeisio am gyllid Llywodraeth Cymru. Byddai arian grant y Gronfa Gofal Integredig yn helpu i hwyluso gwaith ymchwil yn ogystal â gwaith gyda’r gymuned ehangach i benderfynu ar weledigaeth ar gyfer yr ardal a’r cyfleusterau sydd eu hangen i ddarparu’r weledigaeth honno.

·         Mae’r Bwrdd Iechyd, hyd yma, wedi sicrhau cyllid grant ar gyfer datblygiadau gofal iechyd yn y Rhyl, Corwen a Phrestatyn, a'u bod rŵan yn canolbwyntio ar ardal Dinbych.

·         Yn dilyn tân Tŵr Grenfell, mae Llywodraeth Cymru wedi cyfarwyddo pob Bwrdd iechyd i archwilio'r holl gyfleusterau cleifion mewnol sydd ag uchder mwy nag unllawr.

Yr archwiliad manwl hwn, yn unol â chyfarwyddiadau Llywodraeth Cymru, sydd wedi gwneud ward llawr cyntaf yr ysbyty yn anaddas ar gyfer cleifion – oherwydd y dull gwagio pan fo argyfwng. Yn unol â gofynion Deddf Tân ac Achub 2005 roedd gan yr ysbyty gynllun gwagio pan fo tân a oedd yn cynnwys cynllun gwagio llorweddol ar gyfer ward y llawr cyntaf. Er bod y cynllun hwn, yn y blynyddoedd diwethaf, wedi’i gefnogi gan bob arolygwr diogelwch tân, arolygwyr y Bwrdd Iechyd a’r rheiny a gyflogir gan y Gwasanaeth Tân ac Achub, nid yw'n bodloni gofynion y canllawiau newydd a gyhoeddwyd gan Lywodraeth Cymru yn dilyn trychineb Tŵr Grenfell. Mae’n rhaid i’r Bwrdd Iechyd ddarparu ei wasanaethau mewn adeiladau sy'n cyrraedd safonau diogelwch Llywodraeth Cymru.

·         Yn sgil yr arolwg cyntaf o’r adeilad, yn ystod haf 2017, gwelwyd bod y diffyg dulliau ynysu tân ar ward y llawr cyntaf yn risg ac felly bu’n rhaid tynnu 10 gwely (2 fae 5 gwely).

Daeth yr arolwg hwn i’r casgliad bod yn rhaid i’r 7 gwely sy’n weddill gael eu defnyddio gan bobl sy’n medru cerdded allan o’r adeilad petai angen ei wagio. Fodd bynnag, mae arolwg manylach wedi gwneud y gwlâu hyn yn anniogel pan fo tân ac felly mae’r ward cyfan wedi’i gau ar gyfer cleifion mewnol.

·         Roedd 10 i 12 merch y flwyddyn yn defnyddio gwasanaethau mamolaeth Ysbyty Dinbych pan gafodd ei agor.

Mae’r gwasanaethau sydd ar gael yno yn debyg iawn i’r rheiny a ddarperir i ferched beichiog sy’n geni gartref. Er y byddai modd ystyried a ddylid parhau â’r gwasanaeth hwn neu beidio fel rhan o ddatblygiad y safle, mae’n bwysig cofio bod bwrsari addysgol ar gael i fyfyrwyr sydd wedi’u geni yn yr ysbyty.

·         Maent awyddus i weithio gyda’r awdurdod lleol, Grŵp Cynefin a 4 meddygfa’r dref i ddatblygu gweledigaeth iechyd, gofal cymdeithasol a lles gyfannol ar gyfer y dref gyda gwasanaethau ar gael mewn cyfleuster hygyrch ac yng nghartrefi preswylwyr er mwyn cefnogi annibyniaeth a gwella gwytnwch.

·         Nid yw’r ysbyty, er ei fod yn un o’r ysbytai hynaf yng Nghymru, yn adeilad rhestredig ar hyn o bryd.

·         Mae staff Stadau’r Gwasanaeth iechyd wedi archwilio nifer o atebion strwythurol posibl i ailagor y ward i fyny’r grisiau.

Yr unig ddewis hyfyw yw tynnu llawr pren y ward a gosod llawr concrid. Fodd bynnag, oherwydd oed a ffabrig yr adeilad mae’n annhebygol y byddai sylfeini presennol yr adeilad yn ddigon cryf i ddal llawr concrid. O ganlyniad, mae’r cynigion amlinellol presennol ar gyfer ailwampio’r adeilad yn cynnwys codi ffrâm ddur fel rhan o’r cynllun buddsoddi cyfalaf.

·         Mae’n anghenion gofal iechyd cymunedol ardal Dinbych yn wahanol i anghenion gogledd y sir, gan fod demograffeg yr ardal leol yn wahanol.

Mae preswylwyr canol y sir yn fwy tebygol o fod â chefnogaeth teulu.

·         Er y byddai’n rhaid i unrhyw brosiect mawr i ailddatblygu’r safle cyfan ddilyn gweithdrefn dri cham prosiectau cyfalaf Llywodraeth Cymru, rhagwelir, yn achos yr ysbyty, na fyddai’r broses hon mor hir â phroses Ysbyty Cymunedol Gogledd Sir Ddinbych oherwydd bod y weledigaeth ar gyfer Dinbych eisoes yn un cydweithredol ac y dylai’r gwersi a ddysgwyd yn sgil prosiect Gogledd Sir Ddinbych helpu datblygiad achos busnes Ysbyty Dinbych. 

 

Dywedodd Pennaeth Gwasanaethau Cymorth Cymunedol y Cyngor bod yr awdurdod lleol yn ymwybodol y byddai mwy o alw yn yr ardal yn y dyfodol am elfennau o ofal nyrsio yn ogystal â gofal dementia arbenigol – gartref ac mewn lleoliad preswyl/cartref nyrsio. Felly mae’r Cyngor yn awyddus i weithio gyda’r Bwrdd Iechyd a phartneriaid i sicrhau gwasanaethau addas i’r diben ar gyfer preswylwyr. Ar ddiwedd y drafodaeth –

 

PENDERFYNWYD –

 

(a)       Derbyn yr wybodaeth a’r cyflwyniad ar y gwaith hyd yma o ran dyfodol darpariaeth gwasanaethau Ysbyty Dinbych;

 

(b)       Cefnogi’r ymdrechion i ddatblygu gweledigaeth iechyd, gofal cymdeithasol a lles ar gyfer ardal Dinbych; a

 

(c)        Derbyn diweddariadau ar gynnydd y weledigaeth a’r achosion busnes i’w gwireddu.