Agenda and draft minutes

Ethol Is-Gadeirydd ar gyfer gweddill 2013/2014.

Gan na chafodd unrhyw CV ei gyflwyno ar gyfer swydd yr Is-Gadeirydd, cytunwyd i ohirio penodiad hyd nes cyfarfod yn y dyfodol.

Dylai Aelodau ddatgan unrhyw gysylltiadau personol neu rai sy’n rhagfarnu gydag unrhyw fater a nodwyd y dylid ei ystyried yn y cyfarfod hwn.

Datganwyd cysylltiad personol gan:

(i)            Y Cynghorydd Jeanette Chamberlain Jones ynghylch Eitem 8 - Gwasanaeth Mabwysiadu Cenedlaethol, a’r

(ii)          Cynghorydd Bill Tasker ynghylch Eitem 7 –Fframwaith ar gyfer Darparu Gwasanaethau Iechyd a Gofal Cymdeithasol Integredig ar gyfer Pobl Hŷn ag anghenion cymhleth.

Rhybudd o eitemau y dylid, ym marn y Cadeirydd, eu hystyried yn y cyfarfod fel materion brys yn unol ag Adran 100B(4) Deddf Llywodraeth Leol 1972.

Ni chodwyd unrhyw faterion brys.

Derbyn cofnodion cyfarfod y Pwyllgor Archwilio Partneriaethau a gynhaliwyd ar 7 Tachwedd 2013 (copi ynghlwm).

Cyflwynwyd Cofnodion cyfarfod y Pwyllgor Archwilio Partneriaethau a gynhaliwyd ar 7 Tachwedd 2013.

Cadarnhaodd y Cydlynydd Archwilio fod ymateb diweddariad gan y Gwasanaeth Iechyd Meddwl Plant a’r Glasgoed wedi’i gynnwys yn y ddogfen Briff Gwybodaeth (a ddosbarthwyd yn flaenorol).

PENDERFYNWYD –yn amodol ar yr uchod, y dylid cymeradwyo cofnodion y cyfarfod a gynhaliwyd ar 26 Medi 2013  fel cofnod cywir.

Yn y fan hon, cytunodd y Cadeirydd i newid trefn y busnes a nodir yn y Rhaglen.  Byddai'r eitemau’n cael eu clywed yn y drefn ganlynol:

8.         Gwasanaeth Mabwysiadu Cenedlaethol

7.         Fframwaith ar gyfer Darparu Gwasanaethau Iechyd a Gofal Cymdeithasol Integredig ar gyfer Pobl Hŷn ag Anghenion Cymhleth

6          Un Llwybr Mynediad at Dai – Polisi Dyrannu Cyffredin (CAP)

Ystyried adroddiad gan y Pennaeth Gwasanaethau Plant a Theuluoedd (copi ynghlwm) i geisio barn y Pwyllgor Archwilio Partneriaethau am y cynllun i sefydlu Gwasanaeth Mabwysiadu Cenedlaethol i Gymru, gyda chefnogaeth gan Raglenni Cydweithredol Mabwysiadu Rhanbarthol a hefyd i geisio cefnogaeth bod Cyngor Sir Wrecsam yn parhau i fod yn Awdurdod Arweiniol ar gyfer Gwasanaeth Mabwysiadu Gogledd Cymru.

10.50 a.m. – 11.20 a.m.

Cyflwynodd y Cynghorydd Bobby Feeley, Aelod Arweiniol dros Ofal Cymdeithasol a Gwasanaethau Plant yr adroddiad a'r atodiadau (a ddosbarthwyd yn flaenorol) yn gofyn am farn y Pwyllgor Archwilio Partneriaethau ar y cynllun i sefydlu Gwasanaeth Mabwysiadu Cenedlaethol i Gymru, gyda chefnogaeth Cydweithrediaethau Mabwysiadu Rhanbarthol.  Hefyd, ceisiodd y Cynghorydd Feeley gefnogaeth i Gyngor Bwrdeistref Sirol Wrecsam barhau i weithredu fel yr awdurdod arweiniol ar gyfer Gwasanaeth Mabwysiadu Gogledd Cymru.

Eglurodd y Pennaeth Gwasanaethau Plant a Theuluoedd (PGPaTh) bwyntiau o fewn yr adroddiad.  Rhoddodd y PGPaTh sicrwydd i’r Pwyllgor Archwilio y byddai swyddogaethau statudol y Cyngor mewn perthynas â darparu Gwasanaeth Mabwysiadu’n cael eu diwallu’n llawn, yn unol â deddfwriaeth a chanllawiau.

Roedd creu Gwasanaeth Mabwysiadu Cenedlaethol yn un o feysydd polisi allweddol Llywodraeth Cymru, ac mae'r cynigion wedi’u cymeradwyo gan y Dirprwy Weinidog Plant a Gwasanaethau Cymdeithasol ar 25 Ebrill 2013.

Roedd Cymdeithas Cyfarwyddwyr Gwasanaethau Cymdeithasol (CCGC) Cymru, wedi gweithio gyda Chymdeithas Llywodraeth Leol Cymru (CLlLC) i gynhyrchu model gweithredol ar gyfer cyflwyno Gwasanaeth Mabwysiadu Cenedlaethol ledled Cymru drwy gydweithrediaethau gweithredol rhanbarthol.  Roedd y model gweithredol yn cynnig y pump Cydweithrediaeth Fabwysiadu Ranbarthol canlynol:

·         Gogledd Cymru - Wrecsam, Sir y Fflint, Gwynedd, Conwy, Sir Ddinbych ac Ynys Môn;

·         De Ddwyrain Cymru - Blaenau Gwent, Sir Fynwy, Torfaen, Casnewydd a Chaerffili;

·         Gorllewin a Chanolbarth Cymru - Ceredigion, Sir Gaerfyrddin, Sir Benfro a Phowys;

·         Bae’r Gorllewin – Pen-y-bont ar Ogwr, Castell-nedd Port Talbot ac Abertawe; a

·         Chanolbarth a De Cymru - Caerdydd, Bro Morgannwg, Merthyr Tudful a Rhondda Cynon Taf.

Y bwriad yw y bydd pob un o'r pump Cydweithrediaeth Ranbarthol yn cael ei sefydlu erbyn mis Ebrill 2014.

Bydd Grŵp Tasg a Gorffen yn cael ei sefydlu hefyd gyda chynrychiolwyr o Lywodraeth Cymru, CCGC Cymru, Arolygiaeth Gofal a Gwasanaethau Cymdeithasol Cymru (AGGCC), Cymdeithas Prydain dros Fabwysiadu a Maethu (BAAF), Asiantaethau Mabwysiadu Gwirfoddol a phob un o'r pump Cydweithrediaeth Ranbarthol i gynhyrchu rhaglen newid gadarn ar gyfer gweithredu’r model gweithredol.

Dylai'r model gwasanaeth cenedlaethol gael ei fonitro i sicrhau nad yw costau’n cynyddu o'r lefel bresennol o wariant net.  Dylai unrhyw gostau ychwanegol sy'n deillio o weinyddu a chynnal y trefniadau newydd gael eu dosbarthu’n briodol rhwng yr awdurdodau sy'n cymryd rhan.

Cynhaliwyd trafodaeth gyffredinol ar bolisïau a gweithdrefnau mabwysiadu a:

PHENDERFYNWYD – bod y Pwyllgor yn:-

(i)     cefnogi'r cynigion ar gyfer cyflawni Gwasanaeth Mabwysiadu Cenedlaethol yng Nghymru fel y nodwyd yn adroddiad Cymdeithas Cyfarwyddwyr Gwasanaethau Cymdeithasol (CCGC) Cymru.

(ii)  cefnogi’r cynnig i Gyngor Bwrdeistref Sirol Wrecsam barhau i weithredu fel yr awdurdod arweiniol ar gyfer Gwasanaeth Mabwysiadu Gogledd Cymru.

Ystyried adroddiad gan Gyfarwyddwr Corfforaethol:  Moderneiddio a Lles (Cyfarwyddwr Statudol y Gwasanaethau Cymdeithasol) / Pennaeth Gwasanaethau Oedolion a Busnes (copi ynghlwm) sydd yn ceisio sylwadau’r Aelodau ar y Datganiad o Fwriad drafft rhwng y Cyngor a BIPBC ar gyfer integreiddio gwasanaethau iechyd a gofal cymdeithasol cyn ei gyflwyno i Gabinet.

10.10 a.m. – 10.40 a.m.

Cyflwynodd y Cynghorydd Bobby Feeley, Aelod Arweiniol dros Wasanaethau Gofal Cymdeithasol Oedolion a Phlant yr adroddiad (a ddosbarthwyd yn flaenorol) i hysbysu'r Aelodau am fwriadau Llywodraeth Cymru (LlC) i sefydlu gwasanaethau iechyd a gofal cymdeithasol integredig i bobl hŷn sydd ag anghenion cymhleth.

Cafwyd trafodaeth fanwl a chodwyd y pwyntiau canlynol:

·         Croesawodd y Pwyllgor y cynigion a amlinellir yn y Datganiad o Fwriad drafft.  Yn benodol, y cynigion i archwilio dewisiadau rhanbarthol ar gyfer:

Ø  Gwell llywodraethu

Ø  Strategaethau comisiynu ar y cyd

Ø  Cyllidebau cyfun

Ø  Timau wedi’u cyd-leoli

Ø  System rhannu gwybodaeth

Ø  Gwasanaethau cyfeirio at y dinesydd sy'n canolbwyntio ar ganlyniadau;

Ø  Un Pwynt Mynediad yn y sir.

·         Cydnabu'r Pwyllgor fod nifer o opsiynau yn y broses o gael eu datblygu yn Sir Ddinbych.

·         Teimlai'r Aelodau y gall datblygu gwasanaethau integredig rhwng Iechyd a Gofal Cymdeithasol arwain at gydlynu gofal yn well a gwell dilyniant o ran gofal ar gyfer defnyddwyr gwasanaeth.

·         Byddai system atgyfeirio a chyfathrebu mwy syml a chyson, yn ei dro, yn darparu mynediad gwell a haws i wasanaethau.

·         Er bod y Pwyllgor yn cydnabod bod yr hinsawdd ariannol bresennol y mae Llywodraeth Leol a'r Gwasanaethau Iechyd yn gweithredu ynddi, ynghyd ag ansicrwydd strwythur staffio o fewn y Bwrdd Iechyd a'r ansicrwydd o amgylch strwythurau Llywodraeth Leol yn y dyfodol yng Nghymru, yn peri risg i'r weledigaeth a amlinellir yn y Datganiad o Fwriad, mae'r egwyddorion yn cael eu canmol.  O ganlyniad, dylid gwneud pob ymdrech i sicrhau bod digon o adnoddau dynol ac ariannol ar gael i ddarparu'r gwasanaethau di-dor/integredig a amlinellir yn y Datganiad o Fwriad er budd trigolion lleol.

PENDERFYNWYD bod y Pwyllgor yn argymell i'r Cabinet ei fod yn cefnogi cynnwys y Datganiad o Fwriad ar Ofal Integredig ar gyfer Pobl Hŷn ag Anghenion Cymhleth a luniwyd rhwng Awdurdodau Lleol Gogledd Cymru a BIPBC, i'w cyflwyno i Lywodraeth Cymru.  Dylai'r arferion gwaith integredig a amlinellir yn y Datganiad o Fwriad ynghyd â'r defnydd o sgiliau cyfunol, gwybodaeth, profiad ac adnoddau gyflawni gwell canlyniadau i bobl hŷn a chyfrannu tuag at gyflawni blaenoriaeth gorfforaethol y Cyngor o sicrhau bod pobl ddiamddiffyn yn cael eu hamddiffyn ac yn gallu byw mor annibynnol ag y bo modd.

Ar y pwynt hwn (10.45 a.m.) cafwyd egwyl o chwarter awr.

Ailddechreuodd y cyfarfod am 11:00am.

Ystyried adroddiad gan yr Uwch Swyddog - Strategaeth a Phartneriaethau (copi ynghlwm) sydd yn ceisio sylwadau Craffu ar fanylion y Polisi Dyraniadau Cyffredin cyn iddynt fynd am benderfyniad

9.40 a.m. – 10.10 a.m.

Cyflwynodd y Cynghorydd Hugh Irving, Aelod Arweiniol dros Gwsmeriaid a Chymunedau'r adroddiad (a ddosbarthwyd yn flaenorol) i ddarparu gwybodaeth i'r Aelodau ynghylch manylion y Polisi Dyrannu Cyffredin diwygiedig (CAP) ar ôl ystyried yr adborth o'r ymgynghoriad CAP, ymchwil a barn gyfreithiol.   Cytunwyd ar y CAP gan y Grŵp Llywio ULlMAD (Un Llwybr Mynediad at Dai) a byddai'n cael ei gyflwyno i Bwyllgorau/Byrddau’r sefydliadau partner. 

Hefyd gofynnodd y Cynghorydd Irving am gefnogaeth gan yr Aelodau i barhau â'r prosiect a gweithredu'r CAP yn lleol o ddiwedd 2014.

Yn dilyn trafodaeth ddwys codwyd y materion canlynol:

·         Croesawodd y Pwyllgor y ffaith y byddai'r Polisi’n cael ei adolygu’n flynyddol.

·         Croesawodd yr Aelodau'r eglurder ar y diffiniad o'r cysylltiad lleol.  Fodd bynnag, mynegwyd pryderon mewn perthynas â phwysau posibl yn y dyfodol ar gyllidebau gofal cymdeithasol os yw cyfradd anghymesur o uchel o denantiaid oedrannus/anabl o'r tu allan i'r sir yn cael mynediad i lety pensiynwyr/tai gwarchod yn y sir ar sail cysylltiad teulu/cyswllt cefnogi.  Teimlai'r Pwyllgor fod tueddiadau angen eu monitro’n agos er mwyn nodi pwysau posibl.

·         Cymeradwyodd yr Aelodau'r "Egwyddorion Arweiniol" fel yr amlinellir yn y CAP drafft.  Fodd bynnag, roedd y Pwyllgor yn awyddus i bryderon a godwyd mewn perthynas â diffyg ymrwymiad rhai landlordiaid cymdeithasol cofrestredig (LCC) i gynnal a chadw eiddo, a oedd wedi arwain at rai ardaloedd o'r sir yn dioddef gan dai o ansawdd gwael, gael ei nodi.  Er bod yr Aelodau'n cydnabod y gallai'r rhan fwyaf o bryderon gael sylw drwy ddarpariaethau'r Mesur Tai newydd, gofynnodd y Pwyllgor i bob ymdrech gael ei wneud trwy Grŵp Llywio’r Polisi i sicrhau bod yr holl LCC sy'n gweithredu yn Sir Ddinbych yn mynd ati i gynnal eu heiddo i'r safonau gofynnol ac yn cydymffurfio â Safonau Ansawdd Tai Cymru (SATC) er mwyn diogelu tenantiaid.

·         Gofynnodd y Pwyllgor i fanylion pob ymgynghoriad a oedd wedi digwydd o fewn Sir Ddinbych (yn enwedig yn ystod 2013) gyda'r cyhoedd a budd-ddeiliaid gael eu cynnwys yn yr adroddiad i'r Cabinet.

·         Gofynnodd y Pwyllgor hefyd i’r adroddiad i'r Cabinet gynnwys manylion cyfraniad ariannol pob partner tuag at y prosiect datrysiad TG i gefnogi'r Polisi a bod y prosiect TG yn cael ei deilwra i gadw o fewn y dyraniad cyllideb ac yn cael ei werthuso’n llawn a'i gyflwyno i aelodau cyn ei brynu.

PENDERFYNWYD, yn amodol ar y sylwadau a godwyd, bod y Pwyllgor yn cefnogi egwyddorion y Polisi Dyraniadau Cyffredin drafft.  Argymhellodd y Pwyllgor hefyd bod y Cabinet yn cymeradwyo a mabwysiadu’r Polisi i’w roi ar waith yn Sir Ddinbych.  Dylai’r Polisi sicrhau bod tai cymdeithasol yn cael eu dyrannu trwy ddull teg a chyson i bobl o fewn ein cymunedau yn ôl eu hanghenion tai.

Ystyried adroddiad gan y Cydlynydd Archwilio (copi ynghlwm) yn gofyn am adolygiad o raglen gwaith i’r dyfodol y pwyllgor a diweddaru’r aelodau ynglŷn â materion perthnasol.

11.20 a.m. – 11.50 p.m.

Cyflwynodd y Cydlynydd Archwilio adroddiad (a gafodd ei ddosbarthu’n flaenorol) yn gofyn i’r aelodau adolygu Rhaglen Gwaith i’r Dyfodol y Pwyllgor a darparu diweddariad ar faterion perthnasol.    Roedd fersiwn drafft o’r rhaglen gwaith i’r dyfodol (Atodiad 1); Ffurflen Gynigion ar gyfer Eitemau ar Raglen y Pwyllgorau Archwilio (Atodiad 2); Rhaglen Gwaith i’r Dyfodol y Cabinet (Atodiad 3); Cynnydd ar Benderfyniadau’r Pwyllgor (Atodiad 4) a Rhestr o Gynrychiolwyr y Pwyllgor Archwilio ar Grwpiau Herio’r Gwasanaeth (Atodiad 5) ynghlwm â’r adroddiad hwn.

Dywedodd y Cydlynydd Archwilio am newidiadau i'r rhaglen waith ac amryw o faterion sydd angen sylw -

·         Gofyn am ddiweddariad ar Ddatganiad o Fwriad gan BIPBC a gofyn iddynt fynychu’r Pwyllgor Archwilio yn y dyfodol.

·         Prosiect Trin Gwastraff Gweddilliol Gogledd Cymru i gael ei ychwanegu at Raglen 6 Chwefror 2014

·         Tynnu Partneriaeth Cynllun Datblygu Gwledig oddi ar Raglen 6 Chwefror 2014 a’i ychwanegu at Raglen 13 Mawrth 2014

·         Gwahodd pob Aelod Arweiniol i fynychu'r Pwyllgor Archwilio Partneriaethau ar 6 Chwefror 2014.

·         Gofynnwyd am gynrychiolaeth o’r Pwyllgor Archwilio Partneriaethau ar y Grwpiau Herio Gwasanaeth.  Gwirfoddolodd y Cynghorydd Jeanette Chamberlain Jones ar gyfer Cynllunio Busnes a Pherfformiad a'r Cynghorydd Merfyn Parry ar gyfer Priffyrdd.

·         Roedd y Cynghorydd Dewi Owens wedi cynnig a chafodd ei enwebu i gynrychioli’r Pwyllgor ar y Bwrdd Rhaglen Uchelgais Economaidd a Chymunedol

·         Gwahodd y Cynghorydd Huw Jones i fynychu'r cyfarfod ar 13 Mawrth fel Aelod Arweiniol ar gyfer eitem Ardal o Harddwch Naturiol Eithriadol (AHNE).

·         Gofynnodd y Cadeirydd, y Cynghorydd Jeanette Chamberlain Jones i gyfarfodydd yn y dyfodol gael eu cynnal yn y Rhyl a Dinbych, yn ogystal â Rhuthun.

PENDERFYNWYD

(i)           Yn amodol ar y newidiadau uchod, cymeradwyo’r rhaglen waith fel y manylir yn Atodiad 1 gyda’r adroddiad;  

(ii)          Y Cynghorydd Jeanette Chamberlain-Jones i gael ei phenodi fel cynrychiolydd y Pwyllgor ar y Grŵp Herio Gwasanaeth ar gyfer y Gwasanaeth Cynllunio Busnes a Pherfformiad, a’r Cynghorydd Merfyn Parry i wasanaethu fel cynrychiolydd y Pwyllgor ar y Grŵp Herio Gwasanaeth ar gyfer y Gwasanaeth Priffyrdd ac Isadeiledd, a’r

(iii)         Cynghorydd Dewi Owens i gael ei benodi fel cynrychiolydd y Pwyllgor ar y Bwrdd Rhaglen Uchelgais Economaidd a Chymunedol

Derbyn y wybodaeth ddiweddaraf gan gynrychiolwyr Pwyllgor sy’n aelodau o Fyrddau a Grwpiau’r Cyngor.

11.50 a.m. – 12.00 p.m.

Rhoddodd y Cynghorydd Ann Davies ddiweddariad byr i’r Pwyllgor yn dilyn cyfarfod diweddar y Grŵp Llywio Gofalwyr a fynychodd.

Daeth y cyfarfod i ben am 12.40p.m.