Eitem ar yr agenda
ABSENOLIAETH YSGOLION CYNRADD AC UWCHRADD
- Meeting of Pwyllgor Craffu Cymunedau, Dydd Iau, 8 Medi 2016 9.30 am (Item 7.)
- View the declarations of interest for item 7.
Manylu ar weithredu polisi’r sir mewn perthynas â phresenoldeb ysgolion
Cofnodion:
Cyflwynodd Arweinydd Tîm Gwaith Cymdeithasol Addysg yr adroddiad a'r atodiadau
(a ddosbarthwyd yn flaenorol) yn manylu ar eu cynnwys. Eglurodd y gwahaniaeth
rhwng absenoldebau awdurdodedig ac anawdurdodedig a'r broses a ddilynwyd cyn
cyflwyno Rhybuddion Cosb Benodedig. Cafodd yr holl brosesau yn ymwneud ag absenoldebau ysgol
eu hamlygu mewn cyhoeddiadau ysgol i sicrhau bod pob rhiant yn ymwybodol o'u
cyfrifoldebau ac o ganlyniadau peidio anfon eu plentyn i'r ysgol.
Cafodd system rheoli absenoldebau ysgol ei ddatganoli i bob ysgol unigol. Fodd bynnag, bu'r
Cyngor yn monitro absenoldebau yn rheolaidd ac, fel rhan o broses Grŵp
Monitro Safon Ysgolion, cafodd penaethiaid a chadeiryddion llywodraethwyr eu
dal yn atebol am berfformiad eu hysgolion mewn perthynas â rheoli absenoldebau
a chyrhaeddiad academaidd.
Bu’r
Tîm Gwaith Cymdeithasol Addysg hefyd yn monitro cyfraddau absenoldeb ysgol yn
fisol, gan ystyried ffactor Prydau Ysgol am Ddim a Phlant sy’n Derbyn Gofal.
Dywedodd yr Aelodau eu bod wedi gofyn am adroddiad
ar sail y wybodaeth ystadegol a datganiad i'r wasg y gwelsant beth amser yn ôl,
gan eu bod yn pryderu na fyddai lefelau tlodi yn y sir yn gwella os yw
disgyblion yn absennol o'r ysgol am gyfnodau hir ar y tro. Mewn ymateb i
gwestiynau gan yr Aelodau, dywedodd y swyddogion:
·
Ni chafodd cofnodion eu cadw ar lefel sirol o ran
'absenoldebau awdurdodedig', gan fod absenoldebau o'r fath wedi eu caniatáu gan
benaethiaid;
·
roedd penaethiaid wedi bod yn awyddus i'r Cyngor gymhwyso
Hysbysiadau Cosb Benodedig yn gyson ar draws y sir. Ers y dyddiad y cafodd
hyn ei roi ar waith yn llym, bu cynnydd sylweddol yn y nifer o lythyrau
rhybudd/Hysbysiadau Cosb Benodedig a gyhoeddwyd. Fodd bynnag, roedd disgwyl i hyn ddisgyn ar ôl i rieni
sylweddoli na fyddai'r Cyngor yn oedi wrth orfodi'r polisi;
·
bu’r Sir yn monitro ac yn gwirio’n rheolaidd p’un a oedd
ysgolion yn cymhwyso’r holl bolisïau a gweithdrefnau. Roedd presenoldeb yn yr
ysgol yn allweddol gan ei fod yn effeithio ar ganlyniadau bywyd ar gyfer y
disgyblion;
·
cafodd diffyg presenoldeb rheolaidd heb awdurdod yn yr
ysgol ei archwilio'n fanwl i sefydlu'r rhesymau sylfaenol dros absenoldeb
plentyn. Mewn achosion
o'r fath, byddai'r Cyngor wedyn yn cynnig cymorth priodol a pherthnasol i'r
plentyn a'r teulu i helpu i oresgyn unrhyw rwystrau, a’u hymgysylltu gyda'r
system addysg;
·
ar gyfer y disgyblion mwyaf heriol, roedd cyfleoedd ar
gael drwy Brosiect TRAC. Bu hwn yn
Brosiect llwyddiannus iawn yn Sir Ddinbych ac wedi helpu'r sir i symud o safle
19 i safle 16 yng Nghymru.
Ymgysylltu
disgyblion â'r Prosiect oedd prif gyfrifoldeb yr ysgol, a chawsant eu cefnogi
gan y Tîm GCA Corfforaethol;
·
mae nifer o ysgolion bellach yn cyflogi eu Swyddogion
Presenoldeb eu hunain;
·
o dan Fframwaith Presenoldeb Cymru Gyfan Llywodraeth
Cymru, roedd gan benaethiaid ddisgresiwn i ganiatáu hyd at 10 diwrnod o absenoldeb
awdurdodedig. Bu apêl yn yr
Uchel Lys yn erbyn Cyngor Ynys Wyth yn ddiweddar, a oedd wedi rhoi Hysbysiad
Cosb Benodedig i Riant am gymryd ei ferch allan o'r ysgol ar wyliau er gwaethaf
cais am 'absenoldeb awdurdodedig' yn cael ei wrthod. Cafodd yr apêl ei
chadarnhau ac ers hynny, mae timau cyfreithiol ar draws y DU wedi bod yn edrych
ar y dyfarniad i benderfynu a ddylid tynhau polisïau a gweithdrefnau;
·
er gwaethaf y ffaith bod nifer o rieni wedi bod yn
amharod ar y dechrau i swyddogion eu ffonio am bresenoldeb eu plentyn yn yr
ysgol, yn y mwyafrif o achosion yn ôl casgliad y sgwrs, roeddent yn deall
rhesymau a phryderon y Cyngor;
·
roedd perfformiad yn gwella yn yr ardal hon, a byddai'n
parhau i gael ei fonitro gyda’r nod o wella perfformiad hyd yn oed ymhellach er
lles yr holl ddisgyblion; a
·
tra bod y Fframwaith Presenoldeb ar gyfer Cymru Gyfan yn
berthnasol i bob awdurdod addysg yng Nghymru, ni chafodd y polisïau a'r
gweithdrefnau yn y maes hwn eu cymhwyso'n gyson ar draws y wlad.
Cyn dod i gasgliad am y drafodaeth, cytunodd y swyddogion i ddosbarthu
gwybodaeth i aelodau am absenoldebau anawdurdodedig a data prydau ysgol am ddim
ym mhob un o ysgolion y Sir. Cododd yr Aelodau bryderon mewn perthynas â'r
pwynt olaf uchod a gofynnwyd am gael nodi eu pryderon mewn perthynas â hyn, gan
eu bod yn teimlo y gallai effeithio ar safle Sir Ddinbych yn y tabl
perfformiad. Ar ôl
adolygu'r wybodaeth a ddarparwyd i'r Pwyllgor:
PENDERFYNWYD: yn amodol ar y sylwadau uchod -
(i)
cadarnhau'r polisïau a’r
strategaethau a ddefnyddir i wella presenoldeb disgyblion yn ysgolion Sir
Ddinbych;
(ii)
nodi’r perfformiad gwell
sydd wedi’i gyrraedd hyd yn hyn; a
(iii)
chofrestru eu pryderon
nad yw pob awdurdod ar draws Cymru yn cymhwyso'r polisïau a’r gweithdrefnau
mewn perthynas ag absenoldebau anawdurdodedig mor llym â Sir Ddinbych.
Dogfennau ategol:
- School Absenteeism Report 080916, Eitem 7. PDF 90 KB
- School Absenteeism Report - App 080916.docx, Eitem 7. PDF 13 KB