Eitem ar yr agenda

Ystyried adroddiad gan Fwrdd Iechyd Prifysgol Betsi Cadwaladr ar y cynnydd gyda’r Prosiect Gofal Iechyd Sylfaenol Prestatyn a Rhuddlan Iach.

                                                                                     10.10 a.m. – 10.45 a.m.

Cyflwynodd Dr. Chris Stockport yr eitem a thrwy gyflwyniad PowerPoint rhoddodd ddarlun o’r ardal ddaearyddol a gwmpesir gan y gwasanaeth newydd. 

Eglurodd fod y gwasanaeth yn darparu ystod o wasanaethau gofal iechyd i gleifion sydd wedi cofrestru mewn 5 meddygfa yn ardal Rhuddlan a Phrestatyn, ac yn darparu gwasanaethau i'w cleifion, yr oedd rhai ohonynt yn byw yn Sir Ddinbych ac eraill yn Sir y Fflint.  Roedd BIPBC wedi bod yn cynllunio ar gyfer cyflwyno'r math hwn o gyfleuster gofal iechyd cyfannol yng Ngogledd Cymru ers peth amser.  Serch hynny, roedd yn rhaid brysio i’w gyflwyno yn dilyn tri ymddiswyddiad contract meddygon teulu yn ardaloedd Prestatyn a Rhuddlan yn hwyr yn 2015, ddechrau 2016. 

O ganlyniad i'r ymddiswyddiadau hyn, sefydlodd y Bwrdd Iechyd y prosiect Prestatyn a Rhuddlan Iach.  Oherwydd cyfyngiadau amser a chyfyngiadau ymarferol, nid oedd pob agwedd ar y prosiect yn gwbl weithredol eto, ond o 1 Ebrill 2016 roedd gwasanaethau craidd wedi bod ar gael.  Dywedodd Dr Stockport fod:

·                     5 o'r partneriaid meddyg teulu blaenorol wedi cofrestru ar gyfer y prosiect ar sail barhaol a 5 o feddygon teulu eraill wedi ymuno â'r fenter.  Roedd bob meddyg teulu bellach yn gyflogedig gan y Bwrdd Iechyd yn hytrach na phartneriaid yn y feddygfa;

·                     Yn ogystal, roedd aelodau eraill o staff naill ai wedi cael eu trosglwyddo i'r Prosiect neu wedi ymuno ag ef o rywle arall, roedd y rhain yn cynnwys Cydlynwyr Tîm (a wnaeth y gwaith gweinyddol a sicrhau bod y gweithwyr proffesiynol yn y lle cywir ar yr adeg gywir), ymarferwyr nyrsio, therapyddion galwedigaethol, fferyllwyr clinigol, ffisiotherapyddion ac awdiolegydd.  Roedd cael ystod o sgiliau ar gael yn y prosiect wedi hwyluso’r gwaith o adlinio sgiliau a lleddfu pwysau ar feddygon teulu, fel y gallent nawr atgyfeirio cleifion at weithwyr gofal iechyd proffesiynol eraill â chymwysterau priodol yn ôl yr angen;

·                     Pwysleisiodd nad oedd yr holl atebion i ofal iechyd sylfaenol llwyddiannus yn gorwedd o fewn y GIG, roedd y Prosiect hwn wedi profi hyn ac roedd ei lwyddiant hyd yma o ganlyniad i'r dull partneriaeth effeithiol a fabwysiadwyd gan yr holl sefydliadau sector cyhoeddus a gwirfoddol a oedd yn ymwneud ag ef;

·                     Nid yw'r model sydd bellach yn gweithredu yn ardal Prestatyn a Rhuddlan yn fodel meddygol o ofal sylfaenol, ond yn hytrach yn fodel seicogymdeithasol lle’r oedd cleifion yn cael sicrhau apwyntiad ar y diwrnod y maent yn gwneud cyswllt cychwynnol â'r gwasanaeth, cyn belled â bod y cyswllt wedi'i wneud cyn 4pm.  Roedd ffocws y gwasanaeth ar yr unigolyn ac unwaith yn y gwasanaeth, byddai cleifion yn cael eu dyrannu i dimau a allai reoli a chefnogi eu hanghenion;

·                     Roedd gwaith ar y gweill ar hyn o bryd i sefydlu Academi gyda’r bwriad o ddatblygu sgiliau proffesiynol y staff yn lleol.  Rhagwelwyd y byddai cangen lles yr Academi yn cael ei lansio yn y dyfodol agos ac roedd y posibilrwydd o sefydlu Campws Lles yn cael ei archwilio, o bosibl ar safle'r hen lyfrgell ym Mhrestatyn;

·                     Yn ystod Gorffennaf 2016 byddai rhywfaint o darfu  ar wasanaethau arferol, gan fod y system TG ar gyfer pob safle yn cael eu mudo.  Roedd cleifion wedi cael gwybod am hyn ac roedd trefniadau eraill wedi eu gwneud i ddelio ag ymholiadau ac ati yn ystod y cyfnod hwn; ac

·                     Roedd hen adeilad yr awdurdod lleol a chyfleusterau maes parcio cysylltiedig yn Nhŷ Nant wedi eu sicrhau fel cyfleuster ar gyfer y Gwasanaeth. 

Roedd gwaith yn mynd rhagddo ar hyn o bryd i addasu'r adeilad ar gyfer gofynion y Gwasanaeth, er y bu rhywfaint o lithriant gyda'r gwaith hwn, roedd disgwyl i’r cyfleuster fod yn barod yn gynnar yn 2017

Mewn ymateb i gwestiynau gan yr Aelodau, cadarnhaodd swyddogion y Bwrdd Iechyd:

·                     Ar hyn o bryd, roedd safle’r Feddygfa Ganolog ym Mhrestatyn yn gweithredu fel 'canolbwynt' y Gwasanaeth, ond roedd pob un o’r pum meddygfa’n dal i ddarparu gwasanaethau;

·                     Bod y dull partneriaeth a gymerwyd gyda'r prosiect hwn wedi gweithio'n dda ar lawr gwlad ac wedi bod yn allweddol i lwyddiant y prosiect gan ei fod wedi helpu i leddfu ofnau cychwynnol yn yr ardal, yn dilyn cyhoeddi ymddiswyddiadau contract meddygfeydd meddygon teulu;

·                     Bod nifer o ymarferwyr nyrsio a gafodd eu recriwtio’n meddu ar y cymwysterau angenrheidiol a oedd yn caniatáu iddynt ragnodi cyffuriau / triniaethau yn barod. 

Roedd y rhai nad oedd yn meddu ar y cymwysterau hyn ar hyn o bryd yn y broses o weithio tuag atynt;

·                     Oherwydd bod y sylfaen sgiliau bellach ar gael o fewn y Gwasanaeth, roedd y gymhareb Meddyg Teulu i gleifion ar gyfer y gwasanaeth wedi newid;

·                     Bod Fflebotomi’n un o'r gwasanaethau y gellid cael mynediad ato fel rhan o'r prosiect;

·                     Mai un o amcanion y model newydd o ddarparu gwasanaethau oedd gwrando a deall achosion o afiechydon a phryderon cleifion, a’u cefnogi i gael mynediad i wasanaethau a fyddai'n gwella eu lles, a maes o law yn lleihau dibyniaeth ar feddyginiaeth ac ati

Diolchodd y Pwyllgor i'r Bwrdd Iechyd am ymgysylltu’n dda â phreswylwyr a'r awdurdod lleol mewn perthynas â’r Prosiect hwn, ac am friffio Cyngor Tref Prestatyn a Grŵp Ardal yr Aelodau’n rheolaidd ar ddatblygiad y prosiect.  Felly:

            PENDERFYNWYD -

(i) llongyfarch Bwrdd Iechyd Prifysgol Betsi Cadwaladr ar lwyddiant prosiect Prestatyn a Rhuddlan Iach, ac

(ii) argymell bod modelau tebyg o ofal iechyd sylfaenol yn cael eu cyflwyno i ardaloedd eraill o Ogledd Cymru maes o law.