Eitem ar yr agenda

Ystyried cais i ddymchwel strwythurau presennol a chodi tai byw ymddeol, cyfleusterau cymunedol, tirlunio a man parcio ceir ar Safle yn Sandy Lane, Prestatyn (copi ynghlwm).

Cyflwynwyd cais i ddymchwel strwythurau presennol a chodi tai i bobl wedi ymddeol, cyfleusterau cymunedol, tirlunio a lleoedd parcio ceir ar safle yn Sandy Lane, Prestatyn.

Siaradwr Cyhoeddus -

Manylodd Mr. C. Butt (McCarthy & Stone Ltd) (O blaid) ar rinweddau'r cais o ran darparu llety ymddeol arbenigol sydd ei ddirfawr angen yn yr ardal.  Roedd pob maen prawf wedi'u bodloni ac eithrio mynediad a gwagio yn ystod digwyddiadau perygl llifogydd eithafol fel y nodir yn Nodyn Cyngor Technegol (TAN) 15 a oedd wedi'i seilio ar ragdybiaethau penodol.  Byddai mesurau lliniaru yn cael eu cyflwyno gan gynnwys cynllun llifogydd a rheoli safle priodol yn ystod rhybuddion llifogydd.

Trafodaeth Gyffredinol – Cyflwynodd y Swyddog Cynllunio (IW) y cais gan gadarnhau cefnogaeth gyffredinol i'r ffactorau cadarnhaol sy'n deillio o'r cynnig.  Fodd bynnag, roedd y perygl o lifogydd yn fater o bwys ac ymhelaethodd ar y rhesymau y tu ôl i argymhelliad y swyddogion i wrthod y cais o ystyried: ‘Na ellid cyflawni’r meini prawf Derbynioldeb ar gyfer goblygiadau llifogydd’ yn TAN 15 gan na fyddai llwybrau dianc / gwagio yn weithredol yn unrhyw amodau.

Cyfeiriodd y Cynghorydd Jason McLellan (Aelod Lleol) at y gefnogaeth leol ar gyfer y datblygiad a siaradodd o blaid y cais gan ailadrodd y manteision cadarnhaol o ran yr economi, datblygu safle segur a derbyn taliad swm gohiriedig.  Dadleuodd fod y meini prawf nad oedd wedi eu cyflawni yn TAN 15 yn seiliedig ar siawns o 1:1000 o lifogydd a oedd yn ddehongliad cul nad oedd wedi ei weithredu gyda datblygiadau eraill mwy diweddar.  Cydnabu’r Cynghorydd Julian Thompson-Hill hefyd fanteision y cynllun.  Er yn cydnabod pryderon y swyddogion, amlygodd yr angen i fod yn realistig o ystyried pa mor annhebygol y byddai digwyddiad mor eithafol yn digwydd o gwbl.

Yn ystod y drafodaeth fanwl a ddilynodd, nododd aelodau rinweddau'r cais a chanlyniadau cadarnhaol ac ystyriwyd a oedd y bendithion hynny’n gorbwyso'r pryderon am berygl llifogydd sy'n deillio o'r methiant i gyrraedd y meini prawf derbynioldeb yn TAN 15 o safbwynt goblygiadau llifogydd mewn digwyddiad llifogydd eithafol ac a ellid lliniaru'r perygl ymhellach drwy osod amodau ychwanegol.  Credai sawl aelod bod digwyddiad llifogydd eithafol o'r fath yn annhebygol iawn gan y byddai’r realiti’n gadael llawer o’r Rhyl a Phrestatyn o dan ddŵr.  O ystyried y diffyg hanes o lifogydd ar safle'r cais, ei bellter oddi wrth y môr a mesurau gwagio yn sgil llifogydd ychwanegol roedd llawer o gefnogaeth i ganiatáu'r cais.  Awgrymwyd hefyd y byddai'r datblygiad arfaethedig yn caniatáu mwy o ddraenio ar y safle ac yn lleihau’r perygl o lifogydd yn yr ardal.  Nododd yr Aelodau bod datblygiadau eraill ger safle'r cais ac mewn ardaloedd perygl llifogydd yn y Rhyl a Phrestatyn wedi cael eu cymeradwyo o'r blaen.  Canmolodd y Cynghorydd Stuart Davies y datblygiad a’r rheolaeth o gynllun ymddeol tebyg gan yr Ymgeisydd yn Llangollen gan nodi fod hynny’n rhoi sicrwydd pellach.  Anogodd y Cynghorydd Huw Hilditch-Roberts y dylid bod yn ofalus wrth benderfynu ar y cais a chyfeiriodd at y llifogydd yn Ystâd Glasdir ym mis Tachwedd 2012, a gafodd ganiatâd cynllunio yn dilyn cyfrifiadau perygl llifogydd.  Gofynnodd am ragor o wybodaeth a sicrwydd ynghylch y modelau llifogydd a'r broses asesu yn yr achos hwn.  Gofynnodd Aelodau hefyd a ellid gosod amodau ychwanegol er mwyn bodloni'r meini prawf derbynioldeb a oedd heb eu cyflawni dan TAN 15 ac a roddwyd ystyriaeth i astudiaethau eraill o’r llanw yn ystod y broses asesu ynghyd ag unrhyw bosibilrwydd o gryfhau amddiffynfeydd rhag llifogydd.

Dyma oedd ymatebion y Swyddogion i gwestiynau a sylwadau’r Aelodau -

·         roedd perygl llifogydd datblygiadau eraill fel Ysgol Bodnant, Parc Siopa Prestatyn, Nova a Glannau’r Rhyl wedi eu hasesu o dan wahanol gategorïau datblygu – roedd y datblygiad hwn wedi ei gategoreiddio fel un diamddiffyn iawn

·         derbyniwyd bod datblygiadau preswyl eraill wedi cael eu cymeradwyo yn y gorffennol ac roedd Tai Gofal Ychwanegol Nant y Môr, Prestatyn yn ddatblygiad tebyg.  Roedd cyngor gan Gyfoeth Naturiol Cymru (CNC) yn newid dros amser ac roedd yn bwysig ystyried y data technegol diweddaraf wrth benderfynu ar y cais

·         ymhelaethwyd ar y canllawiau technegol a ddarperir yn TAN 15 o safbwynt ardaloedd parth llifogydd ac a oedd gan yr ardaloedd hynny amddiffynfeydd perygl llifogydd ac esboniodd swyddogaeth a safbwynt CNC a’r Uned Gynllunio Brys (EPU) mewn perthynas â cheisiadau cynllunio

·         amlygwyd yr anawsterau wrth gymharu'r cais presennol â'r llifogydd yn Glasdir o ystyried y gwahanol rannau o'r sir a’r perygl lifogydd o'r afon yn hytrach na'r môr ond rhoddwyd sicrwydd bod CNC yn gweithio'n barhaus ar eu modelau llifogydd ac roedd swyddogion wedi ystyried y wybodaeth dechnegol ddiweddaraf sydd ar gael wrth bennu’r argymhelliad

·         rhoddwyd sicrwydd bod yr holl astudiaethau a dogfennau perthnasol yn ymwneud â llifogydd wedi eu hystyried ac roedd cyfarfod wedi'i gynnal gyda CNC a'r EPU i drafod y perygl o lifogydd ymhellach

·         cadarnhawyd bod tybiaethau wedi eu gwneud wrth fodelu llifogydd na fyddai unrhyw welliant i amddiffynfeydd rhag llifogydd dros y 100 mlynedd nesaf

·         pe bai’r cais yn cael ei ganiatáu byddai angen i swyddogion adrodd yn ôl i'r pwyllgor ar unrhyw reolaethau ychwanegol o ran yr amodau i’w cyflwyno a fyddai'n golygu ystyried y cynllun gwagio a materion rheoli llifogydd eraill ymhellach.

Rhoddodd y Pennaeth Cynllunio a Gwarchod y Cyhoedd grynodeb o’r ddadl a'r materion cynllunio perthnasol i'w hystyried yn yr achos hwn.  Amlygodd yr angen i aelodau gydbwyso'r ffactorau cadarnhaol sy’n deillio o'r datblygiad yn erbyn y mater perygl llifogydd.  Cydnabu Swyddogion y penderfyniad anodd oedd angen ei wneud ond tynnwyd sylw'r aelodau at y rhesymau y tu ôl i'r argymhelliad i wrthod o ystyried bod yr wybodaeth dechnegol a ddarparwyd ar ddyfnder mwyaf posibl y llifogydd a chyflymder y dŵr llif mewn digwyddiad llifogydd eithafol yn arwain at berygl annerbyniol ac nid oedd yn bodloni’r safonau gofynnol yn TAN 15.

Cynnig - Teimlai'r Cynghorydd Butterfield, gan fod y risg o ddigwyddiad llifogydd eithafol yn fach iawn a bod mesurau lliniaru derbyniol mewn perthynas â gwagio'r adeilad wedi'u cynnwys ac y gellid eu hymgorffori yn y Cynllun Rheoli Perygl Llifogydd terfynol, nad oedd cyfiawnhad i wrthod caniatâd mewn perthynas â phryderon ynghylch diogelwch llwybrau mynediad a gadael; ac roedd bendithion adfywio clir a bendithion eraill i'r datblygiad sy'n cyfiawnhau cefnogi’r cais.  Cynigiodd hi, ac eiliodd y Cynghorydd Anton Sampson y dylid caniatáu’r cais, yn groes i argymhelliad y swyddogion.

PLEIDLAIS:

CANIATÁU - 16

GWRTHOD - 2

YMATAL - 1

PENDERFYNWYD y dylid CANIATÁU’R cais yn groes i argymhelliad y swyddogion, am y rheswm fod y risg o ddigwyddiad llifogydd eithafol yn fach iawn a bod mesurau lliniaru derbyniol mewn perthynas â gwagio'r adeilad wedi'u cynnwys ac y gellid eu hymgorffori yn y Cynllun Rheoli Perygl Llifogydd terfynol, nad oedd cyfiawnhad i wrthod caniatâd mewn perthynas â phryderon ynghylch diogelwch llwybrau mynediad a gadael; ac roedd bendithion adfywio clir a bendithion eraill i'r datblygiad sy'n cyfiawnhau cefnogi’r cais.