Eitem ar yr agenda
ADOLYGIAD O DRWYDDED I YRRU CERBYDAU HACNI A CHERBYDAU HURIO PREIFAT - GYRRWR RHIF 15/0427/TXJDR
- Meeting of Pwyllgor Trwyddedu, Dydd Iau, 24 Mawrth 2016 2.00 pm (Item 4.)
- Gweld y cefndir i eitem 4.
Ystyried
adroddiad cyfrinachol gan Bennaeth Cynllunio a Gwarchod y Cyhoedd (copi’n
amgaeedig) yn gofyn i aelodau adolygu trwydded i yrru cerbydau hacni a
cherbydau hurio preifat o ran Gyrrwr Rhif 15/0427/TXJDR.
Penderfyniad:
PENDERFYNWYD diddymu trwydded yrru cerbyd hacni a cherbydau hurio
preifat gyrrwr rhif 15/0427/TXJDR
ar sail diogelwch y cyhoedd ar unwaith.
Cofnodion:
Cyflwynwyd adroddiad cyfrinachol gan y Pennaeth
Cynllunio a Gwarchod y Cyhoedd (a ddosbarthwyd yn flaenorol) ynglŷn â –
(i)
addasrwydd
Gyrrwr Rhif 15/0427/TXJDR i ddal trwydded i yrru cerbydau hacni a cherbydau
hurio preifat yn dilyn honiadau o ymddygiad amhriodol wrth ymgymryd â chontract
cludiant ysgol;
(ii)
manylion
ac amgylchiadau yn gysylltiedig â'r drosedd wedi’u rhoi (roedd crynodeb o
ffeithiau ynghyd â datganiadau tyst cysylltiedig a dogfennaeth ynghlwm wrth yr
adroddiad);
(iii)
y
Gyrrwr wedi cyflwyno tystiolaeth ddogfennol i gefnogi'r adolygiad o'i drwydded
a oedd wedi'i gynnwys fel atodiad i'r adroddiad, a
(iv)
bod y
Gyrrwr wedi cael ei wahodd i fod yn bresennol yn y cyfarfod tra adolygir ei
drwydded er mwyn gallu ateb cwestiynau’r aelodau ynglŷn â hynny.
Roedd y Gyrrwr yn
bresennol yn y cyfarfod yng nghwmni ei Gynrychiolydd Undeb a chyd-dyst.
Cadarnhaodd y Cynrychiolydd Undeb dderbyn yr adroddiad a'r gweithdrefnau
pwyllgor.
Amlinellodd y Swyddog
Gorfodi Trwyddedu yr achos fel y manylwyd arnynt yn yr adroddiad.
Cyflwynodd y
Cynrychiolydd Undeb achos y Gyrrwr. Dywedodd nad oedd y
datganiadau tystion wedi’u teipio a gyflwynwyd gan y Swyddog Ymchwilio wedi
cael eu llofnodi a gofynnodd am iddynt gael eu diystyru.
Cyflwynodd hefyd nad oedd yr ymchwiliad wedi cael ei gynnal mewn modd teg
ac agored gan amlygu lle roedd yn ystyried bod yna feysydd o ragfarn o fewn yr
achos. Dadleuwyd nad oedd llwybrau ymholiadau penodol a
allai fod wedi bod o blaid y Gyrrwr wedi cael eu dilyn a chwestiynwyd hefyd
hygrededd tystiolaeth benodol. Cyflwynwyd hefyd
sylwadau ynglŷn â safon y dystiolaeth sy'n ofynnol mewn achosion o'r fath
o ystyried bod yr hawl i apelio trwy’r Llys Ynadon. O ran yr
honiadau a nodwyd yn yr adroddiad, eglurodd y Cynrychiolydd Undeb yr honiadau
hynny a gyfaddefwyd gan y Gyrwyr a'u rhoi mewn cyd-destun, gan roi fersiwn y
Gyrrwr o’r digwyddiadau. Cafodd y pwyllgor hefyd wybod am yr honiadau a
wadwyd gan y Gyrwyr. Amlygwyd nad oedd unrhyw gwynion wedi’u gwneud yn
erbyn y Gyrrwr gan ddefnyddwyr gwasanaeth eraill neu'r cyhoedd.
O ystyried y dystiolaeth wrthgyferbyniol a gyflwynwyd a’r gefnogaeth a fynegwyd yn y geirdaon (a
ddosbarthwyd yn flaenorol) gofynnodd y Cynrychiolydd Undeb i’r Gyrrwr gael cadw
ei drwydded a pharhau fel gyrrwr trwyddedig.
Ar y pwynt hwn trafodwyd
y mater o ddatganiadau tystion heb eu harwyddo, a dosbarthwyd copïau o'r
datganiadau tyst gwreiddiol wedi’u llofnodi. Dadleuodd y Cynrychiolydd Undeb
nad oedd wedi cael y cyfle i edrych ar y dogfennau a gofynnodd am iddynt gael
eu diystyru er budd gwrandawiad teg. Rhoddodd y Pennaeth
Gwasanaethau Cyfreithiol, Adnoddau Dynol a Democrataidd safbwynt cyfreithiol ar
y sefyllfa a thegwch y trafodion. Cadarnhaodd y Swyddog
Gorfodi Trwyddedu bod y datganiadau wedi cael eu teipio i sicrhau eu bod yn
ddarllenadwy a’u bod wedi cael ei gwirio am gywirdeb. Torrodd y
pwyllgor i ystyried y dadleuon cyfreithiol. Ar ôl
ailddechrau'r trafodion dywedwyd wrth bawb am benderfyniad y pwyllgor i dderbyn
y datganiadau fel tystiolaeth a pharhau â’r achos. Nid oedd y
pwyllgor yn ystyried bod annhegwch sylweddol ar y sail y rhoddwyd sicrwydd gan
y Swyddog Gorfodi Trwyddedu, a oedd â dyletswydd o onestrwydd i'r pwyllgor, bod
y fersiynau a deipiwyd wedi'u trawsgrifio’n gywir a bod yr wybodaeth a
gynhwyswyd yn y datganiadau wedi bod ar gael ymlaen llaw a gallent fod wedi eu
hegluro yn gynharach yn y broses. Wrth wneud eu
penderfyniad roedd y pwyllgor hefyd wedi ystyried cyngor gan y Pennaeth
Gwasanaethau Cyfreithiol, Adnoddau Dynol a Democrataidd ynglŷn â safon y dystiolaeth ofynnol.
Eglurwyd bod penderfyniad y pwyllgor ynghylch a oedd y Gyrrwr yn berson
addas a phriodol i ddal trwydded yn seiliedig ar yr hyn sy'n debygol.
Nid oedd y pwynt bod y llwybr apêl i’r Llys Ynadon yn newid y ffaith honno
o ystyried nad oeddent yn eistedd ar sail droseddol wrth ystyried apeliadau o'r
fath ac felly nid oedd baich y dystiolaeth tu hwnt i bob amheuaeth resymol.
Gallai cyfweliadau a gynhaliwyd o dan Ddeddf yr Heddlu a Thystiolaeth
Droseddol eu defnyddio mewn achosion sy'n cynnwys tebygolrwydd a safonau
tystiolaeth troseddol.
Cymerodd yr Aelodau’r
cyfle i holi'r Gyrrwr a'i dystion ynglŷn â ffeithiau'r achos er mwyn
canfod a oeddent yn ystyried y Gyrrwr yn berson addas a phriodol i ddal
trwydded. Eglurodd y tyst ei berthynas â'r Gyrwyr a maint ei
ran yn yr achos a’r dystiolaeth y gallai ategu. Ymatebodd y
Gyrrwr i gwestiynau ynghylch yr honiadau a wnaed ac ymhelaethodd ar
amgylchiadau'r digwyddiadau ac anghysondebau penodol rhwng ei fersiwn o
ddigwyddiadau a datganiadau tystion.
Cymerodd y Cynrychiolydd
Undeb y cyfle i wneud datganiad terfynol. Cyfeiriodd at y
modd yr oedd y Gyrrwr wedi ymateb i sefyllfaoedd arbennig heb y fantais o
hyfforddiant ffurfiol priodol fel y gofynnwyd yn flaenorol gan y pwyllgor.
Nid oedd unrhyw wadu bod camgymeriadau wedi eu gwneud neu na ellid dysgu
gwersi o'r broses. Fodd bynnag, gan gymryd i ystyriaeth yr esboniad
o'r digwyddiadau a gwadu honiadau penodol, ac o ystyried y pryderon a godwyd
ynghylch y broses ymchwilio, gofynnodd i’r Gyrrwr gael cadw ei drwydded a chael
cymorth priodol er mwyn sicrhau'r canlyniad gorau yn yr achos hwn.
Ar y pwynt hwn torrodd y
pwyllgor i ystyried yr achos a -
PENDERFYNWYD diddymu trwydded yrru cerbyd hacni a cherbydau hurio preifat gyrrwr rhif
15/0427/TXJDR.
Dyma oedd y rhesymau am
benderfyniad y Pwyllgor Trwyddedu –
Roedd yr Aelodau wedi
ystyried yn ofalus cynnwys yr adroddiad a’r sylwadau a gyflwynwyd gan y Gyrrwr
yn yr achos hwn a’i ymateb i gwestiynau. Canfu'r
pwyllgor, yn ôl yr hyn sy'n debygol, fod y Gyrrwr wedi ymddwyn mewn ffordd
amhriodol gan resymau ei weithredoedd, y rhai yr oedd wedi eu cyfaddef a’r rhai
yr oedd y pwyllgor wedi dod o hyd iddynt. Roedd y camau
gweithredu hynny wedi achosi i'r pwyllgor ystyried nad oedd y gyrrwr yn berson
addas a phriodol i ddal trwydded yrru cerbydau hacni a cherbydau hurio preifat.
Roedd y pwyllgor yn arbennig o bryderus am ymddygiad amhriodol a sylwadau
tuag merch 16 mlwydd oed. O gofio mai eu
hystyriaeth bwysicaf oedd gwarchod y cyhoedd, roedd yr aelodau o blaid
diddymu'r drwydded ar unwaith am resymau diogelwch y cyhoedd.
Cafodd penderfyniad y
pwyllgor a'r rhesymau felly eu cyfleu i'r Gyrrwr a’i Gynrychiolydd Undeb.
Gan nad oeddent wedi cael cyfle blaenorol i
ymateb i'r sail am ddiddymu am resymau diogelwch y cyhoedd, gwahoddwyd y Gyrrwr
a'i Gynrychiolydd Undeb i roi sylwadau yn hynny o beth.
Dadleuodd y
Cynrychiolydd Undeb nad oedd y dystiolaeth wedi cael ei phrofi’n briodol yn yr
achos hwn ac ailadroddodd bryderon ynghylch y broses ymchwilio.
Tynnodd sylw'r aelodau at y geirdaon
ysgrifenedig yn ardystio cymeriad da'r Gyrrwr a dywedodd nad oedd cyfiawnhad am
ddiddymu’r drwydded ar unwaith yn yr achos hwn.
Torrodd y pwyllgor i
ystyried sail y diddymiad a -
PENDERFYNWYD diddymu trwydded yrru cerbyd hacni a cherbydau hurio
preifat gyrrwr rhif 15/0427/TXJDR
ar sail diogelwch y cyhoedd ar unwaith.
Ar ôl ystyried y
sylwadau a gyflwynwyd ar ran y Gyrrwr o ran y sail ar gyfer diddymu, roedd yr
aelodau’n parhau i fod o'r farn, o ystyried eu pryderon ynghylch ei ymddygiad,
y dylid diddymu’r drwydded ar unwaith ar sail diogelwch y cyhoedd.
Mynegodd y Pennaeth Gwasanaethau Cyfreithiol, Adnoddau Dynol a Democrataidd
benderfyniad y pwyllgor i'r Gyrwyr a'i Gynrychiolydd Undeb ac eglurodd
oblygiadau'r penderfyniad hwnnw. Cynghorwyd y Gyrwyr a'i
Gynrychiolydd Undeb hefyd y byddent yn cael eu hysbysu o'r penderfyniad a'r
rhesymau dros y penderfyniad yn ysgrifenedig cyn gynted ag y bo'n ymarferol
ynghyd â'r hawl i apelio yn erbyn y penderfyniad i Lys yr Ynadon o fewn un
diwrnod ar hugain.
Daeth y cyfarfod i ben
am 3.50pm.
Dogfennau ategol:
- Restricted enclosure Gweler y rhesymau pam fod dogfen 4./1 yn gyfyngedig
- Restricted enclosure Gweler y rhesymau pam fod dogfen 4./2 yn gyfyngedig
- Restricted enclosure Gweler y rhesymau pam fod dogfen 4./3 yn gyfyngedig
- Restricted enclosure Gweler y rhesymau pam fod dogfen 4./4 yn gyfyngedig