Eitem ar yr agenda
CYNNIG CAU YSGOL LLANBEDR DC AR 31 AWST 2016 GYDA’R DISGYBLION PRESENNOL YN TROSGLWYDDO I YSGOL BORTHYN, RHUTHUN, YN DIBYNNU AR DDEWIS Y RHIENI
- Meeting of Cabinet, Dydd Mawrth, 16 Chwefror 2016 10.00 am (Item 6.)
- View the declarations of interest for item 6.
Ystyried
adroddiad gan y Cynghorydd Eryl Williams, Aelod Arweiniol dros Addysg (copi’n
amgaeedig) yn cyflwyno'r adroddiad gwrthwynebiad i'w ystyried a gofyn i’r
Cabinet gymeradwyo gweithredu’r cynnig.
Penderfyniad:
PENDERFYNWYD bod y Cabinet yn -
(a) nodi canfyddiadau'r adroddiad gwrthwynebiad, ac
(b) yn amodol ar ystyried yr uchod, bod y Cabinet yn cymeradwyo'r gweithredu’r cynnig i gau Ysgol
Llanbedr ar 31 Awst 2016 a throsglwyddo'r disgyblion i Ysgol Borthyn, Rhuthun,
yn dibynnu ar ddewis y rhieni.
Cofnodion:
[Ceisiodd yr
Arweinydd gael sicrwydd gan aelodau’r Cabinet a gadarnhaodd eu bod yn fodlon
iddynt gael digon o gyfle i astudio’r holl wybodaeth mewn perthynas â’r eitem
hon er mwyn gwneud penderfyniad deallus.]
Cyfeiriodd
Pennaeth y Gwasanaethau Cyfreithiol, Adnoddau Dynol a Democrataidd at y Cod
Trefniadaeth Ysgolion ac esboniodd fod rhaid i’r Cabinet benderfynu ar y cynnig
gyda meddwl agored gan ystyried y ffactorau perthnasol a osodwyd ym
mharagraffau 4.5, 4.8 a 4.9 yr adroddiad.
Cyflwynodd y Cynghorydd Eryl Williams yr adroddiad sy’n rhoi manylion y gwrthwynebiadau
a ddaeth i law yn dilyn cyhoeddiad yr hysbysiad statudol o’r cynnig i’w
hystyried. Cyfeiriodd at weledigaeth y Cyngor ar gyfer addysg a buddsoddiad
sylweddol mewn ysgolion fel rhan o’r agenda moderneiddio ysgolion. Gwnaed y
cynnig fel rhan o adolygiad ardal ehangach Rhuthun a gosodwyd yr achos am newid
yn yr adroddiad yn seiliedig ar amcanion y Cyngor i leihau’r lleoedd dros ben,
cyflawni dosbarthiad tecach a mwy cyfiawn o gyllid ysgol a darparu mwy o
effeithlonrwydd ac effeithiolrwydd o ystâd
yr ysgol. Roedd y ddarpariaeth addysgol yn yr ardal yn cynnwys (1) Addysg
Cyfrwng Cymraeg, (2) Addysg Cyfrwng Saesneg, (3) Addysg Seiliedig ar Ffydd
Cyfrwng Cymraeg, a (4) Addysg Ffydd Cyfrwng Saesneg. Rhoddodd wybod y byddai
pedair elfen y ddarpariaeth yn parhau o weithredu’r cynnig.
Ystyriodd y Cabinet y gwrthwynebiadau yn yr adroddiad ynghyd â’r dadleuon
ar gyfer y cynnig a’r ffactorau y manylwyd arnynt yn y Cod Trefniadaeth
Ysgolion. Ceisiodd yr aelodau gael eglurder ynghylch y cyfeiriadau at ffedereiddio
yn ymatebion yr ymgynghoriad ac a fyddai’r dewis hwn yn bodloni amcanion
allweddol y Cyngor a chwestiynwyd pam nad ymgynghorwyd ynghylch cynigion
eraill. Codwyd cwestiynau hefyd mewn perthynas â chapasiti Ysgol Borthyn i
letya disgyblion Ysgol Llanbedr a chynnig darpariaeth gofal plant cofleidiol.
Ceisiwyd sicrwydd hefyd mai’r cynnig hwn
oedd yn cynrychioli’r dewis gorau i fodloni amcanion y Cyngor.
Ymatebodd y
swyddogion fel a ganlyn –
·
esboniwyd bod dewisiadau eraill i’r cynnig wedi’u
hystyried, gan gynnwys yr achos o blaid ffedereiddio, yn gynharach yn y broses
ymgynghori. Ystyriwyd y manteision a’r anfanteision ac er bod gan ffedereiddio
nifer fawr o fanteision, nid aeth i’r afael ag amcanion allweddol y Cyngor i
fynd i’r afael â’r lleoedd dros ben, cyflawni dosbarthiad tecach a mwy cyfiawn
o gyllid ysgol, na darparu mwy o effeithlonrwydd ac effeithiolrwydd o ystâd yr
ysgol
·
roedd
y Cod Trefniadaeth Ysgolion yn gofyn i’r Cyngor weithio gyda phartneriaid
allweddol megis yr Esgobaeth a chynhaliwyd ymgynghoriad ym mis Ebrill/Mai.
Cynhaliwyd dadansoddiad o ddewisiadau eraill a rhoddwyd rhesymau o ran pam nad
aed ar drywydd y dewisiadau hynny, gan gynnwys ffedereiddio. Cynhwyswyd y
dewisiadau eraill hyn yn yr adroddiad ymgynghori ffurfiol ochr yn ochr â’r
dewis oedd yn cael ei ffafrio gan y Cyngor
·
rhoddwyd sicrwydd fod y cynnig yn bodloni gofynion y Cod
Trefniadaeth Ysgolion ac yn cynrychioli’r dewis gorau i fodloni amcanion
allweddol y Cyngor i fynd i’r afael â lleoedd dros ben, gostwng y gost fesul disgybl
a darparu ystâd ysgol effeithlon a chynaliadwy
·
cadarnhawyd
petai pob plentyn o Ysgol Llanbedr yn dewis trosglwyddo i Ysgol Borthyn, byddai
lle i gefnogi’r trosglwyddiad hwnnw – gallai fod angen rhywfaint o waith mân
gyflunio i’r lle addysgu
·
derbyniwyd
bod y cyfleuster gofal plant cofleidiol presennol yn Ysgol Llanbedr yn cael ei
werthfawrogi’n fawr ond roedd darpariaeth gofal cofleidiol ar gael mewn
ysgolion eraill yn yr ardal, gan gynnwys Ysgol Borthyn a phetai’r cynnig yn
mynd yn ei flaen, byddai’r swyddogion yn gweithio i helpu cefnogi’r
ddarpariaeth honno.
Siaradodd y Cynghorydd Huw Williams yn erbyn y cynnig a chwestiynodd y gost
oedd ynghlwm, gan gynnwys addasu Ysgol Borthyn i letya disgyblion ychwanegol.
Amlygodd nad oedd y cyllid i fwrw ymlaen â chynigion adolygu gweddill ardal
Rhuthun yn dibynnu ar gau’r ysgol a byddai cau’r cyfleuster gofal plant
cofleidiol yn arwain at golli pedair swydd amser llawn. Dadleuodd y Cynghorydd
Williams y dylid mynd ar drywydd y dewis ffedereiddio a nododd faint y
gwrthwynebiad i’r cau gan ddweud y byddai’r ysgol yn debygol o fod yn llawn pe
na bai dan fygythiad o gael ei chau. Yn olaf, holodd a oedd y Cabinet yn
hyderus y byddai’r Gweinidog yn cynnal ei benderfyniad os byddent yn penderfynu
cau’r ysgol.
Ymatebodd y
Cynghorydd Eryl Williams a’r Pennaeth Addysg fel a ganlynol –
·
byddai unrhyw addasiadau i Ysgol Borthyn yn golygu
ail-gyflunio lle dysgu a byddai’r costau’n fach iawn - ni fyddai angen
buddsoddiad cyfalaf sylweddol
·
byddai’r
swyddogion yn gweithio gyda darparwyr gofal plant cofleidiol ac yn cynnig
cefnogaeth fel y bo’n briodol
·
derbyniwyd
nad oedd cyflawni gweddill cynigion adolygiad ardal Rhuthun yn dibynnu’n
ariannol ar gau unrhyw ysgol unigol ond ni fyddai cadw’r ysgol yn agored yn
mynd i’r afael â’r amcanion a’r ffactorau allweddol a nodwyd yn y Cod
Trefniadaeth Ysgolion o ran lleoedd dros ben, ysgolion cynaliadwy a sicrhau
dosbarthiad tecach o gyllid disgyblion
·
byddai’r
Cabinet yn gwneud penderfyniad deallus ar rinweddau’r cynnig ac ni allai
rhagatal camau gweithredu yn dilyn y broses honno.
Siaradodd y Cynghorydd Dewi Owens hefyd yn erbyn y cynnig gan gredu iddo
gael ei ddatblygu gyda chau mewn golwg yn hytrach nag achub yr ysgol. Roedd yn
beio’r Cyngor am y cwymp yn niferoedd y disgyblion a theimlai y dylid gwneud
mwy i fynd i’r afael â hynny. Cododd y Cynghorydd Martyn Holland bryderon hefyd
yn dadlau bod cau ysgolion eraill wedi arwain at ysgolion ardal newydd ond
roedd yr achos hwn yn ymwneud â throsglwyddo disgyblion i Ruthun a chodwyd
cwestiynau mewn perthynas â chapasiti yn Ysgol Borthyn. Dywedodd hefyd y byddai
costau’n gysylltiedig â throsglwyddo disgyblion ac ni fyddai’r cyngor yn elwa’n
ariannol ar dderbyniad cyfalaf oherwydd nid oedd yn berchen ar y tir nac
adeilad yr ysgol - byddai ffedereiddio’n arwain at arbed costau. Rhybuddiodd yn
erbyn gwneud penderfyniad i gau’r ysgol ar hyn o bryd oherwydd nid oedd effaith
ysgolion newydd Glasdir ar ymarferoldeb Ysgol Borthyn i’r dyfodol yn hysbys eto
- gallai ymadawiad disgyblion i’r ysgolion newydd arwain at golli darpariaeth
seiliedig ar ffydd yn yr ardal.
Ymatebodd y
Cynghorydd Eryl Williams fod galw am addysg seiliedig ar ffydd cyfrwng Saesneg
yn yr ardal a allai gael ei bodloni gan Ysgol Borthyn ac ystyriwyd bod yr ysgol
yn gynaliadwy wrth symud ymlaen – byddai gweithredu’r cynnig yn sicrhau bod y
cyfuniad presennol o ddarpariaeth addysgol mewn ysgolion cyfrwng Cymraeg a
Saesneg ac ysgolion seiliedig ar ffydd cyfrwng Cymraeg a Saesneg yn cael eu
cadw. Ailadroddwyd hefyd fod yr holl ddewisiadau eraill wedi’u hystyried, gan
gynnwys ffedereiddio, ond yn dilyn dadansoddiad, penderfynwyd peidio â dewis
ffedereiddio oherwydd nid oedd yn bodloni amcanion allweddol y Cyngor.
Rodd y Cabinet yn fodlon fod prosesau priodol wedi’u dilyn a’u bod yn
cydymffurfio â gofynion y Cod Trefniadaeth Ysgolion. Derbyniodd y Cabinet fod
angen gwneud penderfyniadau anodd wrth symud yr agenda moderneiddio ysgolion
ymlaen ond ystyriwyd mai gweithredu’r cynnig oedd y dewis gorau er mwyn sicrhau
cymysgedd priodol o ddarpariaeth addysg gynaliadwy yn ardal Rhuthun i’r
dyfodol. Wrth symud yr argymhellion, cydnabyddodd y Cynghorydd Eryl Williams y
penderfyniad anodd ond ailadroddodd ei ymrwymiad i sicrhau darpariaeth a
chyfleusterau addysg gynaliadwy ansawdd uchel i bob disgybl yn y sir.
PENDERFYNWYD bod y Cabinet –
(a) yn nodi canfyddiadau’r adroddiad yn
gwrthwynebu, ac
(b) yn dilyn ystyriaeth o’r uchod, bod y
Cabinet yn cymeradwyo gweithrediad y cynnig i gau Ysgol Llanbedr o 31 Awst 2016
ymlaen gyda’r disgyblion presennol yn trosglwyddo i Ysgol Borthyn, Rhuthun yn
amodol ar ffafriaeth y rhieni.
Gohiriwyd y cyfarfod yn y fan hon (11.10 a.m.) am
luniaeth.
Dogfennau ategol:
- YSGOL LLANBEDR, Eitem 6. PDF 202 KB
- YSGOL LLANBEDR - APP 1, Eitem 6. PDF 2 MB
- YSGOL LLANBEDR - EQIA, Eitem 6. PDF 104 KB