Eitem ar yr agenda

Ystyried cais i amrywio Trwydded Eiddo a gyflwynwyd yn unol ag Adran 34 o Ddeddf Trwyddedu 2003 (amlinelliad o'r cais a phapurau cysylltiedig ynghlwm).

 

 Nodwch y drefn i’w chymryd gan yr Is-Bwyllgor (sydd ynghlwm wrth y rhaglen hon).

 

PENDERFYNWYD gwrthod y cais.

 

Cyflwynodd y Swyddog Trwyddedu adroddiad gan y Pennaeth Cynllunio a Gwarchod y Cyhoedd (a ddosbarthwyd yn flaenorol) ar -

 

(i)        gais a oedd wedi dod i law gan Mr. John Sydney Wynne i amrywio Trwydded Safle mewn perthynas â Devine, Pwll y Grawys, Dinbych;

 

(ii)      mae’r Drwydded Eiddo bresennol yn awdurdodi’r canlynol ar hyn o bryd -

 

GWEITHGAREDD TRWYDDEDIG	DYDDIAU PERTHNASOL	AMSER O	AMSER HYD
Darparu Alcohol (i’w yfed ar y safle yn unig)	Llun-Sul	12:30	00:30
Chwarae Cerddoriaeth sydd wedi’i Recordio	Llun-Sul	12:30	00:30
Lluniaeth Hwyr y Nos (Dan Do ac yn yr Awyr Agored)*	Llun-Sul	23:00	00:30

 

(*daeth darparu Lluniaeth Hwyr y Nos yn weithgaredd trwyddedig rhwng 23.00 a 05.00 o’r gloch yn unig)

 

(iii)     mae’r ymgeisydd wedi cyflwyno cais ar gyfer amrywio fel a ganlyn -

 

GWEITHGAREDD TRWYDDEDIG	DYDDIAU PERTHNASOL	AMSER O	AMSER HYD
Darparu cerddoriaeth fyw (Dan Do)	Gwener – Sul Gwyliau Cyhoeddus	20:00 20:00	02:00 02:00
Darparu Cerddoriaeth wedi’i Recordio (Dan Do)	Iau - Sul Gwyliau Cyhoeddus	20:00 20:00	02:00 02:00
Gwerthu Alcohol (i’w yfed yn yr eiddo ac oddi ar yr eiddo)	Sul - Iau Gwen - Sad Gwyliau Cyhoeddus	11:59 11:59 11:59	01:00 02:00 02:00
Lluniaeth Hwyr y Nos (Dan Do ac Awyr Agored)	Gwen - Sad Sul Nos Galan	12:00 11:00 10:00	01:30 12:30 02:00
Adloniant o ddisgrifiad tebyg i gerddoriaeth fyw, cerddoriaeth wedi’i recordio neu berfformiad dawns (Dan do)	Llun - Iau Gwen - Sad Sul Nos Galan	10:00 10:00 11:00 10:00	00:00 01:30 12:30 02:00
Gwerthu Alcohol (i’w yfed yn yr eiddo ac oddi ar yr eiddo)	Sul - Iau Gwen - Sad Gwyliau Cyhoeddus	23:00 23:00 23:00	01:00 02:00 02:00

 

(iv)     roedd un sylw ysgrifenedig wedi dod i law gan barti sydd â diddordeb mewn ymateb i'r hysbysiad cyhoeddus (Atodiad A i'r adroddiad) sy’n ymwneud â niwsans sŵn posibl o ganlyniad i gerddoriaeth uchel ynghyd â'r aflonyddwch a allai gael ei achosi gan bobl yn gadael yr eiddo yn hwyr yn y nos ac yn ystod oriau mân y bore;

 

(v)      gwrthwynebwyd y cais gan Heddlu Gogledd Cymru ond yn dilyn trafodaethau gyda'r ymgeisydd lluniwyd nifer o amodau sydd wedi eu cynllunio i hyrwyddo'r amcanion trwyddedu ymhellach (Atodiad B i’r adroddiad) ac ar y sail honno gofynnodd yr Heddlu, pe byddai’r aelodau o blaid cymeradwyo’r cais, eu bod yn ystyried cynnwys yr amodau hynny o fewn Atodlen Weithredu’r eiddo;

 

(vi)     mae Awdurdod Cynllunio’r Cyngor wedi rhoi gwybod bod rhywfaint o anghysondeb rhwng y defnydd awdurdodedig presennol o'r eiddo i'r hyn a gynigir yn y cais.

 

(vii)    yr Atodlenni Gweithredu arfaethedig a phresennol (Atodiad C a D i'r adroddiad);

 

(viii)  mae angen ystyried y cais gan roi ystyriaeth ddyladwy i Ganllawiau a Datganiad Polisi Trwyddedu’r Cyngor; deddfwriaeth arall berthnasol a sylwadau perthnasol a dderbyniwyd, a’r

 

(ix)     dewisiadau sydd ar gael i'r pwyllgor wrth benderfynu ynglŷn â’r cais.

 

Cafwyd crynodeb o’r adroddiad gan y Swyddog Trwyddedu ac amlinellodd ffeithiau’r achos.  Ers cyhoeddi'r adroddiad roedd cyfryngu wedi bod yn mynd rhagddo rhwng yr Ymgeisydd a'r parti sydd â diddordeb o'r eiddo cyfagos a oedd wedi arwain at gael gwared â seinydd o’r wal rhyngddynt dros dro.   Roedd y parti â diddordeb wedi bod yn fodlon â’r lefelau sŵn ers hynny ac wedi cytuno i dynnu ei sylw yn ôl os rhoddir gwarantau gan yr Ymgeisydd am lefelau sŵn yn y dyfodol.  Er gwaethaf ddarparu sicrwydd ar lafar yn y cyswllt hwnnw roedd yr Ymgeisydd wedi methu i gadarnhau’r cytundeb hwnnw yn ysgrifenedig ac felly mae'r sylw yn dal i sefyll.  O ran yr anghysondeb a amlygwyd gan yr Adran Gynllunio am ddefnydd awdurdodedig o'r safle, dywedwyd wrth yr aelodau bod yr Ymgeisydd yn mynd i'r afael â'r mater hwnnw yn uniongyrchol gyda'r Adran Gynllunio.

 

CYFLWYNIAD YR YMGEISYDD

 

Nid oedd yr Ymgeisydd, Mr. John Sydney Wynne yn bresennol yn y cyfarfod a chymerwyd bod manylion y cais, gan gynnwys yr Atodlen Weithredu wedi’u darllen.

 

Roedd yr Is-bwyllgor yn siomedig nad oeddent yn gallu holi'r Ymgeisydd neu ofyn am sicrwydd ynghylch camau i roi sylw i niwsans sŵn posibl o ystyried y pryderon a godwyd gan y parti â diddordeb ac agosrwydd preswylwyr eraill yn yr ardal.

 

SYLWADAU HEDDLU GOGLEDD CYMRU

 

Nid oedd cynrychiolydd o Heddlu Gogledd Cymru yn bresennol.  Rhoddwyd gwybod i'r Aelodau am y sylwadau ysgrifenedig a nifer o amodau a gytunwyd rhwng yr Ymgeisydd a Heddlu Gogledd Cymru er mwyn hyrwyddo'r amcanion trwyddedu ymhellach (i'w weld yn Atodiad B i'r adroddiad).  Gofynnodd yr Heddlu, os byddai’r aelodau'n penderfynu caniatáu'r cais, eu bod yn ystyried ymgorffori’r amodau hynny o fewn yr Atodlen Weithredu.

 

SYLWADAU CYHOEDDUS GAN RAI Â DIDDORDEB

 

Roedd un sylw ysgrifenedig (Atodiad A i'r adroddiad) wedi ei dderbyn gan barti â diddordeb - Mr. G. Hughes o Bwll y Grawys yn gwrthwynebu'r cais ar sail sŵn ac aflonyddwch.

 

Nid oedd Mr. Hughes yn bresennol i gefnogi ei sylw a nododd yr aelodau ganlyniadau'r cyfryngu parhaus rhwng Mr. Hughes a'r Ymgeisydd fel y nodwyd gan y Swyddog Trwyddedu yn ystod cyflwyno'r adroddiad.  Nodwyd bod yr Ymgeisydd wedi methu â darparu'r sicrwydd ysgrifenedig y gofynnodd y parti â diddordeb amdano er ei fod wedi dweud y byddai'n gwneud hynny.

 

GOHIRIAD I YSTYRIED Y CAIS

 

Ar y pwynt hwn (9.45 am) gohiriwyd yr Is-bwyllgor Trwyddedu i ystyried y cais.

 

Y PENDERFYNIAD A'R RHESYMAU DROS WNEUD Y PENDERFYNIAD

 

PENDERFYNWYD gwrthod y cais am amrywiad.

 

Dyma oedd y rhesymau am y penderfyniad –

 

Methodd yr Ymgeisydd fod yn bresennol yn y gwrandawiad i gefnogi ei gais.  Teimlai'r Is-bwyllgor Trwyddedu fod methiant yr Ymgeisydd i fod yn bresennol yn amharchus i'r Is-bwyllgor o ystyried ei fod yn gofyn am gynnydd mewn oriau ar ei drwydded.  Yn absenoldeb yr Ymgeisydd roedd rhaid i’r Is-bwyllgor ystyried y cais yn seiliedig ar y dystiolaeth ger ei fron yn unig a rhoddodd aelodau ystyriaeth ddyledus i'r cais a manylion a oedd wedi’u cynnwys ynddo a'r gwrthwynebiadau a gyflwynwyd gan Mr. G. Hughes.  Nid oedd yr Is-bwyllgor yn gallu holi'r Ymgeisydd am yr effaith bosibl y byddai'r cynnydd arfaethedig mewn oriau yn ei gael ar breswylwyr yn yr ardal leol, yn enwedig Mr. Hughes.  Oherwydd agosrwydd y preswylydd, a phreswylwyr eraill yn lleoliad y safle, penderfynodd yr Is-bwyllgor y byddai effaith andwyol o ganlyniad i gynnydd mewn oriau ar lefelau niwsans cyhoeddus, yn enwedig lefelau sŵn yn dod o'r eiddo.   Ymhellach, byddai cynnydd mewn oriau yn arwain at lefel annerbyniol o drosedd ac anhrefn yn y lleoliad.  Nid oedd yr Ymgeisydd wedi darparu unrhyw beth i’r Is-bwyllgor a fyddai'n eu bodloni y gallai'r Amcanion Trwyddedu gael eu bodloni’n briodol.  O ganlyniad cafodd y cais am amrywio'r drwydded ei wrthod.

 

Daeth y cyfarfod i ben am 10.00 a.m.