Eitem ar yr agenda
BWRIAD I GAU YSGOL LLANBEDR DYFFRYN CLWYD
- Meeting of Cabinet, Dydd Mawrth, 27 Hydref 2015 10.00 am (Item 6.)
- View the declarations of interest for item 6.
Ystyried
adroddiad gan y Cynghorydd Eryl Williams, Aelod Arweiniol dros Addysg, yn
cyflwyno canfyddiadau’r ymgynghoriad ffurfiol a gofyn am gymeradwyaeth y
Cabinet i gyhoeddi hysbysiad statudol ar y cynnig i gau Ysgol Llanbedr ar 31
Awst 2016 a throsglwyddo’r disgyblion presennol i Ysgol Borthyn, Rhuthun yn
amodol ar ddewis y rhieni.
Penderfyniad:
PENDERFYNWYD
bod y Cabinet yn rhoi cymeradwyaeth i gyhoeddi
rhybudd statudol ar y cynnig i gau Ysgol Llanbedr Dyffryn Clwyd ar 31
Awst 2016 a throsglwyddo'r disgyblion presennol i Ysgol Borthyn, Rhuthun, yn
dibynnu ar ddewis y rhieni.
Cofnodion:
Cyflwynodd y
Cynghorydd Eryl Williams yr adroddiad a oedd yn manylu ar ganfyddiadau’r
ymgynghoriad ffurfiol ar y cynnig i gau Ysgol Llanbedr DC ar 31 Awst, 2016 a
throsglwyddo’r disgyblion presennol i Ysgol Borthyn, Rhuthun yn amodol ar ddewis
y rhieni, a gofynnodd am gymeradwyaeth y Cabinet i gyhoeddi rhybudd statudol ar
y cynnig.
Mae'r cynnig wedi
cael ei wneud fel rhan o'r adolygiad ehangach ardal Rhuthun, ac er bod
rhywfaint o wybodaeth gefndirol wedi cael ei ddarparu yn flaenorol, roedd yn
ofynnol i'r Cabinet ystyried yr ymatebion i'r ymgynghoriad o'r newydd. Mae’r
achos dros newid wedi ei nodi yn yr adroddiad yn seiliedig ar amcanion y Cyngor
i leihau lleoedd dros ben, sicrhau dosbarthiad tecach a mwy cyfartal o gyllid
ysgolion a rhoi mwy o effeithlonrwydd ac effeithiolrwydd ar gyfer ystâd
ysgolion. Roedd yr ymatebion i'r ymgynghoriad yn cynnwys opsiwn arall a
gyflwynwyd gan Esgobaeth Llanelwy i ffederaleiddio Ysgol Llanbedr DC gydag
Ysgol Trefnant VA, a newid statws cyfreithiol o Ysgol Wirfoddol a Reolir i
Ysgol Wirfoddol a Gynorthwyir. Gofynnwyd i'r Cabinet ystyried hyfywedd y dewis
ffederaleiddio cyn penderfynu a ddylid cymeradwyo'r rhybudd statudol i gau.
Ystyriodd y Cabinet yr achos dros ffederaleiddio gan ofyn a fyddai'n
cyflawni amcanion y Cyngor i fynd i'r afael â lleoedd dros ben yn ardal
Rhuthun, darparu canlyniadau addysgol gwell, lleihau'r gost fesul disgybl a
darparu ysgol gynaliadwy ar gyfer y dyfodol. Cafodd manteision a'r risgiau eu hystyried hefyd
ynghyd â'r goblygiadau i'r partneriaid ffederaleiddio arfaethedig. Yn
ystod y drafodaeth, nododd y Cabinet -
·
y
byddai ffederaleiddio yn golygu bod y ddwy ysgol yn parhau ac yn rhannu Corff
Llywodraethu - ni fyddai'n mynd i'r afael â'r mater o leoedd dros ben
·
ni fyddai
unrhyw arbedion yn cael eu gwneud o ran y gost fesul disgybl o ganlyniad i
ffederaleiddio, ac ar gyfer cynaliadwyedd yn y dyfodol, roedd angen gostwng
costau refeniw a chyfalaf
·
Yn
gyffredinol roedd canlyniadau addysgol yn ardal Rhuthun yn dda ac roedd disgwyl
i ysgolion gynnal neu wella canlyniadau - ni ellid ffurfio barn ar hyn o bryd
ynghylch a fyddai ffederaleiddio yn golygu canlyniadau gwell
·
roedd
Awdurdod yr Esgobaeth a Chorff Llywodraethu yn angerddol am gadw Ysgol Llanbedr
ar agor ac wedi gwneud achos dros ffederaleiddio fel opsiwn arall yn lle cau -
fodd bynnag gallai fod risg posibl ar gyfer y partner ffederaleiddio, a oedd yn
ysgol gynaliadwy yn ei rinwedd ei hun ar hyn o bryd
·
roedd
manteision yr opsiwn ffederaleiddio wedi cael eu nodi gan y Cyrff Llywodraethu
yn yr adroddiad ac roedd yn cynnwys arfer gorau a phrofiadau dysgu – gallai
llawer o'r buddion hynny gael eu gwireddu gan ysgolion sy'n gweithio’n fwy
cydweithredol ac nid oeddynt yn achos cryf dros ffederaleiddio ar eu pen eu
hunain
·
ni
ddarparwyd manylion y model ffederaleiddio ar hyn o bryd, ac er bod pellter o
10 milltir rhwng yr ysgolion yn arwyddocaol, roedd y cynnig yn nodi na fyddai
disgyblion yn cael eu trosglwyddo rhwng safleoedd, dim ond yr athrawon, a gofynnwyd cwestiynau ynghylch ymarferoldeb
trefniant o’r fath heb unrhyw arbedion maint yn cael eu gwireddu
·
byddai
rhywfaint o gyfrifoldeb ariannol yn cael ei dynnu oddi ar y Cyngor yn sgil
newid yn y statws cyfreithiol i Ysgol Wirfoddol a Gynorthwyir a oedd yn ymwneud
â chlustnodi'r eiddo ar gyfer cynnal a chadw.
Ymatebodd y
Cynghorydd Huw Williams i’r ddadl am ffederaleiddio a dywedodd -
·
nad
oedd unrhyw ymgynghori wedi cael ei gynnal ar hyn o bryd ac roedd yn anodd ateb
cwestiynau penodol hyd nes yr ymgynghorwyd yn llawn ar y cynnig
·
roedd arbedion syth yn cynnwys £26,000 yn sgil peidio â
gorfod cludo disgyblion i Ysgol Borthyn a £12,000 ar staffio ac nid oedd unrhyw
ddiffygion cyllidebol yn y naill ysgol na’r llall
·
bu
ffederaleiddio llwyddiannus yn ardal Wrecsam rhwng ysgolion oedd fwy na 10
milltir ar wahân, a
·
pharhaodd
niferoedd disgyblion Ysgol Llanbedr a’r rhagamcanion i gynyddu.
Gofynnodd y
Cynghorydd Huw Williams hefyd gwestiynau ynghylch y cynnydd mewn arbedion a
gynigiwyd o ganlyniad i gau ysgol; a oedd y Cabinet wedi bod yn gyfrin i’r holl
dystiolaeth a gyflwynwyd gan yr Awdurdod Esgobaeth, a cheisiodd farn y
Cynghorydd Eryl Williams, fel Aelod Arweiniol dros Addysg, am adroddiad Hill. Mewn
ymateb bu’r swyddogion -
·
yn
esbonio’r y gwahaniaeth yn y cyfrifiad arbedion o £68,000 i £126,000 o
ganlyniad i newidiadau a wnaed trwy'r Fforwm Cyllideb Ysgolion yn nhermau
cyllid nad oedd yn cael ei arwain gan ddisgyblion - ni fyddai’r awdurdod lleol
yn gwneud arbedion o ffederaleiddio
·
dywedodd
petai’r Cabinet o blaid dilyn y dewis ffederaleiddio byddai angen i’r Cyrff
Llywodraethu symud ymlaen ag o, a
·
rhoddodd
sicrwydd bod yr holl ddogfennaeth a gyflwynwyd wedi bod ar gael i aelodau'r
Cabinet.
·
Ymatebodd
y Cynghorydd Eryl Williams gan ddweud nad oedd llawer o argymhellion adroddiad
Hill wedi cael eu gweithredu, ac roeddent yn fater i Lywodraeth Cymru ynghyd ag
adolygiadau dilynol, megis adroddiad Donaldson.
Trafododd y
Cabinet yr adroddiad a chasgliadau ymgynghori eraill, a gofyn a fyddai’r cynnig
yn cyflwyno amcanion y Cyngor o ran llefydd gwag, canlyniadau addysgol a
chynaliadwyedd. Cadarnhaodd swyddogion na fyddent yn mynd i’r afael â’r mater o
leoedd dros ben drwy gadw’r ysgol. Mae nifer y disgyblion yn Ysgol Llanbedr
wedi cynyddu, ond ystyriwyd bod yr ysgol yn parhau yn anghynaladwy o ystyried
bod yna gapasiti addas arall yn yr ardal – gallai cynnydd yn niferoedd
disgyblion yn Ysgol Llanbedr hefyd arwain at leoedd dros ben mewn ysgolion
eraill. Byddai arbedion cyfalaf a refeniw hefyd yn cael eu cyflawni petai’r
cynnig yn cael ei weithredu drwy ddarparu rhagor o effeithlonrwydd ac
effeithiolrwydd ar gyfer ystâd ysgolion.
Gofynnodd y
Cynghorydd Huw Williams gwestiynau ynghylch lleoedd dros ben a chapasiti /
addasrwydd Ysgol Borthyn i dderbyn disgyblion ychwanegol. Tynnodd y Cynghorydd
Huw Hilditch-Roberts sylw at y newidiadau i gynigion gwreiddiol adolygu ardal
Rhuthun a cheisiodd sicrwydd bod gan bob ysgol gapasiti priodol i ddiwallu
anghenion lleol. Ymatebodd y Swyddogion i’r materion a godwyd fel a ganlyn -
·
rhoddwyd
sicrwydd ynghylch gallu Ysgol Borthyn i dderbyn disgyblion sydd wedi’u hadleoli
ac mae'r asesiad risg tân wedi ei gynnwys yn y Cynllun Cyfalaf ar gyfer ei
gwblhau erbyn diwedd mis Mawrth 2015. Roedd yr asesiad ffordd ac asesiad risg
traffig yn foddhaol
·
petai
holl gynigion adolygiad ardal Rhuthun yn cael eu gweithredu, byddai lleoedd
gwag yn lleihau o 23% i 9% - roedd cyfrifiadau ar gyfer lleoedd mewn ysgolion
wedi eu gwneud o ran y cymysgedd o ysgolion a darpariaeth yn yr ardal, a’r
wybodaeth sydd ar gael. Er nad oedd unrhyw sicrwydd absoliwt, mae ffigurau
diweddar wedi cael eu priodoli gyda lefel uchel o gywirdeb. Roedd capasiti yn
cael ei reoli ymhellach gan yr awdurdod drwy broses derbyn yr ysgol.
Tynnodd y
Cynghorydd Huw Williams sylw at yr angen am ddatrysiad i fodloni'r gymuned leol
gyda 539 o ymatebwyr yn cefnogi’r ysgol o gymharu â 6 ar gyfer cau. Ychwanegodd
fod gan Ysgol Llanbedr gefnogaeth lawn y gymuned ac y byddai ganddi ddyfodol
petai’n cael ffynnu drwy ffederaleiddio.
Fe soniodd y Prif
Weithredwr am benderfyniadau anodd ond angenrheidiol y byddai angen eu gwneud
er mwyn mynd i'r afael â lleoedd dros
ben, buddsoddi mewn moderneiddio addysg a sicrhau bod ysgolion yn gynaliadwy
i'r dyfodol. Roedd yn credu bod ffederaleiddio yn ddatrysiad mewn sefyllfaoedd
penodol, ond nid felly yn yr achos hwn. Fe soniodd y Pennaeth Gwasanaethau Cyfreithiol,
Adnoddau Dynol a Democratiaeth am ofynion y Cod Trefniadaeth Ysgolion a'r
ystyriaeth y dylai'r Cabinet ei roi i ymatebion yr ymgynghoriad. Atgoffodd y
Cabinet mai’r cynnig dan ystyriaeth oedd y cynnig i gau'r ysgol a bod y mater o
ffederaleiddio wedi cael ei godi fel rhan o'r ymgynghori ar y cynnig hwnnw. Ar
ôl ystyried y cyfan roeddynt wedi ei glywed a’i ddarllen i ymateb i’r
ymgynghoriad, dylai aelodau'r Cabinet benderfynu pa unai i gyhoeddi rhybudd
statudol neu beidio o ran y cynnig i gau’r ysgol. Petai aelodau’r Cabinet o’r
farn y dylid dilyn y dewis ffederaleiddio a gyflwynwyd yn ystod yr
ymgynghoriad, byddai’n rhaid iddynt bleidleisio yn erbyn yr argymhelliad a
chychwyn ymarfer ymgynghori newydd o ran cynnig i ffederaleiddio.
Ar ôl adolygu’r
adroddiad ac ymatebion yr ymgynghoriad a dderbyniwyd yn ofalus -
PENDERFYNWYD bod
y Cabinet yn rhoi cymeradwyaeth i gyhoeddi
rhybudd statudol ar y cynnig i gau Ysgol Llanbedr Dyffryn Clwyd ar 31
Awst 2016 a throsglwyddo'r disgyblion presennol i Ysgol Borthyn, Rhuthun, yn
dibynnu ar ddewis y rhieni.
Ar y pwynt hwn (12.30pm) cafwyd egwyl ar gyfer lluniaeth.
Dogfennau ategol:
- YSGOL LLANBEDR, Eitem 6. PDF 246 KB
- YSGOL LLANBEDR - APP 1, Eitem 6. PDF 359 KB
- YSGOL LLANBEDR - APP 2, Eitem 6. PDF 2 MB
- YSGOL LLANBEDR - APP 3, Eitem 6. PDF 103 KB