Eitem ar yr agenda
CYNNIG I GAU YSGOL LLANFAIR DYFFRYN CLWYD AC YSGOL PENTRECELYN O 31 AWST 2017, A BOD ESGOBAETH LLANELWY YN AGOR YSGOL GYNRADD WIRFODDOL A REOLIR NEWYDD FFRWD DDEUOL CATEGORI 2, YR EGLWYS YNG NGHYMRU O 1 MEDI, 2017
- Meeting of Cabinet, Dydd Mawrth, 27 Hydref 2015 10.00 am (Item 5.)
- View the declarations of interest for item 5.
Ystyried
adroddiad gan y Cynghorydd Eryl Williams, Aelod Arweiniol dros Addysg (copi
ynghlwm) yn cyflwyno'r adroddiad gwrthwynebiad i'w ystyried a gofyn i’r Cabinet
gymeradwyo gweithredu’r cynnig.
Penderfyniad:
PENDERFYNWYD bod y Cabinet yn:-
(a) nodi canfyddiadau'r adroddiad gwrthwynebiad;
(b) yn dilyn ystyried yr uchod, mae'r Cabinet yn
cymeradwyo gweithrediad y cynnig a'r diwygiad arfaethedig i gau Ysgol Llanfair
Dyffryn Clwyd ac Ysgol Pentrecelyn ar 31 Awst 2017, a bod Esgobaeth Llanelwy yn
agor Ysgol Gynradd Wirfoddol a Reolir newydd ffrwd ddeuol Categori 2 yr Eglwys
yng Nghymru o 1 Medi 2017;
(c) bod ceisiadau am gludiant dewisol i'r ysgol
categori 1 agosaf, yn cael eu hystyried fesul achos, gan ddisgyblion presennol
Ysgol Pentrecelyn a’u brodyr a’u chwiorydd am weddill eu haddysg gynradd yn
dilyn cau'r ysgol (ar 1 Medi 2017), a
(d) bod yr Awdurdod Lleol wedi ymrwymo i fonitro
safonau a chanlyniadau’r Ysgol Ardal newydd a fydd yn cael eu hadolygu'n
rheolaidd yn y Grŵp Monitro Safonau Ysgolion, Archwilio a chan y Grŵp
Strategol Cymraeg mewn Addysg.
Cofnodion:
Cyflwynodd y Cynghorydd Eryl Williams yr adroddiad yn manylu ar y
gwrthwynebiadau a dderbyniwyd yn dilyn cyhoeddi hysbysiad statudol ar y cynnig,
ynghyd â'r diwygiad arfaethedig i oedi'r dyddiad gweithredu gan ddeuddeg mis o
2016 i 2017. Cyfeiriodd at argymhellion yr adroddiad ac ychwanegodd
argymhelliad i adlewyrchu ymrwymiad y Cyngor, fel y nodir ym mharagraff 5.2 o'r
adroddiad, i fonitro safonau a chanlyniadau yn barhaus.
Gwnaed y cynnig yng nghyd-destun adolygiad
ehangach o ardal Rhuthun. Roedd y ddwy ysgol gymunedol yn gefnogol
o’r buddsoddiad mewn ysgol ardal newydd, ac nid oedd y penderfyniad i’w
ddynodi’n ysgol Eglwys yng Nghymru yn un cynhennus. Y brif gynnen oedd y categoreiddio iaith, a derbyniwyd 30 gwrthwynebiad gan
y gymuned leol yn ymwneud â'r dynodiad arfaethedig i ysgol Categori 2.
Ystyriodd y Cabinet y gwrthwynebiadau a nodwyd yn
yr adroddiad, ynghyd â'r dadleuon dros y cynnig a'r ffactorau a nodwyd yn y Cod
Trefniadaeth Ysgolion. Canolbwyntiodd trafodaeth y Cabinet ar y materion canlynol -
·
cydnabuwyd
bod y mwyafrif llethol o ddisgyblion oedd yn mynychu’r ddwy ysgol yn cael eu
haddysgu drwy gyfrwng y Gymraeg. Byddai ysgol dwy ffrwd yn caniatáu i
ddarpariaeth cyfrwng Cymraeg gael eu cynnal ar gyfer disgyblion o'r ddwy ysgol
ond byddai hefyd yn caniatáu i bobl ddi-Gymraeg gael mynediad i ddarpariaeth
cyfrwng Cymraeg drwy ddechrau yn y ffrwd Saesneg ac yna trosglwyddo i'r ffrwd
Gymraeg. Yn 2015, addysgodd Ysgol Llanfair 80 o ddisgyblion drwy gyfrwng y
Gymraeg a 23 drwy gyfrwng y Saesneg. O blith yr 80 disgybl yma, roedd 14 (13%)
wedi trosglwyddo o gyfrwng Saesneg i Gymraeg, a byddai dynodi’r ysgol yn
Gategori 2 yn helpu i gynyddu nifer y dysgwyr Cymraeg a disgyblion a fyddai’n
gadael yr ysgol yn rhugl yn y ddwy iaith
·
cyfeiriwyd
at y buddsoddiad ychwanegol sydd ei angen er mwyn datblygu a symud yr iaith
Gymraeg yn ei blaen mewn ysgol Categori 2, a p'un a fyddai'n gynaliadwy yn y
tymor hir o ystyried y sefyllfa ariannol - dywedodd y swyddogion bod 23% o
leoedd dros ben yn ardal Rhuthun ar hyn o bryd, a phetai’r holl gynigion yn yr
adolygiad yn cael eu rhoi ar waith, byddai'r lleoedd gwag yn gostwng i 9%, ac
felly’n golygu y gellir ailddosbarthu adnoddau i ddiwallu anghenion ysgolion
·
cafodd
pwysigrwydd cadw ethos a diwylliant Cymreig bresennol ei bwysleisio a cheisiwyd
sicrwydd ynghylch hynny petai’r cynnig yn cael ei weithredu. Cafodd y Cabinet
wybod am gyfrifoldeb ar y cyd sy'n cynnwys y Corff Llywodraethu, GwE
(Gwasanaeth Gwella Ysgolion) a'r Cyngor. Byddai'r Corff Llywodraethu yn
sylfaenol o ran sicrhau bod ethos Cymreig cryf yn cael ei gynnal yn yr ysgol
newydd, a byddai modd i hyn gael ei adlewyrchu yn eu polisïau rheoli a recriwtio. Fe eglurwyd rôl y Cyngor
a'i ymrwymiad i fonitro safonau a chanlyniadau trwy'r Grŵp Monitro Safonau
Ysgolion, Pwyllgorau Archwilio a Grŵp Strategol Cymraeg mewn Addysg, a
fyddai’n diogelu’r ethos Cymreig ymhellach ac yn cynnal parhad
·
adroddodd
y Cynghorydd Huw Jones, Aelod Arweiniol dros yr Iaith Gymraeg ar y cynnydd a
wnaed i gynyddu nifer y dysgwyr Cymraeg yn y sir, gan dynnu sylw at y cynnydd
yn nifer y plant sy'n siarad Cymraeg yn ysgolion y sir ers 2011. Roedd yn falch
o nodi bod y categorïau ieithyddol wedi cael eu hegluro’n eglur yn yr
adroddiad, ynghyd â data cymharol ynglŷn â rhuglder y disgyblion yn y ddwy
ysgol
·
eglurwyd
y byddai ceisiadau am gludiant dewisol i'r ysgol Categori 1 agosaf yn cael eu
hystyried gan ddisgyblion a brodyr a chwiorydd presennol Ysgol Pentrecelyn
petai’r ysgol yn cau.
Dywedodd yr Arweinydd ei fod wedi cwrdd ag
ymgyrchwyr o Ysgol Pentrecelyn i glywed eu pryderon o lygad y ffynnon. Roedd ymgyrchwyr yn gefnogol o ysgol Eglwys yng Nghymru newydd, ond roedd
ganddynt wrthwynebiad cryf i’r ffaith ei fod yn cael ei ddynodi’n ysgol
Categori 2. Roedd wedi ceisio ymatebion i nifer o faterion a godwyd gan y rhai oedd yn
gwrthwynebu, gan gynnwys, a roddwyd digon o ystyriaeth i ddisgyblion Ysgol
Pentrecelyn, y ffaith na fu unrhyw gyfarfod rhwng rhieni'r ddwy ysgol, pryderon
ynghylch yr iaith a siaredir ar iard yr ysgol a'r effaith ar ddiwylliant. Ymatebodd y Swyddogion fel a ganlyn -
·
roedd
angen ystyried cynigion yng nghyd-destun adolygiad ehangach ardal Rhuthun, er
mwyn darparu cymysgedd briodol o ddarpariaeth er mwyn gwasanaethu anghenion
disgyblion yn yr ardal wrth symud ymlaen – yn seiliedig ar ffigurau presenoldeb
cyfredol, nid oedd digon o alw am ysgol Categori 1, ond roedd ysgolion Categori
1 a 2 yn cyflwyno addysg cyfrwng Cymraeg gyda’r un canlyniadau yn yr ysgol
cyfrwng Cymraeg.
·
cylch
gwaith a chyfrifoldeb y Cyrff Llywodraethu yw trefnu cyfarfod rhwng rhieni’r
ddwy ysgol
·
yn
ystod ymweliadau â’r ysgolion, gellid clywed Saesneg yn cael ei siarad yn iard
yr ysgolion Categori 1 a Chymraeg yn iard yr ysgolion Categori 2 – er nad oedd
modd amodi’r iaith yn yr iard ysgol, gallai Cymraeg gael ei annog a’i hyrwyddo
gan y Corff Llywodraethu
·
fe
ymgynghorwyd ag Estyn ynghylch cynigion adolygu ardal Rhuthun, a chafodd eu
hymateb ei gynnwys yn yr adroddiad.
Fe ymbiliodd y Cynghorydd Arwel Roberts ar y
Cabinet i ddewis ysgol ardal newydd Categori 1 er mwyn gwarchod a chryfhau’r
iaith Gymraeg yn yr ardal.
Cyfeiriodd at strategaethau
cadarnhaol i symud ysgolion ar hyd y continwwm iaith, gan ddadlau y byddai'n
groes i'r polisïau hynny ac yn gam yn ôl i ddewis ysgol Categori 2 yn yr achos
hwn, yn enwedig mewn ardal wledig lle roedd yr iaith Gymraeg ar ei chryfaf. Cyfeiriodd at y nifer o wrthwynebiadau a dderbyniwyd, gan ddadlau na fyddai
ysgol Categori 2 yn gwarantu addysg cyfrwng Cymraeg at y dyfodol, ac na fyddai
Ysgol Pen Barras yn gallu cynnwys yr holl ddisgyblion sy'n dymuno trosglwyddo.
Darparwyd yr ymatebion canlynol i’r a materion a
godwyd gan -
·
fe
dynnwyd sylw at y model yn Ysgol Llanfair fel arfer gorau ac roedd yr ysgol yn
denu disgyblion o deuluoedd Cymraeg a di-Gymraeg, ac felly'n cynyddu’r nifer o
ddysgwyr/siaradwyr Cymraeg - credir y byddai ysgol ardal Categori 2 newydd yn
gwella ac yn cynyddu’r ddarpariaeth iaith Gymraeg, a byddai rhagor o
ddisgyblion o'r ardal yn cael mynediad at addysg cyfrwng Cymraeg
·
cafodd
lefelau chyrhaeddiad uchel cyson gan Ysgol Llanfair eu canmol hefyd, a
chyflawnodd dros 90% Lefel 4+ yng Nghyfnod Allweddol 2 yn 2014
·
cydnabuwyd y byddai newid mewn
arweinyddiaeth bob amser yn golygu risg a byddai gan y Corff Llywodraethu rôl
hanfodol i’w chwarae i sicrhau bod yr ethos Cymreig cryf yn cael ei chynnal
·
roedd
y dadleuon o blaid ac yn erbyn y categoreiddio iaith wedi cael ei ystyried yn
ofalus cyn gwneud yr argymhelliad ac roedd yr awydd i gynyddu nifer y
dysgwyr/siaradwyr Cymraeg wedi bod yn ffactor pwysig
·
cafwyd
adroddiad am rôl y Grŵp Strategol Cymraeg mewn Addysg o ran rhoi cymorth i
ysgolion i symud ar hyd y continwwm iaith, a'r gobaith oedd y byddai’r model a
ddefnyddir gan Ysgol Llanfair yn cael ei ailadrodd mewn ysgolion eraill.
Gofynnodd y Cynghorydd Huw Hilditch-Roberts am
sicrwydd ynghylch safonau a chanlyniadau, ynghyd â mesurau diogelu i sicrhau
darpariaeth cyfrwng Cymraeg yn y dyfodol, a dywedodd fod y Gymraeg yn cael ei
siarad yn iard yr ysgol yn Ysgol Pen Barras (Categori 1) a oedd hefyd yn
addysgu disgyblion o deuluoedd â chefndir di-Gymraeg. Fe dynnodd sylw hefyd at y pwysau posibl a
fyddai ar Ysgol Llanfair gan bod Ysgol Rhewl yn cau.
Cafwyd yr ymatebion canlynol i’r sylwadau hynny
a chwestiynau pellach -
·
cydnabuwyd
mai ychydig iawn o ddisgyblion oedd wedi cael eu hasesu drwy’r ffrwd cyfrwng
Cymraeg o ran telerau canlyniadau yn Ysgol Rhewl dros y blynyddoedd diwethaf, a
cheisiwyd sicrwydd bod yr adolygu a monitro safonau a chategoreiddio iaith mewn
ysgolion wedi bod yn llawer mwy cadarn
yn ddiweddar
·
cadarnhawyd
y gallai disgyblion o Ysgol Rhewl wneud cais am leoedd yn yr ysgol arfaethedig
newydd petaent yn dymuno parhau mewn ysgol Categori 2, a byddai eu ceisiadau yn
cael eu hystyried yn unol â'r polisi derbyn
·
roedd
y model a ddefnyddiwyd gan Ysgol Llanfair yn cael ei ystyried yn arfer gorau o
ran cynwysoldeb a chanlyniadau gyda chanran uchel o ddisgyblion mewn ffrydiau
Cymraeg a Saesneg yn cyrraedd y safon ddisgwyliedig a thu hwnt
·
roedd
y costau o ddarparu cludiant ysgol i ddisgyblion a brodyr a chwiorydd sy'n
dymuno trosglwyddo o Ysgol Pentrecelyn i ysgol Categori 1 yn fach iawn, a
byddai am gyfnod dros dro yn unig
·
nod y
cynnig oedd diogelu cynaliadwyedd darpariaeth
cyfrwng Cymraeg yn y tymor hir ar gyfer yr ardal
·
nid
oedd y bygythiad o adolygiad barnwrol yn ystyriaeth berthnasol wrth wneud
penderfyniad ar y cynnig.
Roedd yr Arweinydd yn cydnabod y sefyllfa anodd
gyda dwy farn gref iawn, a phwysleisiodd mai’r ystyriaeth bwysicaf oedd i
sicrhau'r ddarpariaeth addysgol, darpariaeth ddiwylliannol ac ieithyddol orau
wrth symud ymlaen. Cyfeiriodd at y buddsoddiad sylweddol mewn addysg ac roedd yn hyderus
bod y mesurau diogelu angenrheidiol ar waith i ddiogelu a gwella darpariaeth
addysgol, ddiwylliannol ac ieithyddol yn yr ardal. Petai’r cynnig yn cael ei gymeradwyo, roedd yn gobeithio y byddai’r ddwy
gymuned yn cydweithio er lles yr ysgol ardal newydd.
Cynigiodd y Cynghorydd Eryl Williams argymhellion
yr adroddiad ynghyd â'r argymhelliad ychwanegol a nodwyd ym mharagraff 5.2 yr
adroddiad. Ar ôl ystyried yr holl dystiolaeth a
gyflwynwyd, roedd y Cabinet yn fodlon
bod y cynnig yn cynrychioli'r opsiwn gorau er mwyn cyflwyno addysg yn yr ardal
at y dyfodol.
PENDERFYNWYD bod y Cabinet yn -
(a) nodi canfyddiadau'r adroddiad gwrthwynebiad;
(b) yn dilyn ystyried yr uchod, mae'r Cabinet yn cymeradwyo gweithrediad y
cynnig a'r diwygiad arfaethedig i gau Ysgol Llanfair Dyffryn Clwyd ac Ysgol
Pentrecelyn ar 31 Awst 2017, a bod Esgobaeth Llanelwy yn agor Ysgol Gynradd
Wirfoddol a Reolir newydd ffrwd ddeuol Categori 2 yr Eglwys yng Nghymru o 1
Medi 2017;
(c) bod ceisiadau am gludiant dewisol i'r ysgol categori 1 agosaf, yn cael eu
hystyried fesul achos, gan ddisgyblion presennol a'u brodyr neu chwiorydd yn
Ysgol Pentrecelyn am weddill eu haddysg gynradd ar ôl i’r ysgol gau (o 1 Medi
2017), a
(d) bod yr Awdurdod Lleol wedi ymrwymo i fonitro safonau a chanlyniadau’r Ysgol
Ardal newydd a fydd yn cael eu hadolygu'n rheolaidd yn y Grŵp Monitro
Safonau Ysgolion, Archwilio a chan y Grŵp Strategol Cymraeg mewn Addysg.
Ar y pwynt hwn (11.10am) cafwyd egwyl ar gyfer lluniaeth.
Dogfennau ategol:
- YSGOL LLANFAIR PENTRECELYN, Eitem 5. PDF 123 KB
- YSGOL LLANFAIR PENTRECELYN - APP 1, Eitem 5. PDF 569 KB
- YSGOL LLANFAIR PENTRECELYN - APP 2, Eitem 5. PDF 96 KB
- YSGOL LLANFAIR PENTRECELYN - APP 3, Eitem 5. PDF 344 KB
- YSGOL LLANFAIR PENTRECELYN - APP 4, Eitem 5. PDF 136 KB
- YSGOL LLANFAIR PENTRECELYN - APP 5, Eitem 5. PDF 1 MB
- YSGOL LLANFAIR PENTRECELYN - APP 6, Eitem 5. PDF 1 MB
- YSGOL LLANFAIR PENTRECELYN - APP 7, Eitem 5. PDF 98 KB
- YSGOL LLANFAIR PENTRECELYN - APP 8, Eitem 5. PDF 220 KB