Eitem ar yr agenda

Nodi presenoldeb aelodau'r Pwyllgor Safonau yng nghyfarfodydd Cynghorau Sir, Tref a Chymuned a derbyn eu hadroddiadau.

 

Gwahoddwyd Aelodau'r Pwyllgor i roi adborth o gyfarfodydd Cynghorau Dinas, Tref a Chymuned y gwnaethant eu mynychu’n ddiweddar, ac fe gymerodd Aelodau’r cyfle i gynnig crynodeb o sut roedd y Cynghorau perthnasol wedi gweithredu.

 

Roedd y Cynghorydd W.L. Cowie wedi mynychu cyfarfod Cyngor Dinas Llanelwy.  Cadarnhaodd nad oedd wedi dod ar draws unrhyw broblemau ac yn fodlon ar y modd y cynhaliwyd y cyfarfod.

 

Mynychodd yr Aelodau Annibynnol Anne Mellor (AM) a Julia Hughes (JH) gyfarfod Cyngor Cymuned Aberchwiler 7 Hydref, 2015 ac fe dynnwyd sylw at y materion canlynol:-

 

-               Nid oedd unrhyw feysydd o bryder wedi cael eu nodi, a chadarnhaodd y ddau Aelod Annibynnol eu bod yn fodlon ar y modd y cynhaliwyd y cyfarfod.

-               Roedd cynrychiolydd y Cyngor Sir lleol wedi mynychu'r cyfarfod ac wedi bod yn hynod ddefnyddiol ac yn llawn gwybodaeth.

 

Mynychodd yr Aelod Annibynnol Julia Hughes (JH) gyfarfod y Cyngor Sir Arbennig ar 7 Hydref, 2015, a oedd a nifer dda yn bresennol, ac ni chodwyd unrhyw faterion o bryder.

 

Mynychodd yr Aelod Annibynnol Julia Hughes (JH) y cyfarfodydd canlynol ac amlygwyd y pwyntiau a'r materion canlynol:-

 

Cyngor Tref Bodelwyddan:-

 

-               Ni fu unrhyw wybodaeth ar gael ar y wefan, a oedd angen ei diweddaru.  Fodd bynnag, roedd y Clerc wedi bod yn ymatebol iawn, yn gadarnhaol ac yn ddefnyddiol. 

-               Rhoddwyd cefnogaeth gan y Clerc i’r Cadeirydd a'r Aelodau yn ystod y cyfarfod.

 

Cafwyd trosolwg gan JH a oedd yn cynnwys y meysydd canlynol o bryder:-

 

·                     Nid oedd y cyfarfod wedi’i reoli yn y modd mwyaf effeithiol

·                     Nid oedd yr aelodau’n parchu Cadeirydd y cyd Gynghorwyr yn ystod achosion.  Cafodd hyn effaith andwyol ar reolaeth y cyfarfod, ac nid oedd Aelodau wedi cymhwyso protocol a oedd yn briodol i gyfrifoldeb eu swyddi fel Cynghorwyr Tref a chynrychiolwyr preswylwyr lleol.

·                     Cydnabuwyd yr anhawster wrth recriwtio pobl i'r swyddi gwirfoddol, gyda dim ond un cais wedi dod i law ar gyfer dwy swydd wag yn y Cyngor Tref.

 

Yn dilyn trafodaeth fer, gofynnodd y Pwyllgor bod y Swyddog Monitro’n ysgrifennu at Glerc Cyngor Cymuned Bodelwyddan yn tynnu sylw at y materion a godwyd gan yr Aelod Annibynnol J. Hughes, a'r pryderon dilynol a fynegwyd gan y Pwyllgor Safonau ar ôl ystyried ei hadroddiad.

 

Cyngor Cymuned Nantglyn - 6 Hydref, 2015:-

 

-               Rhoddwyd enghraifft dda o sut y dylai cyfarfod redeg.

-               Roedd gan y Cyngor wefan dda, yn llawn gwybodaeth ac wedi’i dylunio’n dda.

-               Anfonwyd e-bost at y Clerc er mwyn cael manylion y lleoliad, y rhaglen a chofnodion y cyfarfod nesaf.  

-               Roedd Clerc y Cyngor wedi bod yn ddefnyddiol iawn.

-               Ni wiriodd y Clerc Aelod o'r Cyngor a gyrhaeddodd yn hwyr, mewn perthynas â Datganiadau o Gysylltiad.

-               Cymerodd Aelodau'r Cyngor ran yn holl eitemau'r rhaglen mewn modd cefnogol ac adeiladol.

-                Rheolodd y Cadeirydd y cyfarfod yn dda ac fe gafodd ei gefnogi gan y Clerc, a chynhaliwyd busnes mewn modd trefnus a chywir.

-               Roedd Ceisiadau Cynllunio wedi cael sylw yn ofalus ac wedi’u trin yn briodol.

-               Cyflwynodd y Cadeirydd JH i Aelodau’r Cyngor a dywedodd ei fod yn synnu nad oedd wedi cael gwybod am fwriad y Pwyllgor Safonau.  Amlinellodd JH ddiben yr ymweliadau i ddarparu cefnogaeth i'r Cynghorau perthnasol, a chodi proffil y Pwyllgor Safonau i osgoi bod yn gorff o bell. 

-               Rhoddwyd adborth am drafodion y cyfarfod gan JH.

 

Hysbyswyd y Pwyllgor bod Aelod o'r Cyngor Cymuned wedi mynegi'r farn nad oedd wedi cael gwybod am fwriadau’r Pwyllgor Safonau, ac yn dilyn trafodaethau gyda'r Swyddog Monitro, ei ddealltwriaeth ef oedd bod rôl y Pwyllgor Safonau’n gysylltiedig â materion sy'n ymwneud â'r Cod Ymddygiad ac nid materion Llywodraethu.  Mewn ymateb i bryderon a fynegwyd ynghylch cwestiynau yn ymwneud â'r wefan, cyfeiriodd JH at gyflwyniad y ddeddfwriaeth ddiweddar.

 

Hysbyswyd yr Aelodau, yn dilyn y cyfarfod, bod JH wedi anfon e-bost at Glerc y Cyngor Cymuned, a ddarllenwyd yn y cyfarfod, yn crynhoi rôl, cylch gorchwyl a phrif ddyletswyddau’r Pwyllgor Safonau.

 

Mewn ymateb i bryderon a godwyd gan Aelodau'r Pwyllgor Safonau ynghylch Cynghorau Dinas, Tref a Chymuned yn dod yn ymwybodol o rôl y Pwyllgor Safonau, cytunodd y Swyddog Monitro i ysgrifennu at Gynghorau Dinas, Tref a Chymuned yn amgáu manylion rôl a chylch gorchwyl y Pwyllgor Safonau.  Rhoddodd y Swyddog Monitro gadarnhad nad oedd yn orfodol i Aelodau'r Pwyllgor Safonau ymweld neu fynychu cyfarfodydd Cynghorau Dinas, Tref a Chymuned.

 

Hysbysodd y Cadeirydd y Pwyllgor ei fod ef a'r Swyddog Monitro wedi mynychu cyfarfod Clercod a Chynghorwyr Cymuned 25 Tachwedd, 2015. Rhoddwyd manylion ynghylch yr eitemau a drafodwyd, a’r gweithrediadau, gan y Cadeirydd.  Cafwyd cadarnhad bod y cyfarfod wedi ei gadeirio’n dda ac ni chodwyd unrhyw faterion o bryder. 

 

Hysbysodd y Swyddog Monitro’r Pwyllgor fod cwestiynau am ddarparu hyfforddiant, a darparwyr hyfforddiant, wedi cael eu codi o ran y posibilrwydd o ddyblygu darpariaeth.  Eglurodd fod y Prif Weithredwr wedi gofyn am gael archwilio’r rhaglen gyfannol o hyfforddiant, ar y cyd â darparwyr eraill.  Cyfeiriodd y Swyddog Monitro at ei gyfrifoldeb o ran lefel, amlder a safon y ddarpariaeth o hyfforddiant mewn perthynas â'r Cod Ymddygiad.  Mynegodd y Cadeirydd y farn bod y lefel o hyfforddiant a ddarperir gan Sir Ddinbych wedi bod yn ardderchog.

 

Yn dilyn trafodaeth bellach:-

 

PENDERFYNWYD - bod y Pwyllgor Safonau:-

 

(a)          yn derbyn ac yn nodi adborth a gyflwynwyd o gyfarfodydd diweddar a fynychwyd gan Aelodau'r Pwyllgor.

(b)          yn gofyn i'r Swyddog Monitro ysgrifennu at Gynghorau Dinas, Tref a Chymuned yn amgáu manylion rôl a chylch gorchwyl y Pwyllgor Safonau, a

(c)          chytuno bod y Swyddog Monitro yn ysgrifennu at Glerc Cyngor Tref Bodelwyddan yn tynnu sylw at y materion a godwyd gan yr Aelod Annibynnol J. Hughes, a'r pryderon dilynol a fynegwyd gan y Pwyllgor Safonau.

          (GW i Weithredu)