Eitem ar yr agenda
CANLYNIADAU ARHOLIAD DROS DRO
- Meeting of Pwyllgor Craffu Perfformiad, Dydd Iau, 24 Medi 2015 9.30 am (Item 4.)
- View the declarations of interest for item 4.
Arholiadau Allanol Dros Dro ac Asesiadau Athrawon (Tudalennau 15-34)
Ystyried
adroddiad gan Uwch Ymgynghorydd Herio GwE (copi ynghlwm) ar adolygu asesiadau
athrawon ac arholiadau allanol.
Canlyniadau Safon Uwch Chweched Dosbarth y Rhyl (Tudalennau 35-42)
Ystyried
adroddiad gan y Cyfarwyddwr, Coleg Llandrillo, y Rhyl (copi ynghlwm) sy’n
darparu gwybodaeth i Aelodau am berfformiad Chweched Dosbarth y Rhyl.
9.35 a.m. – 10.15 a.m.
Cofnodion:
Arholiadau Allanol Dros Dro ac Asesiadau Athrawon
Cyflwynodd Aelod
Arweiniol dros Addysg, y Cynghorydd Eryl Williams, adroddiad Arholiadau Allanol
Dros Dro ac Asesiadau Athrawon (a ddosbarthwyd yn flaenorol). Cyflwynwyd
yr adroddiad hwn i roi gwybodaeth i Aelodau am berfformiad asesiadau athrawon
ac arholiadau allanol ysgolion Sir Ddinbych yn seiliedig ar y data terfynol
sydd wedi ei ddilysu ar gyfer y Cyfnod Sylfaen, Cyfnod Allweddol 2/3 ac
arholiadau allanol Cyfnod Allweddol 4 ac Ôl-16.
Cyflwynwyd Dr
Alwyn Jones, Pennaeth Safonau, GwE, a Marc Berw Hughes, Uwch Ymgynghorydd Her –
Hwb Conwy/Sir Ddinbych, GwE i'r Pwyllgor, gan y Pennaeth Addysg, Karen Evans.
Cadarnhaodd y
Pennaeth Addysg bod yr holl ganlyniadau yng Nghyfnod Allweddol 4 yn rhai dros
dro ac y byddai canlyniadau wedi’u gwirio ar gael ym mis Tachwedd a data
meincnodi ar gael ym mis Rhagfyr 2015.
Roedd yr Awdurdod
Lleol wedi dewis gyda GwE bod datblygiad mathemategol yn y Cyfnod Sylfaen wedi
bod yn faes oedd yn haeddu ffocws gyda'r bwriad o wella.
Er gwaethaf
gwelliant yng nghanlyniadau Cyfnod Allweddol 2 (CA2) yn 2015 o gymharu â'r
flwyddyn flaenorol, mae safle Sir Ddinbych wedi gostwng gan fod canlyniadau
wedi gwella mewn Awdurdodau Lleol eraill. Ar
lefel CA2 daeth yn amlwg y byddai angen ymyrraeth yn gynt yn siwrnai addysg
disgyblion, o bosibl yn y Cyfnod Sylfaen. Byddai
hyn yn rhoi cefnogaeth i'r disgyblion yn ystod rhan gyntaf eu haddysg ac yn eu
helpu i gyflawni eu potensial yn CA2.
Bu gwelliant yng
nghanlyniadau Cyfnod Allweddol 3 (CA3) am y seithfed flwyddyn, a oedd yn
galonogol iawn.
Roedd canlyniadau
arholiadau allanol heb eu gwirio ar gyfer 2015 yn siomedig wrth i ganlyniadau
lefelau 1 a 2 aros yr un fath, neu bu cwymp cyffredinol mewn perfformiad o
gymharu â blynyddoedd blaenorol.
Roedd canlyniadau
Cyfnod Allweddol 5 (CA5) yn debyg i'r graddau a gyflawnwyd yn y flwyddyn
flaenorol.
Gan ymateb i gwestiynau'r Aelodau, dywedodd y Pennaeth Addysg a Swyddogion
GwE:
·
Yn y
Cyfnod Sylfaen, roedd Sir Ddinbych, yn debyg i Awdurdodau Lleol eraill,
roeddynt wedi bod yn canolbwyntio ar lythrennedd, ac o ganlyniad, roedd sgiliau
mathemategol wedi dioddef. Dyma oedd y rheswm dros ganolbwyntio ar ddatblygiad
mathemategol yn y dyfodol ac i adnabod anghenion addysgol arbennig (AAA) yn
fuan yn natblygiad disgybl er mwyn targedu'r ymyrraeth gywir a rhoi cefnogaeth
iddynt. Heb gymorth wedi'i dargedu yn gynnar, gallai'r disgyblion
gael trafferth â phob pwnc Gwyddoniaeth, Technoleg, Peirianneg a Mathemategol
(STEM) yn y pendraw;
·
Roedd
wedi bod yn siomedig nodi bod ysgolion uwchradd sy’n perfformio'n dda wedi
llithro eleni yn erbyn perfformiad blaenorol, gan fod yr ysgolion hynny wedi
derbyn cefnogaeth allanol dwys tan yn ddiweddar. Cafodd hyn ei briodoli i'r
ffaith bod GwE, yn ystod ei gyfnod cychwynnol ers ei sefydlu, wedi canolbwyntio
llawer o'i adnoddau a’i waith ar y sector cynradd, er anfantais i’r sector
uwchradd. Roedd canlyniadau Ysgol Uwchradd y Rhyl yn
arbennig o siomedig gan fod ei ganlyniadau eleni wedi bod ar yr un lefel â'r
canlyniadau a gyrhaeddwyd pan oedd dan fesurau arbennig. Byddai
hyn yn achos brys ar gyfer ymyrraeth a gwelliant. Roedd
Ysgol Uwchradd y Rhyl wedi gofyn i nifer o bapurau arholiad ei disgyblion gael
eu hail-farcio. Swyddogion y Cyngor a GwE wedi cwrdd â
chynrychiolwyr Estyn, y Pennaeth a'r Llywodraethwyr i drafod y canlyniadau a'r
pryderon cysylltiedig. Cytunwyd y byddai Bwrdd Adfer bychan yn
cael ei sefydlu, sy'n cynnwys yr Awdurdod Lleol, yr Ysgol a chynrychiolwyr
Annibynnol, gyda'r bwriad o fynd i'r afael â'r problemau (rhai ohonynt wedi
cael eu nodi gan Estyn ddwy flynedd yn gynharach) ac i wella deilliannau i
ddisgyblion;
·
Mewn
cyfarfod diweddar gyda Swyddogion Llywodraeth Cymru (LlC), GwE a chynrychiolwyr
yr Awdurdod Lleol, cytunwyd bod angen
rhoi gwybod i’r Adrannau Adnoddau Dynol am faterion gallu yn ymwneud ag
athrawon unigol yn gynnar, gyda’r bwriad o’u cefnogi i gael y sgiliau angenrheidiol
i gyflawni’r canlyniadau gorau posibl ar gyfer disgyblion;
·
Hefyd,
roedd angen i Benaethiaid dynnu sylw eu Corff Llywodraethu, at unrhyw feysydd o
bryder a risg yn gynnar. Byddai hyn yn sicrhau bod y Corff Llywodraethu yn
ymgymryd â’i rôl mewn modd cadarn a heriol i sicrhau cefnogaeth i ddisgyblion
allu cyflawni eu llawn botensial;
·
Ni fu
unrhyw arwydd ystod blwyddyn ysgol 2014/15 bod perfformiad disgyblion y Sir
mewn arholiadau allanol yn debygol o ddirywio;
·
Mae
ysgolion unigol yn gosod eu targedau eu hunain;
·
Yn
ystod tymor yr hydref 2015, roedd GwE yn ceisio ymweld â Chorff Llywodraethu
pob ysgol i herio a phrofi’r targedau a osodwyd ganddynt, ac i weithio gyda
Llywodraethwyr i wella eu sgiliau i fod yn fwy cadarn a heriol;
·
Roedd
GwE, fel sefydliad, wedi bod yn destun monitro a herio yn rheolaidd gan
Lywodraeth Cymru. Roedd dau o'r consortia effeithiolrwydd a
gwelliant ysgolion eraill yng Nghymru wedi wynebu heriau enfawr, ac o ganlyniad
maent wedi cael buddsoddiad sylweddol gan Lywodraeth Cymru. Er gwaethaf y
buddsoddiad, nid oedd y naill gonsortia na'r llall wedi sylweddoli eu potensial
disgwyliedig. Dywedodd yr Aelod Arweiniol dros Addysg y byddai'n
trafod hyn gyda'r Gweinidog yn ystod eu cyfarfod ganol fis Hydref;
·
Cyflogodd
yr Awdurdod Lleol "swyddogion cyswllt" i gefnogi disgyblion cyfnod
sylfaen integreiddio i fywyd yr ysgol a nodi cefnogaeth sylfaenol neu anghenion
arbennig. O dro i dro byddai gwahaniaethau sylweddol rhwng disgyblion oedd â
theuluoedd oedd cael eu cefnogi gan gynlluniau "Dechrau'n Deg" a rhai
nad oedd wedi cael y gefnogaeth;
·
Mae
disgyblion unigol yn datblygu ar gyflymder gwahanol rhwng 7 ac 11 oed. Mae’n
bwysig felly bod unrhyw anghenion arbennig neu anghenion dysgu ychwanegol yn
cael eu hadnabod yn fuan er mwyn sicrhau’r canlyniadau gorau ar gyfer y
disgyblion sydd angen cymorth;
·
Mae
GwE a'r Awdurdod Lleol yn ymdrechu'n barhaus i geisio cefnogi athrawon yn eu
rôl. Fe wnaethant dracio eu perfformiad a chynnig y
gefnogaeth briodol pan roedd angen. Y Corff Llywodraethu sydd â’r pwerau i
benodi neu ddiswyddo staff addysgu;
·
Er
bod yr Awdurdod Lleol yn cymryd lles disgyblion o ddifri, ar ganlyniadau
arholiadau allanol a chanlyniadau’r disgyblion yn y pen draw y byddant yn cael
eu barnu.
Teimlai'r Aelodau
Cyfetholedig y byddai'n bwysig bod GwE a'r Awdurdod lleol yn darparu
hyfforddiant a datblygiad digonol i Lywodraethwyr Ysgol i'w cynorthwyo i
adnabod y data pwysicaf a’i ddadansoddi’n gywir.
Ar ran y
Pwyllgor, diolchodd y Cadeirydd i’r Pennaeth Addysg am ei holl waith caled ar y
mater hwn.
PENDERFYNWYD yn
amodol ar y sylwadau uchod, bod y
Pwyllgor Archwilio Perfformiad yn derbyn yr adroddiad ac i wahodd y
Rheolwr Gyfarwyddwr GwE i fod yn bresennol yng nghyfarfod y Pwyllgor Perfformiad
ym mis Ionawr 2016, lle byddai'r canlyniadau arholiadau wedi’u gwirio yn cael
eu cyflwyno.
Canlyniadau Safon Uwch Chweched y Rhyl
Cyflwynodd
Pennaeth Addysg Bennaeth Cynorthwyol Coleg Llandrillo, Y Rhyl - Celia Jones, a
Rheolwr Rhaglen Chweched Y Rhyl - Martin Evans.
Rhoddodd Pennaeth
Cynorthwyol Coleg Llandrillo, y Rhyl, drosolwg o'r cefndir i sefydlu Chweched y
Rhyl a dywedodd wrth yr Aelodau bod canlyniadau Lefel A a Bagloriaeth Cymru a
gyflawnwyd gan y myfyrwyr eleni yn gadarnhaol ar y cyfan. Cyflwynwyd
gwybodaeth ystadegol i’r Pwyllgor yn dangos cyfraddau a graddau pasio y Coleg o
gymharu â Sir Ddinbych yn ei chyfanrwydd a Chymru a Lloegr.
Wrth ymateb i
gwestiynau'r Aelodau, dywedodd Pennaeth Cynorthwyol Coleg Llandrillo a Rheolwr
Rhaglen ar gyfer Chweched Y Rhyl:
·
Maent
wrthi’n gwneud darn o waith i ganfod nifer y myfyrwyr o'r Rhyl sy’n mynychu
ysgol neu gampysau coleg eraill ar gyfer eu haddysg bellach, ond yn gyffredinol
y gred oedd bod y mwyafrif o’r myfyrwyr presennol yn Chweched y Rhyl yn
gyn-ddisgyblion naill ai yn Ysgol Uwchradd y Rhyl neu Ysgol y Bendigaid Edward
Jones, ynghyd ag o ychydig o gyn ddisgyblion Ysgol Glan Clwyd;
·
Roedd amrywiaeth o resymau am y nifer ymddangosiadol
uchel o fyfyrwyr a oedd wedi rhoi'r gorau i’w cyrsiau rhwng blynyddoedd 12 a
13. Roedd y rhesymau yn cynnwys sylweddoliad ar ran y myfyrwyr nad llwybr Lefel
A oedd orau iddyn nhw. Roedd y myfyrwyr hyn yn dewis cyrsiau oedd
yn fwy galwedigaethol fel rheol. Roedd eraill wedi rhoi’r gorau i’w cyrsiau
Lefel A oherwydd diffyg cefnogaeth i’w hastudiaethau o gartref;
·
Mae
canlyniadau addysgol i bob myfyriwr sydd wedi’u cofrestru yn y coleg yn cael
tracio, ac er gwaethaf y canfyddiad bod nifer uchel o fyfyrwyr wedi rhoi’r
gorau i’w cyrsiau Lefel A rhwng Blynyddoedd 12 a 13, roedd y canlyniadau addysg
gwirioneddol i bob myfyriwr yn dda.
Mae pob un heblaw dau a fu
drwy Chweched y Rhyl y llynedd wedi cyflawni canlyniadau llwyddiannus;
·
Roedd
y Coleg yn cydnabod arwyddocâd pynciau Gwyddoniaeth, Technoleg, Peirianneg a Mathemateg
(STEM) a'u pwysigrwydd i'r economi lleol a chyflogwyr. Roedd
y Coleg yn gweithio’n agos gyda diwydiant lleol i geisio diwallu eu hanghenion
ac i fonitro cynnydd cyn-fyfyrwyr;
·
Yn
debyg i chweched dosbarth ysgolion, byddai myfyrwyr coleg yn dechrau astudio 4
pwnc AS ym mlwyddyn 12, gan symud ymlaen i astudio 3 Lefel A ym mlwyddyn 13.
Byddai myfyrwyr hefyd yn ymgymryd â Bagloriaeth Cymru. Byddai
myfyrwyr a oedd yn ei chael yn anodd yn ystod ac ar ddiwedd Blwyddyn 12 yn cael
eu cefnogi i drosglwyddo i gyrsiau eraill mwy addas. Ni
fyddai disgwyl iddynt adael y Coleg.
·
Roedd
myfyrwyr talentog a dawnus yn cael eu cefnogi i gyflawni eu llawn botensial, ac
roedd cynyddu nifer y dysgwyr sy'n mynd i un o Brifysgolion Grŵp Russell wedi ei adnabod fel un o’r
meysydd yn y Coleg i’w ddatblygu yn y flwyddyn i ddod, fel yr oedd gwella
cyfradd llwyddo cyffredinol y Coleg, ynghyd â’i broffil graddau.
Gan ymateb i
bryderon yr aelodau am y nifer y sefydliadau addysg uwch, gan gynnwys
prifysgolion mawr eu parch a oedd yn dal i fod yn amharod i gydnabod
Bagloriaeth Cymru fel cymhwyster mynediad ag enw da ar gyfer addysg uwch yn ei
rinwedd ei hun, dywedodd y Pennaeth Addysg a Cydlynydd Rhwydwaith 14-19 fod hyn
yn newid yn araf. Roedd Prifysgol Caergrawnt wedi cyhoeddi’n
ddiweddar y byddai yn cydnabod Bagloriaeth Cymru fel cymhwyster mynediad. Roedd
angen mwy o waith o bosibl gyda sefydliadau eraill i geisio eu perswadio am
ddilysrwydd Bagloriaeth Cymru ac i'w haddysgu ar yr ymdrech a wnaed gan
fyfyrwyr i ennill y cymhwyster.
Cyn i’r
drafodaeth ddod i ben, cytunodd y Cydlynydd Rhwydwaith 14-16 y byddai’n rhoi
adroddiad gwybodaeth i’r Aelodau am ddargadwad a datblygiad Dosbarthiadau
Chweched yn Sir Ddinbych.
Diolchodd y
Cadeirydd i Swyddogion y Coleg am ddod i'r Pwyllgor.
PENDERFYNWYD derbyn yr
wybodaeth am ganlyniadau Lefel A Chweched Rhyl, yn amodol ar yr arsylwadau
uchod.
Dogfennau ategol:
- Exam Results Report W 240915, Eitem 4. PDF 97 KB
- Exam Results 240915 Appendix 1-3, Eitem 4. PDF 61 KB
- Exam Results 240915 Appendix 4, Eitem 4. PDF 13 KB
- Exam Results 240915 Appendix 5, Eitem 4. PDF 40 KB
- Exam Results Report - App 6 240915, Eitem 4. PDF 96 KB
- Rhyl 6th Results Report W 240915, Eitem 4. PDF 359 KB
- Rhyl 6th Results Report - App 1W 240915, Eitem 4. PDF 183 KB