Eitem ar yr agenda

Ystyried adroddiad gan y Pennaeth Gwasanaethau Cefnogi Cymunedol (copi’n amgaeedig) a oedd yn cynnwys manylion argymhellion y Grŵp Tasg a Gorffen yn dilyn ei archwiliad o ganlyniadau'r ymarfer ymgynghori.

 

                                                                                10.10 a.m. – 10.45 a.m.

 

 

Roedd copi o adroddiad gan Bennaeth y Gwasanaethau Cymorth Cymunedol wedi’i ddosbarthu gyda'r papurau ar gyfer y cyfarfod.

 

Darparodd Gadeirydd Grŵp Tasg a Gorffen Gwasanaethau Cymdeithasol Mewnol, y Cynghorydd W. Mullen-James, grynodeb o bwrpas a gwaith y Grŵp Tasg a Gorffen, a diolch i’r swyddogion am eu gwaith caled.   Eglurodd mai cylch gorchwyl y Grŵp oedd ymgynghori ar ddyfodol gofal cymdeithasol oedolion mewnol a sicrhau cost effeithiolrwydd a gwerth gorau am arian yn Sir Ddinbych, gan sicrhau bod defnyddwyr yn cadw eu hunaniaeth a’u cysylltiadau â’r gymuned.  

 

Amlinellodd Bennaeth y Gwasanaethau Cymorth Cymunedol y canlyniadau gan y Grŵp Tasg a Gorffen yn dilyn cam cyntaf y broses ymgynghori, a oedd yn cynnwys gwybodaeth a gasglwyd o adolygiadau unigolion a’r teuluoedd sy’n defnyddio’r gwasanaethau.   Gofynnwyd i’r Pwyllgor roi sylwadau ar yr wybodaeth a gasglwyd a'r argymhellion dilynol gan y Grŵp Tasg a Gorffen ar yr opsiynau i'w cyflwyno i'r Cabinet ar gyfer ymgynghoriad ffurfiol â'r holl fudd-ddeiliaid.   Roedd gwerthusiad opsiynau wedi’i ddatblygu ar gyfer pob un o’r gwasanaethau mewnol a oedd wedi’u hystyried gan y Pwyllgor ym mis Hydref, 2014 a’r Cabinet ym mis Rhagfyr 2014, ac roedd eu hargymhellion wedi’u cynnwys yn yr adroddiad.

 

Eglurodd y Cynghorydd R.L. Feeley bod y gair “ymgynghori” wedi’i newid yn dilyn cyngor y Sefydliad Ymgynghori i sicrhau bod y broses yn cael ei hystyried fel ymarfer casglu gwybodaeth yn cynnwys teuluoedd a defnyddwyr gwasanaeth, cyn cynnal ymgynghoriad llawn a phriodol. 

 

Roedd manylion ar y fethodoleg a gytunwyd gan Tîm Gweithredol Corfforaethol ar gyfer asesu anghenion unigolion a chasglu eu barn ar ddyfodol y gwasanaeth yn ogystal â’r cylch gorchwyl a'r amserlenni ar gyfer yr ymgynghoriad, wedi’u darparu.   Roedd yr awgrymiadau gan y Grŵp Tasg a Gorffen yn Atodiad 1, yn dangos yn glir bod yr asesiadau a safbwyntiau unigolion a theuluoedd wedi'u hystyried wrth gynnig atebion sy'n canolbwyntio ar foderneiddio darpariaeth gwasanaethau drwy fodloni disgwyliadau Llywodraeth Cymru a'r boblogaeth ehangach o ran sut mae gofal modern a chymorth yn edrych, ar yr un pryd â chanolbwyntio adnoddau tuag at y meysydd lle mae’r galw uchaf a chyflawni’r arbedion gofynnol hefyd.

 

Roedd canlyniadau’r ymarfer casglu gwybodaeth wedi’u cynnwys yn yr adroddiad ynghylch Hafan Deg y Rhyl, Dolwen Dinbych, Awelon Rhuthun, Cysgod y Gaer Corwen a Chynlluniau Gofal Ychwanegol ym Mhrestatyn, y Rhyl a Rhuthun.

 

Hysbyswyd y Pwyllgor y byddai cyfanswm yr arbedion a nodwyd yn y cynigion yn cyfateb i £680mil dros gyfnod o 2 flynedd.   Roedd manylion y broses ymgynghori a gynhaliwyd, a'r risgiau posibl a’r camau a weithredwyd i’w lliniaru, wedi’u cynnwys yn yr adroddiad.

 

Eglurodd y Prif Weithredwr bod argymhelliad y Cabinet i ymgynghori’n ehangach wedi dechrau gan asesu anghenion defnyddwyr gwasanaeth.   Awgrymodd bod canfyddiadau’r ymgynghoriad ehangach ar ddarpariaeth gofal preswyl a gofal ychwanegol, gyda chefnogaeth tystiolaeth leol a chenedlaethol, yn cael eu hadrodd yn ôl i’r Cabinet.   Teimlwyd y dylid cyflwyno canfyddiadau’r ymgynghoriad i’r Sefydliad Ymgynghori, a bod manylion y rhesymau dros newid yn cael eu cyflwyno i’r cyhoedd.

 

Cyfeiriodd y Prif Weithredwr at y dystiolaeth lethol yn erbyn cartrefi gofal preswyl traddodiadol, gyda’r mwyafrif o ddefnyddwyr gwasanaeth yn mynegi dymuniad i aros yn eu cartrefi eu hunain gyda chefnogaeth gofal ychwanegol.   Amlinellwyd manylion opsiynau posibl trefniadau gweithio ar y cyd gyda’r Awdurdod Iechyd.   Fodd bynnag, eglurodd y Prif Weithredwr y byddai’n amhriodol peidio â datblygu’r cynigion tra nad oedd gweithio ar y cyd gyda’r Bwrdd Iechyd yn ddatrysiad hyfyw.

 

Eglurodd Bennaeth y Gwasanaethau Cymorth Cymunedol bod yr adroddiad yn adlewyrchu safbwyntiau’r cyhoedd a defnyddwyr gwasanaeth, gyda’r cynigion gwreiddiol wedi’u diwygio i gynnwys datrysiadau da iawn i ddarparu cefnogaeth.   Cadarnhawyd nad oedd amserlen na dyddiadau wedi’u cytuno hyd yn hyn, ac na fyddai unrhyw newidiadau’n cael eu gweithredu, nac unrhyw atgyfeiriadau’n cael eu hatal, cyn i’r Cabinet gytuno ar benderfyniad.   Cyfeiriwyd at safon uchel y gwasanaeth a ddarparwyd gan weithwyr gofal Sir Ddinbych, ac at weithio gyda'r Awdurdod Iechyd yn y dyfodol.   Cyfeiriodd at y datganiad o fwriad, targedau hyfforddi yn y dyfodol ac arbedion posibl yn cael eu cyflawni trwy ddarparu gwasanaethau mewn ffordd wahanol.

 

Darparwyd cadarnhad gan Bennaeth y Gwasanaethau Cymorth Cymunedol y gallai’r defnyddwyr gwasanaeth  aros yn eu lleoliadau presennol ac y byddai’n rhaid i’r Awdurdod ddiwallu eu hanghenion.   Fodd bynnag, gellir ystyried dulliau gwahanol o ddarparu a darparwyd manylion y ddarpariaeth gwasanaeth i gefnogi gofalwyr.

 

Cyfeiriodd y Cynghorydd H. Hilditch-Roberts at benderfyniad a wnaed gan y Cabinet y dylid cynnal ymarfer ymgynghori ehangach gan gynnwys y cyhoedd.   Eglurodd er ei fod yn croesawu newid roedd yn teimlo mai dim ond sylwebaeth ynglŷn â'r sefyllfa bresennol oedd wedi’i darparu ac nad oedd tystiolaeth o’r buddion i’r cyhoedd a’r defnyddwyr gwasanaeth yn yr adroddiad.   Amlygwyd bod angen darparu tystiolaeth benodol bod defnyddwyr gwasanaeth yn dymuno cael mwy o annibyniaeth, ynghyd â datblygu cynllun strategol cyn llunio unrhyw benderfyniad terfynol.   Pwysleisiodd bwysigrwydd yr angen i amlinellu safbwynt strategol gofal yn Sir Ddinbych i sicrhau eglurder yn y dyfodol.   Holodd y Cynghorydd Roberts sut y byddai darpariaeth gofal yn ardal Rhuthun yn cael ei ddiwallu yn y dyfodol.

 

Cododd yr Aelodau nifer o faterion a darparwyd yr ymatebion a ganlyn gan y swyddogion:-

 

·            Roedd unrhyw bryderon a godwyd gan aelodau o staff ynglŷn â darpariaeth gwasanaeth yn y dyfodol a’r gofynion wedi derbyn sylw ar unwaith.

·            Roedd ansawdd darpariaeth gwasanaeth wedi’i fonitro’n rheolaidd, gyda rheoli ansawdd yn sicrhau bod safonau darpariaeth wedi’u bodloni.

·            Roedd targedau hyfforddi ar waith i sicrhau bod staff wedi’u cyflogi gan sefydliadau annibynnol yn derbyn yr hyfforddiant cywir.

·            Eglurwyd y byddai’r costau’n gysylltiedig â darpariaeth gwasanaeth yn lleihau, ond gallai gynyddu dros gyfnod o amser gyda chwyddiant.

·            Mynegodd yr Aelodau’r safbwynt y dylid cynnal lefel y ddarpariaeth cyfrwng Cymraeg yn y gwasanaeth.

·            Mynegwyd cefnogaeth ar gyfer penderfyniad y Cabinet mewn perthynas â Dolwen, ac ynglŷn â chysondeb y staff yn y categorïau gwahanol yn y Cartref.

·            Cyfeiriwyd at y cysylltiad rhwng y GIG a darparwyr Gofal Cymdeithasol.

·            Mynegwyd pryder na allai’r lefel o ofal dydd sy’n cael ei ddarparu gan Sir Ddinbych a’i staff gael ei efelychu gan y darparwyr gofal dydd preifat.

·            Bod yr holl fudd-ddeiliaid perthnasol, gan gynnwys cymdeithasau tai, yn cael eu cynnwys yn y broses ymgynghori.

 

Ar ddisgresiwn y Cadeirydd siaradodd Mr David Jones o Langollen ynglŷn â’r darpariaeth gwasanaeth yn ardal Llangollen a’r dirywiad yn y galw am wasanaeth o ganlyniad i newid yn y gofynion cymhwysedd.   Cyfeiriodd at y cynnydd posibl yng nghostau’r gwasanaeth fesul preswylydd o ganlyniad i hyn ac amlinellodd yr cyfleoedd sydd ar gael i Sir Ddinbych ddylanwadu ar y Bwrdd Iechyd i sicrhau darpariaeth gofal cymdeithasol priodol.

 

Cyfeiriodd y Cadeirydd at y gefnogaeth a fynegwyd ar gyfer y penderfyniad a wnaed gan y Cabinet o ran ymarfer ymgynghori ehangach bod adroddiadau’r dyfodol yn cynnwys manylion yr ymchwil perthnasol a wnaed a chyfnod ymgynghori y gellir ei ymestyn os oes angen.

 

(a)            PENDERFYNWYD - bod y Pwyllgor yn:-

(b)             

(c)  cefnogi ystyriaeth y Cabinet o adroddiad ym mis Medi mewn perthynas â chynnal ymgynghoriad cyhoeddus.

(d)  argymell bod cynigion neu opsiynau yn adroddiadau'r dyfodol yn nodi'r ymchwil a’r dystiolaeth waelodol, ac

(e)  argymell y gellir ymestyn y cyfnod ymgynghori, os oes angen.