Eitem ar yr agenda

Ystyried adroddiad gan y Pennaeth Priffyrdd a Gwasanaethau Amgylcheddol (copi ynghlwm) ar safbwynt polisi'r Cyngor mewn perthynas â symud arwyddion heb eu hawdurdodi o dir priffyrdd, a sut y mae'r polisi yn cael ei weithredu.

10.55 a.m. tan 11.30 a.m.

 

 

Dosbarthwyd copi o adroddiad gan Bennaeth y Gwasanaethau Priffyrdd ac Amgylcheddol ar safbwynt polisi'r Cyngor mewn perthynas â symud arwyddion heb eu hawdurdodi o dir priffyrdd, a sut yr oedd y polisi yn cael ei weithredu, gyda’r papurau ar gyfer y cyfarfod.

 

Roedd mater arwyddion heb eu hawdurdodi wedi'i drafod gan y Pwyllgor ar 9 Medi, 2014, ac roedd manylion y canlyniad wedi'u cynnwys yn yr adroddiad.  Roedd y canllawiau diweddaraf i swyddogion wedi’u cynnwys fel Atodiad 1, ac roedd y Cyngor yn gwahaniaethu rhwng arwyddion masnachol, ac arwyddion digwyddiadau anfasnachol/cymunedol.  Roedd Atodiad 2 yn rhoi rhestr o enghreifftiau, er mwyn dangos sut mae'r gwahaniaeth wedi ei ddehongli yn ymarferol.   Oherwydd bod y polisi’n cyfeirio'n benodol at fathau o arwyddion heb eu hawdurdodi a fyddai’n cael eu goddef, teimlwyd y byddai’n anghywir i gyfeirio at hyn fel polisi “dim goddefgarwch".  Roedd Atodiad 3 yn darparu ffotograffau o enghreifftiau i gynorthwyo Aelodau.

 

Wrth gyflwyno'r adroddiad pwysleisiodd Aelod Arweiniol y Parth Cyhoeddus yr angen am waith partneriaeth effeithiol rhwng nifer o adrannau'r Cyngor er mwyn sicrhau triniaeth deg a chyfartal ar gyfer busnesau lleol, i helpu grwpiau cymunedol, a sicrhau diogelwch preswylwyr wrth ymdrin ag arwyddion heb eu hawdurdodi ar dir priffyrdd. 

 

Mynegodd Aelodau’r safbwyntiau a’r farn ganlynol yn ystod y drafodaeth a ddilynodd:-

 

- roedd y polisi wedi gweithio’n dda ym Mhrestatyn, lle’r oedd y broblem fwy neu lai wedi ei dileu.  Roedd astudiaeth ddichonoldeb wedi’i chomisiynu yn ddiweddar gan Gyngor Tref Prestatyn i archwilio a fyddai'n ymarferol i gynnig gofod hysbysebu i fusnesau ar fyrddau a gaiff eu codi mewn arosfannau bws sy’n eiddo i’r Cyngor Tref, a byddai ffi yn cael ei chodi;

 

- bu pryderon mewn trefi eraill am weithredu'r polisi, yn arbennig y diffyg canfyddedig o ran dull cyson o’i weithredu, ac roedd angen diffiniad clir o'r gwahanol gategorïau o ddigwyddiadau e.e. digwyddiadau cymunedol;

 

- mewn achosion syml, gellid gweithredu'r polisi yn uniongyrchol gan swyddogion.  Fodd bynnag, mewn achosion lle'r oedd anawsterau yn debygol o ddigwydd, dylid rhoi cyfle i’r aelod lleol gysylltu â threfnydd y digwyddiad neu'r busnes ynglŷn â'r arwyddion.  Dylid gwneud hyn mor gynnar â phosibl yn y broses. 

 

-  oni bai yr amharwyd ar ddiogelwch priffyrdd, cam cyntaf y broses fyddai cysylltu â pherchnogion yr arwyddion a/neu drefnwyr y digwyddiad, er mwyn ceisio datrys y sefyllfa.  Os nad oedd modd datrys y sefyllfa, dylid rhoi gwybod i’r aelod lleol ar unwaith;

 

- byddai'n ddefnyddiol i arwyddion gwybodaeth i dwristiaid gael eu cynnwys ar arwyddion ffyrdd presennol h.y. arwyddluniau i ddynodi'r cyfleusterau sydd ar gael mewn pentref/tref, ac

 

- i ganfyddiadau gwaith gweithgor y Gwasanaethau Cynllunio, Datblygu Economaidd a Phriffyrdd gael eu cyflwyno i’r Pwyllgor Archwilio maes o law i sicrhau ei fod yn cefnogi gweledigaeth y Cyngor ac yn cyflawni ei Gynllun Corfforaethol.

 

Nododd yr Arweinydd ei bryderon ynghylch yr angen i sicrhau cydbwysedd priodol rhwng hawliau a dyletswyddau’r Cyngor o ran camau gorfodi diogelwch priffyrdd a’i rôl datblygu economaidd.  Roedd angen i’r Cyngor gael ei weld yn meithrin a chefnogi busnes yn y Sir. 

 

Wrth ymateb i gwestiynau Aelodau gwnaeth y Pennaeth Gwasanaeth a’r Aelod Arweiniol:-

 

·bwysleisio y byddai swyddogion o'u gwirfodd yn dilyn pa bynnag bolisi yr oedd aelodau yn tybio oedd yn briodol mewn perthynas â'r broblem hon, cyn belled nad oedd yn peryglu diogelwch defnyddwyr y priffyrdd;

 

·pwysleisio nad yw'r polisi yn bolisi dim goddefgarwch, roedd wedi ei lunio mewn ymateb i bryderon yr aelodau o ran gormodedd o arwyddion heb eu hawdurdodi ar draws y Sir, cyfeiriwyd yn benodol mewn cyfarfod blaenorol at y briffordd drwy Lôn Parcwr, Rhuthun;

 

·tynnu sylw’r Aelodau at y diffiniad o ddigwyddiadau cymunedol, digwyddiadau elusennol ac ati fel y nodir yn Atodiad 2 i'r adroddiad;

 

·egluro’r gwahaniaethau rhwng camau gorfodi priffyrdd cyhoeddus a chyfreithiau cynllunio;

 

·cydnabod bod camgymeriadau wedi'u gwneud yn 2014 pan oedd arwyddion yn hysbysebu digwyddiadau cymunedol a oedd eisoes wedi’u cynnwys yn Strategaeth Ddigwyddiadau’r Sir, wedi’u tynnu i lawr fel rhan o weithredu'r polisi hwn.  Roddwyd sicrwydd na fyddai hyn yn digwydd eto eleni gan fod canllawiau wedi’u rhoi i swyddogion bellach a diffiniadau ar y mathau hyn o ddigwyddiadau.   Byddai'n ddefnyddiol pe gallai Aelodau ofyn i drefnwyr digwyddiad gysylltu â'r Gwasanaeth Priffyrdd i roi cyngor iddynt o ran pryd a lle'r oedd arwyddion hyrwyddo ar gyfer digwyddiadau cymunedol yn mynd i gael eu codi, a gallai'r gwasanaeth wedyn roi cyngor ar addasrwydd y lleoliad ar sail diogelwch;

 

·roedd y Cyfarwyddwr Corfforaethol: Uchelgais Economaidd a Chymunedol wedi comisiynu darn o waith i edrych ar sut y gallai’r Gwasanaeth Priffyrdd, Datblygu Economaidd a Busnes, a'r Gwasanaeth Cynllunio weithio’n well gyda'i gilydd er mwyn datblygu'r economi leol, sicrhau cydbwysedd priodol rhwng gorfodi a gweithgarwch cymorth busnes, a chefnogi busnesau lleol.  Byddai rhan o'r gwaith hwn yn cynnwys llunio ‘pecyn croeso’ ar gyfer busnesau newydd a fyddai’n egluro beth y gallent ei wneud a'r hyn na allent ei wneud o ran hysbysebu eu busnesau.  Hyd nes y bydd y gwaith hwn wedi’i gwblhau, byddai'r polisi presennol yn berthnasol, ond byddai swyddogion yn cael eu cynghori i ystyried y diffiniad o amrywiol fathau o ddigwyddiadau fel yn Atodiad 2 i'r adroddiad;

 

·cadarnhawyd bod byrddau ‘A’ yn cael eu caniatáu y tu allan i fusnesau cyn belled â bod digon o le i sicrhau diogelwch cerddwyr.

 

Ar ddiwedd y drafodaeth pwysleisiodd y Pwyllgor fod angen dull gweithredu synnwyr cyffredin o ran gweithredu’r polisi, gydag Aelodau lleol yn cael gwybod am unrhyw broblemau o fewn eu hardaloedd cyn gynted ag y byddant yn dod i'r amlwg.  Roedd angen i bobl fusnes a grwpiau cymunedol gael eu hymgysylltu ac ymwneud â'r broses yn gynnar mewn ymgais i'w cefnogi i gyflawni eu dyheadau a'r Cyngor i gyflawni ei flaenoriaethau corfforaethol datblygu economaidd a strydoedd glân a thaclus, wrth gynnal ei ddyletswyddau diogelwch cymunedol hefyd.  Felly:-

 

PENDERFYNWYD - yn amodol ar y sylwadau uchod -

 

(a) cefnogi'r egwyddorion a amlinellir yn y canllawiau, eu defnydd parhaus a datblygu 'pecyn croeso i fusnesau' i gynorthwyo a chefnogi busnesau newydd i sefydlu eu hunain a hyrwyddo eu gwasanaethau o fewn arferion a ganiateir;

(b) mynegi cefnogaeth i swyddogion Sir Ddinbych sy'n gorfod gweithredu'r polisi, weithiau o dan amgylchiadau anodd;

(c) dylid diwygio'r canllawiau polisi er mwyn cynnwys aelodau lleol yn y broses;

(d) cefnogi'r egwyddor o hawlio costau yn ôl gan unrhyw droseddwyr mynych sy'n dewis anwybyddu rhybuddion ysgrifenedig, a/neu unrhyw geisiadau gan aelodau lleol, ac yn parhau i osod arwyddion yn anghyfreithlon;

(e) cefnogi’r cynlluniau unigol sy'n cael eu datblygu mewn perthynas ag arwyddion a hysbysebion a awdurdodwyd yn briodol, yn enwedig arwyddion twristiaeth ac arwyddion cymdogaeth (mewn ardaloedd lle mae nifer o fusnesau’n cydfodoli); a

(f) gofyn bod canfyddiadau gwaith gweithgor y Gwasanaethau Priffyrdd, Datblygu Economaidd a Chynllunio yn cael eu cyflwyno i’r Pwyllgor Archwilio pan fydd wedi’i gwblhau i sicrhau ei fod yn cefnogi gweledigaeth y Cyngor ac yn cyflawni ei Gynllun Corfforaethol;