Eitem ar yr agenda
CATEGORÏAU IAITH HOLL YSGOLION SIR DDINBYCH
- Meeting of Pwyllgor Craffu Cymunedau, Dydd Iau, 12 Mawrth 2015 9.30 am (Item 5.)
- View the declarations of interest for item 5.
Ystyried
adroddiad gan y Pennaeth Addysg (copi ynghlwm) sy’n gofyn i’r Pwyllgor ystyried
canfyddiadau arolwg Grŵp Strategol y Gymraeg mewn Addysg o gategorïau
iaith ysgolion y sir.
9.35 a.m. tan 10.10 a.m.
Cofnodion:
Dosbarthwyd adroddiad gan y Pennaeth Addysg a oedd yn gofyn i’r Pwyllgor
ystyried canfyddiadau arolwg Grŵp Strategol y Gymraeg mewn Addysg o
gategorïau iaith ysgolion y Sir, gyda’r papurau ar gyfer y cyfarfod.
Ar 30 Medi 2014 penderfynodd y Cabinet ofyn i’r Grŵp Strategol Cymraeg
mewn Addysg adolygu categori iaith pob ysgol yn ystod tymor yr hydref a
chyflwyno adroddiad i'r Pwyllgor Archwilio ar ddechrau gwanwyn 2015.
Rhoddodd y Pennaeth Addysg grynodeb o gyd-destun a
meini prawf categoreiddio, sydd wedi’i gynnwys yn yr adroddiad, a rhoddodd
amlinelliad o gategoreiddio a chanlyniadau’r holiadur yn Atodiad 2 hefyd. Roedd
dadansoddiad o ymatebion wedi'i gynnwys yn Atodiad 3 ac roedd yr ymatebion wedi'u
gwirio yn erbyn canlyniadau addysgol presennol.
Dywedodd y Pennaeth Addysg a’r Aelod Arweiniol Addysg wrth yr Aelodau:-
·roedd dogfen
Llywodraeth Cymru (LlC) ‘Diffinio ysgolion yn ôl y ddarpariaeth cyfrwng Cymraeg
(2007)’ yn ganllaw a oedd yn nodi disgrifiadau a chategorïau ysgolion yn ôl
faint o Gymraeg sy’n cael ei defnyddio wrth addysgu a dysgu; ac yn y gwaith o
redeg ysgolion o ddydd i ddydd. Defnyddiwyd y canllawiau hyn, nad oedd ag unrhyw
sail mewn deddfwriaeth, gan awdurdodau addysg ledled Cymru wrth ddatblygu
gwybodaeth i rieni am gyfrwng iaith eu hysgolion;
·mewn ymateb i
benderfyniad y Cabinet ym mis Medi 2014 roedd y Grŵp Strategol Cymraeg
mewn Addysg wedi cynnal adolygiad o holl ysgolion y sir, cynradd ac uwchradd
(ar wahân i'r ysgolion arbennig), er mwyn asesu a oedd pob ysgol yn darparu eu
cwricwlwm o fewn y meini prawf diffiniedig ar gyfer eu categori presennol;
·roedd canlyniadau'r
asesiad hwn wedi nodi anghysondebau rhwng y categori iaith presennol a'r cyfrwng
o ddarparu’r cwricwlwm mewn pedair o ysgolion y Sir - 3 ysgol gynradd ac 1
ysgol uwchradd. Tra’r oedd un o'r ysgolion cynradd yn ysgol dwy ffrwd (Categori
2), nid oedd yr un o'i disgyblion wedi'u hasesu drwy gyfrwng y Gymraeg yn y
blynyddoedd diweddar, ond roedd disgwyl i ddau gael eu hasesu drwy gyfrwng y
Gymraeg eleni. Roedd ysgol gynradd arall, a oedd yn darparu ei
chwricwlwm yn Saesneg yn bennaf, ond gyda defnydd sylweddol o'r Gymraeg
(Categori 4), wedi nodi ei bod yn ysgol dwy ffrwd â digon o gapasiti i ddarparu
trwy gyfrwng y Gymraeg, ac mewn gwirionedd roedd rhai disgyblion wedi eu hasesu
drwy gyfrwng y Gymraeg yn y blynyddoedd diweddar. Roedd y drydedd ysgol gynradd wedi cydnabod
nad oedd ganddi gapasiti digonol mwyach i ddarparu addysg drwy gyfrwng y
Gymraeg i ganiatáu iddi barhau â'i statws Categori 4 presennol. Dylai felly fod
yn ysgol Categori 5 (cyfrwng Saesneg). O'r ddwy ysgol uwchradd
ddwyieithog yn y sir, sydd ar hyn o bryd a statws Categori 2B – darparu o leiaf
80% o addysg drwy gyfrwng y Gymraeg, roedd un wedi nodi y dylai bellach mae'n
debyg fod yng Nghategori 2C - rhwng 50% a 79% o'i chwricwlwm yn cael ei darparu
drwy gyfrwng y Gymraeg;
·yn y 7 mlynedd diwethaf
roedd y Sir wedi cofnodi cynnydd yn nifer y disgyblion sy'n cael eu haddysgu
drwy gyfrwng y Gymraeg o 17% i 23%, roedd hyn yn galonogol. Fodd bynnag
roedd ffordd hir i fynd eto os oedd y Cyngor i wireddu ei uchelgais tymor hir o
weld holl blant a phobl ifanc y sir yn gwbl hyderus a chymwys yn y Gymraeg ac
yn Saesneg pan fyddant yn gadael yr ysgol:
·roedd gan y Grŵp
Strategol Cymraeg mewn Addysg a'r Llywodraethwyr Ysgol rôl bwysig i'w chwarae
wrth fonitro a chefnogi ysgolion i fodloni a darparu'r cwricwlwm yn unol â’i
chategori iaith, a phe bai ysgol yn penderfynu na allai ddarparu yn unol â'i
chategori presennol mwyach, byddai’r rhaid dilyn proses statudol er mwyn newid
categori’r ysgol.
Nodwyd y pwyntiau canlynol gan yr Aelodau:-
- er bod
categoreiddio iaith ysgolion yn bwnc cymhleth, roedd angen archwilio'r
anghysonderau ym mhob un o'r pedair ysgol yn fanylach er mwyn ennill gwell
dealltwriaeth o'r ffactorau cyfrannol a oedd wedi arwain at yr anghysonderau a
nodi unrhyw gefnogaeth a allai fod ar gael iddynt;
- byddai hefyd yn
ddefnyddiol i archwilio'n fanwl y cynnydd a wnaed gan bob ysgol ar hyd y
continwwm iaith, yn enwedig yr ysgolion hynny a nodwyd eisoes o dan y Rhaglen
Moderneiddio Addysg fel rhai a oedd eisiau cynyddu eu darpariaeth cyfrwng
Cymraeg;
- dylid
archwilio’r holl gynlluniau gweithredu ad-drefnu ysgolion er mwyn sicrhau bod y
camau a nodwyd mewn perthynas â chategoreiddio iaith, gan gynnwys y cymorth
angenrheidiol sy'n ofynnol i helpu'r ysgolion gyda darparu addysg drwy gyfrwng
yr iaith benodedig, wedi eu gweithredu a’u cwblhau;
- byddai'n
ddefnyddiol at ddiben cynnal yr ymarfer uchod i gael dau neu dri o aelodau’r
Pwyllgor Archwilio i wasanaethu ar y Grŵp Strategol Cymraeg mewn Addysg. Mynegodd Dr D
Marjoram ei ddiddordeb mewn bod yn aelod o'r Grŵp at y diben hwn.
Yn dilyn trafodaeth bellach:-
PENDERFYNWYD – fod y Pwyllgor, yn amodol ar y sylwadau uchod yn: -
(a) nodi canfyddiadau'r
adolygiad o ddarpariaeth addysg ysgolion y Sir mewn perthynas â'u categori
iaith,
(b) argymell bod y Grŵp
Strategol Cymraeg mewn Addysg yn cynnal adolygiad pellach i ganfod y rhesymau
am yr anghysondebau yn y pedair ysgol a nodwyd yn yr adroddiad, gan nodi unrhyw
gymorth a allai fod ar gael iddynt i’w cefnogi wrth fynd ymlaen,
(c) gofyn bod y Grŵp
Strategol Cymraeg mewn Addysg hefyd yn archwilio’r cynnydd a wnaed gan bob ysgol
yn y sir ar hyd y continwwm iaith, yn enwedig yr ysgolion hynny a nodwyd o dan
y Rhaglen Moderneiddio Addysg fel rhai a oedd eisiau cynyddu eu darpariaeth
cyfrwng Cymraeg, a
(d) gofyn bod cais yn cael ei
wneud i’r Grŵp Cadeiryddion ac Is-gadeiryddion Archwilio benodi dau neu
dri Aelod o’r Pwyllgor Archwilio i wasanaethu ar y Grŵp Strategol Cymraeg
mewn Addysg at ddiben yr adolygiad pellach hwn.
Dogfennau ategol:
- Language Categorisation Report 120315, Eitem 5. PDF 105 KB
- Language Categorisation Report - App 1 120315, Eitem 5. PDF 56 KB
- Language Categorisation Report - App 2 120315, Eitem 5. PDF 316 KB
- Language Categorisation Report - App 3 120315.docx, Eitem 5. PDF 265 KB
- Language Categorisation Report - App 4 120315, Eitem 5. PDF 176 KB
- Language Categorisation Report - App 5 120315, Eitem 5. PDF 99 KB