Eitem ar yr agenda

Ystyried adroddiad gan Arweinydd Tîm Datblygu Economaidd a Busnes y De (copi ynghlwm) sy’n amlinellu’r sefyllfa gyfredol gyda’r Undeb Ewropeaidd (yr UE) a chronfeydd eraill sydd ar gael ar gyfer buddion Cymunedol.

                                                                                   9.35 a.m. tan 10.10 a.m.

Roedd adroddiad gan Arweinydd Tîm Datblygu Economaidd a Busnes y De oedd yn amlinellu’r sefyllfa gyfredol gyda’r Undeb Ewropeaidd (yr UE) a chronfeydd eraill sydd ar gael ar gyfer buddion Cymunedol wedi’i gylchredeg gyda’r papurau ar gyfer y cyfarfod.

Roedd yr adroddiad yn nodi'r sefyllfa gyfredol ac argaeledd ffynonellau cyllid posibl, yn amodol ar feini prawf cymhwyso, ar gyfer buddion Cymunedol.   Roedd yn nodi’r gefnogaeth sydd ar gael i grwpiau Cymunedol wrth wneud cais am gyllid trwy asiantaethau allanol a rhwydweithiau cefnogaeth, ac yn darparu canllawiau ynglŷn â phrif ffynonellau’r UE a mathau eraill o gyllid sydd ar gael ar hyn o bryd.

Roedd canllaw i’r prif ffynonellau cyllid sydd ar gael ar hyn o bryd wedi’u darparu ac yn cynnwys Cyllid yr UE a Chronfeydd Strwythurol yr UE 2014-2020. Eglurwyd y byddai swm y cyllid cyfatebol yn amrywio yn ôl pob thema a phrosiect.   Roedd cyfraddau lefelau grant y rhaglen wedi’u darparu i nodi’r lefelau grant a ragwelir.   Roedd amcanion buddsoddi ar gyfer rhaglenni yng Nghymru wedi’u hamlinellu yn yr adroddiad.

Hysbysodd yr Arweinydd Tîm y Pwyllgor wrth gyflwyno ei hadroddiad bod:-

·Canolbwynt rownd newydd Cyllid Ewropeaidd wedi newid.    Dan y rhaglen newydd byddai llai o brosiectau lleol yn derbyn cyllid, byddai pwyslais ar brosiectau strategol mawr fyddai’n cael eu darparu naill ai yn isranbarthol, yn rhanbarthol neu hyd yn oed yn genedlaethol:

·Penodwyd Cadwyn Clwyd fel y Grŵp Gweithredu Lleol i ddarparu elfen ARWEINYDD y Cynllun Datblygu Gwledig (CDG) 2014/20, ond gan nad oedd yr Undeb Ewropeaidd wedi cymeradwyo’r CDG hyd yn hyn, ni fyddai’r cyllid ar gyfer y prosiectau’n cael ei ryddhau ac o ganlyniad roedd y staff wedi’u rhyddhau neu roeddent dan hysbysiad diswyddo.   Nid oedd hyn yn sefyllfa ddelfrydol ond roedd tu hwnt i reolaeth y Cyngor;

·Roedd Cyngor Gwasanaethau Gwirfoddol Conwy wedi'u penodi yn weinyddwyr Cronfa Fferm Wynt Gwynt y Môr yn ddiweddar.   Roedd hyn yn gais consortia, a oedd yn cynnwys Cyngor Gwasanaethau Gwirfoddol Sir Ddinbych a Chyngor Gwasanaethau Gwirfoddol Sir y Fflint ymysg y partneriaid eraill.   Roedd y Grŵp Ymgynghorol yn awr wedi trefnu cyfarfod ar 7 Ebrill i drafod meini prawf cymhwyso prosiect a sut i symud ymlaen â dosbarthiad grant ac arian.  

Mewn ymateb i gwestiynau'r Aelodau, fe gynghorodd yr Arweinydd Tîm-

-  O ran Cronfa Gymunedol Gwynt y Môr roedd rhai anghysondebau ynglŷn â pha mor bell i mewn i’r arfordir y dylid dyrannu buddion y Gronfa, y rheswm dros hyn yw er bod y tyrbinau eu hunain oddi ar y lan roedd effaith weledol ar hyd yr arfordir, ac roedd y cysylltiadau a’r is-orsaf gysylltiol ar y tir, gyda’r is-orsaf ger Llanelwy, a

- Fel rhan o waith Grŵp Ymgynghorol Gwynt y Môr roedd gan swyddogion Sir Ddinbych berthynas waith dda gyda’r holl bartneriaid, gan gynnwys Cyngor Gwasanaethau Gwirfoddol Conwy.   Hyd yma roedd Sir Ddinbych wedi’i gynrychioli ar Grŵp Ymgynghorol Gwynt y Môr gan swyddogion, ond nawr bod gweinyddydd y gronfa wedi’i benodi mae’n debyg y byddai’r aelodaeth a’r strwythurau yn cael eu hadolygu;

- Roedd symiau o arian gohiriedig yn cael eu gweinyddu gan nifer o adrannau’r Cyngor e.e. y Parth Cyhoeddus, Cynllunio a Gwarchod y Cyhoedd, Gwasanaethau Priffyrdd a’r Amgylchedd, yn dibynnu ar y rheswm pam fod y symiau gohiriedig wedi’u dyrannu.   Cadarnhaodd bod holl symiau gohiriedig mannau agored wedi’u hymrwymo;

- Gofynion cyllid cyfatebol ar gyfer y rownd newydd o gyllid Ewropeaidd fyddai:   Cronfeydd Strwythurol:  75% cyllid grant, 25% cyllid cyfatebol; CDG:   80% cyllid grant, 20% cyllid cyfatebol.  Nid oedd arian cyllid cyfatebol wedi’i ddyrannu gan y Cyngor eto.   Byddai dyraniad cyllid cyfatebol yn cael ei ystyried ar rinweddau pob prosiect.   Roedd un prosiect wedi’i gyflwyno hyd yn hyn, roedd hyn yn ymwneud â phrosiect sgiliau addysg ar gyfer myfyrwyr 14 i 19 mlwydd oed oedd mewn perygl o adael byd addysg   Byddai elfen cyllid cyfatebol y prosiect ar ffurf staff y Cyngor yn prynu darpariaeth cwricwlwm amgen i leihau’r risg o adael byd addysg;

- Byddai cefnogaeth i gael gwybodaeth a derbyn cyllid ar gyfer prosiectau yn y dyfodol ar gael trwy Gyngor Gwirfoddol Cymru, oedd yn darparu cefnogaeth benodol ar gyfer y math hwn o waith.   Byddai gwybodaeth ar gael ar wefan GwerthwchiGymru hefyd;

- Roedd dadansoddiad bwlch yn cael ei gyflawni i geisio nodi meysydd o wasanaethau anstatudol fyddai'n elwa o gyllid CDG yn y dyfodol.   Eglurwyd y byddai gan y Cynghorwyr rôl bwysig wrth symud ymlaen fel cyswllt rhwng cymunedau a ffrydiau ariannu, gan y byddent yn allweddol i gyfeirio grwpiau cymunedol ac ati at CGGSDd / Cyngor Gwirfoddol Cymru, i gael cyngor a chefnogaeth;

- Nid oedd yr holl gronfeydd cymunedol yn darparu cyllid datblygu at ddibenion cwmpasu prosiectau, fodd bynnag roedd cyllid datblygu ar gael ar gyfer rhai prosiectau’r Loteri FAWR;

- Roedd rhai prosiectau isadeiledd mawr sy’n cael eu noddi gan Fwrdd Uchelgais Economaidd Gogledd Cymru, megis trydaneiddio’r rheilffordd yng Ngogledd Cymru, neu'r morlyn llanw arfaethedig, y tu hwnt i gwmpas Cronfeydd Strwythurol Ewrop oherwydd eu maint a'r gost;

- Nid oedd yn ymwybodol o gyllid cymunedol sydd ar gael i gynorthwyo rhai sy’n prynu tai am y tro cyntaf i gael mynediad i’r farchnad dai, ond byddai’n holi’r Landlordiaid Cymdeithasol Cofrestredig i weld os oeddent yn cynnig cyllid i’r diben hwn, a byddai’n gwirio i weld os oedd y rheolau yn ymwneud â symiau gohiriedig ar gyfer gofodau gwyrdd wedi newid.

Roedd y Pwyllgor yn awyddus bod Aelod Etholedig yn cael ei benodi i gynrychioli Sir Ddinbych ar gorff olynol Bwrdd Ymgynghorol Cronfa Gymunedol Gwynt y Môr gan fod Gweinyddydd y Gronfa wedi’i benodi yn awr.   Cytunwyd hefyd y dylid nodi, yn y gwahoddiad  i CGGSDd fynychu cyfarfod o’r Pwyllgor, dymuniad yr Aelodau i drafod rôl CGGSDd gyda’i gynrychiolwyr i gynorthwyo cymunedau i dderbyn y ffrydiau amrywiol o gyllid cymunedol allanol sydd ar gael iddynt.   

Yn dilyn trafodaeth bellach:-

PENDERFYNWYD -

(a) derbyn yr wybodaeth, yn amodol ar yr arsylwadau uchod;

(b) nodi rôl yr Aelodau yn y gymuned i nodi prosiectau a chodi ymwybyddiaeth o ffynonellau cyllid sydd ar gael i grwpiau cymunedol gyda’r diben o wneud y gorau o’r buddion i’r cymunedau a chefnogi darpariaeth blaenoriaethau corfforaethol a Chynllun Corfforaethol y Cyngor;

(c) argymell y dylid cyflwyno sylwadau i Grŵp Ymgynghorol Cronfa Gymunedol Gwynt y Môr yn nodi y dylai bod Aelod Etholedig ar y corff perthnasol fydd yn goruchwylio dyfarniad cyllid grant yn y dyfodol; a

(d) bod cyfarfod gyda Chyngor Gwasanaethau Gwirfoddol Sir Ddinbych yn y dyfodol yn cynnwys trafodaeth ar rôl y sefydliad i gynorthwyo a chefnogi grwpiau cymunedol i gael cyngor ynghylch ffrydiau cyllid cymunedol allanol.