Eitem ar yr agenda
RHAGLEN MODERNEIDDIO ADDYSG - YSGOLION CYNRADD ARDAL RHUTHUN
- Meeting of Cabinet, Dydd Mawrth, 13 Ionawr 2015 10.00 am (Item 5.)
- View the declarations of interest for item 5.
Ystyried
adroddiad gan y Cynghorydd Eryl Williams, Aelod Arweiniol ar gyfer Addysg
(copi’n amgaeedig) sy'n ceisio cymeradwyaeth y Cabinet i ddechrau ymgynghori ar
gynigion trefniadaeth ysgolion ac i awgrymu bod y Cyngor yn cymeradwyo
buddsoddiad mewn tri phrosiect ysgol gynradd yn ardal Rhuthun.
Penderfyniad:
PENDERFYNWYD
bod y Cabinet yn -
(a) cymeradwyo symud ymlaen i ymgynghori'n
ffurfiol ar y cynnig i gau Ysgol Llanfair DC ac Ysgol Pentrecelyn ar 31 Awst
2016 ac agor ysgol a reolir yn wirfoddol Categori 2 newydd ar y safleoedd
presennol ar 1 Medi 2016.
(b) cymeradwyo symud ymlaen i ymgynghori'n
ffurfiol ar y cynnig i gau Ysgol Rhewl ar 31 Awst 2017 a throsglwyddo’r
disgyblion i Ysgol Penbarras neu Ysgol Stryd y Rhos i gyd-daro ag agor yr
adeiladau ysgol newydd, ac
(c) argymell y dylai’r Cyngor cymeradwyo’r
Achosion Busnes a’r Dyraniad Cyfalaf ar gyfer
1.
Ysgol Safle
Glasdir i ddisodli’r ddarpariaeth bresennol yn Ysgol Stryd y Rhos / Ysgol
Penbarras
2.
adeilad ysgol newydd ar gyfer
Ysgol Carreg Emlyn
3.
adeilad ysgol newydd ar gyfer
ysgol ardal Llanfair a Phentrecelyn, yn amodol ar ganlyniad y cynigion
trefniadaeth ysgolion.
Cofnodion:
Cyflwynodd y Cynghorydd Eryl Williams yr adroddiad
yn ceisio cymeradwyaeth y Cabinet i ddechrau ymgynghori ar gynigion
trefniadaeth ysgolion sy'n codi o adolygiad ardal Rhuthun, ac argymell i'r
Cyngor gymeradwyo buddsoddiad ar gyfer tri phrosiect ysgol gynradd yn yr ardal.
Roedd Aelodau'r Cabinet wedi ymgyfarwyddo gyda
phob ysgol sy’n destun adolygiad ardal Rhuthun, ac roeddent yn gwbl ymwybodol o
anghenion a gofynion pob un o'r ysgolion hynny.
Pwysleisiwyd nad oedd penderfyniad wedi’i wneud ynghylch y cynigion, a
gofynnwyd am gymeradwyaeth i gychwyn y broses ymgynghori. O ran yr ymrwymiad ariannol i brosiectau
ysgol, dywedodd y Cynghorydd Julian Thompson, yn dilyn adolygiad o'r achosion
busnes, bod y Grŵp Buddsoddi Strategol wedi argymell cymeradwyo. Eglurodd nad oedd y prosiectau yn rhan o'r
prosiectau a ariennir gan Ysgolion yr 21ain Ganrif, ond roedd gan y Cyngor
ddigon o gyfalaf mewnol i'w cyflawni.
Ychwanegodd y Cynghorydd Eryl Williams, er nad oedd unrhyw ddibyniaeth
ar gyllid allanol, roedd yn obeithiol y gellid diogelu cyllid Ysgolion yr 21ain
Ganrif.
Roedd y rhesymeg y tu ôl i ad-drefnu ysgolion
cynradd yn Rhuthun wedi cael ei nodi yn yr adroddiad, a thrafododd y Cabinet
gyda swyddogion ynghylch argymhellion yr adroddiad, er mwyn symud ymlaen i gam
nesaf y cynigion trefniadaeth ysgolion.
Roedd prif bwyntiau trafod ynghylch yr argymhellion yn cynnwys -
·
Ymgynghoriad ar y cynnig i gau Ysgol
Llanfair DC ac Ysgol Pentrecelyn ac agor ysgol wirfoddol a reolir newydd
Categori 2
Rhoddwyd gwybod i’r Cabinet am y gefnogaeth
gyffredinol i'r ysgol ardal gymryd lle'r ddwy ysgol, yn enwedig o ystyried
cyflwr yr adeiladau presennol. Y mater dadleuol yn y cynnig hwn
oedd categoreiddio iaith yr ysgol newydd, ond y bwriad oedd peidio â dechrau
trafodaeth ar hyn o bryd, ond i ddechrau ymgynghori ac adrodd yn ôl i gyfarfod
yn y dyfodol. Nodwyd bod rhieni a phartïon eraill â
diddordeb eisoes wedi codi pryderon, a sicrhawyd y byddai'r holl faterion a
godwyd yn cael eu trafod a'u hystyried yn ofalus yn ystod y broses ymgynghori
cyn gwneud penderfyniad. Roedd yr
Arweinydd wedi cyfarfod cynrychiolwyr o'r ddwy ysgol, a siaradodd am y
teimladau cryf o gwmpas y mater categoreiddio a'r gwahanol safbwyntiau a
geir. Roedd yn awyddus i ysgol newydd
fod o’r budd gorau i’r plant a'r ardal yn y dyfodol. Cyfeiriwyd at yr adolygiad o gategoreiddio
iaith ysgolion y sir, a rhoddodd y swyddogion sicrwydd bod categoreiddio pob
ysgol yn cael ei fonitro trwy'r Grŵp Strategol Cymraeg mewn Addysg. Teimlai'r Cynghorydd Meirick Davies yn gryf y
dylai'r ymgynghoriad gynnwys agor ysgol Categori 1 newydd yn hytrach na
Chategori 2. Derbyniodd y Cynghorydd Eryl Williams y farn honno, ond ymatebodd
y byddai'r dadleuon o ran categoreiddio yr un fath, a byddai'r holl faterion yn
cael eu hystyried yn ystod y broses ymgynghori.
Gofynnwyd am sicrwydd na fyddai disgyblion dan anfantais oherwydd y
newid dilynol i’r categoreiddio iaith, ac amlygodd y swyddogion y ffaith bod
disgyblion ffrwd Gymraeg mewn ysgolion Categori 2 yn gorfod cyflawni'r un
canlyniadau â disgyblion mewn ysgolion Categori 1.
·
Ymgynghoriad ar y cynnig i gau Ysgol Rhewl
gyda disgyblion yn trosglwyddo i Ysgol Pen Barras neu Stryd y Rhos
Ailadroddwyd y rhesymeg y tu ôl i'r cynnig yn
seiliedig ar gynaliadwyedd tymor hir Ysgol Rhewl. Mynegwyd rhai amheuon ynghylch a allai'r
ysgol arfaethedig yng Nglasdir ddal disgyblion ychwanegol o ystyried y nifer
arfaethedig o leoedd ysgol. Eglurodd
swyddogion y cyfrifiadau ar gyfer nifer y disgyblion ynghyd ag ystyriaethau
eraill gan gynnwys lleoedd dros ben - roedd hyblygrwydd o fewn y broses ar hyn
o bryd a fyddai'n caniatáu ar gyfer diwygio rhagamcanion disgyblion, yn dibynnu
ar ganlyniadau eraill fel y rhai sy'n ymwneud ag Ysgol Rhewl ac Ysgol Llanbedr,
a fyddai'n caniatáu i'r ysgol gael maint priodol ar gyfer yr ardal. Cyflwynodd y Cynghorydd Huw Williams
ymddiheuriadau gan y Cynghorydd Merfyn Parry, a rhannodd safbwyntiau
Llywodraethwyr Ysgol Rhewl a fyddai'n ymgyrchu yn erbyn cau ysgolion. Dywedodd y swyddogion bod y Pennaeth wedi
cael gwybod yn anffurfiol cyn cyfarfod y Cabinet, a dylid codi pob mater arall
fel rhan o'r broses ymgynghori. O ran
lleoedd dros ben, ni fyddai'n briodol defnyddio meini prawf gwahanol i
brosiectau ysgol nad ydynt yn destun arian ysgolion yr 21ain ganrif. Amlygodd y Cynghorydd Martyn Holland
bwysigrwydd cyfathrebu, ac adroddodd y swyddogion ar hyd a lled yr ymgynghoriad
yn hyn o beth er mwyn darparu proses agored a thryloyw.
·
Argymell i'r Cyngor gymeradwyo'r achosion
busnes a dyraniad cyfalaf ar gyfer tri phrosiect ysgol gynradd yn ardal Rhuthun
Amlygodd y Cynghorydd Eryl Williams bwysigrwydd
dyrannu cyllid penodol ar y cam hwn er mwyn rhoi mwy o sicrwydd ac adlewyrchu
ymrwymiad y Cyngor i'r prosiectau adeiladu ysgolion os yw'r cynigion yn cael eu
cymeradwyo.
(I) Safle Glasdir (adleoli o Stryd y Rhys/ Ysgol Pen Barras) - Eglurodd y Swyddogion y cynnig ar gyfer dwy ysgol ar safle a rennir yng
Nglasdir a rhoddwyd adroddiad am eu trafodaethau gyda chynrychiolwyr ysgol
ynglŷn â’u gofynion, a fyddai'n cael eu diwallu cyn belled ag y bo modd, o
ystyried cyfyngiadau ariannol y prosiect ac sy’n cael sylw fel rhan o’r cam
dylunio manwl. Croesawodd yr Aelodau Lleol y cynigion ar
gyfer y ddwy ysgol ar safle Glasdir, ond codasant nifer o faterion sydd angen
eu hystyried, yn bennaf o gwmpas y defnydd o gyfleusterau a rennir a rheoli
traffig, gan dynnu sylw at y ffaith bod cyfraniad gan gynrychiolwyr ysgolion yn
hollbwysig wrth ystyried eu gofynion yn y dyfodol. Fe wnaeth y swyddogion gydnabod bod dyluniad
cywir o’r adeilad yn hanfodol, gan roi adroddiad am waith a wnaed i reoli
disgwyliadau a gofynion yr ysgolion i sicrhau effeithlonrwydd er budd y ddwy
ysgol o fewn y cyfyngiadau ariannol ac amser ar gyfer y prosiect. Byddai unrhyw dderbyniadau cyfalaf a
gynhyrchir ar ôl cwblhau'r prosiectau ysgol yn cael eu cadw’n
gorfforaethol. Rhoddwyd sicrwydd pellach
y byddai nifer y lleoedd ysgol yn cael eu diwygio’n briodol yn dilyn
canlyniadau adolygiadau eraill yn ymwneud ag Ysgol Rhewl ac Ysgol
Llanbedr. Derbyniwyd hefyd bod caniatâd
cynllunio ar gyfer safle Glasdir wedi dod i ben, ond roedd swyddogion mewn
cysylltiad â Swyddogion Cynllunio ac yn hyderus na fyddai cael caniatâd
cynllunio yn broblem gyda'r dyluniad cywir.
(Ii) Ysgol Carreg Emlyn - Hysbyswyd yr Aelodau bod yr adroddiad yn
cynnwys amserlenni dangosol ar gyfer adeilad arfaethedig yr ysgol newydd, ond
roedd yn debygol y gallai'r prosiect ddechrau yn gynt os cânt gymeradwyaeth gan
nad oedd gofyniad i gyflwyno hysbysiad statudol ynghylch y cynnig.
(Iii) Ysgol Ardal Llanfair a Phentrecelyn – Roedd y cynnig ar gyfer adeilad ysgol newydd ar
gyfer ardal Llanfair a Phentrecelyn wedi cael ei drafod fel rhan o'r
argymhelliad cyntaf.
Wrth gynnig yr argymhellion, diolchodd y
Cynghorydd Eryl Williams i'r aelodau am eu cyfraniadau at y ddadl.
PENDERFYNWYD
bod y Cabinet yn -
(a) cymeradwyo symud ymlaen i ymgynghori'n
ffurfiol ynghylch y cynnig i gau Ysgol Llanfair DC ac Ysgol Pentrecelyn o 31
Awst 2016, ac i agor ysgol Wirfoddol a Reolir newydd Categori 2 ar y safleoedd
presennol ar 1 Medi 2016;
(b) cymeradwyo symud ymlaen i ymgynghori'n
ffurfiol ar y cynnig i gau Ysgol Rhewl o 31 Awst 2017, gyda disgyblion yn
trosglwyddo i naill ai Ysgol Pen Barras neu Stryd y Rhos i gyd-fynd ag agoriad
yr adeiladau ysgol newydd, ac
(c) argymell i'r Cyngor gymeradwyo'r
achosion busnes a dyraniad cyfalaf ar gyfer
1.
disodli darpariaeth bresennol
Stryd y Rhos / Ysgol Pen Barras ar Safle Glasdir
2.
adeilad ysgol newydd ar gyfer
Ysgol Carreg Emlyn
3.
adeilad ysgol newydd ar gyfer
ysgol ardal Llanfair a Phentrecelyn, yn amodol ar ganlyniad y cynigion
trefniadaeth ysgolion.
Ar
y pwynt hwn (11.30am) cafwyd egwyl ar gyfer lluniaeth.
Dogfennau ategol:
- MEP - RUTHIN PRIMARY AREA, Eitem 5. PDF 93 KB
- MEP - RUTHIN PRIMARY AREA - APP 1, Eitem 5. PDF 73 KB
- MEP - RUTHIN PRIMARY AREA - APP 2, Eitem 5. PDF 1 MB
- MEP - RUTHIN PRIMARY AREA - APP 2(1), Eitem 5. PDF 329 KB
- MEP - RUTHIN PRIMARY AREA - APP 3, Eitem 5. PDF 771 KB
- MEP - RUTHIN PRIMARY AREA - APP 3(1), Eitem 5. PDF 469 KB
- MEP - RUTHIN PRIMARY AREA - APP 4, Eitem 5. PDF 99 KB
- MEP - RUTHIN PRIMARY AREA - APP 4(1), Eitem 5. PDF 99 KB
- MEP - RUTHIN PRIMARY AREA - APP 4(2), Eitem 5. PDF 99 KB
- MEP - RUTHIN PRIMARY AREA - APP 4(3), Eitem 5. PDF 99 KB
- MEP - RUTHIN PRIMARY AREA - APP 4(4), Eitem 5. PDF 99 KB