Eitem ar yr agenda
FFRAMWAITH AR GYFER DARPARU GWASANAETHAU IECHYD A GOFAL CYMDEITHASOL AR GYFER POBL HŶN AG ANGHENION CYMHLETH
- Meeting of Pwyllgor Craffu Partneriaethau, Dydd Iau, 6 Tachwedd 2014 9.30 am (Item 5.)
- View the declarations of interest for item 5.
Ystyried adroddiad ar y cyd (copi ynghlwm) ynglŷn â’r camau gweithredu a gymerwyd er mwyn datblygu’r gwasanaethau integredig a’r strwythur llywodraethu mewn perthynas â darparu gwasanaethau integredig ar gyfer pobl hŷn.
9:35 – 10:05
Cofnodion:
Cyflwynwyd yr
adroddiad gan Aelod Arweiniol dros Ofal
Cymdeithasol i Oedolion
a Gwasanaethau Plant
yr adroddiad (a ddosbarthwyd ymlaen llaw) tra y bu’r Pennaeth
Gwasanaethau Oedolion a Busnes a Chyfarwyddwr Cynllunio Dros Dro BIPBC, yn rhoi
gwybod i’r pwyllgor sut roedd y prosiect yn datblygu mewn perthynas â meysydd
priodol.
Fe atgoffwyd y Pwyllgor o faint y prosiect hwn gan ddweud bod y Comisiynydd
Pobl Hŷn yn awyddus iawn i hyrwyddo’r gwasanaeth a’i weld yn ymestyn i
fodel gwasanaeth 7 diwrnod. Er mwyn i hyn gael ei gyflawni mae angen gwneud
llawer iawn o waith ac mae angen dod o hyd i’r adnoddau i'w gefnogi. Nodwyd:
• bod gan ddefnyddwyr gwasanaeth gyfradd boddhad uchel gyda'r gwasanaeth hyd yn hyn
• yn allweddol i
gyflwyno gwasanaeth da fyddai llywodraethu da, felly yn ystod y misoedd nesaf,
bydd y Bwrdd Iechyd a Gofal Cymdeithasol Sir Ddinbych yn cael ei adolygu er
mwyn sicrhau ei fod yn addas at y diben ac yn cyd-fynd â strwythurau newidiol y
Bwrdd Iechyd.
Mynegodd aelodau'r pwyllgor bryderon am adroddiadau a dderbyniwyd gan
etholwyr bod gofal cleifion mewn ysbytai yn amhersonol weithiau, a bod y diffyg
empathi a phryder ymddangosiadol wedi gadael rhai pobl â chanfyddiad o safon
wael o nyrsio.
Cydnabuwyd bod y
mater hwn wedi cael sylw fel maes pryder yn Adroddiad Andrews yn ddiweddar,
'Ymddiried mewn Gofal', ar Fwrdd Iechyd Prifysgol Abertawe Bro Morgannwg, ac yn
sgil hynny, roedd pob Bwrdd Iechyd wedi ei adolygu. Mae hyn wedi arwain at
gyflwyno ymweliadau dirybudd a’r Cyngor Iechyd Cymuned (CIC) i weithredu
"gwylio gofal" mewn ysbytai.
Parhaodd y Cyngor
Iechyd Cymuned i gynnal ymweliadau â
rhybudd a rhai dirybudd ar bob agwedd o ofal, gan gynnwys trugaredd ac
urddas. Mae'r ymweliadau hyn wedi bod yn arf hynod o werthfawr ar gyfer nodi
arferion gwaith da a drwg ac i rannu arfer da. Fe wnaeth cynrychiolwyr iechyd
wirio a oedd hawl i’r ymweliadau hyn ddigwydd yn ystod 'amser llonydd i gael
bwyd'.
Roedd cynrychiolwyr o’r Bwrdd Iechyd yn cydnabod
bod angen gwneud mwy o waith i addysgu’r
staff Iechyd am fanteision ymweliadau
Cyngor Iechyd Cymuned ar gyfer cleifion a
gweithwyr iechyd fel eu gilydd. Mae angen meddwl am y Cyngor Iechyd
Cymuned fel cyfaill cefnogol yn hytrach na gwrthwynebydd beirniadol.
Clywodd y
Pwyllgor fod Ysbyty Maelor Wrecsam wedi bod yn cymryd rhan mewn cynllun peilot
o'r enw 'i Want
Great Care’, a oedd yn holi
barn cleifion am eu profiadau gofal yn yr ysbyty. Fel yr arfer, bydd y cynllun
peilot hwn yn cael ei werthuso ar ôl iddo ddod i ben ym mis Ionawr 2015 cyn dod
i benderfyniad ar ei addasrwydd i’w gyflwyno ar draws sefydliadau Bwrdd Iechyd
eraill. Byddai angen ystyried yr amharodrwydd posibl i adrodd nôl ar brofiad
negyddol petai angen triniaeth barhaus.
Rhoddwyd sicrwydd
i’r aelodau gan swyddogion Iechyd a Gwasanaethau Cymdeithasol:
• bod trugaredd ac urddas yn ffurfio rhan o'r rhaglen hyfforddi nyrsio
sylfaenol;
• bod trin pobl ag urddas a thrugaredd yn rhan annatod o alwedigaethau
iechyd a gofal cymdeithasol;
• y dylai pawb gael eu trin yn gwrtais a chyda pharch bob amser a dylid
annog staff i roi gwybod am unrhyw ddigwyddiadau nad oedd yn cyrraedd y nod hwn.
Eglurodd Pennaeth y Gwasanaethau Oedolion a Busnes bod staff rheng flaen
wedi cael hyfforddiant gwasanaeth cwsmeriaid yn
ddiweddar ar "Dull Sir Ddinbych" a oedd wedi arwain at lyfr
gwaith a fyddai'n cael ei ddosbarthu i bob gweithiwr. Dywedodd y derbyniwyd ymateb cwbl gadarnhaol gan
gleifion i wasanaethau a oedd yn cael eu darparu dan y Fframwaith hwn, ac
roeddynt yn teimlo eu bod wedi’u trin ag urddas a pharch. Serch hynny,
gofynnodd yr aelodau i'r swyddogion fod yn ystyriol o lefel uchel o fodlonrwydd ffug gyda lefel y
gwasanaethau, ar y sail fod pobl ddiamddiffyn yn gyndyn o feirniadu’r
gwasanaethau roeddynt yn eu derbyn am eu bod ofn eu colli.
Fe gadarnhaodd y
Swyddogion Bwrdd Iechyd hefyd fod gweithwyr newydd yn gwylio ffilm addysgu
“Beth ydych chi’n ei weld pan fyddwch yn edrych arna i?" yn ystod
cyflwyniad, a bod hyfforddiant atodol yn orfodol ar gyfer nyrsys, gyda
chefnogaeth rowndiau ac arolygon ategol o’r ward.
Gofynnwyd i swyddogion BIPBC a fyddai Cefnogi
Annibyniaeth yn Sir Ddinbych (SID) yn dylanwadu ar ddatblygiad eu cynllun 3
blynedd a sut roeddynt yn gweld y Gwasanaeth Iechyd ar ddiwedd y cyfnod hwnnw. Fe sicrhawyd yr
aelodau bod y Bwrdd Iechyd wedi cytuno mewn egwyddor yn ddiweddar, i gefnogi'r
dull a amlinellwyd yng Nghynllun Integredig Sengl Bwrdd Gwasanaethau Lleol (BGLl) - Cynllun Lles Sir Ddinbych - a’i
un thema o gefnogi annibyniaeth
a dygnwch. Byddai’r
Strategaeth hwn yn llywio rhan o gynllun strategol tair blynedd newydd y Bwrdd
Iechyd gan fod nifer o ddyheadau’r Cynllun Lles yn adlewyrchu bwriadau i
ddarparu gwasanaeth yn y dyfodol ee, buddsoddi mewn gwasanaethau cymunedol a
gofal sylfaenol gyda'r bwriad o leihau hyd arhosiad mewn ysbyty a oedd yn
peryglu annibyniaeth hir dymor – roedd ymyrraeth gynnar neu ataliad yn llawer
mwy cost effeithiol i bawb yn yr hir dymor.
Cydnabuwyd nad
oedd llawer o unigolion angen gofal proffesiynol i fyw yn annibynnol, ond eu
bod angen cwmni a chyfle i ryngweithio’n
gymdeithasol er mwyn ffynnu. Er mwyn lliniaru'r risg o unigedd cymdeithasol,
roedd staff Iechyd a Gofal Cymdeithasol yn gweithio i ymgysylltu â gwasanaethau
arbenigol o blith y sector gwirfoddol i ddarparu digwyddiadau yn y gymuned. Fe
awgrymwyd bod meddygon teulu (sef yr unig gyswllt cymdeithasol i rai) yn rhannu
gwybodaeth am y perygl o unigedd a’r gwasanaethau a allai fod ar gael iddynt.
Byddai unrhyw wasanaethau a gomisiynir gan sefydliadau gwirfoddol (3ydd sector)
yn destun trefniadau monitro contract llym a fyddai’n cynnwys materion diogelu.
Cyfeiriwyd at orwariant mawr posibl y Bwrdd Iechyd a gafodd sylw yn y wasg
yn ddiweddar. Cadarnhaodd
swyddogion iechyd nad oedd y Bwrdd yn destun mesurau arbennig ar hyn o bryd a
dywedasant fod y Bwrdd yn gweithio gyda Llywodraeth Cymru (LlC) i leihau'r
gorwariant, a oedd yn ganlyniad rhannol i gynnydd araf gyda rhaglen
moderneiddio gwasanaeth iechyd yng Ngogledd Cymru, a tharged arbedion o 8% a osodwyd i’r Bwrdd ei
gyflawni.
Dywedodd yr Aelod Arweiniol am Ofal Cymdeithasol -Gwasanaethau Plant ac
Oedolion, a oedd yn gwybod am gynllun drafft 3 blynedd y Bwrdd Iechyd, bod y
cynllun yn edrych yn obeithiol gyda thri isranbarth yn seiliedig ar uno
arfaethedig Awdurdodau Lleol, ac felly tri ysbyty cyffredinol yn canolbwyntio
ar arbenigeddau gwahanol.
Trafododd y Pwyllgor adolygiad o drefniadau llywodraethu a gweithredu
Fforymau Partneriaeth ac Arweinyddiaeth newydd a Phanel Dinasyddion. Gofynnwyd
i’r aelodau ystyried y canlynol:
• bod gan unrhyw bwyllgorau neu grwpiau newydd Bwrdd Iechyd oedd yn ymdrin
ag ardaloedd awdurdod lleol Conwy a Sir Ddinbych, nifer cyfartal o
gynrychiolwyr o'r ddwy ardal arnynt;
• i’r Pwyllgor edrych ar gyfansoddiad, recriwtio a phenodi ar gyfer y Panel Dinasyddion newydd pan fydd y
manylion ar gael
• i wneud
ymholiadau ynglŷn ag a fyddai BIPBC yn gwneud cais am y cyllid ychwanegol
sydd ar gael gan Lywodraeth y DU ar gyfer wasanaethau dementia, ac os felly pa
wasanaethau fyddai’n elwa o ystyried mai gogledd Cymru oedd â’r gyfradd isaf
yng Nghymru am roi diagnosis dementia.
Dywedodd y Pennaeth Gwasanaethau Oedolion a Busnes, er y byddai arian
Cronfa Gofal Canolraddol (CGC) yn dod i ben ddiwedd mis Mawrth 2015, roedd yn
obeithiol y gallai trafodaethau ddechrau gyda'r Bwrdd Iechyd cyn bo hir i
edrych ar gyllid ychwanegol a glustnodwyd i’r Gwasanaeth Iechyd y gellid ei
ddefnyddio i ariannu a chefnogi’r gwaith ardderchog a gychwynnwyd gyda’r arian
CGC. Gofynnodd hefyd ynghylch
argaeledd fideo cyflwyniad y Bwrdd Iechyd ar drugaredd ac urddas sylfaenol er
mwyn hyfforddi cynulleidfa ehangach staff
gofal cymdeithasol.
Dywedodd yr Aelod
Arweiniol dros Ofal Cymdeithasol (Gwasanaethau
Oedolion a Phlant) ei bod eisoes wedi bod gweld drafft o gynllun tair blynedd newydd y Bwrdd
Iechyd. Roedd hi'n teimlo bod modd ei gyflwyno ac roedd hi’n gobeithio na
fyddai’r sylw negyddol yn y wasg yn ddiweddar ynghylch y Bwrdd Iechyd yn tynnu
sylw oddi ar ei weithrediad ac yn tanseilio ei gallu i’w ddarparu. Roedd yr
Aelod Arweiniol yn obeithiol y byddai yna ddull mwy cydlynol wrth ddatblygu
polisi genedlaethol a phenderfynu ar gyllid gan fod gwasanaethau Iechyd a Gofal
Cymdeithasol bellach yn disgyn o fewn portffolio cyfrifoldebau’r Gweinidog LlC.
Yn dilyn
trafodaeth fanwl gan y Pwyllgor:
Penderfynwyd: nodi pob gweithred a gymerwyd hyd yn hyn gan yr holl fudd-ddeiliaid i
gyflwyno’r Datganiad o Fwriad i ddarparu gwasanaethau integredig ar gyfer pobl
hŷn sydd ag anghenion cymhleth, yn amodol ar yr uchod.
Dogfennau ategol:
- Framework Report 061114, Eitem 5. PDF 60 KB
- Framework Report 061114 - App 1, Eitem 5. PDF 42 KB
- Framework Report 061114 - App 2, Eitem 5. PDF 56 KB