Eitem ar yr agenda

Derbyn cyflwyniad ynglŷn â’r mesurau a gymerwyd gan Fwrdd Iechyd Prifysgol Betsi Cadwaladr (BIPBC) i leihau afiechydon a geir mewn ysbytai.

10:35 – 11:05

Derbyniodd y Pwyllgor gyflwyniad gan Gyfarwyddwr Cynorthwyol Nyrsio (Atal Heintiau) BIPBC a amlinellodd y camau a gymerwyd hyd yn hyn er mwyn lleihau’r niferoedd o heintiau sy’n cael eu dal mewn ysbytai. Roedd yn gydnabyddiaeth gyffredinol, y bu cyfradd uwch o Clostridium Difficile (C. diff) yng Nghymru nag yn Lloegr yn 2013.   

Cymerwyd camau i ymdrin â hyn drwy newid arferion glanhau gan gynnwys defnyddio cynnyrch sy'n seiliedig ar glorin a chadachau microffibr. Roedd hyn wedi cael effaith wirioneddol ar lendid gweledol. Mae swyddogion y Bwrdd yn cydnabod bod rhai meysydd o Ysbyty Glan Clwyd yn edrych yn fudr er eu bod yn lân oherwydd cyfansoddiad yr adeilad yn methu. 

Pwysleisiodd swyddogion y Bwrdd ymrwymiad y Bwrdd i reoli heintiau a mynd i'r afael ag ymwrthedd gwrth-ficrobaidd a oedd yn broblem fyd-eang, nid mewn ysbytai yn unig, ond mewn  lleoliadau  gofal sylfaenol megis meddygfeydd teulu hefyd. Roeddynt wedi buddsoddi adnoddau ariannol ac wedi recriwtio staff yn benodol i fynd i'r afael â rheoli heintiau o fewn sefydliadau’r Bwrdd ac ar y wardiau. 

Gwelwyd gwelliannau eisoes i reoli heintiau ac mae’r cynnydd  sydd wedi’i wneud hyd yn hyn wedi’i ddilysu’n allanol.  Roedd y Bwrdd wedi ymrwymo i ysgogi gwelliant drwy archwilio’r ddadansoddiad achos. Maent bellach yn canolbwyntio ar welliant pellach i brosesau glanhau a lleihau achosion o MRSA a heintiau eraill trwy weithio mewn partneriaeth ag awdurdodau lleol a phartneriaid eraill.  Hysbyswyd y Pwyllgor bod Llywodraeth Cymru yn cynhyrchu ystadegau, sydd ar gael i'r cyhoedd, sydd yn dangos achosion o C. diff.

Mynegodd Aelodau'r Pwyllgor bryder y gallai nyrsys a gweithwyr gofal iechyd eraill gael eu gweld yn gwisgo eu dillad ward/gwaith  y tu allan i’w amgylchedd gwaith glân, ee, yn siopa mewn  archfarchnadoedd ac ati, ac yn cwestiynu sut roedd hyn yn  effeithio  ar reoli  haint ac a oedd unrhyw bolisïau yn ymwneud  â’r mater hwn.

Cadarnhaodd swyddogion iechyd fod gan y Bwrdd Iechyd bolisi clir ar wisgo gwisgoedd y tu allan i ysbytai a thra oddi ar ddyletswydd, a bod gwisgo gwisg weithredol mewn amgylchedd nad oedd yn  ymwneud â lleoliad iechyd y Bwrdd, yn fater disgyblu.  

Mewn ymateb i gwestiynau'r aelodau, cadarnhaodd swyddogion Iechyd fod:

• staff yn cael eu hannog yn aml i herio arferion o beidio â chydymffurfio â’r arferion gwisg a hylendid, fel yr oedd cleifion ac ymwelwyr;

• ffedogau yn cael eu hystyried yn llawer mwy hylan na’r cotiau gwyn llawes hir ar gyfer yr holl staff yr ysbyty;

• mae cleifion wedi cael eu hannog i ddilyn gofynion ymolchi a gwisgo wrth gyrraedd yr ysbyty a chyn-llawdriniaeth. Os bydd claf yn gwrthod cydymffurfio â'r ceisiadau hyn ni fydd modd gweithredu yn eu herbyn gan fod rhaid i staff barchu hawl unigolion i ddewis. Fodd bynnag, byddai unrhyw feysydd agored ar gyfer llawdriniaeth yn cael eu glanhau;

• roedd clustnodi wardiau unigol i lanhawyr wedi bod yn arfer da.  Os yw glanhawyr yn gyfrifol am ardaloedd penodol, y canfyddiad oedd bod ganddynt falchder yn eu gwaith. Roedd cyfarfodydd rheolaidd gyda’u harweinydd wardiau yn arwain at well cyfathrebu a gwelliant yn yr amgylchedd. 

• roedd cydberthynas glir rhwng adeiladau glân, modern a  hylendid, felly roedd  buddsoddiad  pellach yn cael ei wneud mewn staff domestig;

• roedd pob toiled yng nghyffiniau ystafelloedd llawdriniaeth yn  cynnwys basnau ymolchi yn unol â rheoliadau adeiladu;

• fe nodwyd nad oedd digon o gadeiriau i ymwelwyr ar wardiau, ac  roedd hyn yn golygu bod ymwelwyr yn eistedd ar welyau cleifion tra'n ymweld. Bydd rhagor o gadeiriau yn cael eu darparu;

• cynhaliwyd ymweliadau llywodraethu clinigol i feddygfeydd meddygon teulu i gynnal gwiriadau dirybudd;

• yn y blynyddoedd diwethaf roedd gormod o fwlch rhwng  arweinwyr a staff rheng-flaen, mae hyn bellach yn cael ei gywiro;

• mae urddas a pharch bellach yn cael eu hyrwyddo ger y 'drws ffrynt' ee, yn ddiweddar cafodd system o ddosbarthu cleifion mewn ambiwlansys y tu allan i’r adran Damweiniau ac Achosion Brys ei cyflwyno. Roedd hyn wedi cyflawni canlyniad cadarnhaol gan arwain at gleifion yn cael eu cyfeirio i’r mannau priodol i gael triniaeth cyn gynted ag y bo modd, gan ryddhau ambiwlansys i fynd i ateb eu galwad nesaf. O ganlyniad roedd  gweld ambiwlansys yn ciwio y tu allan i adran  Damweiniau ac Achosion Brys bellach yn eithriad nid yn ddigwyddiad rheolaidd;

·                    nid yw cau rhai o’r ysbytai cymuned wedi cymhlethu amseroedd aros ambiwlans yn yr ysbytai cyffredinol, gan fod yr  ysbytai sydd wedi cau o safon gwael iawn ac felly yn berygl cynyddol  i gleifion oedd yn dioddef o heintiau a ddaliwyd yn yr ysbyty; 

• yn  y  pendraw  byddai gwaith integredig rhwng staff meddygol ac anfeddygol yn arwain at y profiad gorau posibl i'r claf ar adeg ofidus iawn.