Eitem ar yr agenda

Ystyried  adroddiad  gan  Reolwr  Busnes,  Tîm  Diogelu  ac  Adolygu  (copi  ynghlwm)  i  fonitro  llwyddiant  a  pherfformiad  y  BLlDP o ran darparu ei flaenoriaethau allweddol  ar gyfer 2013/14  a  gwybodaeth  am  flaenoriaethau  allweddol  2014/15. 

9.40 a.m. – 10.20 a.m.

Cyflwynodd y Pennaeth Gwasanaethau Plant a Theuluoedd yr adroddiad (a ddosbarthwyd yn flaenorol) i’r Aelodau Archwilio i fonitro cyflawniadau a pherfformiad y Bwrdd Lleol Diogelu Plant wrth gyflawni ei flaenoriaethau allweddol ar gyfer 2013/2014 a gwybodaeth ar ei flaenoriaethau allweddol ar gyfer 2014/2015.

Roedd Leighton Rees, Pennaeth Gwasanaethau Plant a Theuluoedd yn bresennol fel Cadeirydd y Bwrdd Lleol Diogelu Plant (BLlDP).

Nododd y Rheolwr Busnes bod adroddiad y BLlDP wedi cael ei gyflwyno’n flaenorol i’r Pwyllgor Archwilio Partneriaethau ym mis Tachwedd 2013, a gofynnwyd yn y cyfarfod hwnnw i ddiweddariad gael ei gyflwyno i’r Pwyllgor ar y blaenoriaethau allweddol ar gyfer 2013/14.

Rhoddodd Aelodau’r Pwyllgor ystyriaeth i’r adroddiad a'r cynnydd a wnaed yn ystod 2013/14 o ran darparu blaenoriaethau allweddol y BLlDP. 

Er y cydnabuwyd bod y gwaith o ddarparu rhai o'r blaenoriaethau wedi’i rwystro i raddau gan y gwaith sy’n digwydd i sefydlu Bwrdd Diogelu Plant Rhanbarthol ac i ddatblygu rhyngwynebau rhwng y Bwrdd Rhanbarthol a grwpiau darparu isranbarthol, roedd gan yr aelodau nifer o bryderon.  Roedd y pryderon hyn yn ymwneud â’r:

·        Grŵp Tasg a  Gorffen Cyflogaeth Diogel nad oedd wedi cyfarfod oherwydd anawsterau wrth ddod o hyd i ddyddiad ac amser oedd yn gyfleus i bawb i sicrhau presenoldeb mor uchel â phosibl neu oherwydd amodau tywydd gwael.  Awgrymodd yr Aelodau y gallai defnyddio cyfleusterau cynadledda fideo fod yn ffordd o oresgyn problemau o’r fath a sicrhau bod y Grŵp yn cyfarfod i ddatblygu ei waith a darparu’r canllawiau.  Gofynnodd y Pwyllgor i gael gwybod am gynnydd y Grŵp Tasg a Gorffen o ran cyflawni ei amcanion.

·        Rhyngweithiad Meddygon Teulu ag atgyfeiriadau amddiffyn plant, yn enwedig eu parodrwydd i dynnu sylw swyddogion diogelu’r Gwasanaethau Plant / Bwrdd Iechyd at achosion lle mae amheuaeth o gam-drin pant.  Gofynnodd yr Aelodau i gynnydd wrth ddatblygu cyfranogiad Meddygon Teulu yn y broses atgyfeirio gael ei adrodd iddynt maes o law.

Hefyd Cafwyd trafodaeth ar ymagwedd y BLlDP a’r Gwasanaethau Plant tuag at gam-drin emosiynol ac esgeulustod a'r ffordd y maent yn gweithio gyda sefydliadau ac asiantaethau eraill mewn perthynas ag ymdrin ag achosion o gam-drin emosiynol ac esgeulustod.  Dywedodd Swyddogion bod cam-drin emosiynol ac esgeulustod yn faes anodd gan fod materion sylweddol ynghylch beth yn union oedd cam-drin emosiynol ac esgeulustod a’r gwahanol safonau sydd gan bobl gysylltiedig. Roedd yr aelodau'n awyddus i wybod a oedd polisi ar waith yn ysgolion y Sir i helpu canfod cam-drin emosiynol a chorfforol neu esgeulustod.  Gwnaethant gais hefyd i wybod a yw brodyr a chwiorydd a ffrindiau plant anabl yn cael eu monitro i sicrhau nad ydynt yn cael eu heithrio'n anfwriadol o weithgareddau arferol yr ysgol oherwydd eu bod yn gweithredu fel gofalwr tra’u bod yn yr ysgol.

Yn dilyn trafodaeth fanwl:

PENDERFYNWYD:

(a)  Derbyn yr adroddiad a nodi'r cynnydd a wnaed o ran cyflawni Cynllun Busnes Bwrdd Diogelu Plant Conwy a Sir Ddinbych ar gyfer 2013/14;

(b)  Dylid gwneud pob ymdrech i hwyluso gwaith y Grŵp Tasg a Gorffen Cyflogaeth Ddiogel a chynnig Arweiniad;

(c)  Dylai’r Bwrdd barhau i weithio gyda Meddygon Teulu gyda’r bwriad o wella eu rhyngweithiad gyda'r broses atgyfeiriadau amddiffyn plant;

(d)  Dylid adrodd gwybodaeth ar y cynnydd a wnaed gyda phwyntiau (b) a (c) uchod yn ôl i'r Pwyllgor maes o law;

(e)  Bod gwybodaeth am aelodaeth Bwrdd Diogelu Plant newydd Gogledd Cymru a Grŵp Darparu Diogelu Conwy a Sir Ddinbych yn cael ei gylchredeg i aelodau cyn gynted â’u bod ar gael;

(f)    Dylid darparu gwybodaeth ar y nifer o blant sy’n derbyn addysg yn y cartref ar draws y Sir ac ar y mesurau sy'n cael eu cymryd yn ysgolion y Sir i gefnogi brodyr a chwiorydd a ffrindiau disgyblion anabl er mwyn sicrhau nad ydynt yn cael eu heithrio'n anfwriadol o weithgareddau neu brofiadau ysgol a phlentyndod oherwydd eu dyletswyddau gofal.