Eitem ar yr agenda
PROSES Y GYLLIDEB 2015/16
- Meeting of Pwyllgor Llywodraethu ac Archwilio, Dydd Mercher, 17 Rhagfyr 2014 9.30 am (Item 5.)
- View the declarations of interest for item 5.
Ystyried
adroddiad gan y Pennaeth Cyllid ac Asedau sy'n rhoi diweddariad ar y broses i
gyflawni'r gyllideb refeniw ar gyfer 2015/16.
Cofnodion:
Roedd adroddiad, ac atodiad cyfrinachol, gan y
Pennaeth Cyllid ac Asedau, a oedd yn rhoi diweddariad ar y broses i gyflawni'r
gyllideb refeniw ar gyfer 2015/16, wedi ei ddosbarthu eisoes.
Eglurodd y Cynghorydd J. Thompson-Hill bod proses y gyllideb wedi symud at
ddiwedd yr ail gam. Roedd Atodiad 1 yn dangos y darlun o broses y gyllideb, er
gwybodaeth, ac roedd tabl o ddigwyddiadau allweddol yn y broses wedi ei gynnwys
yn yr adroddiad.
Roedd strategaeth gyllidebol y cyngor wedi nodi
bwlch cyllidebol o hyd at £18 miliwn dros ddwy flynedd yn flaenorol. Cafodd hyn
ei lywio’n bennaf gan arwyddion y byddai setliad cyllido’r Cyngor yn cael ei
dorri o 4.5%. Mae’r Setliad Llywodraeth Leol Dros Dro yn dangos y byddai'r
gostyngiad arian parod yn 3.7%, sy’n cyfateb i £5.3 miliwn. Gyda’r costau y
mae’n rhaid i’r cyngor eu hariannu, fel cynnydd mewn cyflog, pensiynau ac ynni,
mae bwlch y gyllideb ar gyfer 2015/16 bellach yn oddeutu £8.3 miliwn a
disgwylir y bydd yn oddeutu £8.8 miliwn yn 2016/17 – cyfanswm o £17.1 miliwn.
Mae dadansoddiad o'r symudiadau mewn rhagdybiaethau
rhwng mis Medi a diwedd mis Tachwedd wedi ei gynnwys yn Atodiad 2. Mae'n
amlinellu effaith y newidiadau yn sgil y Setliad Dros Dro, gan gynnwys effaith
trosglwyddo grantiau i mewn ac allan o'r Setliad, ac yn dangos y symudiad mewn
rhagdybiaethau pwysau cost yn ystod y cyfnod. Bydd y rhagdybiaethau yn newid yn
rheolaidd ac fe ddangosir hyn yn y symudiad dros y tri mis diwethaf sy’n
cynnwys rhagdybiaethau ar gyfer costau straen pensiwn, ardoll y gwasanaeth tân
a chodiad cyflog. Mae Atodiad 3 yn dangos tablau o'r Setliad Dros Dro i dynnu
sylw at y canlynol:-
·
Mae Tabl 1 yn dangos y sylfaen a addaswyd gyda gostyngiad
o 3.7%.
·
Mae Tabl 2 yn dangos sut yr addaswyd y sylfaen gan
drosglwyddiadau i mewn ac allan o'r Setliad.
·
Mae Tabl 3 yn dangos trosglwyddiadau pellach wedi eu
cynnwys yn y Setliad ond heb eu hariannu'n benodol.
·
Mae Tabl 4 yn dangos rhestr o'r grantiau rhwng 2014/15 a
2015/16.
Mae Tabl 4 yn tynnu sylw at y mater ynghylch y
Gronfa Gofal Canolraddol a'r Gronfa Cydweithredu Rhanbarthol. Sefydlwyd y
Gronfa Cydweithredu Rhanbarthol yn 2013/14 fel grant 3 blynedd i ariannu
prosiectau cydweithio rhanbarthol ac roedd cyfanswm o £10 miliwn ar gael ar
draws Cymru. Yn 2014/15, dargyfeiriwyd hanner y gronfa i gronfa gwerth £50
miliwn (y Gronfa Gofal Canolraddol) i hybu gwell integreiddio rhwng iechyd a
gofal cymdeithasol. Roedd setliad dros dro yn dangos diwedd y Gronfa Gofal
Canolraddol ond roedd yn cynnwys oddeutu £5 miliwn o arian y Gronfa
Cydweithredu Rhanbarthol a oedd yn ariannu nifer o brosiectau sydd â blwyddyn
arall ar ôl.
Mae’r setliad terfynol ar gyfer 2015/16 wedi ei
gyhoeddi ddechrau mis Rhagfyr. Bydd ail gam proses y gyllideb yn dod i ben gyda
chyflwyno cynigion i'r Cyngor ym mis Rhagfyr. Cyfanswm y cynigion yw £3.6
miliwn yn 2015/16 ac £1.8 miliwn yn 2016/17, a gyda'r cynigion a gymeradwywyd
gan y Cyngor ym mis Medi, bydd cyfanswm yr holl gynigion yn dod i £7.3 miliwn
yn 2015/16 a £2.7 miliwn yn 2016/17.
Byddai Cam 3 proses y gyllideb yn ystyried y cynigion
terfynol i gydbwyso cyllideb 2015/16, gan gynnwys opsiynau ar gyfer Treth y
Cyngor a defnyddio unrhyw gronfa wrth gefn. Mae’r materion hyn wedi eu trafod
yng ngweithdy’r aelodau ar 12 Rhagfyr cyn i’r gyllideb gael ei chymeradwyo’n
derfynol ym mis Chwefror. Byddai Cam 3 o’r broses hefyd yn parhau i ddatblygu
opsiynau arbedion ar gyfer 2016/17. Roedd yr adroddiad i’r Cyngor ar 9 Rhagfyr
wedi amlygu proses ymgynghori sylweddol ac mae’r manylion llawn wedi eu crynhoi
yn yr adroddiad. Cyfeiriodd y Cadeirydd at faterion a godwyd ynglŷn â
gwybodaeth yn ymwneud â'r broses o ryddid a hyblygrwydd, a'r ymateb a gafwyd y
gallai Aelodau ofyn cwestiynau pellach y gellid eu harchwilio yng Ngweithdai’r
Gyllideb.
Esboniodd Mr P. Whitham y nodwyd yn flaenorol mai cyllid oedd y risg
pwysicaf sy'n wynebu'r Cyngor, ac roedd yn teimlo bod tri risg penodol
allweddol ym Mhroses y Gyllideb y dylai'r Pwyllgor Llywodraethu Corfforaethol
dderbyn sicrwydd yn eu cylch, sef:-
· risgiau o wanhau neu gael gwared ar
reolaethau wrth i adnoddau leihau, gan arwain o bosibl at fwy o risg
Llywodraethu;
· mewn achos o ddiswyddiadau, y risgiau o fethu
gwireddu arbedion ariannol yn 2016/17 o ganlyniad i beidio â gwneud
penderfyniadau rŵan;
· risgiau arloesi fel risgiau i gaffael
pethau’n allanol a mewnol, os nad yw amodau a thelerau contractau ymlaen llaw,
agweddau cychwynnol o reoli contractau yn cael eu rheoli'n iawn.
Awgrymodd Mr Whitham y gellir cyfeirio at y tri risg penodol, a’r sicrwydd yn
eu cylch, yn yr adroddiad nesaf i’r Pwyllgor am Broses y Gyllideb. Eglurodd y
Cadeirydd fod y meysydd a nodwyd wedi eu cyfeirio atynt yn y Cynllun Gweithredu
ar gyfer Gwella Llywodraethu. Cyfeiriodd y Prif Gyfrifydd at broffil risg
cyffredinol y Cyngor a gwelededd uchel y broses a fabwysiadwyd gyda phob cam yn
cael ei archwilio a'i adolygu. Cadarnhawyd bod bwriad i adnabod y rhan fwyaf
o'r arbedion ar gyfer 2016/17 erbyn dechrau blwyddyn ariannol 2015/16.
Eglurodd Pennaeth y Gwasanaethau Cyfreithiol, Adnoddau Dynol a Democrataidd
bod y Prif Weithredwr yn dymuno mabwysiadu dull strategol o fonitro
gweithrediad cyffredinol y toriadau a’r arbedion. Byddai dull rhaglen yn
defnyddio Verto yn cael ei fabwysiadu er mwyn tracio cynnydd pob cynnig unigol.
Byddai hefyd yn cynnwys trosolwg o sut mae'r Cyngor yn cyfathrebu â'r cyhoedd,
gyda’r risgiau yn cael eu rheoli'n weithredol. Ar hyn o bryd mae Adnoddau Dynol
yn cynhyrchu map o gynigion sy’n ymwneud â materion staffio.
Cadarnhaodd Pennaeth Archwilio Mewnol fod gwaith yn cael ei wneud ar reoli
perthynas y Cyngor â chyrff allanol, ac eglurodd y Prif Gyfrifydd fod y Tîm
Gweithredol Corfforaethol wedi gofyn am adolygiad ar ôl cwblhau'r gyllideb.
Mewn ymateb i bryderon a godwyd gan y Cynghorydd G. M. Kensler ynghylch
unrhyw effaith ariannol ar y Cyngor yn sgil Diwygio Llywodraeth Leol, eglurodd
y Cadeirydd mai dim ond Sir Ddinbych hyd yma sydd wedi cyflwyno Datganiad o
Ddiddordeb. Dywedodd y Cynghorydd J. Thompson-Hill y byddai gwaith y Cyngor yn
parhau, gyda'r bwriad o fynd i'r afael â'r materion gyllidebol presennol, hyd
nes bydd penderfyniad ffurfiol wedi ei wneud. Cadarnhaodd Pennaeth y
Gwasanaethau Cyfreithiol, Adnoddau Dynol a Democrataidd y byddai busnes y
Cyngor yn datblygu yn ôl yr arfer yn ystod y tair blynedd nesaf gan
ganolbwyntio ar broses y gyllideb. Amlinellodd y Prif Gyfrifydd rôl y Pwyllgor
mewn perthynas â Diwygio Llywodraeth Leol, a'r gwaith y gellid ei wneud gyda
Chonwy mewn perthynas â chynhyrchu Cynllun Busnes.
Eglurodd y Cadeirydd fod ei awgrym yng nghyfarfod y Cyngor, 'bod Asesiadau
o Effaith ar Gydraddoldeb Proses y Gyllideb hefyd yn cynnwys effaith y toriadau
yn y gyllideb ar bobl ar incwm isel', wedi cael derbyniad da gan y Prif
Weithredwr. Yn dilyn trafodaeth bellach:-
PENDERFYNWYD - bod y
Pwyllgor Llywodraethu Corfforaethol yn derbyn ac yn nodi’r adroddiad yn amodol
ar y sylwadau sydd wedi eu gwneud.
(RW i weithredu)
Dogfennau ategol:
- Budget Report, Eitem 5. PDF 288 KB
- Budget App 1, Eitem 5. PDF 54 KB
- Budget App 2, Eitem 5. PDF 34 KB
- Budget App 3 (Table 1), Eitem 5. PDF 31 KB