Eitem ar yr agenda
DIWEDDARIAD CYLLIDEB
Ystyried
adroddiad gan y Pennaeth Cyllid ac Asedau (copi ynghlwm) sy’n rhoi’r wybodaeth
ddiweddaraf am y sefyllfa ddiweddaraf o ran proses pennu cyllideb y Cyngor ar
gyfer 2014/15.
Cofnodion:
Roedd adroddiad gan y Pennaeth Cyllid ac Asedau, a
oedd yn rhoi diweddariad ar y sefyllfa ddiweddaraf o ran y broses o bennu
cyllideb y Cyngor ar gyfer 2014/15, wedi’i gylchredeg yn barod.
Roedd y mwyafrif o gyllid y cyngor, oddeutu 78%, yn dod gan Lywodraeth
Cymru trwy’r Grant Cynnal Refeniw ac ailddosbarthu’r Trethi Annomestig
Cenedlaethol. Yn 2013/14, y setliad terfynol ar gyfer Sir Ddinbych oedd
£150.821 miliwn. Roedd gweddill y cyllid yn cael ei ddarparu drwy
Dreth y Cyngor, £40.7 miliwn yn y gyllideb yn 2013/14. Roedd effaith y symudiad
ar y setliad yn cael effaith llawer mwy arwyddocaol na symudiad ar lefelau
Treth y Cyngor.
Rhoddodd y Prif
Gyfrifydd (PG) gyflwyniad yn canolbwyntio ar yr adroddiad, a gylchredwyd gyda
phapurau'r cyfarfod, a fyddai’n cael ei gyflwyno i’r Cyngor ar 10 Medi, 2013.
Roedd adroddiad wedi’i gyflwyno ym mis Mehefin, 2013 yn amlinellu
rhagdybiaethau mewn perthynas â setliad cyllideb refeniw bosibl y Cyngor a’r
goblygiadau ariannol posibl. Nes y cyhoeddwyd y Setliad
Llywodraeth Leol Drafft ym mis Hydref, byddai’r sefyllfa yn aneglur er bod
popeth yn awgrymu y byddai’r setliad yn un gwael, gyda’r CLlLC wedi argymell y
dylai Cynghorau ragdybio gostyngiad o -4% yn 2014/15. Eglurodd y PG fod gormod
o ansicrwydd yn parhau i roi union ffigwr ond pe bai gostyngiad i setliad
refeniw’r Cyngor ar lefel o -4% a phe bai effaith y newid yn sgil y cyfrifiad
yn cael ei weithredu ym mlwyddyn un, yna ni fyddai rhagdybiaeth cynllunio o
ostyngiad o rwng £8-9m yn bosibilrwydd afresymol. Bydd y cyngor hefyd yn wynebu pwysau chwyddiant mewn meysydd fel tâl,
pensiynau, ynni a phwysau o ran y galw am wasanaethau.
Mewn ymateb i’r setliad gwael tebygol, mae pob gwasanaeth yn gwneud cynnydd
wrth ddynodi cynigion ar gyfer arbedion ar gyfer y tair blynedd nesaf. Byddai cynigion
newydd i arbed, gyda thri gwasanaeth yn dal i’w hadolygu, yn cael eu hystyried ym
mis Medi gyda’r Aelodau Arweiniol perthnasol cyn eu cyflwyno i aelodau
etholedig mewn gweithdy ym mis Hydref.
Mae’r broses Herio Gwasanaethau ar gyfer 2012/13 a 2013/14 wedi dynodi
arbedion posibl o £1.716m ar gyfer 2014/15. Roedd y cynigion wedi’u hystyried
yn fanwl yn y cyfarfodydd Herio Gwasanaethau ac wedi’u cadarnhau mewn
cyfarfodydd diweddar gyda Phenaethiaid Gwasanaeth. Roedd y
cynigion arbed wedi’u cynnwys yn Atodiad 1 ac wedi’u disgrifio fel Cam 1 y
broses o gyflawni targed a allai fod yn arwyddocaol ar gyfer 2014/15.
Mae’r adroddiad i’r Cyngor wedi dynodi arbediad o £1.7m gyda £782k ohono
wedi’i gynnig gan wasanaethau a £963k ohono yn arbedion wedi’u harwain yn gorfforaethol, gyda £663k ohono’n cael ei
gyflawni gan wasanaethau. Roedd y cynigion ar gyfer
arbedion 2014/15 eisoes wedi eu hystyried mewn cyfarfodydd herio gwasanaeth yn
2011 ac yn 2012 ac wedi’u cynnwys fel rhan o’r targedau tair blynedd a
ddynodwyd yn y Cynllun Ariannol Tymor Canolig. Bydd cytundeb
ffurfiol o’r arbedion sydd eisoes wedi eu dynodi’n caniatáu i ymdrechion
gwleidyddol a chorfforaethol ganolbwyntio at y dasg heriol o osod gweddill y
gyllideb ar gyfer 2014/15.
Mae’r arbedion corfforaethol a amlygwyd fel Moderneiddio’r Cyngor yn rhan o
darged i gyflawni gwerth £3.0 miliwn o arbedion yn y 3 blynedd nesaf wrth
ddatblygu prosiectau i gyflawni arbedion effeithlonrwydd a meithrin cymhwysedd
mewn gwasanaethau. Mae sawl prosiect
effeithlonrwydd yn cael eu datblygu, gan gynnwys buddsoddi mewn Rheoli
Dogfennau a Chofnodion Electronig a Chofrestr Anfonebau Ganolog a phrosiectau eraill sy’n cynyddu’r defnydd o
dechnoleg er mwyn cyflawni arbedion trwy leihau’r angen i deithio, cynyddu
hyblygrwydd a gweithredu systemau gweinyddol mwy effeithlon. Yn y pen draw bydd
targedau arbedion moderneiddio yn cael eu cyflawni gan y gwasanaethau.
Mae’r grynodeb o Asesiad o Effaith ar Gydraddoldeb
cam 1 rhaglen effeithlonrwydd 2014/15 mewn perthynas ag effaith y cynigion
arbed wedi’i chynnwys yn Atodiad 2.
Mynegwyd pryderon ynglŷn ag effaith pobl nad
ydynt yn talu treth y cyngor mewn perthynas â chanlyniad data’r cyfrifiad a
gynhyrchwyd, gan gyfeirio’n benodol at boblogaeth symudol sy’n byw mewn
carafanau neu gartrefi gwyliau. Amlinellodd y PG y rhesymau dros yr amrywiad yn
ffigyrau’r cyfrifiad a chadarnhaodd fod Cymdeithas Trysoryddion Cymru yn cynnal
trafodaethau gyda Chymdeithas Llywodraeth Leol Cymru (CLlLC), sy’n ceisio
sicrhau lliniariad mewn perthynas ag effaith y ffigyrau, ac amlygodd y
posibilrwydd y byddai angen diwygio ffigyrau’r setliad. Cytunodd y PG y gellir
rhoi manylion y trafodaethau gyda CLlLC ac ymatebodd i bryder a fynegwyd gan Mr
P. Whitham ynglŷn â’r risgiau posibl oedd ynghlwm â hyn. Eglurodd fod eitem
sefydlog ar y Gofrestr Risg Gorfforaethol ynglŷn â gosod cyllideb gytbwys,
a chytunodd i roi rhagor o wybodaeth i Mr Whitham ar y mater hwn. Rhoddodd yr PGCD fanylion
am yr eitem ar y Gofrestr Risg Gorfforaethol, a chadarnhaodd y PAM y byddai
Archwilio Mewnol yn archwilio’r camau sy’n cael eu cymryd ac yn adrodd ar eu
cynnydd.
Awgrymodd y Cynghorydd G.M. Kensler y byddai’n
bwysig archwilio uchelgeisiau'r Cyngor yn fanwl cyn gosod y praesept treth y
cyngor, a sicrhau gymaint â phosibl o gyllid allanol a manteisio ar unrhyw
grantiau sydd ar gael.
Mynegodd y Cynghorydd M.Ll. Davies y farn y dylid
darparu rhagor o fanylion mewn perthynas â cholli incwm yn deillio o gau amryw
o gyfleusterau’r Cyngor. Cytunodd y PG i gynnig ymateb i’r Cynghorydd B. Blakeley
ynglŷn â cholli incwm yn sgil cau’r maes parcio ar Stryd y Cei.
Cyfeiriodd y Cynghorydd S.A. Davies at estyniad yr
AHNE a mynegodd y farn y dylai ei haelodaeth gynnwys dau Aelod Ward Llangollen.
Mewn ymateb i gwestiwn gan y Cadeirydd, rhoddodd y
PG fanylion yr arbedion ar y gyllideb ac arbedion effeithlonrwydd fyddai’n cael
eu creu mewn perthynas â chynlluniau tymor canolig a hir o safbwynt prosiectau
cydweithio a phartneriaethau. Cadarnhaodd nad oedd unrhyw gynlluniau partneriaeth o
bwys wedi’u cynllunio ar hyn o bryd mewn perthynas â gostyngiadau yn y
gyllideb.
PENDERFYNWYD - bod
y Pwyllgor Llywodraethu Corfforaethol yn nodi’r sefyllfa ddiweddaraf a'r camau
bwriedig nesaf ac yn ystyried y cynigion ar gyfer arbedion sy’n mynd ger bron y
Cyngor Sir i’w cymeradwyo’n ffurfiol.
Dogfennau ategol:
- Budget Update Report, Eitem 6. PDF 72 KB
- Budget Update DCC Report, Eitem 6. PDF 57 KB
- Budget Update App 1, Eitem 6. PDF 23 KB
- Budget Update App 2, Eitem 6. PDF 54 KB