Eitem ar yr agenda

Ystyried adroddiad gan y Cyfarwyddwr Corfforaethol: Cwsmeriaid (copi ynghlwm) sy’n gofyn am farn Aelodau ar strwythur a chynnwys y Strategaeth Parth Cyhoeddus drafft ar gyfer y Cyngor.

 

Cafodd copi o adroddiad Cyfarwyddwr Corfforaethol Cwsmeriaid, sy’n gofyn am farn y Pwyllgor ar strwythur a chynnwys Strategaeth Parth Cyhoeddus ddrafft y Cyngor, Atodiad 1, ei gylchredeg gyda phapurau’r cyfarfod.

 

Cyflwynodd Pennaeth yr Amgylchedd a Phennaeth Cynllunio a Gwarchod y Cyhoedd yr adroddiad. Eglurwyd bod yr Archwiliad Mewnol i reolaeth parth cyhoeddus wedi argymell llunio strategaeth i gael eglurder a chydlyniad ynglŷn â sut mae’r Cyngor yn delio gyda’r maes pwysig yma. Mae ail argymhelliad yn nodi bod angen gwell cydweithio rhwng gwasanaethau allweddol a dull mwy corfforaethol ar gyfer cynllunio ac ymateb i faterion sy’n gysylltiedig â pharth cyhoeddus.

 

Cafodd y Strategaeth Parth Cyhoeddus ddrafft ei datblygu mewn gweithdy yn dilyn ymchwil i strategaethau tebyg yng Nghymru a thu hwnt. Mae’r ddogfen strategol yn diffinio beth yw parth cyhoeddus a sut gall y Cyngor reoli a dylanwadu ar y gwaith. Mae’r Strategaeth yn diffinio pwysigrwydd gweithio mewn partneriaeth wrth weithredu newid sy’n gwella parth cyhoeddus. 

 

Mae rôl a chyfrifoldeb aelodau allweddol Archwilio, Grwpiau Ardal yr Aelodau a swyddogion allweddol wedi eu diffinio. Mae pedair egwyddor strategol wedi eu hadnabod, sef:-

 

Ø     Parth Cyhoeddus sy’n gyraeddadwy a chyda   cysylltiadau da

Ø     Amgylchedd glân a thaclus

Ø     Cadw a datblygu hunaniaeth leol

Ø     Amgylchedd diogel

 

Mae disgrifiadau manwl o’r pedair egwyddor strategol wedi eu hamlinellu yn y ddogfen ddrafft, ynghyd ag enghreifftiau o ddatblygiadau diweddar. Byddai’r Strategaeth yn cynorthwyo i gyflawni Blaenoriaethau Corfforaethol “Strydoedd Glân a Thaclus" a "Datblygu'r Economi Leol" a byddai'n effeithio ar drigolion, gweithwyr ac ymwelwyr Sir Ddinbych. Rhagwelir y bydd y rhan fwyaf o’r gwaith o ran darparu’r Strategaeth o fewn y cyllidebau gwasanaeth cyfredol ac o fewn y gyllideb sydd wedi ei neilltuo yn y Cynllun Corfforaethol ar gyfer y ddwy flaenoriaeth uchod.  

 

Hyd yma rydym ni wedi ymgynghori â swyddogion perthnasol o'r gwasanaethau amrywiol sy'n ymdrin â Pharth Cyhoeddus, yr Aelod Arweiniol a’r Uwch Dîm Arweinyddiaeth. Mae’r Cynghorau Tref, Dinas a Chymuned, y sector gwirfoddol a Chyfoeth Naturiol Cymru wedi derbyn copïau o’r sylwadau hefyd.

 

Pwysleisiodd y Cyng. J.M. Davies yr angen i gynnwys cyfeiriad cyffredinol at ddiwylliant y Cyngor mewn perthynas â chynnwys unigolion yn y mecanwaith adrodd. Eglurodd Pennaeth yr Amgylchedd y byddai manylion y newidiadau o ran cael pwynt cyswllt unigol yn cael eu cyflwyno yng Ngweithdy’r Aelodau Arweiniol ym mis Hydref.   

 

Soniodd y Cyng. H.O. Williams am y gwaith caled sydd wedi ei wneud i fynd i’r afael â baw cŵn yn ei Ward. Amlygodd y Cynghr. R.M. Murray a P.A. Evans y problemau sydd i’w gweld yn eu wardiau nhw. Amlinellodd Pennaeth yr Amgylchedd yr anawsterau o ran dal troseddwyr. Fodd bynnag, pwysleisiodd bod gwasanaethau yn gweithio mewn partneriaeth i fynd i’r afael â’r mater hwn a chyfeiriodd at yr Ymgyrch Atal Baw Cŵn a lansiwyd ym mis Chwefror 2013.  

 

Ymatebodd Pennaeth Cynllunio a Gwarchod y Cyhoedd i gwestiwn gan y Cynghorydd J.M. Davies a chyfeiriodd at dudalen 7 y Strategaeth, Canllawiau ar gyfer Hunaniaeth Leol yn y Parth Cyhoeddus, sy’n cydnabod y cwmpas ar gyfer gweithio mewn partneriaeth ac ymgynghori gyda Chynghorau Tref a Chymuned ac sy’n cyfeirio’n benodol at arwyddion a dodrefn stryd.

 

Cefnogodd y Cadeirydd y Strategaeth ond amlygodd yr angen i gynnwys proses ar gyfer asesu llwyddiant a mesur canlyniadau a chynnydd a chynnwys trefnau ar gyfer adrodd a chyfathrebu. Amlygodd Pennaeth yr Amgylchedd yr anawsterau o ran mesur cynnydd rhai elfennau o'r Strategaeth, e.e. newid diwylliannol. Eglurodd Pennaeth Cynllunio a Gwarchod y Cyhoedd bod Strategaeth Parth Cyhoeddus yn ddogfen strategol ac y byddai angen gweithredu proses neu fecanwaith ychwanegol i fesur cynnydd.

 

Yn dilyn y drafodaeth a ddilynwyd, darparwyd yr ymatebion canlynol i gwestiynau a materion a godwyd gan yr Aelodau:-

 

-               Rhoddwyd gwybod i’r aelodau na fydd beicwyr yn cael eu gorfodi i ddefnyddio llwybrau beicio sydd wedi eu darparu fel llwybr amgen i briffordd. Eglurodd y Cyng. C.H. Williams bod beicio ar balmentydd yn drosedd ond nad yw’r camau gorfodi’n cael eu cymryd yn aml iawn. Dylid annog unigolion sy’n beicio yn eu hamser hamdden i ddefnyddio llwybrau beicio.

-               Mewn ymateb i bryderon ynglŷn â gweddillion torri cloddiau yn achosi pynjars ac yn atal beicwyr rhag defnyddio rhai llwybrau beicio, eglurodd Pennaeth yr Amgylchedd, yn yr achosion lle mae gan y Cyngor cytundeb â’r perchnogion i dorri cloddiau, bod y cytundeb hefyd yn cynnwys clirio’r gweddillion o’r llwybrau beicio.

-               Eglurwyd nad yw'r Cyngor Sir yn gyfrifol am bob ardal chwarae. Mae rhai ardaloedd chwarae yn rhan o ddatblygiadau tai neu yng ngofal Cynghorau Tref neu Gymuned. Amlygodd yr Aelodau bwysigrwydd sicrhau, pan fo ardaloedd chwarae’n cael eu hadeiladu, eu bod yn cynnwys rhaglen gynnal a chadw llawn ac yn cael eu monitro’n ofalus. Holodd yr Aelodau ynglŷn â chynnwys materion cosmetig, fel peintio a thacluso, yn yr archwiliad blynyddol o ardaloedd chwarae gan y byddai’r rhain yn gwella edrychiad ardaloedd chwarae a’u gwneud yn fwy deniadol i breswylwyr ac ymwelwyr. Eglurodd Pennaeth Cynllunio a Gwarchod y Cyhoedd, o ran cynllunio ac ar ôl ystyried y sefyllfa economaidd sydd ohoni, y byddai’n bwysig sicrhau cydbwysedd rhwng y ddarpariaeth o fannau agored ac ardaloedd chwarae a’r costau i ddarparwyr gwasanaethau eraill.

-               Cyfeiriodd Pennaeth yr Amgylchedd at gyflwyno trefnau arfaethedig i’w dilyn pan fo aelodau o’r cyhoedd yn methu torri neu gynnal a chadw clawdd sydd wedi gordyfu ac yn rhwystr i eraill. Rhoddwyd gwybod i’r Pwyllgor y byddai’r trefnau arfaethedig, a fyddai’n golygu anfon llythyr rhybudd i’r troseddwyr yn yr achos cyntaf, yn cael eu trafod yng Ngweithdy’r Aelodau ym mis Hydref.

-               Cyfeiriodd Pennaeth yr Amgylchedd at y ddadl bosib yn ymwneud â thorri neu drimio coed. Pwysleisiodd y Cadeirydd bod angen sicrhau bod Aelodau lleol yn derbyn yr wybodaeth ddiweddaraf ynglŷn â materion Parth Cyhoeddus yn eu wardiau.

-               Roedd Pennaeth yr Amgylchedd yn cydnabod pryderon yr Aelodau o ran gorchuddion gyliau. Eglurodd nad oedd anghenion cynnal a chadw wedi eu hystyried yn ystod y cam dylunio. 

-               Pwysleisiodd yr Aelodau yr angen i gael trefniadau adrodd a monitro Rheoli Cyswllt Cwsmer effeithiol i sicrhau effeithlonrwydd y Strategaeth. Gofynnwyd hefyd am gynnwys rhai nodau ac amcanion lefel uchel yn y Strategaeth.

 

PENDERFYNWYD – fod y Pwyllgor yn:-

 

(a)   derbyn ac yn nodi cynnwys yr adroddiad; ac,

(b)   yn amodol ar gynnwys yr argymhellion a’r newidiadau uchod, cefnogi’r Strategaeth Parth Cyhoeddus a’i chyflwyno i’r Cabinet er cymeradwyaeth.