Eitem ar yr agenda

Ystyried adroddiad y Cyng. Eryl Williams, Aelod Arweiniol Addysg (copi ynghlwm), sy’n nodi canfyddiadau'r adolygiad diweddar ar ddarpariaeth gynradd yn ardal Rhuthun ac yn cynnig argymhellion i newid y ddarpariaeth bresennol.

 

Cyflwynodd y Cyng. Eryl Williams adroddiad, a gylchredwyd cyn y cyfarfod, a oedd yn cynnwys canfyddiadau'r arolwg diweddar ar ddarpariaeth ysgolion cynradd yn ardal Rhuthun ac argymhellion arfaethedig i'w hystyried er mwyn newid y ddarpariaeth bresennol.

 

Amlinellodd y Cyng. Eryl Williams y fframwaith ariannu a’r broses strwythuredig a fabwysiadodd y Cyngor yn ogystal â pherthnasedd polisïau cenedlaethol ar y broses benderfynu ar gyfer ariannu gwelliannau i adeiladau addysg y Sir. Cyfeiriwyd at raglen fuddsoddi gynhwysfawr Sir Ddinbych, y cais i Ysgolion yr 21ain Ganrif a phwysigrwydd ansawdd adeiladau addysg yn y broses ddysgu. Eglurodd y byddai ceisiadau a gyflwynir i Lywodraeth Cymru am fuddsoddiad cyfalaf sylweddol yn cael eu dylanwadu gan Sir Ddinbych a’r bwriad i fynd i’r afael â llefydd dros ben mewn ysgolion. Pwysleisiodd hefyd y gallai’r arian yma fod dan fygythiad os nad yw’r Sir yn mynd i’r afael â llefydd dros ben.

 

Pwysleisiodd y Cyng. Williams y byddai’n ymdrechu i sicrhau gwelliannau parhaus yn Sir Ddinbych drwy ddarparu cyfleusterau addysg gwell a fydd yn creu cynaladwyedd ac yn diogelu natur yr ardal.  Cyfeiriodd at nifer y llefydd dros ben yn ardal Rhuthun a’r cynigion gerbron y Cabinet i fynd i’r afael â’r mater. Eglurwyd bod y Cyngor wedi cynnal ymgynghoriad ffurfiol ar ddyfodol darpariaeth gynradd yn ardal Rhuthun. Yn ystod yr arolwg cynhaliwyd ymgynghoriad eang ag 11 ysgol a oedd yn cynnwys cyfarfodydd â rhieni, staff a llywodraethwyr. Amlygwyd sawl mater gan gynnwys y ddibyniaeth ar ystafelloedd dosbarth symudol, cyflwr gwael ysgolion a nifer y llefydd dros ben yn yr ardal (sy’n fwy na’r cyfartaledd). 

 

Mae canfyddiadau’r arolwg anffurfiol wedi eu cynnwys yn Atodiad 1 ac mae nifer y llefydd mewn ysgolion ar hyn o bryd a nifer y disgyblion (PLASC mis Ionawr, 2013) wedi eu cynnwys yn yr adroddiad ynghyd â chanfyddiadau’r ymgynghoriad anffurfiol a’r ffordd ymlaen sy’n cynnwys y cynigion canlynol:-

 

Mae argymhellion wedi eu cynnig a’u grwpio gyda’i gilydd, yn dibynnu ar eu heffaith ar ysgolion yr ardal, i ganiatáu darpariaeth gynaliadwy tymor hir yn ardal Rhuthun yn dibynnu ar adnoddau ariannol. Crynhodd Pennaeth Cwsmeriaid a Chymorth Addysg y cynigion sydd wedi eu cynnwys yn yr adroddiad, codwyd sawl mater a darparwyd yr ymatebion fel y ganlyn:-

 

Cynnig 1 – Creu Ysgol Ardal newydd ar gyfer cymunedau Clocaenog a Chyffylliog (Atodiad 2).

 

Bu i’r arolwg ganfod y galw i gadw darpariaeth addysg yn yr ardaloedd gwledig i’r gorllewin o Ruthun. Ar hyn o bryd mae 55 disgybl llawn amser yn mynychu’r ddwy ysgol. Mae galw mawr am lefydd yn Ysgol Clocaenog ond mae’r niferoedd yn Ysgol Cyffylliog yn gostwng. Gan nad yw’r ddwy ysgol yn addas ar gyfer codi estyniad, argymhellir bod ysgol ardal newydd yn cael ei chreu ar gyfer y cymunedau ar y safleoedd presennol. Byddai creu’r ysgol ardal yn cael ei wneud yn raddol a byddai ymrwymiad tymor hir i greu un ysgol ar un safle gyda chyswllt posib â chyfleusterau cymunedol.  Awgrymwyd y dylai'r cam cyntaf gael ei roi ar waith ddechrau mis Medi 2014.

 

Codwyd sawl pryder gan y Cyng. Huw Jones a darparwyd yr ymatebion canlynol:-

 

-               Atodiad 2, 15.5. – Cyfeiriodd Pennaeth Cwsmeriaid a Chymorth Addysg at Bolisi Cludiant y Cyngor ac eglurodd y byddai trefniadau cludiant ar gyfer y disgyblion presennol yn cael eu harchwilio fel rhan o’r adrefnu.   

-               Mewn ymateb i’r pryderon ynglŷn â chyflwr y ffordd rhwng Ysgol Clocaenog ac Ysgol Cyffylliog, eglurodd y Cyng. Williams bod y ffordd o Glocaenog i Fontuchel yn rhan o'r prif lwybr graenu. 

-               Cadarnhaodd Pennaeth Cwsmeriaid a Chymorth Addysg y byddai Sir Ddinbych yn ymgynghori ag awdurdodiadau cyfagos ar y cynigion.

-               O ran nifer y llefydd dros ben a darpariaeth y dyfodol, eglurwyd y byddai dwy gam gweithredu. Byddai’r can cyntaf yn golygu creu ysgol newydd ar y ddau safle a byddai’r ail gam yn golygu ystyried y safle gorau ar gyfer ysgol newydd, yn amodol ar arian. Amlinellodd Pennaeth Cwsmeriaid a Chymorth Addysg ddarpariaeth Cyfnod Allweddol 1 a 2 yn y dyfodol.          

 

Cynnig 2 – Cau Ysgol Llanbedr a throsglwyddo'r disgyblion i Ysgol Borthyn, Rhuthun, yn dibynnu ar ddewis y rhieni (Atodiad 3)

 

Mae’r Corff Llywodraethu ac eraill wedi mynegi pryderon na ddylid ystyried y lleihad yn nifer y disgyblion yn Ysgol Llanbedr ar ei ben ei hun wrth ystyried dyfodol yr ysgol.   Wrth ystyried y ddarpariaeth o fewn tref Rhuthun a’i chymuned agos, ymddengys bod gorddarpariaeth o lefydd cyfrwng Saesneg. Mae Ysgol Llanbedr ac Ysgol Borthyn yn Ysgolion Saesneg a Reolir yn Wirfoddol gan yr Eglwys yng Nghymru.  Canfuwyd wrth ddadansoddi’r galw mai 20 disgybl yn unig o fewn y dalgylch naturiol yr ysgol sy’n dewis addysg cyfrwng Saesneg.  Ar hyn o bryd mae ysgol eglwys cyfrwng Saesneg arall yn agos at yr ysgol hon, sef Ysgol Borthyn, ac mae ysgolion Gellifor a Stryd y Rhos yn agos iawn hefyd.   O ystyried yr angen i leihau’r fath ddarpariaeth, argymhellir y dylid cynnal ymgynghoriad ar gau Ysgol Llanbedr ar ddiwedd blwyddyn academaidd 2013/2014. 

 

Sicrhaodd yr Arweinydd y bydd yr ohebiaeth a dderbyniwyd gan rieni ac athrawon Ysgol Llanbedr yn nodi materion a phryderon yn cael ei hystyried os cytunir i gynnal ymgynghoriad ar y cynigion. Cadarnhaodd Pennaeth Cwsmeriaid a Chymorth Addysg y bydd yna lefydd ar gael mewn ysgolion ffydd eraill yn yr ardal e.e. Ysgol Borthyn, Rhuthun.  Teimlwyd y byddai cynyddu darpariaeth Ysgol Borthyn yn sicrhau dewis ac yn cryfhau darpariaeth ffydd gan ei gwneud yn fwy cynaliadwy. Eglurodd y swyddog y byddai gwaith ac ymgynghori pellach yn cael ei wneud ac y byddai hynny’n ystyried ffigyrau amcanol ar gyfer y galw yn y dyfodol.

 

Cododd y Cyng. Huw Williams y materion canlynol a darparwyd ymateb:-

 

-               Cytunwyd bod angen gwirio cywirdeb ffigyrau amcanol Ysgol Llanbedr ac Ysgol Borthyn, ynghyd â ffigyrau ar gyfer darpariaeth cyn-ysgol, a’u cadarnhau cyn cynnal trafodaethau pellach.

-               Mae’r ysgol wedi gwella ers y problemau a gafwyd yn y gorffennol a soniwyd am gyfleusterau a lleoliad gwych yr ysgol. 

-               Cyfeiriodd y Cyng. Williams at ddewis y rheini ac at golli darpariaeth ffydd yn yr ardal. Awgrymodd y dylid ystyried cadw Ysgol Llanbedr ar gyfer darparu addysg ffydd yn ardal Rhuthun.

-               Fe ddylai’r ddarpariaeth addysg ddiwallu anghenion y 71 cartref newydd sydd wedi eu cynnwys yn y Cynllun Datblygu Lleol ar gyfer ardal Llanbedr. 

 

Cynnig 3 – Ardal Tref Rhuthun (Atodiad 4)

 

Eglurodd Pennaeth Cwsmeriaid a Chymorth Addysg bod yna gefnogaeth gref i gadw darpariaeth y tair ysgol yn y dref ond dywedodd bod anawsterau tymor hir ynghlwm wrth safleoedd Ysgol Stryd y Rhos ac Ysgol Pen Barras. Mae mynediad y safle yn bryder o ran iechyd a diogelwch ac mae’r safle yn dibynnu ar ystafelloedd dosbarth symudol. Mae arolwg ac asesiad o addasrwydd y safle wedi awgrymu y dylai’r Cyngor weld pa mor addas yw adeiladu ysgol newydd yn safle Glasdir.  Mae astudiaeth ddichonolrwydd wedi awgrymu y gall y tir sydd wedi ei glustnodi yn y CDLl ar gyfer ysgol newydd ddiwallu anghenion disgyblion Ysgol Stryd y Rhos ac Ysgol Pen Barras. Awgrymwyd y dylid ystyried y dewis yma cyn gwneud unrhyw benderfyniad.

 

Mae dyfodol Ysgol Borthyn ac Ysgol Rhewl yn gysylltiedig â’r cynnig hwn. Mae’r angen i sicrhau amrywiaeth trwy ddarparu ysgolion ffydd, os yw’r argymhelliad i gau Ysgol Llanbedr yn mynd rhagddo, wedi arwain at yr argymhelliad i gadw Ysgol Borthyn. Mae arolwg safle Ysgol Rhewl wedi amlygu'r gallu i ehangu’r ddarpariaeth bresennol.  Fodd bynnag, byddai angen ystyried buddsoddi yn yr adeiladau presennol.   

 

Gan y byddai’n anodd cyfiawnhau buddsoddi llawer o arian ar safle Ysgol Rhewl, pe bai ysgol newydd yn cael ei hadeiladu ar safle Glasdir, awgrymwyd  y dylid ystyried dyfodol yr ysgol ar y cyd â datblygiad Glasdir. Byddai’r dewisiadau yn cynnwys cau Ysgol Rhewl ar ôl cwblhau’r ysgol/ysgolion newydd.  Bydd unrhyw gynnig i gau Ysgol Rhewl yn gofyn am ymgynghoriad ffurfiol a chyhoeddi rhybudd statudol. Os yw Ysgol Stryd y Rhos a/neu Ysgol Pen Barras yn symud i safle Glasdir, ac nad ydyn nhw'n newid llawer mewn maint, yna ni fyddai angen cyhoeddi cynigion statudol gan y byddai'r ysgol yn symud i safle llai nag un filltir i ffwrdd. Cafwyd cadarnhad bod cynigion i ddarparu dwy ysgol newydd gyda’u penaethiaid eu hunain ac y byddan nhw, gyda Chadeiryddion y Llywodraethwyr, yn rhan o’r broses ddylunio.   

 

Cododd y Cyng. David Smith y materion canlynol:-

 

-               Mynegodd ei gefnogaeth at ddarparu ysgol newydd i fynd i’r afael â’r problemau sydd wedi codi dros y blynyddoedd. Fodd bynnag, gofynnodd am sicrhad bod unrhyw broblem yn ymwneud â thraffig yn sgil adeiladu ysgol newydd, gan gynnwys materion parcio, yn cael eu hystyried a’u datrys ar y cychwyn cyntaf.

-               Cefnogodd y Cyng. Smith y cynnig i gadw Ysgol Borthyn fel ysgol ffydd.

-               Mae angen sicrhau nad yw unrhyw safle sy'n cael ei ddefnyddio i adeiladu ysgol newydd yng Nglasdir yn agored i lifogydd ac mae angen gwybod beth yw dewis rhieni dalgylch Ysgol Rhewl pe bai ysgol newydd yn cael ei hadeiladu yng Nglasdir.  Cadarnhaodd y Pennaeth Addysg y byddai unrhyw safle posib yn cael ei asesu ac y byddai adroddiad ar lifogydd yn cael ei ddarparu.

 

Soniodd y Cyng. Merfyn Parry am bryderon Corff Llywodraethu Ysgol Rhewl ynglŷn â’r ffaith y gall yr ansicrwydd ynghylch dyfodol yr ysgol gael effaith andwyol ar ei dyfodol, yn arbennig o ran nifer y darpar ddisgyblion.   Eglurodd y swyddogion y byddai’n anghywir hepgor Ysgol Rhewl o’r astudiaeth ddichonolrwydd gan y gallai’r cynigion effeithio ar yr ysgol, a phwysleisiwyd bod angen bod yn agored a chlir ynglŷn â’r amcan terfynol. Cadarnhawyd nad yw’r ysgol ar hyn o bryd yn rhan o’r cynnig ffurfiol. Fodd bynnag, byddai swyddogion yn cydweithio gyda'r ysgol i sicrhau nad yw darpariaeth addysg y disgyblion yn cael ei rhoi mewn perygl. Mewn ymateb i bryderon y Cyng. Parry ynglŷn â chategori dwyieithog yr ysgol, cadarnhaodd y Pennaeth Addysg y byddai ymgynghoriad ffurfiol pellach, a fyddai’n cynnwys y rheini, yn cael ei gynnal i edrych ar alw ac anghenion dwyieithrwydd.  Eglurodd Cyfarwyddwr Corfforaethol: Cwsmeriaid at yr argymhelliad o gynnal “astudiaeth ddichonolrwydd pellach cyn cadarnhau unrhyw argymhelliad ffurfiol ar gyfer Ysgol Stryd y Rhos, Ysgol Borthyn, Ysgol Pen Barras ac Ysgol Rhewl” a phwysleisiodd nad yw’r broses a awgrymir yn ymgynghoriad ffurfiol.

 

Datganodd y Cyng. Huw Hilditch-Roberts gysylltiad personol yn yr eitem hon gan ei fod yn Gadeirydd Llywodraethwyr Ysgol Pen Barras. Croesawodd y cynigion ar gyfer cadw Ysgol Pen Barras, Ysgol Stryd y Rhos ac Ysgol Borthyn a soniodd am bwysigrwydd cynnwys y Cyrff Llywodraethu ac uwch dimau'r ysgolion yn y broses gynllunio ar gyfer datblygu’r safle arfaethedig ar gyfer yr ysgol newydd. Soniodd hefyd am yr angen i edrych yn ofalus ar effaith unrhyw ysgol newydd ar Ysgol Borthyn ac Ysgol Rhewl ac i sicrhau bod safon cyfleusterau Ysgol Borthyn yn cael eu cadw. Cadarnhaodd Pennaeth Cwsmeriaid a Chymorth Addysg y byddai ansawdd y ddarpariaeth yn cael lle blaenllaw yn yr astudiaeth ddichonolrwydd.

 

Cynnig 4 – Ffederasiwn Arfaethedig Ysgol Llanfair Dyffryn Clwyd ac Ysgol Pentrecelyn (Atodiad 5)

 

Mae yna gefnogaeth gref o blaid cadw’r ddarpariaeth yn y cymunedau o amgylch Llanfair DC a Phentrecelyn. Mae angen buddsoddi yng nghyfleusterau Ysgol Llanfair DC ac mae llawer yn cytuno nad yw’r ysgol bresennol yn addas ar gyfer ei phwrpas. Pwysleisiwyd pa mor bwysig yw Ysgol Pentrecelyn yn y gymuned ynghyd â’r gwahaniaeth rhwng darparu addysg cyfrwng Cymraeg a darpariaeth ddwyieithog. Wrth ystyried anghenion yr ardal ehangach a’r angen am fuddsoddiad sylweddol, awgrymwyd cymryd camau gweithredu graddol.

 

Byddai’r cam cyntaf yn golygu cadw’r ddwy ysgol ac argymell bod y Cyrff Llywodraethu yn ffurfio ffederasiwn. Byddai Sir Ddinbych yn gofyn am gytundeb mewn egwyddor i ddatblygu hyn erbyn mis Ionawr 2014 gyda'r golwg o ddechrau'r ffederasiwn newydd ym mis Medi 2014. Byddai’r cynlluniau tymor hir, sy'n rhan o gynigion Band B Ysgolion yr 21ain Ganrif, yn golygu symud tuag at greu ysgol newydd ar gyfer cymunedau Pentrecelyn a Llanfair DC. Byddai creu ysgol ardal newydd yn gofyn am ymgynghoriad ffurfiol ar yr adeg gywir.

 

Cadarnhaodd yr Arweinydd y byddai’n cefnogi’r dewis a fyddai’n darparu’r budd mwyaf i ddisgyblion yr ardal. O ran ffedereiddio’r ddwy ysgol, ac o ran y ffaith bod Ysgol Llanfair yn ysgol ffydd, eglurodd y Pennaeth Addysg y byddai’r Tîm Arwain a’r Corff Llywodraethu yn edrych ar ethos a gwerthoedd moesol yr ysgolion, ac eglurodd bod ethos yr ysgolion yn edrych yn debyg iawn. Ymatebodd y Pennaeth Addysg i’r cwestiynau a ofynnwyd gan yr Aelodau ac eglurodd sut ddarpariaeth fydd darpariaeth Cyfnod Allweddol 1 a 2 yn y dyfodol, ac amlinellodd y rhesymau dros weithredu dulliau gwahanol mewn ardaloedd eraill. Eglurodd Cyfarwyddwr Corfforaethol: Cwsmeriaid y gellir gweithredu’r cynnig i greu ysgol ardal ar gyfer Clocaenog a Chyffylliog yn gynt oherwydd graddfa’r datblygiad.

 

Cynnig 5  - Cefnogaeth ar gyfer Ffederasiwn Ysgol Bryn Clwyd ac Ysgol Gellifor (Atodiad 5)

 

Awgrymwyd y dylid cynnwys Ysgol Bryn Clwyd yn arolwg ardal Rhuthun oherwydd bod yr ysgol hon ac Ysgol Gellifor yn cael eu cydarwain a’u cydreoli yn dilyn ffurfio ffederasiwn yn 2011.

 

Mae Ysgol Gellifor yn ysgol boblogaidd, heb lefydd gwag, sy’n denu disgyblion o’r tu allan i’r dalgylch naturiol.   O ran trefniadau'r ffederasiwn, mae canran y llefydd dros ben yn Ysgol Gellifor yn 4% a’r canran yn Ysgol Bryn Clwyd yn 67.6% ac mae hynny’n effeithio ar gynaladwyedd tymor hir y ffederasiwn.   

 

Cwestiynwyd categorïau iaith y ddwy ysgol. Mae’r ddwy ysgol yn ysgolion categori 5 ond byddai’r continwwm iaith Gymraeg yn gweld cynnydd yn narpariaeth Gymraeg yr ysgolion fel ymateb i safbwyntiau’r budd-ddeiliaid. 

 

Roedd y Llywodraethwyr wedi gofyn am sicrwydd ynghylch dyfodol Ysgol Bryn Clwyd yn sgil yr arolwg ac maent yn dymuno gweld dyfodol tymor hir yr ysgol yn cael ei gysylltu ag unrhyw gynnig sy’n deillio o arolwg Rhuthun. Mae’r Cyngor wedi cydnabod hyn er mwyn osgoi unrhyw ansicrwydd ynglŷn â'r ffederasiwn. Argymhellwyd y dylid parhau’r â’r trefniadau presennol yn amodol ar gytundeb i edrych ar gategori iaith Ysgol Bryn Clwyd. Byddai angen mynd i'r afael â nifer anghytbwys y disgyblion yn y ddwy ysgol drwy edrych ar y trefniadau derbyn.

 

Cyfeiriodd y Cyng. Huw Jones at y cynnig i gadw Ysgol Llanbedr ac amlygodd yr angen i fod yn glir ac yn deg wrth ystyried y cynnig mewn perthynas ag Ysgol Bryn Clwyd. Cyfeiriodd y Cyng. Merfyn Parry at y gwaith cadarnhaol sydd wedi ei wneud gan yr ysgolion a’u Cyrff Llywodraethu i sefydlu ffederasiwn llwyddiannus. Cyfeiriodd y Cyng. Huw Williams at yr angen i wneud gwaith cynnal a chadw ar adeilad Ysgol Gellifor.

 

Cynnig 6 – Cadw Ysgol Bro Famau (Atodiad 6)

 

Mae’r ysgol yn gwasanaethu’r ardal leol ond mae yna nifer fawr o lefydd dros ben. Mae’r ddau safle mewn cyflwr da ac argymhellir bod y sefyllfa bresennol yn parhau gyda’r Awdurdod a bod y Corff Llywodraethu yn adolygu defnydd presennol y safle’n barhaus.

 

Mynegodd y Cyng. Martyn Holland bryderon ynghylch cyllid gan Lywodraeth Cymru, yr angen i ddiogelu ysgolion gwledig ac effaith y CDLl ar ysgolion mewn ardaloedd gwledig. Eglurodd Pennaeth Cwsmeriaid a Chymorth Addysg bod swyddogion addysg a chynllunio wedi cydweithio i sicrhau bod nifer disgwyliedig y disgyblion yn cael ei gynnwys yn y broses blaengynllunio. Cyfeiriodd at ddiffyg cyfalaf ac arian ac amlygodd yr angen i adrefnu er mwyn buddsoddi mewn ysgolion yn y dyfodol. 

 

Yn ystod y drafodaeth i ddilyn, eglurwyd bod argymhelliad wedi ei wneud ynglŷn â chychwyn ymgynghoriad ffurfiol ddechrau mis Medi 2013, er mwyn annog trafodaethau ar ddechrau’r tymor ysgol, a chynnal yr ymgynghoriad am o leiaf 6 wythnos. Byddai’r broses ymgynghori yn galluogi rhieni, disgyblion, llywodraethwyr a staff i wneud sylwadau ar y cynigion cyn y byddai'r Cabinet yn penderfynu symud ymlaen a chyhoeddi cynigion ffurfiol ar gyfer newid. Cadarnhawyd mai cynigion 1 a 2 yn unig fyddai’n gofyn am ymgynghoriad ffurfiol ar hyn o bryd. 

 

Bydd astudiaeth ddichonolrwydd cynnig 3 yn cael ei gynnal dros yr haf, gyda’r golwg o gyflwyno’r dewis a ffafrir i’r Cabinet cyn diwedd yr hydref. Byddai hyn yn arwain at egluro’r dewisiadau ar gyfer sicrhau’r gwelliannau ar gyfer y dref.  Byddai’r wybodaeth hon yn galluogi’r Cabinet i ystyried achos busnes ar gyfer buddsoddiad. O ran cynigion 4, 5 a 6, bydd y Pennaeth Addysg a Phennaeth Cwsmeriaid a Chymorth Addysg, yn amodol ar gymeradwyaeth, yn dechrau'r trafodaethau gyda’r Cyrff Llywodraethu perthnasol i sicrhau’r cytundebau angenrheidiol i wneud y newidiadau a amlygwyd.   Os ni dderbynnir cymeradwyaeth, yna mae’n bosib y caiff cynigion eraill eu cyflwyno i’r Cabinet yn ystod gwanwyn 2014.

 

PENDERFYNWYD bod y Cabinet yn:-

 

(i)            nodi canfyddiadau’r ymgynghoriad;

(ii)        Cymeradwyo cynnal ymgynghoriad ffurfiol ar gyfer y cynigion i gau Ysgol Clocaenog ac Ysgol Cyffylliog ar 31 Aw^st 2014, ac uno’r ddwy ysgol fel ysgol ardal newydd ar 1 Medi 2014 yn defnyddio’r safleoedd presennol;

(iii)       Cymeradwyo cynnal ymgynghoriad ffurfiol ar gyfer y cynigion i gau Ysgol Llanbedr ar 31 Awst 2014 a throsglwyddo’r disgyblion i Ysgol Borthyn, yn dibynnu ar ddewis y rhieni;

(iv) Argymell i Gyrff Llywodraethu Ysgol Pentrecelyn ac Ysgol Llanfair DC eu bod yn ffurfio ffederasiwn erbyn 1 Medi 2014 fan bellaf..

(v) nodi canfyddiadau’r astudiaeth dichonolrwydd cyntaf i adnabod safleoedd posib ar gyfer ysgolion cynradd yn ardal Rhuthun ac argymell cynnal astudiaeth ddichonolrwydd pellach cyn cadarnhau unrhyw argymhelliad ffurfiol ar gyfer Ysgol Stryd Rhos, Ysgol Borthyn, Ysgol Penbarras ac Ysgol Rhewl.