Eitem ar yr agenda
TRAWSNEWID CLUDIANT – PROSIECT CYDWEITHREDOL RHANBARTHOL CLUDIANT TEITHWYR
Ystyried adroddiad
gan y Cyfarwyddwr Corfforaethol: Uchelgais Economaidd a Chymunedol (copi ynghlwm) i ystyried a chynnig sylwadau ar yr
achos busnes amlinell ar gyfer
creu tîm rhanbarthol trafnidiaeth teithwyr.
11.55 a.m.
Cofnodion:
Roedd adroddiad cyfrinachol gan y Cyfarwyddwr Corfforaethol: Uchelgais
Economaidd a Chymunedol (CC:UECh) a oedd yn rhoi crynodeb o’r gwaith sydd wedi
ei wneud hyd yma mewn perthynas â chreu uned integredig sengl ar gyfer darparu
gwasanaethau cludiant teithwyr yng Ngogledd Cymru ac yn cyflwyno’r achos busnes
amlinellol dros ei chreu, wedi cael ei gylchredeg gyda phapurau’r cyfarfod.
Croesawyd Mr Iwan Prys
Jones, Cynrychiolydd y Grŵp Cludiant Rhanbarthol (TAITH) i’r cyfarfod gan
y Cadeirydd.
Eglurodd y CC:UECh fod y
Prosiect Cludiant Teithwyr Rhanbarthol bellach wedi cyrraedd y cam o gyflwyno
Achos Busnes Amlinellol ac y byddai’r Cabinet yn ystyried p’un ai i gymeradwyo
symud ymlaen i ddatblygu Achos Busnes Llawn dros y Dewis a Ffefrir neu
beidio. Roedd Gweithgor o reolwyr
cludiant o bob un o Awdurdodau Gogledd Cymru, gyda chefnogaeth TAITH, a gafodd
ei hwyluso’n allanol, wedi datblygu Achos Busnes Amlinellol gan gynhyrchu Dewis
a Ffefrir er mwyn rhoi ystyriaeth bellach iddo, a cheisid cymeradwyaeth i
ddatblygu’r Dewis a Ffefrir yn Achos Busnes Llawn i’w roi ar waith pe profid yr
achos a phe câi ei gymeradwyo gan yr Awdurdodau sy’n aelodau. Roedd adolygiad gan Lywodraeth Cymru (LlC)
ynglŷn â dyfarnu cymorthdaliadau bysiau ledled Cymru i’r dyfodol wedi
cynhyrchu nifer o argymhellion, a'r prif un ohonynt oedd y byddai grant ariannu
bysiau newydd "Grant Gwasanaethau Cludiant Rhanbarthol" yn ei le o 1 Ebrill, 2013, a byddai hwnnw'n
cael ei ddosbarthu trwy gyfrwng y Consortia Cludiant Rhanbarthol.
Sylweddolwyd beth oedd
rhychwant y prosiect, a oedd i gynnwys cludiant cyhoeddus, addysg a
gwasanaethau cymdeithasol, yn gynnar iawn.
Roedd yr adroddiad yn manylu ar y meysydd nad oeddent wedi eu cynnwys o
fewn cwmpas y prosiect, ar y prif ffeithiau sy’n berthnasol i ddarpariaeth
gwasanaeth bresennol y chwe Awdurdod Lleol ac ar y sail y lluniwyd yr achos
dros newid arno. Roedd y pedwar prif
Ddewis a ystyriwyd yn ystod datblygu’r Achos Busnes Amlinellol wedi cael eu
crynhoi ac roedd copi o’r Achos Busnes Amlinellol wedi cael ei gynnwys yn Atodiad
1, ynghyd â manylion ynglŷn â’r meini prawf yr aseswyd y Dewisiadau yn eu
herbyn.
Roedd asesiad yr Achos Busnes Amlinellol wedi
adnabod dau ddewis gorau pan aseswyd yn erbyn y meini prawf a oedd wedi eu
nodi, ond o ystyried y newidiadau bwriedig diweddar i’r system o ariannu
bysiau, dim ond un o’r dewisiadau hyn oedd bellach yn teilyngu cael ei
ddatblygu ymhellach yn Achos Busnes Llawn i roi ystyriaeth bellach iddo. Roedd y dewis hwn wedi ei amlinellu yn yr adroddiad. Roedd cydnabyddiaeth i’r ffaith mai’r dewis
hwn fyddai’n un mwyaf radical a’r mwyaf cymhleth o’r rheiny oedd wedi cael eu
hystyried, fodd bynnag, roedd hefyd yn cynnig y potensial mwyaf ar gyfer gweld
gwell canlyniadau ac arbedion yn yr hir dymor.
Byddai’r potensial am arbedion ac effeithlonrwydd
yn cael ei dafoli ochr yn ochr â’r cymhlethdod a’r costau cychwynnol posibl
wrth i’r Achos Busnes Llawn gael ei ddatblygu.
Gellid datblygu ar y dewis yn gynyddrannol, gyda cham cyntaf yn rhoi
ystyriaeth i integreiddio gwasanaethau cludiant teithwyr, a bod hynny i’w
ddilyn yn hwyrach gan gludiant addysg a chludiant gwasanaethau
cymdeithasol. Byddai’r dull gweithio hwn
yn cyfuno gyda’r newidiadau sy’n angenrheidiol i reoli rhoi’r dull gweithio
newydd o ariannu bysiau ar waith, y tu hwnt i’r cyfnod trosiannol.
Roedd yr amserlen, a ystyrid yn gyraeddadwy ar
gyfer y prosiect, yn amodol ar dderbyn cymeradwyaeth, wedi cael ei hamlinellu
yn yr adroddiad. Derbyniwyd cadarnhad y
byddai’r goblygiadau ariannol llawn ar gyfer pob un o’r Cynghorau yn cael ei archwilio
yng ngham nesaf y gwaith ac yn cael eu nodi er mwyn caniatáu i benderfyniadau
ynglŷn â p’un ai i gyflwyno’r newidiadau neu beidio gael eu gwneud unwaith
y bo’r Achos Busnes Llawn wedi cael ei gwblhau a'i ystyried.
Mewn ymateb i bryderon a fynegwyd gan Aelodau, eglurodd Prif Weithredwr
TAITH y byddai model rhanbarthol integredig sengl yn sicrhau y byddai pob
Awdurdod unigol yn cadw rhyw gymaint o atebolrwydd yn narpariaeth eu
gwasanaethau penodol eu hunain, tra bônt yn gweithio o fewn fframwaith gyffredinol
ledled Gogledd Cymru. Eglurodd fod
Gweinidog Llywodraeth Leol a Chymunedau Llywodraeth Cymru wedi rhoi cyfle i bob
rhanbarth gyflwyno’r trefniadau bwriedig ar gyfer eu hardaloedd.
Cyfeiriodd nifer o Aelodau bod safonau uchel wedi eu gosod a gwaith da wedi
ei gyflawni gan y Rheolwr Adain:Cludiant Teithwyr a’i dîm gyda golwg ar
ddarpariaeth a rheolaeth cludiant ysgolion o fewn Sir Ddinbych. Cafwyd cadarnhad gan Brif Weithredwr TAITH y
byddai rhai elfennau sy’n ymwneud ag ysgolion a gwasanaethau cymdeithasol yn
parhau i fod o dan reolaeth yr awdurdod lleol.
Fodd bynnag, gellid cynnig a darparu cefnogaeth pe bai diffyg cynhwysedd
neu arbenigedd o fewn unrhyw ardal benodol.
Mewn ymateb i gwestiwn gan y Cynghorydd E.A. Jones, eglurodd y CC:UECh fod pwysigrwydd
cyfarch materion sy’n ymwneud â’r iaith Gymraeg a’r diwylliant Cymreig wedi
cael eu cynnwys yn rhan o’r Achos Busnes. Cafwyd ymateb gan Brif Weithredwr
TAITH i bryderon a leisiwyd gan y Cynghorydd M. McCarroll yn cadarnhau fod lle
ar gyfer gwelliannau effeithlonrwydd mewn perthynas â chludiant teithwyr ar
draws ffiniau, gan gyfeirio’n benodol at gludiant ysgolion, a dywedodd y gellid
edrych ar y mater hwn o fewn cylch gwaith y prosiect. Fodd bynnag, byddai
penderfyniadau’n ymwneud â’r meini prawf cymhwyso ar gyfer cludiant ysgolion yn
aros o fewn rheolaeth yr awdurdod addysg lleol.
Cafwyd ymateb Prif Weithredwr TAITH i bryderon a leisiwyd gan y Cynghorydd
J. Butterfield yn ymwneud ag anferthedd y prosiect. Cafwyd
cadarnhad ganddo y gellid cyflwyno adroddiadau cynnydd rheolaidd ger bron y
Pwyllgor Archwilio Partneriaethau ym mhob un o’r camau datblygu.
Cafwyd cadarnhad gan y CC:UECh y byddai hi’n cysylltu gyda’r Cydlynydd
Archwilio pan fyddai manylion ynglŷn â’r amserlen ar gael.
PENDERFYNWYD bod y Pwyllgor:-
(a)yn amodol ar y sylwadau uchod, yn gwneud argymhelliad bod
y Cabinet yn derbyn yr Achos Busnes Amlinellol a’r dewis a ffefrir a bod y
prosiect nawr yn symud yn ei flaen i ddatblygu Achos Busnes Llawn dros sefydlu
uned integredig sengl ar gyfer darparu gwasanaethau cludiant teithwyr yng
Ngogledd Cymru.
(b)yn nodi na fyddai unrhyw benderfyniad i sefydlu uned
integredig yn digwydd hyd nes bo’r Cynghorau wedi rhoi ystyriaeth i’r Achos
Busnes Llawn a’i gymeradwyo, ac y byddai trefniadau llywodraethu at y dyfodol
yn cael eu cyfarch yn ystod cyfnod datblygu’r Achos Busnes Llawn, a
(c) bod y Pwyllgor yn derbyn adroddiadau cynnydd
rheolaidd i’w harchwilio yn ystod pob un o gamau datblygu’r prosiect.
RHAN
I
Dogfennau ategol:
- Restricted enclosure Gweler y rhesymau pam fod dogfen 8./1 yn gyfyngedig
- Restricted enclosure Gweler y rhesymau pam fod dogfen 8./2 yn gyfyngedig
- Restricted enclosure Gweler y rhesymau pam fod dogfen 8./3 yn gyfyngedig