Eitem ar yr agenda

Ystyried adroddiad gan y Cynghorydd Hugh Evans, Arweinydd ac Aelod Arweiniol Datblygiad Economaidd (copi’n amgaeëdig) yn gofyn i’r Cabinet gymeradwyo cynigion ar gyfer Cyfleusterau Arfordirol y Rhyl a gwaith brys i’r Tŵr Awyr.

 

PENDERFYNWYD bod y Cabinet -

 

(a)       yn cymeradwyo’r prosiectau arfaethedig mewn egwyddor a datblygiad Cam 2 achos busnes / cyfiawnhad a ffïoedd Cam 2 hyd at £30,000 i:

 

·         Symud ymlaen gyda datblygu’r dyluniad ac astudiaeth ddichonolrwydd ar gyfer y ganolfan ddŵr newydd yn y lleoliad arfaethedig ger y pwll padlo presennol;

·         Cynnwys ystyriaeth benodol i bwll nofio 50 medr o fewn yr astudiaeth ddichonolrwydd;

·         Ymgorffori cynaliadwyedd strwythur y Tŵr Awyr yn y cynlluniau hyn a datblygu cynigion ar gyfer ei ddefnyddio / ei wella yn y dyfodol;

·         Cydnabod egwyddor dymchwel strwythur presennol yr Heulfan gan arwain at ddatblygu dyluniadau ac astudiaeth ddichonolrwydd ar gyfer gwelliannau i Theatr y Pafiliwn;

·         Cytuno datblygu’r pecyn cyfan (fel un prosiect) i lunio achos busnes manwl;

·         penodi Alliance Leisure Ltd dan delerau’r cytundeb fframwaith presennol i gynorthwyo gyda datblygu’r prosiect;

·         sicrhau bod yr agwedd yn cael ei datblygu ar y cyd â chynlluniau ehangach y Rhyl yn Symud Ymlaen a sicrhau effaith y prosiect ar y cynlluniau hynny;

·         sefydlu Bwrdd Prosiect i fonitro a chyfeirio cynnydd, a

 

(b)       cymeradwyo gwaith brys i’r Tŵr Awyr i leihau peryglon iechyd a diogelwch presennol a gwneud y strwythur yn ddiogel – hyd at derfyn uchaf o £35,000.

 

Cyflwynodd y Cynghorydd Hugh Evans, Arweinydd ac Aelod Arwain dros Ddatblygu Economaidd, yr adroddiad yn gofyn i’r Cabinet gymeradwyo cynigion ar gyfer Cyfleusterau Arfordirol y Rhyl a gwaith brys i’r Tŵr Awyr. Roedd yr adroddiad yn cynnwys cynlluniau i gyfleusterau arfordirol y dref, gan edrych ar y cynnig dyfrol yn y dyfodol, yr Heulfan, Theatr y Pafiliwn a Phentref y Plant. Gwnaethpwyd argymhellion cychwynnol hefyd ar gyfer dyfodol Canolfan Nova, Prestatyn.

 

Dymunai’r Cynghorydd Evans egluro’r cyfeiriadau at Clwyd Leisure yn yr adroddiad, gan gynghori bod y Cyngor hefyd yn gyfrifol am y cynnig hamdden, a soniodd am yr anawsterau o ran cynnal yr Heulfan a buddsoddi ynddo, am resymau amrywiol. Roedd y cynigion yn arwydd o ddechrau oes newydd i’r Rhyl gan arwain at gynnig hamdden newydd, creu swyddi newydd ac ysgogi buddsoddiad preifat pellach yn y dref.  Byddai datblygiad y prosiect yn mynd rhagddo gyda phartner datblygu’r Cyngor, Alliance Leisure, gyda phecyn cyflawn o brosiectau i ategu ei gilydd ac a fyddai o fudd i breswylwyr a thwristiaid.

 

Bu Rheolwr y Rhyl yn Symud Ymlaen yn rhoi cyflwyniad PowerPoint am y cynigion i’w hystyried yn codi o astudiaeth ddichonolrwydd gychwynnol o’r prosiectau. Ymhelaethodd ar -

 

·         y cefndir yn arwain at yr adroddiad cyfredol gan gynnwys cyfeiriad at astudiaethau blaenorol a newidiadau allweddol ers hynny

·         creu cynnig hamdden ddyfrol blaenllaw newydd gan gyfeirio at leoliad, dyluniad y cyfleuster, hamdden wlyb (cymysgedd o nofio ffurfiol a hamdden), ffitrwydd, caffi, dringo ac efallai chwaraeon traeth ynghyd â darluniadau o’r math o gyfleusterau ac adeiladau a fyddai’n cael eu cynhyrchu gan y prosiectau

·         gwaith brys a oedd yn ofynnol i’r Tŵr Awyr ynghyd â dewisiadau’r dyfodol

·         argymhelliad i ddymchwel yr Heulfan a naill ai tirlunio’r safle, ceisio denu datblygiad gwesty, neu ddatblygu maes parcio newydd

·         argymhellion i wella Theatr y Pafiliwn ac ystyried y potensial am dwf busnes gwledda a chynadledda

·         cau Pwll presennol Canolfan Hamdden y Rhyl wedyn gyda’r Ganolfan yn gwasanaethu ysgolion/colegau ac anghenion chwaraeon lleol yn y dyfodol

·         ystyriaethau ehangach Cynllun y Rhyl yn Symud Ymlaen gan gynnwys: adleoli’r parc sglefrio; datblygu gwesty newydd; gwella’r maes parcio tanddaearol a buddsoddi ym maes parcio Crescent Road ynghyd â dull rheoli gweithredol cyffredinol i gydlynu hamdden ac adfywio, a

·         chynigion am adolygiad penodol i ystyried dewisiadau’r dyfodol ar gyfer Canolfan Nova na fyddent yn tanseilio llwyddiant cynnig dyfrol a glan môr newydd y Rhyl.

 

Wrth ddod i ben, dywedodd Rheolwr y Rhyl yn Symud Ymlaen y gallai cynnig hamdden a dyfrol newydd chwarae rhan hanfodol yn y gwaith cyffredinol i adfywio’r llain arfordirol a’r Rhyl yn gyrchfan i ymwelwyr. Yn olaf, soniodd am y camau nesaf pe byddai’r Cabinet yn cymeradwyo’r argymhellion yn yr adroddiad.

 

Roedd y Cabinet yn croesawu’r adroddiad yn fodd o drawsnewid y Rhyl drwy becyn cydlynol o brosiectau a fyddai o fudd i breswylwyr ac ymwelwyr fel ei gilydd. Cydnabuwyd y byddai’r cynigion yn hybu hyder a buddsoddiad y sector preifat, gan greu cyfleoedd busnes a swyddi newydd.  Amlygwyd hefyd y posibilrwydd i’r buddsoddiad hwnnw effeithio’n gadarnhaol ar Ganol Tref y Rhyl. Cyfeiriodd yr Aelodau at eu hatgofion a’u profiadau eu hunain o’r Rhyl yn gyrchfan glan môr prysur gan gydnabod bod yr Heulfan a arferai fod yn eiconig wedi gweld dyddiau gwell a bod angen atyniad newydd sy’n addas i’r 21ain ganrif. Wrth ystyried natur uchelgeisiol y cynigion, mynegodd yr aelodau eu barn am agweddau amrywiol ar yr adroddiad a manteisiwyd ar y cyfle i ofyn cwestiynau. Gofynnwyd am sicrhad am nifer o bethau hefyd fel a ganlyn –

 

-       bod yr Heulfan yn dal i weithredu nes bod cyfleuster wedi’i agor yn ei lle

-       na fyddai Canolfan Nova dan anfantais o ganlyniad i’r cynigion

-       bod ystyriaeth bellach yn cael ei rhoi i gynnwys pwll 50 metr yn y manylebau er mwyn denu cystadlaethau

-       na ddylid colli’r parc sglefrio fel cyfleuster ac y dylid ystyried ei adleoli yn ofalus o ystyried ei boblogrwydd

-       bod angen i’r adeilad a’r cyfleusterau newydd fod yn ymarferol ac yn addas at ddiben, gyda chostau gweithredu a chynnal a chadw rhesymol

-       sicrhau bod cynnig newydd y Rhyl yn cyfrannu at adfywio ehangach yn yr ardal, a Chanol y Dref yn benodol, a

-       chywirdeb costau a ddarperir i’r prosiect a modelau cyllid.

 

Wrth ateb yr aelodau, dywedodd y swyddogion –

 

-       fod y Cyngor wedi egluro ei fod yn dymuno i’r Heulfan ddal i weithredu cyhyd â phosibl nes bod unrhyw gynigion newydd yn cael eu datblygu

-       bod gan Clwyd Leisure weledigaethau ar gyfer Canolfan Nova a bod cynlluniau clir i fynd ymlaen â’r rheini gydag aelodau Prestatyn

-       darparwyd darluniad o’r modd y gellid gosod pyllau allan; roedd Alliance Leisure wedi nodi y byddai’n barod i’w hariannu a’i bod yn bwysig darparu digon o le pwll i fodloni’r galw. Gellid ystyried ymhellach cynnwys pwll 50 metr yn y cyfleuster pe dymunai’r aelodau

-       cydnabuwyd bod y parc sglefrio’n gyfleuster pwysig a byddai safleoedd amgen priodol yn cael eu hystyried

-       ei bod yn bwysig darparu strwythur eiconig a fyddai’n cael ei gydnabod ac a fyddai’n ysgogi adfywio ond bod yr angen am fforddiadwyedd yn ystyriaeth allweddol yn ei ddyluniad i sicrhau cyfleuster cynaliadwy i’r dyfodol

-       bod y Cyngor wedi buddsoddi’n synhwyrol yn ei stoc hamdden ei hun a oedd wedi’i chynnal i safon dda, a fyddai’n cael ei chynnwys mewn unrhyw brosiectau yn y dyfodol

-       dim ond costau dangosol a oedd wedi’u darparu ar hyn o bryd a byddai cam nesaf y broses yn darparu gwir gostau’r prosiectau

-       am fod Theatr Fach y Rhyl yn gyfleuster cymunedol, nid oedd wedi’i hystyried yn rhan o’r cynnig theatr a oedd yn canolbwyntio ar ddichonolrwydd masnachol

-       roedd gwaith wedi’i wneud gyda Grŵp Busnes y Rhyl a Chyngor y Dref i gyfarwyddo dyfodol Canol y Dref a oedd yn amgylchedd heriol iawn

-       roedd gofynion parcio ceir yn cael eu hystyried a byddai’r achos busnes yn ystyried y ffordd orau o ddarparu lleoedd parcio ac yn ystyried a fyddai’n gonsesiynol

-       cadarnhawyd bod y partner datblygu, Alliance Leisure, yn adolygu cyfleusterau hynny’r Cyngor nad oeddent yn cael eu defnyddio’n ddigonol neu a allai gynhyrchu mwy o incwm.

 

Pwysleisiodd y Cabinet hefyd fod angen sicrhau dichonolrwydd economaidd y prosiect i’r dyfodol a thrafodwyd gyda’r swyddogion y ffrydiau ariannu posibl a fyddai’n cael eu cynnwys yn yr achos busnes. Bu’r Pennaeth Cyllid ac Asedau’n atgoffa’r aelodau nad oedd yn cytuno i’r prosiect heddiw ac y byddai’n rhaid i achos busnes manwl gael ei gyflwyno a’i adolygu’n ofalus cyn y gellid gwneud unrhyw benderfyniad am y prosiect. Amlygwyd hefyd fod angen cadw cyflogaeth yn lleol. Rhybuddiodd y Cynghorydd Hugh Irving y gellid gosod amodau ynghlwm wrth gyllid grant, a bod angen ei ystyried yn ofalus. Roedd cyllid ychwanegol eisoes wedi’i sicrhau gan Lywodraeth Cymru er mwyn archwilio dichonolrwydd materion parcio ceir a thir y cyhoedd a oedd yn gysylltiedig â’r prosiect.

 

Yn y man hwn, gwahoddodd yr Arweinydd y rheini nad ydynt yn aelodau Cabinet i siarad ac roedd yn benodol o awyddus i glywed barn Aelodau’r Rhyl. Dywedodd y Cynghorwyr Joan Butterfield a David Simmons eu bod yn llwyr gefnogi’r cynigion yn gam cadarnhaol ymlaen ar gyfer dyfodol y Rhyl, gan ddisgrifio buddion y cynigion i breswylwyr a thwristiaid ac o ran adfywio ehangach y Rhyl. Roedd Aelodau’r Rhyl wedi cael gwybod yn llawn am y cynigion ac roeddent yn awyddus i’r cynlluniau cyffrous fynd ymlaen i’r cam nesaf. Roedd aelodau eraill yn falch o nodi y byddai costau refeniw a chynnal a chadw parhaus yn ystyriaeth fawr yn natblygiad y cyfleusterau newydd. Cafodd y traeth ei gymeradwyo hefyd yn fantais enfawr ac amlygwyd bod angen sicrhau ei welededd a’i bod yn hawdd cael ato, ynghyd â dull mwy cyfannol er mwyn integreiddio cynnig newydd y Rhyl gyda phrosiectau eraill yno er mwyn cynnig pecyn cyfan. Mewn ymateb i’r sylwadau hynny a chwestiynau pellach, bu i’r Aelod Arwain a’r Swyddogion –

 

-       gytuno bod dull cydgysylltiedig ar goll yn y gorffennol ond bod llawer o waith wedi’i wneud yn ddiweddar i ddarparu dull mwy integredig

-       ymhelaethu ar ddewisiadau posibl i gynnwys gwesty yn rhan o’r cynigion ynghyd â dewisiadau parcio ceir a fyddai’n cael eu harchwilio’n llawn yng ngham 2

-       cydnabod y cymhlethdodau sydd ynghlwm wrth ddatblygu cyfleusterau felly gan gynghori bod arolygon strwythurol wedi’u cynnal yn ystod yr astudiaeth ddichonolrwydd gydag ymchwiliadau pellach i’w cynnal yng ngham 2

-       cynghori y byddai’r broses gyllido’n cael ei hystyried ar ôl costio’r prosiect yn llawn, ac y byddai’r cyllid yn debygol o ddod o amrywiaeth o ffynonellau

-       cadarnhau bod y prosiect yn fenter enfawr y byddai angen ei chwblhau cyn y byddai mentrau mawr eraill yn cael eu hystyried, fel yr awgrym am drên stêm o Ganolfan Nova i’r Rhyl

-       gellid rhoi gwybod i’r aelodau am y cynigion yn Sesiwn Wybodaeth y Cyngor pe dymunid a gellid gwneud y prosiect yn destun craffu i’w ystyried ymhellach; disgrifiwyd y broses a’r amserlenni i weithredu’r cynigion yn yr adroddiad.

 

Soniodd y swyddogion am benodi’r partner datblygu, Alliance Leisure, yn ddull arloesol o reoli stoc hamdden ac am y gwelliannau a’r buddion sylweddol a gyflawnwyd o ganlyniad a ddylai rhoi hyder i’r aelodau yn y cynigion. Ychwanegodd y Cynghorydd Huw Jones fod awdurdodau lleol eraill yn ystyried cau neu drosglwyddo cyfleusterau hamdden ac amlygodd y ffordd yr oedd Sir Ddinbych wedi elwa ar y dull arloesol hwn a oedd bellach yn cael ei ystyried gan eraill gan ddisgwyl dirprwyaeth o Gyngor Dinas Caerdydd. Manteisiodd y Cynghorydd Jones hefyd ar y cyfle i ddiolch i’r tîm Hamdden a thîm y Rhyl yn Symud Ymlaen am eu gwaith caled i ddatblygu’r cynigion.

 

Cyfeiriodd yr Arweinydd at yr argymhellion ac, yng ngoleuni’r gefnogaeth i ystyried pwll nofio 50 metr yn yr astudiaeth ddichonolrwydd, cynigiwyd hyn fel gwelliant gan y Cynghorydd Julian Thompson Hill ac fe’i heiliwyd gan y Cynghorydd Huw Jones. Ar fwrw’r bleidlais –

 

PENDERFYNWYD bod y Cabinet –

 

(a)       yn cymeradwyo’r prosiectau arfaethedig mewn egwyddor a datblygiad Cam 2 achos busnes/cyfiawnhad a ffioedd Cam 2 hyd at £30,000 er mwyn:

 

·         symud ymlaen â datblygiad y dyluniad a’r astudiaeth ddichonolrwydd i’r ganolfan ddyfrol newydd yn y lleoliad arfaethedig wrth ymyl y pwll padlo presennol;

·         cynnwys ystyriaeth benodol i bwll nofio 50 metr yn yr astudiaeth ddichonolrwydd;

·         ymgorffori cynaliadwyedd strwythur y Tŵr Awyr yn y cynlluniau hyn a datblygu cynigion am ei ddefnyddio/ei wella yn y dyfodol

·         cydnabod egwyddor dymchwel strwythur presennol yr Heulfan gan arwain at ddatblygu dyluniadau a dichonolrwydd ar gyfer gwelliannau i Theatr y Pafiliwn;

·         cytuno i ddatblygu’r pecyn cyfan (fel un prosiect) i achos busnes manwl;

·         penodi Alliance Leisure Ltd dan delerau’r cytundeb fframwaith presennol i gynorthwyo i ddatblygu’r prosiect

·         sicrhau bod y dull yn cael ei ddatblygu ar y cyd â chynlluniau ehangach y Rhyl yn Symud Ymlaen a sicrhau effaith y prosiect ar y cynlluniau hynny;

·         sefydlu Bwrdd Prosiect i fonitro a chyfarwyddo cynnydd, a

 

(b)       cymeradwyo gwaith brys i’r Tŵr Awyr i leihau’r risgiau iechyd a diogelwch presennol ac i ddiogelu’r strwythur – hyd at £35,000 o gyllideb uchaf.