Eitem ar yr agenda

Cyflwynodd Cyfarwyddwr Corfforaethol Moderneiddio a Lles adroddiad (a gylchredwyd yn flaenorol) yn mynegi’r prif faterion a oedd yn codi o werthusiad Arolygiaeth Gofal a Gwasanaethau Cymdeithasol Cymru (AGGCC) o berfformiad Gwasanaethau Cymdeithasol Sir Ddinbych ar gyfer 2011 - 12.  Roedd copi o’r gwerthusiad llawn wedi ei atodi i’r adroddiad (Atodiad 1) ynghyd â throsolwg o ymateb y Cyngor i’r meysydd cynnydd a nodwyd a’r meysydd i’w gwella (Atodiad 2).

Cyflwynodd y Cyfarwyddwr Corfforaethol Moderneiddio a Lles, Angela Mortimer a Sue Millington, Rheolwyr Ardal AGGCC ynghyd â Rheolwr Gwasanaeth: Datblygu Ansawdd a Systemau'r Cyngor, Craig McLeod, a’u croesawu i’r cyfarfod.  Rhoddodd beth gwybodaeth gefndir i’r adroddiad a chyd-destun y gwerthusiad blynyddol fel rhan o system reoli perfformiad cyffredinol y Cyngor.  Roedd yn werthusiad positif i Sir Ddinbych yn nodi cynnydd arwyddocaol mewn llawer o feysydd gyda meysydd i’w gwella wedi eu nodi a oedd yn adlewyrchu’r rheiny yn hunanasesiad y Gyfarwyddiaeth.  Tynnwyd sylw Aelodau’n arbennig at y meysydd canlynol -

·         Roedd rhaglenni uchelgeisiol o newid gwasanaeth gydag arweinyddiaeth glir a threfniadau rheoli perfformiad wedi eu hamlygu

·         Roedd meysydd a nodwyd i’w gwella wedi eu mewnblannu o fewn Cynlluniau Busnes Gwasanaethau a oedd yn cael eu monitro’n chwarterol

·         Roedd risg wedi ei nodi o ran cynllunio strategol gyda Bwrdd Iechyd Prifysgol Betsi Cadwaladr (BIPBC) [a oedd hefyd wedi ei nodi ar draws awdurdodau Gogledd Cymru i gyd].   Roedd ymateb cynhwysfawr i ymgynghoriad BIPBC ar gynlluniau i ad-drefnu darpariaeth gofal iechyd wedi ei gyflwyno ac roedd yr angen am Grŵp Strategol wedi ei amlygu.

Rhoddodd y Rheolwr Ardal  sylw ar yr adroddiad positif a oedd yn edrych yn ôl dros y deuddeng mis blaenorol gan ddweud fod pethau wedi symud ymlaen ac roedd camau’n cael eu cymryd i symud ymlaen â’r meysydd a oedd wedi eu nodi i’w gwella.  Rhoddodd sylwadau hefyd ar ansawdd yr ymgysylltiad â’r awdurdod ac uwch swyddogion a oedd wedi bod yn gynorthwyol yn cynhyrchu gwybodaeth er mwyn arwain y broses werthuso.

Roedd aelodau’n falch o nodi agweddau positif yr adroddiad a’r cynnydd arwyddocaol sy’n cael ei wneud ond roedd eu cwestiynau’n canolbwyntio ar y meysydd hynny a nodwyd i’w gwella a lle’r oedd cynnydd wedi bod yn fwy cyfyngedig a cheisiwyd sicrwydd ynglŷn â chadernid y camau i ddelio â nhw.  Fe ganolbwyntiodd y drafodaeth ar y meysydd canlynol -

·         Roedd AGGCC wedi nodi gallu parhaus i ddylanwadu ar gynllunio strategol sy’n canolbwyntio ar ardal gyda BIPBC fel risg potensial - esboniodd y Rheolwr Ardal bod cydgysylltu ag iechyd yn hanfodol i gynllunio a darpariaeth gwasanaeth ar gyfer gwaith Oedolion a Phlant a bod ailstrwythuro BIPBC wedi tarfu ar lawer o gysylltiadau a hynny wedi effeithio ar gyflymdra symud cynlluniau ymlaen i’w terfyn.  Mynegodd aelodau bryderon difrifol ynglŷn â’r risgiau canfyddadwy, yn enwedig o ystyried ad-drefnu’r ddarpariaeth gofal iechyd ac effaith ddilynol ar wasanaethau a chyllidebau’r Cyngor, ac fe geisiwyd sicrwydd ynglŷn â sut y byddai’r risg yn cael ei reoli’n effeithiol.  Cyfeiriodd y Cyfarwyddwr Corfforaethol: Moderneiddio a Lles at fentrau fel y prosiect ardaloedd, a oedd wedi bod yn arafach i symud ymlaen oherwydd yr anhawster o ymgysylltu staff yn lleol yn dilyn ailstrwythuro a gweithrediad BIPBC yn rhanbarthol ynghyd â blaenoriaethau eraill sy’n gwrthdaro.  Roedd yn obeithiol y byddai Grwpiau Strategol yn cael eu sefydlu’n sirol i alluogi datrys problemau lleol a’u bwrw ymlaen.  Ychwanegodd fod cysylltiadau ar lefel weithredol yn dal i fod yn dda efo BIPBC mewn meysydd eraill ac roedden nhw wedi bod yn weithredol ymglymedig â BIPBC yn datrys problemau penodedig.  Roedd fforwm strategol o chwe Chyfarwyddwr Gwasanaethau Cymdeithasol a Chyfarwyddwyr BIPBC yn cyfarfod yn chwarterol hefyd gyda’r bwriad o ddatrys problemau.  [Roedd y Cynghorydd Stuart Davies am iddo gael ei nodi fod sicrwydd wedi ei geisio gan BIPBC na fyddai cyfleusterau presennol yn cael eu cau’n rhan o’r ad-drefnu nes byddai rhai newydd yn agor.  Er bod y Prif Weithredwr wedi derbyn y sicrwydd hwnnw fe ddywedwyd wrth rai aelodau ar wahân na ellid rhoi unrhyw sicrwydd].

·         Gwella absenoldeb oherwydd salwch - roedd cynnydd wedi bod yn fwy cyfyngedig gyda gwella absenoldeb oherwydd salwch a gofynnodd aelodau a ddeliwyd ag adnoddau staffio a baich gwaith; y rhesymau am absenoldeb, a pha ddulliau a gyflwynwyd i wella perfformiad.  Cadarnhaodd swyddogion nad oedd staff asiantaeth yn cael eu defnyddio bellach a bod staff digonol wedi eu recriwtio.  Er bod lefelau salwch wedi gwella roedd cynnydd yn dal yn gyfyngedig ac fe ymhelaethodd swyddogion ar y dulliau cadarnach a gyflwynwyd i reoli absenoldeb a hwyluso dychweliad i’r gwaith yn dilyn salwch.  Roedd straen wedi ei nodi’n brif reswm am absenoldeb ac roedd hyn yn cael ei ailadrodd ar draws holl wasanaethau’r cyngor ond roedd cyfraddau Sir Ddinbych yn cymharu’n ffafriol ag awdurdodau lleol eraill.  Roedd trafodaethau’n barhaus ynghylch achos straen ac a oedd salwch yn berthynol i waith a byddid yn cynnal dadansoddiad o wasanaethau a oedd yn perfformio’n well gyda’r bwriad o rannu arferion gorau.  Dywedodd y Cynghorydd Bobby Feeley y byddid yn sefydlu Gweithgor gyda’r bwriad o daclo’r broblem benodedig yn y gwasanaethau cymdeithasol.

·         Adolygiad o Wasanaethau a ddarperir i Oedolion – amlygwyd pwysigrwydd cynlluniau gofal a dywedodd y Rheolwr Gwasanaeth: Datblygu Ansawdd a Systemau fod 94% o gynlluniau gofal wedi eu hadolygu’n brydlon ac roedd systemau cadarnach wedi eu cyflwyno er mwyn olrhain perfformiad adolygiadau.

·         Systemau Gofal Seibiant - Amlygodd y Cynghorydd Raymond Bartley y fiwrocratiaeth a oedd yn gysylltiedig â’r broses o ddarparu gofal seibiant mewn cartrefi gofal.  Teimlai y dylid ei adolygu er mwyn cynorthwyo gofalwyr a sicrhau bod teuluoedd yn cael eu cyfweld yn rhan o’r broses honno.  Cyfeiriodd y Cyfarwyddwr Corfforaethol: Moderneiddio a Lles at y Strategaeth Gofalwyr a’r cyswllt â theuluoedd a’r cydbwysedd rhwng cynorthwyo gofalwyr a chynnal annibyniaeth pobl.  Amlygodd hefyd yr angen i flaenoriaethu a gwneud y defnydd gorau o adnoddau cyfyngedig wrth gefnogi gofalwyr.  Ychwanegodd y Rheolwr Adnoddau fod gofalwyr sy’n derbyn gwasanaethau wedi bod yn bositif yn gyffredinol.

·         Diogelu Plant - Ceisiodd y Cynghorydd Martyn Holland sicrwydd ynglŷn â mecanweithiau sydd yn eu lle i adnabod plant sydd mewn perygl.  Dywedodd y Cyfarwyddwr Corfforaethol: Moderneiddio a Lles fod yna systemau gwydn iawn yn eu lle a chysylltiadau gweithio da ar y cyd ag asiantaethau eraill.  Adroddodd ar waith y Panel Amlasiantaeth ar y Cyd  i sgrinio atgyfeiriadau a oedd yn darparu dull amlasiantaeth cydlynol.  Mewn ymateb i gwestiwn gan y Cadeirydd ynglŷn ag ymyriad cynnar mewn teuluoedd sy’n agored i niwed, adroddodd y Cyfarwyddwr Corfforaethol: Moderneiddio a Lles ar ddull amlasiantaeth i nodi ffactorau cyfranogol allweddol er mwyn canfod y teuluoedd sy’n fwyaf agored i niwed.  Byddid yn defnyddio’r wybodaeth honno ar gyfer ymyrryd drwy’r Rhaglenni Teuluoedd yn Gyntaf a Chymorth Dwys i Deuluoedd.  Roedd y broses wedi ei dogfennu’n helaeth a gellid rhoi’r canlyniadau ar gael i aelodau ar gais.  Y gobaith oedd y byddai ymyriad cynnar yn golygu llai o achosion gofal.

·         Lleoliadau y Tu Allan i’r Sir - fe atebodd y Cyfarwyddwr Corfforaethol: Moderneiddio a Lles gwestiwn gan y Cynghorydd Raymond Bartley gan ddweud fod tua phymtheg o blant wedi eu lleoli y tu allan i’r sir ar hyn o bryd a bod y nifer wedi bod yn graddol leihau.  Cyfeiriodd y Rheolwr Ardal at adolygiad diweddar gan yr AGGCC o blant mewn gofal, a fyddai ar gael ym mis Chwefror 2013, a oedd yn nodi arferion da ac fe allai fod o ddiddordeb i’r awdurdod.

Diolchodd y Cadeirydd i Reolwyr Ardal yr AGGCC am eu presenoldeb yn y cyfarfod a’u persbectif ar berfformiad a gwerthusiad gwasanaethau cymdeithasol y  Cyngor.

PENDERFYNWYD derbyn a nodi’r adroddiad ar werthusiad perfformiad Gwasanaethau Cymdeithasol Sir Ddinbych ar gyfer 2011-12.