Eitem ar yr agenda

Ystyried adroddiad gan y Pennaeth Tai a Datblygu Cymunedol (copi’n amgaeëdig) yn rhoi dadansoddiad manwl o effaith digwyddiad 2012 ar y gymuned leol, busnesau lleol a chyfranogwyr ynghyd â’r manteision a welwyd/yr effaith ar yr economi lleol ehangach a Sir Ddinbych gyfan.

                                                                                                       10.10 a.m.

 

 

Roedd copi o adroddiad gan y Prif Swyddog Strategaeth Adfywio, a oedd yn rhoi dadansoddiad manwl o effaith digwyddiad 2012 ar y gymuned leol, busnesau lleol a chyfranogwyr, ynghyd â’r manteision / effaith ar yr economi lleol ehangach a Sir Ddinbych gyfan, wedi ei ddosbarthu gyda’r papurau ar gyfer y cyfarfod. Cyflwynodd y Rheolwr Adfywio Strategol (SRM) yr adroddiad.

 

Y llynedd, roedd y Pwyllgor wedi penderfynu ei fod yn cymeradwyo’r ceisiadau i gau ffyrdd i ganiatáu cynnal Etape Cymru 2012, yn amodol ar:-

 

a)            Ymgynghoriad llawn gyda’r cymunedau a’r busnesau lleol a effeithiwyd gan y ffyrdd yn cau gan gynnwys ymgynghori â’r Grŵp lleol Aelodau Ardal.

b)             Ymgymryd ag asesiad o’r effaith.

c) bod y Pwyllgor yn derbyn gwarant y byddai Bwlch yr Oernant yn ailagor i draffig erbyn 11am.

 

Byddai arfarniad o effaith y digwyddiad ac unrhyw fanteision a gafwyd neu effeithiau andwyol a achoswyd yn galluogi gwneud argymhellion mewn perthynas â’r trefniadau ar gyfer unrhyw ddigwyddiadau mawr yn y dyfodol. Roedd Sir Ddinbych wedi parhau i gyfathrebu’n rheolaidd gyda Human Race, trefnwyr Etape Cymru, a Chyngor Bwrdeistref Sirol Wrecsam, mewn perthynas â digwyddiad beicio ‘ffordd ar gau’ 2012 a gynhaliwyd ym Medi 2012 ac roedd cynlluniau nawr ar y gweill ar gyfer digwyddiad 2013 i’w gynnal ar ddydd Sul, 8fed Medi, 2013.  Cyfarfu trefnwyr gyda’r Grŵp Ymgynghorol ar Ddiogelwch a swyddogion Priffyrdd ac Adfywio Wrecsam a Sir Ddinbych i adolygu 2012, ac roeddynt wedi derbyn argymhellion y Grŵp.

 

Roedd Atodiad 1 i’r adroddiad yn cynnwys adolygiad o ddigwyddiad Etape Cymru 2012 a oedd yn rhoi trosolwg gadarnhaol o’r effaith economaidd ar ardal Wrecsam / de Sir Ddinbych. Manylwyd adolygiad Sir Ddinbych o fusnesau ar neu yn agos at lwybr cau ffyrdd dros dro ar gyfer Etape Cymru 2012 yn Atodiad 2 ac roedd cofnodion cyfarfod diwethaf  Grŵp Ymgynghori ar Ddiogelwch wedi ei gynnwys fel Atodiad 3 i’r adroddiad. Roedd gwybodaeth ar gyfraniad y penderfyniad mewn perthynas â Blaenoriaerhau Corfforaethol, effaith costau ar wasanaethau eraill, ymgynghoriad a ymgymerwyd a manylion risgiau a mesurau a weithredwyd i’w lleihau, wedi eu cynnwys yn yr adroddiad. Roedd crynodeb o’r adborth gan y Grŵp Ymgynghori ar Ddiogelwch, Aelodau Wardiau a busnesau yn yr adroddiad.

 

Cododd y Cynghorwyr T.R. Hughes a M.L. Holland nifer o bryderon a chytunodd y Pwyllgor bod angen eu cyflwyno i’r Grŵp Ymgynghori ar Ddiogelwch (SAG) ac a oedd angen atebion cyn cyflwyno’r adroddiad i’r Cabinet ym mis Chwefror, 2013.   Cytunodd y Pwyllgor bod y pryderon a’r materion canlynol a godwyd gan yr aelodau yn cael eu cyflwyno gan y swyddogion i gyfarfod nesaf y Grŵp Ymgynghori ar Ddiogelwch:-

 

·angen i wella cyfathrebu gyda thrigolion a busnesau, yn enwedig mewn ardaloedd gwledig, mewn perthynas â’r digwyddiad. Pwrpas a disgwyliadau’r Digwyddiad, cau ffyrdd a’r effaith ar fywydau bob dydd y trigolion a’r angen i’r holl gyfathrebu fod yn amserol.

·Atebolrwydd cyhoeddus os bydd digwyddiad neu ddamwain yn cynnwys cystadleuwr, warden, trigolyn, busnes a stoc ffermio byw neu farw.

·Canlyniad unrhyw asesiadau risg a ymgymerwyd mewn perthynas â materion atebolrwydd cyhoeddus.

·Dilysrwydd y ffigurau ar y fantais economaidd i’r ardal oherwydd pryderon a godwyd gydag aelodau gan fusnesau yn eu hardaloedd hwy ar yr amser yr oeddynt wedi gorfod cau oherwydd y digwyddiad.

·Darpariaeth wardeniaid annigonol yn y digwyddiad.

·Rhoi ystyriaeth i'r posibilrwydd o gychwyn y digwyddiad yn gynharach yn y y bore er mwyn lleihau’r ymyrraeth i fusnesau a thrigolion lleol.

·A oedd y deunydd hyrwyddo ar gyfer y digwyddiad ei hun yn helpu hyrwyddo a marchnata Sir Ddinbych, ac a ellid gwneud hyn neu ei wella yn y dyfodol.

·Y posibilrwydd o gael Aelod Lleol i fynychu SAG gyda swyddogion o Sir Ddinbych.

·Goblygiadau cyfreithiol damwain mewn perthynas ag atebolrwydd yswiriant Etape.

·Archwilio lefel a digonolrwydd y wardeniaid ar gyfer y digwyddiad.

 

Pwysleisiodd y Rheolwr Adran – Rheoli Rhwydwaith, bod meddiant y Gorchymyn Cau Ffordd yn aros gyda’r trefnwyr ac y byddant hwy yn cymryd unrhyw gyfrifoldeb cyfreithiol, atebolrwydd a risg, o fewn y trefniadau cau ffyrdd. Amlinellwyd dyletswyddau a chyfrifoldebau Sir Ddinbych a chyfeiriwyd at rôl y SAG a oedd yn cyfarfod yn rheolaidd i ystyried a thrafod unrhyw faterion a godai trwy’r fforwm.

 

Mewn ymateb i gwestiynau gan yr Aelodau, amlinellodd yr SRM y camau a oedd yn cael ei cymryd i hyrwyddo Sir Ddinbych trwy'r digwyddiad, a oedd yn cynnwys adroddiadau helaeth mewn cylchgronau beicio, manylion y lleoliad ar gyfer cyn-gofrestriad y digwyddiad a dolennau i lety yn yr ardal. Cefnogodd yr Aelodau awgrym gan y Cynghorydd H C Irving y dylid cael arweiniad gan y Pennaeth Cyfathrebu, Marchnata a Hamdden mewn perthynas â chynnwys gwybodaeth i hyrwyddo Sir Ddinbych yn y pecynnau gwybodaeth.

 

Ystyriodd yr Aelodau yr argymhellion yn yr adroddiad ac argymell y dylid cynnwys eitem Etape Cymru ar Flaenraglen waith y Pwyllgor.

 

Gofynnodd y Cynghorydd T R Hughes bod y cofnodion yn nodi nad oedd wedi mynegi ei gefnogaeth i’r digwyddiad.  

 

PENDERFYNWYD -

 

(a)          Argymhell bod Etape Cymru 2013 yn cael ei gynnwys ar Flaenraglen Waith y Pwyllgor i’w ystyried;

(b)          Bod pryderon a materion a godwyd gan yr Aelodau yn cael eu cyfleu gan y swyddogion i gyfarfod nesaf y Grŵp Ymgynghori ar Ddiogelwch (SAG), a bod yr atebion i’r cwestiynau uchod ac esboniad ar y pwyntiau a godwyd yn cael eu cynnwys yn yr adroddiad i’r Cabinet ym mis Chwefror gan anfon copi i aelodau’r Pwyllgor Craffu Cymunedau cyn cyfarfod nesaf y Pwyllgor, a

(c)           Gofyn am arweiniad gan y Pennaeth Cyfathrebu, Marchnata a Hamdden mewn perthynas â chynnwys deunydd hyrwyddo ar Sir Ddinbych yn y pecynnau gwyboaeth.