Eitem ar yr agenda

Ystyried adroddiad gan y Pennaeth Tai a Datblygu Cymunedol (copi’n amgaeëdig) a oedd yn adolygu effeithiolrwydd Cynlluniau Tref wrth ddechrau cyflawni eu hamcanion.

                                                                                                            9.35 a.m.

Roedd copi o adroddiad gan y Pennaeth Tai a Datblygu Cymunedol, a oedd yn adolygu effeithiolrwydd Cynlluniau Tref wrth ddechrau cyflawni eu hamcanion, wedi ei ddosbarthu gyda’r papurau ar gyfer y cyfarfod.

Rhoddodd y Rheolwr Adfywio Strategol (SRM) grynodeb o’r adroddiad, a oedd yn amlinellu datblygu trefi economaidd hyfyw a chynaliadwy a fyddai’n rhoi hwb i’r economi lleol, gwella canlyniadau i fusnesau lleol a thrigolion a denu ymwelwyr i’r ardal.

Roedd Cynlluniau Tref ar gyfer y saith anheddiad mwyaf, ac eithrio’r Rhyl, wedi eu cymeradwyo gan y Cabinet. Cafwyd ymgynghoriad gydag Aelodau newydd eu hethol iddynt ddod yn gyfarwydd â chynnwys y Cynlluniau Tref a gymeradwywyd eisoes a chychwyn adolygiad o’u cynnwys i sicrhau eu bod yn dal yn ddilys, ac i alluogi ymgorffori unrhyw flaenoriaethau ychwanegol. Roedd  chwe Grŵp Aelodau Ardal (MAG), gan gynnwys y Rhyl, wedi eu gwahodd i enwebu Aelod Arweiniol fesul Cynllun Tref i weithio mewn Grŵp Cydgysylltu Cynlluniau i ddiweddaru’r Cynlluniau Tref. Byddai fersiynau newydd y cynlluniau yn cael eu cyflwyno i’r MAG yn eu rownd cyfarfodydd presennol. Roedd y Grŵp Cydgysylltu wedi ystyried dyrannu cyllid i gyflawni Blaenoriaeth Gorfforaethol i wella’r economi lleol a byddai hyn yn galluogi i’r camau blaenoriaeth hynny a adnabuwyd fel rhai i’w gweithredu’n gynnar fynd rhagddynt.

Nid oedd y Cynlluniau a gymeradwywyd eto wedi delio ag anghenion a blaenoriaethau cymunedau llai a mwy gwledig. Gofynnwyd i Aelodau wardiau perthnasol adnabod materion rhagarweiniol gan gynnwys ardal ddaearyddol briodol  ar gyfer Cynlluniau Ardal na fyddai o reidrwydd yn cyd-fynd â ffiniau MAG, a blaenoriaethau i’w trafod trwy’r MAG. Byddai Cynlluniau Tref yn cael eu ehangu yn Gynlluniau Ardal ehangach a rhagwelwyd y byddai gan Gynlluniau Ardal dair adran fras fel y manylwyd yn yr adroddiad. Byddai proses ymgynghori yn cael ei mabwysiadu, yn debyg i’r un ar gyfer y Cynlluniau Tref gwreiddiol. Byddai MAG yn adolygu ac yna’n argymell Cynlluniau Ardal i’w mabwysiadu’n ffurfiol gan sicrhau bod anghenion a blaenoriaethau holl gymunedau a oedd yn dod dan y Cynllun, gan gynnwys cymunedau llai a mwy gwledig, yn cael eu hadlewyrchu’n briodol. Roedd rôl yr Aelod Arweiniol ar gyfer Datblygu Gwledig wrth sicrhau bod Cynlluniau Ardal yn ymgorffori blaenoriaethau gwledig, a’r broses ar gyfer monitro perfformiad Cynlluniau Tref ac Ardal, wedi ei datblygu ar y cyd â’r gwasanaeth Cynllunio Busnes a Pherfformiad i fynd gyda’r trefniadau adrodd ar gyfer y Cynllun Corfforaethol, ac wedi ei amlygu yn yr adroddiad. Byddai adroddiad perfformiad yn cael ei gyflwyno i’r MAG bob chwarter yn amlygu’r hyder cyflawni a oedd yn gysylltiedig â phob cam blaenoriaeth byw yn y Cynlluniau Tref ac Ardal perthnasol. Roedd adroddiad perfformiad enghreifftiol ar gyfer Rhuddlan ynghlwm fel atodiad, fel enghraifft o’r fformat a gymeradwywyd ac a fabwysiadwyd.

Byddai’r wybodaeth yn yr adroddiad Tref ac Ardal unigol yn cael ei chasglu at ei gilydd a’i chynnwys yn yr Adroddiad Perfformiad Chwarterol i’w gyflwyno i’r Cabinet yn chwarter cyntaf blwyddyn ariannol 2013/14. Byddai adroddiad blynyddol yn cael ei gyflwyno i’r Cyngor Sir a chytunodd yr Aelodau bod adroddiadau monitro ar y Cynlluniau yn y dyfodol yn cael eu cyflwyno i’r Pwyllgor Craffu.

Hysbyswyd yr Aelodau gan yr SRM y byddai’r Cynlluniau Tref yn cefnogi gweithrediad y Flaenoriaeth Gorfforaethol i wella’r economi lleol a byddai hefyd yn cynorthwyo’r Cyngor wrth gyflawni ei uchelgais i fod yn gyngor agosach at y gymuned.

Roedd manylion goblygiadau cyllidebol ac effeithiau posibl ar wasanaethau eraill mewn perthynas â blaenoriaethau Cynlluniau Tref ac Ardal ar gyfer 2012/13 a 2013/14 wedi eu hamlinellu yn yr adroddiad. Cadarnhawyd y byddai prosiectau y Rhyl yn Symud Ymlaen yn cael eu hariannu naill ai o ddyraniad corfforaethol ar gyfer adfywio a wnaed yn 2011/12 neu, yn achos prosiectau mwy, trwy gynigion penodol i’w hystyried gan y Grŵp Buddsoddi Strategol cyn i’r Cabinet gymryd penderfyniad. Fodd bynnag, efallai y bydd peth galw ar y dyraniad cyllid ar gyfer Cynlluniau Tref ac Ardal ar gyfer prosiectau y Rhyl yn Symud Ymlaen.

Amlygwyd y risgiau a oedd yn gysylltiedig â gweithredu Cynlluniau Tref. Roedd y risg o beidio â chyflawni’r camau a nodwyd fel rhai i’w cwblhau ym mlynyddoedd cynnar y Cynlluniau Tref wedi ei lleihau trwy greu rolau Hyrwyddwyr Cynlluniau Tref ac Ardal i yrru cyflawni’r blaenoriaethau a nodwyd yn y Cynlluniau Tref ac Ardal perthnasol, a thrwy ddyrannu cyllidebau i alluogi ariannu camau blaenoriaeth na fyddai fel arall yn cael eu cyflawni trwy gyllidebau gwasanaeth presennol.

Ymatebodd yr SRM i bryderon a godwyd gan y Cynghorydd T R Hughes a chadarnhaodd, ar ôl cymeradwyaeth gan y Cabinet yn ddiweddar, y gellid nawr symud ymlaen gyda chyflawni amcanion y Cynlluniau Tref.

Mynegodd nifer o Aelodau eu cefnogaeth i strwythur presennol y Grwpiau Aelodau Ardal a’r farn gyffredinol oedd na ddylid adolygu’r grwpiau presennol gan ei bod yn ymddangos eu bod yn gweithio’n dda. Amlinellodd y Cynghorydd H.Ll. Jones ei rôl fel Aelod Arweiniol yn goruchwylio’r ardal wledig yn y Sir a oedd yn cynnwys 9 ardal lle nad oedd unrhyw drefi. Esboniodd bod Aelodau yn y wardiau gwledig wedi cael cais i gyflwyno manylion tair blaenoriaeth yr hoffent weld eu datblygu yn eu hardaloedd hwy, ac esboniodd y byddai cyfarfod yn cael ei drefnu ar gyfer yr aelodau dan sylw er mwyn sicrhau eu mewnbwn hwy i’r Cynlluniau Tref perthnasol. Cadarnhaodd Aelodau a oedd yn cynrychioli’r ardaloedd gwledig y byddant yn ymgynghori â’r Cynghorau Cymuned perthnasol i ofyn am eu barn hwy. 

Mewn ymateb i gwestiwn gan y Cynghorydd T.R. Hughes, esboniodd yr SRM bod paramedrau hyblyg wedi eu pennu gan y Pwyllgor mewn perthynas â dyrannu cyllid ar gyfer cynlluniau a phrosiectau o fewn y Cynlluniau Tref.

Cadarnhaodd y Pwyllgor yr angen i fonitro gweithrediad ac amserlenni cyflawni’r Cynlluniau Tref, camau cyflawni gwasanaeth safonol, cyfrifoldeb Aelodau etholedig i gymryd meddiant o’r Cynlluniau a’u gweithrediad. Amlygwyd pwysigrwydd cynnwys Aelodau etholedig yn y gwaith o ailddiffinio’r ardaloedd, os oedd angen ailddiffinio ardaloedd, gyda sylw penodol i gynnwys y cymunedau cysylltiedig llai a gwledig.

Mynegodd y Cynghorydd G M Kensler y farn nad oedd, dan y strwythur craffu presennol, yn glir pa  Bwyllgor Craffu a ddylai dderbyn adroddiadau yn y dyfodol ar y mater hwn. Cytunodd yr Aelodau y dylai adroddiadau ar y Cynlluniau Tref yn y dyfodol gael eu cynnwys ar flaenraglen waith y Pwyllgor Craffu Cymunedau. Ar ôl trafodaeth bellach, fe:-

BENDERFYNWYD – bod y Pwyllgor Craffu Cymunedau:-

(a)          Yn cymeradwyo’r trefniadau a wnaed i symud ymlaen gyda chyflawni Cynlluniau Tref,

(b)          Yn cefnogi’r cynigion i ddatblygu Cynlluniau Ardal i adnabod blaenoriaethau mewn cymunedau gwledig, a

(c)          Yn cytuno bod y Pwyllgor Craffu Cymunedau yn derbyn adroddiadau yn y dyfodol ar y Cynlluniau Tref.