Eitem ar yr agenda

Ystyried adroddiad (copi ynghlwm) sy’n rhoi diweddariad lefel uchel i’r Pwyllgor ar Raglen Adfywio ac Uwchgynllun Glan y Môr y Rhyl, yn cynnwys y camau nesaf yn dilyn cwblhau Cynllun Amddiffyn Arfordir Canol y Rhyl.

Cyflwynodd Arweinydd y Cyngor / Aelod Arweiniol Twf Economaidd a Threchu Amddifadedd, y Cyng. Jason McLellan yr adroddiad (dosbarthwyd ymlaen llaw). Dywedodd fod arian y Gronfa Ffyniant Bro yn dod i law, ynghyd â chyllid o gronfa Cynllun ar gyfer Cymdogaethau (Cynlluniau Hirdymor ar gyfer Trefi gynt).

Mae llawer o waith yn cael ei wneud o ran:

• Marchnad y Frenhines
• Datganiadau o ddiddordeb ar gyfer sinema’r Vue
• Uwchgynllun Glan y Môr

Rhoddodd Cyfarwyddwr Corfforaethol: Economi a’r Amgylchedd y wybodaeth ddiweddaraf ar Raglen Adfywio’r Rhyl sydd yn bennaf yn canolbwyntio ar brosiectau cyfalaf i ddatrys problemau ffisegol ac amgylcheddol – i geisio annog twf economaidd a swyddi newydd. Mae’r rhaglen hefyd yn ymwneud â materion eraill sy’n gysylltiedig â digartrefedd, anweithgarwch hirdymor, trosedd ac ymddygiad gwrthgymdeithasol.

Mae’r Cyngor wedi llwyddo i gael grantiau i gyflawni cynlluniau cyfalaf mawr – gyda thros £200 miliwn o fuddsoddiadau cyfalaf wedi’u cyflawni yn ystod y ddegawd ddiwethaf.

Mae £12 miliwn arall wedi’i fuddsoddi mewn pedwar prosiect ychwanegol i wella canol y dref a’r promenâd yn ystod y tair blynedd nesaf. Mae’r grant £20 miliwn o Gronfa Cynllun ar gyfer Cymdogaethau yn caniatáu darparu strategaeth adfywio hirdymor gymunedol yn ystod y 10 mlynedd nesaf.

Piler y rhaglen oedd Gweledigaeth Canol Tref y Rhyl. Datblygwyd y cynllun chwe blynedd yn ôl, mae rhai prosiectau wedi’u cyflawni ac eraill heb. Mae cymdeithas wedi newid dros y blynyddoedd hynny – yn bennaf oherwydd y pandemig, ac roedd yn rhaid adolygu’r weledigaeth i wneud yn siŵr ei bod yn cyd-fynd â’r cynllun 10 mlynedd nesaf.

Yn debyg iawn, lluniwyd Uwchgynllun Glan y Môr y Rhyl sawl blwyddyn yn ôl. Roedd yn gysyniad uchelgeisiol gyda’r holl elfennau yn amodol ar sicrhau cyllid i’w darparu, ynghyd â rhywfaint o fuddsoddiad preifat. Y cynnig oedd datblygu pedwar parth penodol ar hyd glan y môr (atodiad a).

Mae model 3D drafft o’r glan y môr a chanol y dref wedi’i gynnwys yn yr adroddiad (atodiad b). Cafodd y cynllun ei gomisiynu at ddibenion marchnata, fel ffordd i ddangos sut mae glan y môr y Rhyl wedi’i ddatblygu dros y ddegawd ddiwethaf – a gellir hefyd ei ddefnyddio i fodelu datblygiadau newydd ac annog buddsoddiadau preifat yn y Rhyl. Y dyhead oedd gweld y Rhyl yn cyrraedd pwynt ble na fyddai angen ymyrraeth sector cyhoeddus, a bod y farchnad breifat yn cymryd drosodd.

Wrth ymateb i gwestiynau'r Pwyllgor, cynghorodd yr Arweinydd a’r Cyfarwyddwr Corfforaethol:

• Mae’r Adran Gymunedau (Ffyniant Bro, Tai a Chymunedau gynt) wedi ymrwymo i wneud newidiadau gwerth am arian parhaol i gymunedau (bydd cylch gorchwyl cynlluniau hirdymor yr Adran yn cael eu rhannu gyda’r Pwyllgor).
• Bydd rhaglen o ymgysylltu cyhoeddus yn dechrau’n fuan i weld sut fydd y weledigaeth yn cyd-fynd ag anghenion y gymuned.
• Byddai llwyddiant adfywiad y Rhyl yn rhoi budd i’r sir / rhanbarth cyfan.
• Yr her fwyaf i’r Rhyl yw ei henw da oherwydd y sylw negyddol mae’r dref wedi’i gael yn y cyfryngau yn ystod y blynyddoedd diwethaf. Mae ymgyrch gyfryngau yn cael ei lansio i hyrwyddo’r agweddau cadarnhaol.
• Mae Bwrdd Cymdogaeth y Rhyl, a sefydlwyd yn ddiweddar, yn cynnwys cynrychiolwyr annibynnol o’r gymuned yn hytrach na chynghorwyr.
• Bydd gwasanaethau cymuned ac ieuenctid yn rhan o’r ymgynghoriad ynghylch y weledigaeth.
• Mae gan y cyfryngau cymdeithasol rôl i’w chwarae ym mhroses ymgysylltu gyhoeddus Gweledigaeth y Rhyl. Tra bod modd defnyddio tudalennau Facebook i gael barn trigolion, nid Facebook yw’r llwyfan cymdeithasol a ffafrir gan bobl ifanc.
• Roeddynt yn hyderus y bydd Marchnad y Frenhines ar agor erbyn yr haf (2025).

Roedd yr Aelodau yn credu bod angen ymgysylltu â’r cyhoedd ar draws y sir i hyrwyddo adfywiad y Rhyl. Yn hanesyddol mae’r Rhyl a’r glan y môr wedi bod yn gyrchfan glan môr i drigolion y sir. Mae angen hysbysebu manteision y cynlluniau adfywio i bawb.

Roedd yr Aelodau hefyd yn annog swyddogion i gysylltu â threfi cyfagos, Bae Cinmel a Thowyn, fel rhan o’r Strategaeth Twristiaeth. Cytunodd yr Arweinydd a dywedodd y byddai’r gwaith ar y marina yn hwyluso hynny.

Roedd gwahoddiad i bob Cynghorydd Sir Ddinbych ymweld â safle newydd Marchnad y Frenhines ar 10 Ebrill. Croesawodd y Pwyllgor y gwahoddiad a dweud y byddai gan bob Aelod ddiddordeb cael y wybodaeth ddiweddaraf am gynnydd y gwaith adfywio, nid Grŵp Aelodau Ardal y Rhyl yn unig.

Gofynnodd y Pwyllgor am adroddiad arall ar ôl i’r broses ymgysylltu ddod i ben a Chynllun Gweledigaeth y Rhyl gael ei lunio.

PENDERFYNWYD:

1. Bod yr adborth a’r sylwadau a ddarparwyd yn ystod y drafodaeth yn cael eu hystyried fel rhan o waith cyflawni Rhaglen Adfywio’r Rhyl ac Uwchgynllun Glan y Môr y Rhyl; a
2. Bod adroddiad diweddaru yn cael ei gyflwyno i’r Pwyllgor Craffu Cymunedau ar ôl y broses ymgynghori a sefydlu Cynllun Gweledigaeth Canol Tref y Rhyl.