Eitem ar yr agenda

Ystyried adroddiad gan y Rheolwr Traffig a Chludiant (copi ynghlwm) sy’n gofyn am farn y Pwyllgor ar gynhyrchu incwm meysydd parcio ers gweithredu’r taliadau diwygiedig yn 2024/25 a’r camau gweithredu arfaethedig wrth symud ymlaen.                                                             

                                                                                                                    11.35am – 12.10pm

 

 

Cyflwynodd Aelod Arweiniol yr Amgylchedd a Thrafnidiaeth a’r Pennaeth Cynllunio, Gwarchod y Cyhoedd a Gwasanaethau Cefn Gwlad yr adroddiad (dosbarthwyd ymlaen llaw) ar Incwm Meysydd Parcio i’r Aelodau.

 

Rhoddodd yr adroddiad wybodaeth am yr incwm ychwanegol o feysydd parcio a ragamcanwyd y byddai’n deillio o gynyddu’r prisiau parcio, ymestyn yr oriau codi tâl am barcio a chodi tâl mewn meysydd parcio a oedd am ddim yn flaenorol. 

 

Rhoddodd y Rheolwr Traffig, Parcio a Diogelwch Ffyrdd fwy o fanylion i'r aelodau, a oedd wedi'u cynnwys yn yr adroddiad.

 

Fel rhan o’r gwaith i gyflawni arbedion a chynyddu incwm ar gyfer blwyddyn ariannol 2024-25, cafodd y mesurau canlynol eu rhoi ar waith ar gyfer ein meysydd parcio, a rhagwelwyd y byddai’r rhain yn cynhyrchu £699 mil o incwm ychwanegol:

 

·       Cynyddu’r holl brisiau mewn meysydd parcio talu ac arddangos.

·       Ymestyn yr oriau codi tâl yn y meysydd parcio tan 11pm (5pm yn flaenorol)

·       Cynyddu prisiau trwyddedau meysydd parcio.

·       Codi tâl ar gyfer rhai meysydd parcio am ddim.

Roedd y cynnydd a ragwelwyd o £699 mil yn cynnwys £591 mil o’r cynnydd yn y prisiau, £60 mil o barcio min nos, £30 mil o godi tâl mewn meysydd parcio am ddim, a £18 mil o gynyddu’r pris am drwydded.  Mae eglurhad o ran cyfrifo’r ffigyrau unigol hyn yn Atodiad A yr adroddiad.  Fodd bynnag, mae’r rhagamcanion presennol yn amcangyfrif y bydd yr incwm ychwanegol o feysydd parcio ar gyfer y flwyddyn ariannol 2024/25 yn sylweddol is na’r targed a ragwelwyd yn wreiddiol.  Byddai cymhwyso cynnydd o 19.2% am weddill y flwyddyn ariannol yn arwain at £295 mil o incwm ychwanegol o gymharu â blwyddyn ariannol 2023/24.  Byddai hyn yn cynrychioli diffyg o £404 mil yn is na’r targed cynnydd incwm o £699 mil. 

 

Roedd yr hen dariffau a’r tariffau newydd i’w gweld yn Atodiad B. Mae’r tabl yn Atodiad C yn cymharu incwm talu ac arddangos fesul tref, ar gyfer y cyfnod o fis Ebrill i fis Tachwedd 2024, gan gynnwys y misoedd hynny, ac ar gyfer yr un cyfnod yn 2023.  Dangoswyd gwahaniaeth mawr yn y cynnydd o ran incwm parcio mewn rhai trefi o gymharu â rhai eraill.

 

Mae’r polisi presennol o osod prisiau parcio yn ôl y math o faes parcio (h.y. boed yn arhosiad hir neu arhosiad byr) yn anhyblyg ac yn trin pob tref / pentref fel pe baent yr un fath, ac nid yw hyn yn wir.  Cynigiwyd creu system newydd i sicrhau bod tariffau yn seiliedig ar y galw. Byddai hyn yn golygu codi tariffau uwch ar feysydd parcio y mae galw mawr amdanynt a thariffau is ar gyfer meysydd parcio gyda llai o alw.

 

Diolchodd y Cadeirydd i’r Swyddogion am yr adroddiad a chroesawyd cwestiynau gan yr Aelodau.

 

Roedd yr aelodau'n anghyfforddus ynglŷn â chodi tâl ar feysydd parcio di-dâl yn y Sir. Teimlwyd nad oedd digon o leoedd parcio am ddim yng nghanol trefi i alluogi ymwelwyr i ymweld a gwario arian. Eglurodd y Rheolwr Traffig, Parcio a Diogelwch Ffyrdd fod llawer o barcio am ddim ar ymyl y ffordd mewn trefi a phentrefi, ac y byddai data yn dangos hyn yn cael ei ddarparu mewn cyfarfod yn y dyfodol. Roedd yn bwysig cael y cydbwysedd cywir rhwng parcio am ddim a pharcio am dâl.

 

Gofynnodd yr aelodau a oedd trwyddedau parcio'n cael eu hysbysebu, gan nad oedd llawer o drigolion yn ymwybodol ohonynt. Eglurodd y Rheolwr Traffig, Parcio a Diogelwch Ffyrdd fod hawlenni parcio yn cael eu hysbysebu ar wefan y Cyngor ac ar wefannau cyfryngau cymdeithasol.  Roedd Canolfan Alwadau’r Cyngor hefyd yn eu hyrwyddo mewn ymateb i ymholiadau a gafwyd. Bu cynnydd o 17% yn y gost o brynu trwyddedau parcio, a nodir yn yr adroddiad.

Holodd yr Aelodau sut roedd prisiau parcio'r Sir yn cymharu â thariffau mewn awdurdodau lleol eraill. Eglurodd y Pennaeth Cynllunio, Gwarchod y Cyhoedd a Gwasanaethau Cefn Gwlad fod ymarfer cymharu prisiau'n cael ei gynnal bob tro yr oedd adolygiad o'r prisiau parcio ceir, er mwyn cymharu prisiau â'r 5 Awdurdod Lleol arall yng Ngogledd Cymru. Yn ddiweddar bu cynnydd pellach mewn tariffau mewn awdurdodau cyfagos, ac felly mae meysydd parcio Sir Ddinbych yn codi tariffau is ar hyn o bryd.

 

Trafododd yr Aelodau bwysigrwydd parcio am ddim yn y Sir ymhellach, a'r gwahaniaeth y gallai ei wneud i fusnesau lleol ac ymwelwyr.  Dywedodd y swyddogion, er bod maes parcio am ddim ar ymyl y ffordd ar gael ym mhob tref ac, mewn rhai ohonynt, roedd y cynghorau tref yn darparu cyfnod o amser rhydd ar gyfer parcio mewn rhai meysydd parcio, roedd angen sicrhau cydbwysedd da os oedd y Cyngor Sir am allu fforddio buddsoddi i gynnal y meysydd parcio yn ei berchnogaeth.

 

Cynigiodd y Cadeirydd y dylid trefnu gweithdy i aelodau etholedig ar y strwythur prisiau maes parcio newydd arfaethedig, er mwyn galluogi'r holl aelodau i gyfrannu ato a dylanwadu ar unrhyw benderfyniadau yn y dyfodol ynghylch y strwythur tariffau. Cafodd hyn ei gynnig, ei eilio a’i gytuno gan holl aelodau’r Pwyllgor.

 

Anogodd yr aelodau y swyddogion i ailystyried codi tâl am barcio ar ôl 5pm. Dywedodd y Rheolwr Traffig, Parcio a Diogelwch Ffyrdd fod llawer o adborth wedi dod i law ynghylch codi tâl gyda'r nos, a bod trafodaethau'n parhau a fyddai'n cael eu hadlewyrchu yn y cynnig.

 

Diolchodd y Cadeirydd i’r Swyddogion am ddod i’r cyfarfod.

 

 

 

Ar ddiwedd y drafodaeth drylwyr:

 

Penderfynodd y Pwyllgor:

 

(i)             dderbyn yr adroddiad, cadarnhau ei gynnwys, ei ganfyddiadau a chamau gweithredu pellach arfaethedig;

(ii)           yn amodol ar ystyried yr awgrymiadau a gyflwynwyd yn ystod y drafodaeth, bod strwythur prisiau maes parcio newydd arfaethedig yn cael ei ddatblygu gan swyddogion a'i ddwyn yn ôl i'r Pwyllgor Craffu yn yr Hydref 2025; ac

(iii)         fel rhan o ddatblygiad y strwythur prisiau maes parcio newydd arfaethedig, cynhelir gweithdy i bob aelod i alluogi pob cynghorydd i gyfrannu at y gwaith datblygu.