Eitem ar yr agenda

Ystyried adroddiad cyfrinachol gan y Pennaeth Cynllunio, Gwarchod y Cyhoedd a Gwasanaethau Cefn Gwlad (copi ynghlwm) yn gofyn i aelodau benderfynu ar gais i adnewyddu Trwydded Cerbyd Hacni.

 

PENDERFYNWYD gwrthod y cais i adnewyddu Trwydded Cerbyd Hacni.

 

Cyflwynwyd y Pennaeth Cynllunio, Gwarchod y Cyhoedd a Gwasanaethau Cefn Gwlad adroddiad cyfrinachol (a ddosbarthwyd o flaen llaw) ynghylch –

 

(i)             cais a dderbyniwyd i adnewyddu Trwydded Cerbyd Hacni;

 

(ii)            y ffaith bod y cerbyd wedi’i drwyddedu fel Cerbyd Hacni ers ei gofrestru am y tro cyntaf yn 2008 a bod y drwydded wedi’i hadnewyddu bob blwyddyn ers hynny, ac y byddai’r drwydded gyfredol yn dod i ben ar 31 Mawrth 2025 pan fyddai’r cerbyd yn 16 o flynyddoedd oed;

 

(iii)          y ffaith na fedrau swyddogion gymeradwyo’r cais gan nad oedd y cerbyd mwyach yn cydymffurfio â pholisi presennol y Cyngor oherwydd y cyfyngiad ar oedran cerbydau y gellir eu hadnewyddu (hyd at 12 o flynyddoedd oed yn unig) a bod y cyfnod gras neu’r ‘hawliau taid’ wedi dod i ben ar 30 Mehefin 2024;

 

(iv)          gwybodaeth gefndirol a dogfennau cysylltiedig a ddarparwyd, gan gynnwys datganiad ategol yr Ymgeisydd ynghyd â chofnodion cynnal a chadw/cydymffurfiaeth y cerbyd, geirda gan y garej a phrawf allyriadau; a

 

(v)           y ffaith y gwahoddwyd yr Ymgeisydd i’r cyfarfod i siarad o blaid y cais i adnewyddu’r drwydded.

 

Roedd yr ymgeisydd yn bresennol er mwyn siarad o blaid ei gais.

 

Cyflwynodd y Swyddog Gorfodi (Trwyddedu) yr adroddiad a gofynnwyd i’r Pwyllgor Trwyddedu ystyried a fyddai’n briodol gwyro o bolisi’r Cyngor ynghylch oedrannau cerbydau a chymeradwyo’r cais i adnewyddu’r drwydded.

 

Dywedodd yr Ymgeisydd nad oedd ganddo ddim i’w ychwanegu at yr hyn a nodwyd yn yr adroddiad (a oedd yn cynnwys ei ddatganiadau ategol a dogfennau ar gyfer y cerbyd).

 

Atebodd yr Ymgeisydd gwestiynau ynglŷn â pham nad oedd eisoes wedi cymryd camau i sicrhau cydymffurfiaeth â’r polisi ynghylch oedran cerbydau, gan grybwyll ei oedran a’i amgylchiadau personol a sôn na fyddai’n gweddu iddo weithio i weithredwr tacsi arall.  Eglurodd hefyd fod cofnodion trin a chynnal a chadw’r cerbyd yn anghyflawn gan mai ef a gyflawnodd lawer o’r gwaith hwnnw ei hun.  Gofynnwyd cwestiwn hefyd i’r Swyddog Gorfodi, a gytunodd â datganiad blaenorol yr Ymgeisydd fod yno brinder tacsis mewn safleoedd pwrpasol, yn enwedig yn y Rhyl, a llai o dacsis yn cludo teithwyr.  Ychwanegodd yr Ymgeisydd fod llawer o weithredwyr yn canolbwyntio ar waith contract gydag ysgolion ac nad oedd ond ychydig o weithredwyr a wnâi waith mewn safleoedd tacsis, a oedd yn farchnad arbenigol.

 

Yn ei ddatganiad i gloi, soniodd yr Ymgeisydd y trwyddedwyd cerbyd arall yn agos i’r un oedran a’i gerbyd ef a bod yno gerbydau trwyddedig hŷn na hynny mewn ardaloedd eraill.  Soniodd hefyd am ei ymddygiad da ers blynyddoedd lawer fel gyrrwr trwyddedig, a gofynnodd i’r Pwyllgor fod yn bleidiol i’w gais.  Tynnodd Aelodau sylw at y ffaith bod y cerbyd y cyfeiriai’r Ymgeisydd ato’n un o fath arbennig nad oedd yn berthnasol yn yr achos hwn, a derbyniwyd fod awdurdodau lleol eraill yn arfer gwahanol bolisïau.  Ychwanegodd y Swyddog Gorfodi bod y Cyngor yn gweithredu polisi pendant a orfodid yn llym, a bod hynny’n effeithiol wrth annog cerbydau newydd a oedd yn addas ar gyfer y ffordd ac yn ddiogel i’w defnyddio.  Cadarnhawyd bod yr Ymgeisydd wedi cael yr holl wybodaeth am ofynion y polisi.

 

Wedi torri’r cyfarfod i’r Pwyllgor ystyried y cais am adnewyddiad –

 

PENDERFYNWYD gwrthod y cais i adnewyddu Trwydded Cerbyd Hacni.

 

Dyma oedd rhesymau’r Pwyllgor Trwyddedu dros y penderfyniad –

 

Roedd y Pwyllgor wedi pwyso a mesur yn ofalus yr hyn a gyflwynodd yr Ymgeisydd ynghyd â’r wybodaeth a ddarparodd y swyddogion cyn y cyfarfod, a diolchodd yr aelodau i bawb am eu cymorth.  Wrth gyhoeddi ei benderfyniad, tynnodd y Pwyllgor sylw at wasanaeth clodwiw’r Ymgeisydd am fwy na deg ar hugain o flynyddoedd yn y diwydiant tacsis gan ddiolch iddo am hynny.

 

Roedd yr aelodau wedi ystyried yn bwyllog y rhannau perthnasol o Bolisi’r Cyngor ar gyfer Trwyddedu Cerbydau Hacni a Cherbydau Hurio Preifat a’r Amodau ynghylch oedran cerbydau.  Yn benodol, roedd y Pwyllgor wedi ystyried Adran 5.4.2, a oedd yn datgan “… bydd trwydded y cerbyd yn cael ei hadnewyddu i hyd at 12 mlwydd oed yn unig, a bryd hynny, bydd yn rhaid disodli’r cerbyd gydag un sydd hyd at uchafswm oedran o 5 mlwydd oed o ddyddiad y cofrestriad cyntaf.”  Byddai’r cerbyd y ceisid adnewyddu’r drwydded ar ei gyfer yn 16 o flynyddoedd ac 8 mis oed ar ddyddiad adnewyddu’r drwydded, a bron yn 18 o flynyddoedd oed pan ddeuai’r drwydded honno i ben, a oedd yn bump neu chwe blynedd yn hŷn na’r terfyn a bennid yn y polisi.  Roedd y cerbyd hefyd wedi teithio cryn bellter, gyda milltiredd o 272,053.

 

Roedd Adran 5.4.3 o’r Polisi’n ymdrin â ‘hawliau taid’.  Daeth y polisi i rym yn 2017 a chafodd yr Ymgeisydd bum mlynedd wedi hynny i sicrhau cydymffurfiaeth â’r terfyn oedran, a dwy flynedd arall ar ben hynny oherwydd y pandemig Covid-19.  Barn y Pwyllgor, felly, oedd y bu’r Ymgeisydd yn ymwybodol ers mwy na saith mlynedd o’r sefyllfa a’r gofynion pan ddeuai’r drwydded i ben, a’i fod wedi methu â bodloni’r gofynion hynny.

 

Credai’r aelodau y cyflwynwyd y polisi er mwyn hybu cynlluniau amgylcheddol yn ogystal â sicrhau bod y cyhoedd yn ddiogel ac yn gyfforddus wrth deithio.

 

Ar sail y darpariaethau polisi uchod, bu’r Pwyllgor yn ystyried a fyddai’n briodol gwyro o’r polisi yn yr achos hwn.  Rhoes y Pwyllgor sylw i’r hyn a gyflwynodd yr Ymgeisydd ac er bod yr aelodau’n cydymdeimlo ag amgylchiadau personol yr Ymgeisydd, y cerbyd oedd yn destun y cais oedd yr unig ystyriaeth berthnasol.  Methodd yr Ymgeisydd â darparu cofnodion llawn o drin a chynnal a chadw’r cerbyd, ac roedd yno nifer o nodiadau cynghori yn y cofnodion MOT/Cydymffurfiaeth.  Tynnwyd sylw hefyd at adroddiad y swyddog, a nodai fod yno gryn ôl traul a gwisgo ar y cerbyd gan nad oedd yn un o fath arbenigol.  Barnodd y Pwyllgor hefyd y bu’r polisi cyfredol mewn grym ers 2017 a bod yr Ymgeisydd yn ymwybodol ohono, gan gynnwys y gofynion ynglŷn ag oedran cerbydau.  Roedd y Cyngor wedi mabwysiadu’r polisi er mwyn codi safonau yn y fflyd gerbydau, ac roedd y terfyn oedran yn rhan o hynny.  Felly, roedd y Pwyllgor o’r farn bod yr Ymgeisydd heb gynnig unrhyw ddadl dderbyniol o blaid ei gais o safbwynt amgylchiadau eithriadol neu resymau cyfiawn a fyddai wedi dwyn perswâd ar y Pwyllgor i wyro o’r polisi yn yr achos hwn.

 

Cyhoeddodd y Cadeirydd y penderfyniad i’r Ymgeisydd ac eglurodd yr Ymgynghorydd Cyfreithiol y rhesymau dros y penderfyniad hwnnw.  Hysbyswyd yr Ymgeisydd hefyd fod ganddo hawl i apelio yn erbyn y penderfyniad i’r Llys Ynadon cyn pen 21 o ddiwrnodau.

 

Daeth y cyfarfod i ben am 10.40 am.