Eitem ar yr agenda

Ystyried adroddiad gan Reolwr Asedau’r Cyngor (copi ynghlwm) sy’n cyflwyno’r Strategaeth Rheoli Asedau ar gyfer 2024 – 2029 i’r pwyllgor ac yn ceisio sylwadau’r Pwyllgor ar ei gynnwys.

11.20am – 11.50am

Cyflwynodd yr Aelod Arweiniol Cyllid, Perfformiad ac Asedau Strategol yr adroddiad (dosbarthwyd ymlaen llaw), a dywedodd fod yr adroddiad yn delio â’r cyfnod rhwng 2024-2029, ac nad oedd y rhagolygon ariannol, o leiaf am ran gyntaf y cyfnod amser yma, yn galonogol ar hyn o bryd.   Fe bwysleisiodd pa mor hanfodol fyddai’r strategaeth hon i’r Awdurdod Lleol i’w alluogi i wneud penderfyniadau am ei asedau wrth symud ymlaen.  Fe nodwyd fod gan yr Awdurdod Lleol 669 o asedau ar 519 o safleoedd.  Roedd hyn gyfystyr â nifer fawr o asedau i gyflawni dyletswyddau statudol ohonynt, a byddai rhai o’r asedau yma’n darparu cyfle i gynhyrchu symiau cyfalaf i’r Cyngor.  Byddai rheoli asedau’n wahanol, mabwysiadu agweddau gwahanol, a chydweithio gyda phartneriaid i gyd yn galluogi’r Awdurdod i gael y budd mwyaf o’i Bortffolio Asedau.   Fe fyddai hefyd yn sicrhau bod gan y Cyngor yr asedau cywir, yn y lle cywir ac yn y cyflwr cywir i fodloni anghenion  presennol a’r rhai a ragwelir yn y dyfodol, sef egwyddor sylfaenol y Strategaeth.

Dywedodd Pennaeth Gwasanaethau Cymorth Corfforaethol:  Perfformiad, Digidol ac Asedau wrth y Pwyllgor bod fersiwn ddrafft y Strategaeth (Atodiad 1 yr adroddiad) yn ddogfen hollbwysig a bod rheoli asedau yn ffurfio un o’r saith piler o lywodraethu da ac felly roedd yn cael ei adolygu’n flynyddol.  Diolchodd y Pennaeth Gwasanaeth i’r Rheolwr Asedau a Chyfleusterau a Rheolwr Tîm Asedau am eu gwaith caled yn llunio’r Strategaeth ddrafft. 

Gan ymateb i gwestiynau’r aelodau, fe wnaeth yr Aelod Arweiniol a’r swyddogion:

·     Rhoddwyd eglurhad fod Adran 7.2 y Strategaeth yn cyfeirio at leoedd dros ben y disgyblion o fewn portffolio o asedau Addysg y Cyngor. Rhaglen Moderneiddio Addysg y Cyngor oedd y cyfrwng a ddefnyddir i reoli proses moderneiddio ysgolion y Sir a rheoli llefydd gwag.  Roedd gwaith cynnal a chadw parhaus mewn ysgolion yn ddibynnol ar gyllid drwy broses gosod y gyllideb, ond fe eir i’r afael â gwaith cynnal a chadw ymatebol fel y bo angen yn syth, er enghraifft pan ganfuwyd Concrit Awyredig Awtoclafiedig Cydnerth mewn ysgolion.

·     wedi cytuno i wneud ymholiadau gyda’r Adran Addysg am y sefyllfa bresennol ynglŷn ag adeilad y Cylch Meithrin yn Ysgol Dewi Sant, Y Rhyl.

·     bydd penderfyniad yn cael ei wneud yn rhan o’r broses o osod y gyllideb mewn cysylltiad â dyfodol toiledau cyhoeddus.

·     o ran gwerth asedau cyfredol, nid oedd hi’n beth doeth i fod yn benodol am werth asedau penodol mewn adroddiad cyhoeddus. Roedd yna restr o asedau wedi’u datgan rhai dros ben, ac roedd yr Awdurdod wrthi’n ceisio cael gwared arnynt. Nid oedd y rhestr yn gynhwysfawr, ac roedd pob ased posibl i gael ei waredu wedi cael eu hadrodd i’r Grŵp Rheoli Asedau a oedd ar agor i bob cynghorydd ei fynychu. 

·     roedd gwasanaethau unigol yn gyfrifol am reoli’r asedau hynny oedd o fewn eu meysydd gwasanaeth eu hunain, h.y. roedd Gwasanaeth Cefn Gwlad yn gyfrifol am y safleoedd yr oeddynt yn eu gweithredu ar draws y Sir. Gwasanaeth fyddai’n penderfynu sut roedd eu cyllideb yn cael ei ddefnyddio i fuddsoddi yn y safleoedd hynny.

·     cytunwyd i gais y byddai Aelodau yn cael gweld rhestr o asedau oedd yn berchen i’r Cyngor o fewn pob Grŵp Ardal Aelodau.  

Ar ddiwedd y drafodaeth drylwyr:

Penderfynwyd:

(i)             yn amodol ar y sylwadau uchod a darparu gwybodaeth y gofynnwyd amdani, argymell bod y Cabinet yn cymeradwyo a mabwysiadu fersiwn ddrafft Strategaeth Rheoli Asedau 2024/2029 (Atodiad 1 yr adroddiad); 

(ii)            fel rhan o’i ystyriaeth, ei fod wedi darllen, deall ac ystyried yr Asesiad o’r Effaith ar Les (Atodiad 2 yr adroddiad); a

(iii)          bod rhestr o asedau sydd yn eiddo i’r Cyngor yn eu hardaloedd yn cael eu dosbarthu i bob Grŵp Ardal yr Aelodau a bod y rhestr yn nodi statws presennol yr ased a rhagolwg o’i statws yn y dyfodol, ynghyd ag amcangyfrif o’i werth ar y farchnad.