Eitem ar yr agenda

Ystyried adroddiad gan Bennaeth Cydweithio Rhanbarthol (copi ynghlwm) sy’n crynhoi gwaith Bwrdd Partneriaeth Rhanbarthol yn ystod 2023/24 ac yn ceisio sylwadau’r Pwyllgor ar y cynnydd a wnaed hyd yma wrth gyflawni ei amcanion.

10.40am – 11.10am

Cyflwynodd yr Aelod Arweiniol Iechyd a Gofal Cymdeithasol yr adroddiad (dosbarthwyd ymlaen llaw) a dywedodd fod y Bwrdd Partneriaeth Rhanbarthol wedi cael ei ffurfio i fodloni gofynion Adran 9 Deddf Gwasanaethau Cymdeithasol a Lles (Cymru) 2014.  Roedd ystod eang o leisiau’n rhan o’r Bwrdd, yn cynnwys gwasanaethau, gofalwyr a defnyddwyr gwasanaeth. Prif swyddogaeth y Bwrdd oedd sicrhau bod y gwasanaethau hyn yn gweithio’n effeithiol ac effeithlon gyda’i gilydd tra’n goruchwylio’r gwaith o ddefnyddio ffrydiau ariannu allweddol. Tynnodd yr Aelod Arweiniol sylw at rai agweddau o’r adroddiad, yn cynnwys Gweithdy Meddwl yn Radical a edrychodd ar egwyddorion posibl ar gyfer newid trawsnewidiol ar gyfer lles preswylwyr gogledd Cymru. 

Diolchodd y Pennaeth Cydweithio Rhanbarthol i’r holl staff am eu hymdrechion yn darparu’r gwasanaethau yma a dywedodd eu bod yn ymroddedig ac yn dalentog.  Tynnodd yr adroddiad sylw at faint y gwaith sydd wedi cael ei wneud i sefydlu gweithdrefnau i alluogi darparu amcanion y Gydweithredfa. Fe nodwyd mai un o’r prif egwyddorion o fewn y Gydweithredfa yw’r angen am newid a datblygiad.

Gan ymateb i gwestiynau’r aelodau, fe wnaeth yr Aelod Arweiniol a’r swyddogion gynghori:

·       bod y risgiau sy’n cael eu hamlinellu yn yr adroddiad yn cael eu hadnabod a’u cydnabod.   Wrth i’r Byrddau Rhanbarthol ddatblygu dros y blynyddoedd mae’r disgwyliad am ystod y gwaith a mentrau y mae’r Bwrdd yn eu goruchwylio wedi cynyddu bob blwyddyn gan olygu bod y gwaith o reoli’r llwyth gwaith ynddo’i hun yn dod yn risg.    Roedd hwn yn risg cenedlaethol, nid un rhanbarthol yn unig.

·       roedd y Bwrdd yn bodloni ei holl ofynion a Dyletswyddau Statudol ar hyn o bryd, ond roedd pob partner yn ymwybodol y gallai hyn fod yn her i’w gynnal yn y dyfodol, felly roedd hi’n bwysig bod yr holl bartneriaid yn deall ble’r oedd y straeniau yma er mwyn ystyried y darlun ehangach.  

·       o ran gosod ffioedd cartrefi gofal, roedd rhai awdurdodau wedi gwyro o’r cytundeb ffioedd gofal er gwaetha’r ymdrechion i gyflwyno dull cyson. Yr Awdurdodau Lleol unigol a’r Bwrdd Iechyd ddylai osod eu ffioedd gofal eu hunain.  Tra bod y Bwrdd Gosod Ffioedd Rhanbarthol (is-grŵp o’r Bwrdd Partneriaeth Rhanbarthol) yn gweithio tuag at egwyddorion a methodoleg i osod ffioedd gofal, nid oedd gan y Grŵp y pwerau i osod y ffioedd, dim ond argymell lefel ‘gyffredin’ ar draws y rhanbarth y gallai wneud. Nod y grŵp oedd sicrhau bod pob budd-ddeiliad yn cydweithio i sefydlu perthnasoedd gwell gyda darparwyr. Yn y pendraw, nid oeddynt wedi gwyro oddi wrth y cytundeb, gan fod y fethodoleg wedi cael ei defnyddio. 

·       bod Gwasanaethau Dementia, y Llwybr Cymorth Cof yn benodol, wedi dechrau cynnig gwasanaethau yn ddiweddar i helpu dioddefwyr a gofalwyr.  Roedd y digwyddiadau yma’n cynnwys siaradwyr gwadd ac amrywiaeth o wasanaethau sy’n cael eu rhedeg gan Ymddiriedolaeth y Gofalwyr gan ddefnyddio cyllid rhanbarthol, ac roedd gweithwyr cefnogi Dementia yn mynychu’r digwyddiadau yma. Un partner nodedig wrth gomisiynu a darparu cefnogaeth gwasanaethau Dementia ac Alzheimer yn ardal Sir Ddinbych oedd Cyngor Gwasanaethau Gwirfoddol Sir Ddinbych.   Er hynny, efallai bod newidiadau diweddar ym mhroses achrediad ‘Sy’n deall Dementia’ wedi effeithio ar gymunedau penodol gan nad ydynt wedi gallu cael eu hachrediad yn ôl.

·       Roedd cyllid Bwrdd Partneriaeth Rhanbarthol yn gymysgedd o gyllid Llywodraeth Cymru (LlC) a chyllid gan ei bartneriaid craidd.  Mae’r Gronfa Integreiddio Ranbarthol  (CIRh) yn gronfa 5 mlynedd werth ychydig dros £57m, mae £29.7 yn cael ei ddarparu gan LlC a £27.4m gan bartneriaid eraill.    Amcan y gronfa hon oedd cefnogi integreiddio a gwaith partneriaeth mewn cysylltiad â grwpiau poblogaeth sydd â blaenoriaeth.   Gan ei bod hi’n gronfa ranbarthol, roedd hi’n anodd mesur yn union faint o gyllid ar gyfer pob prosiect unigol sy’n weithredol yn Sir Ddinbych yr oedd Cyngor Sir Ddinbych wedi’i gyfrannu i ddechrau. 

·     roedd y Bwrdd Iechyd yn Bartner Statudol ar y Bwrdd, ac fel pob partner statudol arall, roedd yn cymryd ei gyfrifoldebau o ddifri’.   Nid y Bwrdd Iechyd yn unig oedd yn gwneud toriadau, roedd cyllidebau pob corff sector cyhoeddus yn wynebu toriadau.

·     nid oeddynt yn ymwybodol o unrhyw gynlluniau ar hyn o bryd i integreiddio Gwasanaethau Anableddau Dysgu yr Awdurdod Lleol a’r Bwrdd Iechyd yn ffurfiol; serch hynny nid oedd hyn yn eu rhwystro rhag cydweithio. 

Yn dilyn trafodaeth fanwl:

Penderfynwyd: yn amodol ar y sylwadau uchod a darparu’r wybodaeth y gofynnwyd amdani –

(i)             cadarnhau, yn rhan o ystyried Adroddiad Blynyddol Bwrdd Partneriaeth Rhanbarthol Gogledd Cymru, ei fod wedi darllen, deall ac ystyried y gwaith sydd angen ei wneud gan y Bwrdd Partneriaeth Rhanbarthol; a

(ii)            chydnabod y cynnydd a wnaed yn ystod 2023/24 mewn cysylltiad â’r meysydd gwaith sy’n cael eu datblygu drwy Fwrdd Partneriaeth Rhanbarthol Gogledd Cymru.

12pm:  Ar y pwynt hwn, cymerodd y pwyllgor egwyl ac ailymgynnull am 12.10pm.