Eitem ar yr agenda

Ystyried cais ar gyfer newidiadau ac ad daliadau i do, gan gynnwys tynnu a gwneud iawn o olau awyr presennol, gosod ffenestri to, paneli solar ffotofoltaidd a gwaith cysylltiedig yng Ngweithdy'r Goron (Y Farchnad Fenyn gynt), Lôn y Goron, Dinbych (copi ynghlwm).

 

 

Cafodd cais ei gyflwyno ar gyfer Addasiadau ac atgyweiriadau i’r to, gan gynnwys tynnu ac atgyweirio’r ffenestr do presennol, gosod goleuadau yn y to, paneli solar ffotofoltäig a gwaith cysylltiol yng Ngweithdy’r Goron (Marchnad Fenyn gynt), Lôn Crown, Dinbych.

 

Siaradwr Cyhoeddus - diolchodd Paul Moore (o blaid) i’r pwyllgor am y cyfle i siarad i gefnogi’r cais ar gyfer y Farchnad Fenyn yn Ninbych.   Eglurodd y siaradwr cyhoeddus na fyddent yn trafod yr agweddau technegol o’r cais a deddfwriaeth, gan fod hyn wedi ei gyflwyno eisoes; byddent yn canolbwyntio ar bwysigrwydd yr adeilad hwn i’r gymuned.    Ar ôl bod yn wag ac mewn cyflwr gwael ers bron i saith mlynedd, y gobaith oedd i’w weld yn cael ei adfywio.   Gweledigaeth yr ymgeisydd oedd i greu canolfan dreftadaeth a diwylliant iechyd meddwl, a weithredir gan y trydydd sector ac elusennau, a fyddai’n darparu gwasanaethau hanfodol i bobl Sir Ddinbych. 

 

Oherwydd yr hinsawdd ariannol presennol, roedd yn hynod heriol i ddarparu unrhyw wasanaeth, yn arbennig ar gyfer y trydydd sector, a oedd yn wynebu toriadau parhaus a phenderfyniadau anodd yn ddyddiol.   Y nod oedd i leihau gorbenion gweithredol a chanolbwyntio ar gyflawni canlyniadau. Er enghraifft, roedd y datblygiad yn anelu i ddarparu gwasanaeth iechyd meddwl oedd wir ei angen ar gyfer o leiaf pump diwrnod yr wythnos, ynghyd â chyfleoedd gwirfoddoli. Roedd yr ymgeisydd hefyd yn dyheu i ddatblygu’r gwasanaethau a bod yn achrededig tra’n hybu ein diwylliant gyda’r Fenter Iaith.

 

Roedd y siaradwr cyhoeddus yn cydnabod bod Sir Ddinbych wedi cefnogi eu gweledigaeth yn fawr ac roeddent yn ddiolchgar am yr arian oedd ar gael drwy’r Gronfa Ffyniant Gyffredin. Roedd gan y Farchnad Fenyn botensial sylweddol i fod yn ganolbwynt cymunedol hanfodol.

 

Trafodaeth Gyffredinol –

 

Caniataodd y Cynghorydd Mark Young i’r Cynghorydd Arwel Roberts siarad ar ran y Cynghorydd Delyth Jones (aelod lleol) nad oedd yn gallu bod yn bresennol.  “Fel aelod lleol o’r ward ble roedd yr adeilad wedi’i leoli, roeddwn eisiau rhannu fy marn.   Y bwriad yw i ddatblygu’r adeilad, sydd eisoes wedi derbyn caniatâd cynllunio, i swyddfa, canolfan addysg, amgueddfa a chyfleuster cymunedol.   Mae’r cynllun hwn yn alinio gydag amcanion y Gronfa Ffyniant Gyffredin ac mae mewn lleoliad priodol.   Felly, rydw i’n cefnogi’r prosiect yn llwyr.

 

Nid oes gennyf unrhyw wrthwynebiad i’r bwriad i gadw’r goleuadau to na’r blwch nythu ar y safle.   Mae’n hanfodol i sicrhau bod y deunyddiau to a ddefnyddir yn briodol i’r safle, fel llechi Cymreig fel y soniwyd yn yr adroddiad.   Er fy mod yn cefnogi’r prosiect, mae gennyf bryderon ynglŷn ag ychwanegu paneli solar i’r adeilad.   Mae ynni adnewyddadwy yn hanfodol ar gyfer y dyfodol, ond mae’n bosibl na fydd maint a graddfa’r lleoliad yn briodol ar gyfer ystod o 40 o baneli.  Rwyf yn annog aelodau’r panel i ystyried yr agwedd hon yn ofalus cyn penderfynu. Gan fod y safle mewn ardal gadwraeth ble mae adeiladau rhestredig yn amlwg, mae lleoliad a gwelededd unrhyw waith adeiladu newydd yn ystyriaethau hanfodol.    Mae’r safle arfaethedig, sydd wedi’i leoli mewn lle amlwg a gellir ei weld o nifer o lwybrau cerdded ledled y dref, gan gynnwys y rhai sy’n arwain at Gastell Dinbych, angen sylw arbennig. 

 

Mae unrhyw ddatblygiad yn yr ardal hon yn gallu bod yn risg o osod cynsail ar gyfer prosiectau yn y dyfodol, a allai gael effaith andwyol ar ymdrechion cadwraeth.   Mae Dinbych yn cynnwys y nifer uchaf o adeiladau rhestredig yng Nghymru, gan ei wneud hyd yn oed yn fwy hanfodol i gadw a diogelu cymeriad unigryw y dref.   Mae’r cyllid CFFR mewn perygl os yw’r cynllun bwriedig yn cynnwys paneli solar, a oedd yn fater o bryder.   Dylai’r cynllun datblygu fod wedi ystyried arwyddocâd hanesyddol a chadwraeth i osgoi unrhyw niwed posibl i dreftadaeth y gymuned.”

 

Caniataodd y cadeirydd i’r Cynghorydd Merfyn Parry siarad hefyd ar ran y Cynghorydd Pauline Edwards (aelod lleol).   “Fel aelod lleol y ward hon, roeddwn yn falch o glywed am y cyllid a roddwyd i gefnogi cyfleuster cymunedol sydd wirioneddol ei angen yn Ninbych.   Fodd bynnag, roeddwn i’n llai bodlon pan ddarllenais am y pryderon a godwyd ynglŷn â’r system Paneli Solar a fwriadwyd.  Rwyf wedi mynd drwy’r datganiad effaith treftadaeth a chanfod bod y system PV solar rhyngweithiol a fwriedir ar gyfer llechi to’r adeilad yn ddatrysiad ystyriol i fynd i’r afael ag unrhyw effaith posibl ar ymddangosiad yr adeilad. Byddai’r paneli solar ond yn cael eu gosod ar rannau mwyaf modern o’r adeilad ac ni fyddent yn weladwy o’r strwythur Marchnad Fenyn gwreiddiol.   Ni fyddent i’w gweld yn amlwg gan y cyhoedd o’r priffyrdd.

 

Rwy’n deall bod y Paneli PV bwriedig yn ofyniad ar gyfer yr adeilad i gefnogi polisi Sero Net Llywodraeth y DU.   Mae hyn yn cyd-fynd â’n hamcanion amgylcheddol a byddai o fudd i’r adeiladau, gan gynnwys llai o gostau rhedeg.    Mae’n werth nodi nad oes gan Gyngor Tref Dinbych na Cadw unrhyw wrthwynebiad i’r cynlluniau.”

 

Hysbysodd swyddogion y pwyllgor bod Swyddog Cadwraeth y Cyngor wedi mynychu’r cyfarfod i ateb unrhyw ymholiadau ynglŷn â’r cais. 

 

Dywedodd Aelodau fod y cais yn fuddiol i wneud defnydd o adeilad gwag yn y gymuned, byddai’r paneli solar bwriedig yn cynorthwyo’r lleoliad gyda chostau cynnal ac yn cyd-fynd â’r agenda werdd a ddilynir yn lleol ac yn genedlaethol.   Hefyd ychwanegwyd bod y pryderon cadwraeth wedi eu hystyried drwy’r cais. 

 

Dywedodd y Cynghorydd Merfyn Parry y gellir cael amod os bydd mwy o dechnoleg pellach yn cael ei weithredu yn y dyfodol, fyddai’n golygu bod y paneli solar wedi cyrraedd diwedd eu hoes; gallai’r to ddychwelyd i’r dyluniad gwreiddiol. 

 

Dywedodd y Swyddog Cadwraeth fod y paneli yn weladwy a gallent fod yn rhwystr i harddwch y dref, a gallent osod cynsail ar gyfer datblygiadau yn yr ardal yn y dyfodol.

 

Eglurodd swyddogion wrth yr aelodau fod y drafodaeth ynglŷn â gosod cynsail yn gymhleth; roedd y cais yn sicrhau y byddai’r paneli yn cael eu gosod mewn mannau llai amlwg.   Eglurodd swyddogion y byddai pob cais angen ei drafod yn ôl ei rinweddau ei hun; fodd bynnag, os byddai’r cais yn cael ei gymeradwyo, byddai’n gwneud unrhyw ddadleuon tebyg yn fwy anodd wrth symud ymlaen. 

 

Ychwanegodd y Swyddog Cadwraeth ei fod yn cytuno mai’r paneli a fwriadwyd oedd y dewis gorau; fodd bynnag, roeddent yn parhau’n blastig ac nid y deunydd toi traddodiadol fyddai wedi cael ei ddefnyddio; gan ymateb i pa un a ellir gweld y paneli o lefel y stryd, eglurodd y swyddog y gellir eu gweld o’r stryd a’r maes parcio. 

 

Codwyd gwresogi amgen, fel gwres ffynhonnell aer neu wres o’r ddaear a pha un a oeddent wedi eu hystyried fel dull gwresogi amgen.   Ychwanegodd y Cynghorydd Parry at y mater gan amlygu eu bod yn ffynonellau gwresogi da; fodd bynnag, roedd angen ynni i’w rhedeg a heb baneli gallent fod yn anhyfyw yn ariannol i’w rhedeg. Roedd swyddogion wedi codi’r mater gyda’r asiant a’r cais; fodd bynnag, ni fu unrhyw sylwadau pellach ar y sefyllfa. 

 

Eglurodd yr Ymgynghorydd Cyfreithiol fod yr amod yn awgrymu ynglŷn ag adfer y to i’w gyflwr blaenorol os byddai’r paneli solar yn cael eu tanddefnyddio; dychwelir i’r pwyllgor yn y dyfodol a gellir ei gynnwys os byddai’r cais yn cael ei ganiatáu.   Byddai’r swyddogion hefyd yn trafod unrhyw amodau gyda’r aelodau lleol os byddai’r cais am ganiatâd cynllunio yn cael ei ganiatau.

 

Cynnig - roedd y Cynghorydd Elfed Williams yn cynnig bod y cais yn cael ei ganiatau yn groes i argymhellion swyddog oherwydd bod y polisïau amgylcheddol yn gorbwyso’r agwedd dreftadaeth o’r polisïau; roedd y cynnig yn cynnwys yr amod bod y paneli solar yn cael eu tynnu os na fyddent yn cael eu defnyddio, eiliwyd gan y Cynghorydd Merfyn Parry. 

 

PLEIDLAIS –

O blaid – 17

Yn erbyn – 1

Ymatal – 0

 

PENDERFYNWYD y dylid CYMERADWYO’R cais yn groes i argymhelliad y swyddog.