Eitem ar yr agenda

Ystyried cais i ddymchwel fferm ddofednod bresennol ac adeiladu uned ddofednod ar gyfer bridio tyrcwn, yn cynnwys 2 uned ddofednod cysylltiedig gyda biniau porthiant, sied tractor, lloriau caled, ffordd fynediad, mynedfa newydd i gerbydau a gwaith cysylltiedig (copi ynghlwm). 

 

Cyflwynwyd cais i ddymchwel fferm ddofednod ac adeiladu uned ddofednod ar gyfer bridio tyrcwn, yn cynnwys 2 uned ddofednod cysylltiedig gyda biniau porthiant, sied tractor, lloriau caled, ffordd fynediad, mynediad newydd i gerbydau a gwaith cysylltiedig ym Mryn Golau, Saron, Dinbych.

 

Siaradwr Cyhoeddus –

 

Sam Harrison (Asiant) (O blaid) – mae gan y fferm ddofednod 7 tŷ dofednod ac yn gweithredu dan drwydded amgylcheddol wedi’i chyhoeddi a’i rheoli gan Gyfoeth Naturiol Cymru ar gyfer magu ieir brwylio; mae gan y safle le i 87,200 o adar, gydag oddeutu 7.5 haid y flwyddyn. Cynigir dymchwel y fferm bresennol a chodi uned fodern ar gyfer bridio tyrcwn a fydd yn cynnwys y technegau gorau, yn wahanol iawn i’r unedau presennol. Ar ôl y datblygiad byddai’r fferm yn gweithredu fel uned i dyrcwn ddodwy wyau ffrwythlon ar gyfer deori. Byddai lle i 6000 o adar ar y fferm newydd – 5,500 o dwrcennod a 500 o geiliogod tyrcwn, a byddai’r datblygiad newydd yn creu 5 swydd lawn amser ar y safle.

 

Mae’r datblygiad arfaethedig yn llawer llai dwys na’r unedau brwylio presennol. Mae’r gylchred dyrcwn yn seiliedig ar gylchred fridio 36 wythnos, gyda’r adar yn cael eu cadw am oddeutu 28 wythnos a’r safle wedyn yn cael ei wagio, ei lanhau a’i baratoi am 8 wythnos. Y cynnig yw bridio 1.6 haid y flwyddyn yn hytrach na 7.5 y flwyddyn.

Mae effaith y datblygiad wedi’i asesu drwy amrywiaeth o adroddiadau technegol sy’n ymdrin ag arogl, sŵn, amonia, ecoleg, cludiant a rheoli gwastraff. Byddai’r datblygiad yn arwain at nifer o welliannau, yn cynnwys, ond nid yn gyfyngedig i: lleihau arogl ac amonia, lleihau gweithgareddau dal gyda’r nos a lleihau traffig yn ystod y dydd. Mae’r gwerthusiad wedi’i werthuso’n llawn o safbwynt technegol gan Gyfoeth Naturiol Cymru, Priffyrdd, Ecoleg ac Iechyd yr Amgylchedd, sydd heb fynegi gwrthwynebiad yn amodol ar amodau.

 

Trafodaeth Gyffredinol –

 

Mynegodd y Cynghorydd Elfed Williams (aelod lleol) bryderon ynghylch oriau gweithredu’r safle a lleoliad mynediad y safle. Gan gyfeirio at amod 10 –

 

Er y cynlluniau a’r dogfennau i’w cymeradwyo wrth hyn, bydd yr holl ddanfoniadau, gweithgareddau cludo dofednod byw o’r safle (ac eithrio gweithgareddau cludo a ellir eu gwneud y tu allan i’r oriau hyn) yn digwydd rhwng 07.00 a 19.00 ddydd Llun i ddydd Gwener, rhwng 07.00 a 17.00 ddydd Sadwrn a rhwng 10.00 a 16.00 ddydd Sul a gwyliau banc.

 

Roedd teimlad bod yr oriau gweithredu yn ystod yr wythnos yn rhy hwyr a chafwyd cais i’w newid nhw o 19.00 i 17.00 yn ystod yr wythnos oherwydd y niwsans sŵn posibl i drigolion lleol. Amlygwyd y gall loriau gyrraedd ar unrhyw adeg, ddydd neu nos, am 6 wythnos o’r flwyddyn.

 

Pryder mwyaf y trigolion a Chyngor Cymuned Llanrhaeadr yng Nghinmeirch yw’r mynediad i’r safle. Mae’r mynediad newydd arfaethedig yn agos at set o groesffyrdd, nad ydynt yn addas i gerbydau mawr sy’n mynd i mewn ac allan o’r safle. Gofynnwyd bod y mynediad arfaethedig yn cael ei symud i le gwahanol draw oddi wrth y croesffyrdd ac eiddo cymdogion.

 

Dywedodd y Rheolwr Rheoli Datblygiadau fod yr opsiynau fel a ganlyn:

·       Gall yr aelod lleol gynnig geiriad gwahanol i amod 10. Cymeradwyo’r cais yn amodol ar ddiwygio amod 10.

·       Mae’r pwynt mynediad yn rhan fawr o’r cais arfaethedig ac nid oes modd i’r Pwyllgor newid y lleoliad. Mae’n rhaid i’r Aelodau asesu’r wybodaeth sydd o’u blaenau gan y swyddogion a’r Peirianwyr Priffyrdd a phenderfynu a yw’r mynediad yn dderbyniol. Os yw’n annerbyniol, byddai’n rhaid i’r Aelodau wrthod y cais.

·       Gohirio’r cais i ganiatáu i swyddogion siarad efo’r ymgeisydd ynglŷn â newid lleoliad y mynediad a’r oriau gweithredu.

 

Holodd y Cynghorydd Alan James ynghylch y pellter rhwng y mynediad presennol a’r mynediad arfaethedig. Cyfeiriodd y Prif Swyddog Cynllunio at y cynllun o’r awyr ac amlygodd ble’r oedd y mynediad arfaethedig a’r mynediad presennol.

 

Holodd y Cynghorydd Huw Hilditch-Roberts ynghylch oriau gweithredu presennol y safle. Dywedodd y Prif Swyddog Cynllunio nad yw’r caniatâd presennol ar gyfer y safle yn cynnwys unrhyw reolaeth dros yr oriau gweithredu.

 

Cynnig –

 

CYNIGIODD y Cynghorydd Elfed Williams bod y cais yn cael ei ohirio tan y bydd y swyddogion wedi cysylltu â’r ymgeisydd ynglŷn â’r mynediad i’r safle a’r oriau gweithredol. EILIODD y Cynghorydd Delyth Jones y cynnig i ohirio.

 

Pleidlais –

O blaid – 14

Yn erbyn – 4

Ymatal – 1

 

PENDERFYNWYD GOHIRIO’R cais cynllunio.