Eitem ar yr agenda

Ystyried cais i newid defnydd tir drwy leoli 4 uned llety gwyliau (dosbarth defnydd C6), gosod gwaith trin pecynnau, creu mannau parcio, trac mewnol, pont droed i gerddwyr a gwaith cysylltiedig (copi ynghlwm).

 

 

Cyflwynwyd cais i newid defnydd tir drwy osod 4 llety gwyliau, gosod gwaith trin bychan, creu mannau parcio, trac mewnol, pont droed i gerddwyr a gwaith cysylltiedig ar dir wrth ymyl Paddock, Llanferres yn yr Wyddgrug.

 

Siaradwr Cyhoeddus –

 

Paul Dyson (YN ERBYN) – Dywedodd Mr Dyson wrth y Pwyllgor fod y cais wedi bod yn yr arfaeth ers dwy flynedd a hanner, gyda manylion y goleuadau tu allan ond ar gael ers 12 Ionawr 2024. Nid yw’r diwygiad diweddar wedi rhoi digon o amser i drigolion wrthwynebu neu wneud sylwadau. Felly gofynnodd Mr Dyson i’r Pwyllgor ohirio trafod y cais er mwyn rhoi amser i drigolion a phartïon eraill ymateb.

 

Mae yna ddau safle llety gwyliau ar y lôn gul yn barod, Bryn Bowlio a Camp Alun. Nid oes galw am lety gwyliau ychwanegol yn yr ardal ac mae’r safleoedd sy’n bodoli eisoes yn wag am sawl mis. Byddai’r cais yn annog mwy o dwristiaeth i’r ardal, sydd eisoes wedi cyrraedd ei chapasiti. Nid yw lleoliad y safle yn addas gan nad oes siopau, tafarndai, llwybrau cerdded na goleuadau stryd ar y ffordd.

 

Dylid cofio am fenter Awyr Dywyll yr Ardal o Harddwch Naturiol Eithriadol wrth ystyried cynllun goleuo arfaethedig y cais. Byddai sŵn ymwelwyr yn effeithio ar heddwch tirwedd yr AHNE. Mae’r cynlluniau sgrinio sŵn yn y cais yn mynd i gymryd blynyddoedd i’w sefydlu, ac ni fyddent yn atal sŵn. Mae’n bosibl y bydd y cais yn arwain at sŵn 24 awr y dydd, gyda phobl yn defnyddio twbâu poeth gyda’r nos ochr yn ochr ag yfed alcohol – a all arwain at wrthdaro rhwng ymwelwyr a thrigolion.

 

Mae Polisi PSE12 y Cynllun Datblygu Lleol (CDLl) yn nodi na fydd unrhyw wersyll newydd yn agor yn Sir Ddinbych oni bai bod modd dangos y galw.

 

Gofynnwyd i’r Pwyllgor ohirio trafod y cais.

 

Siaradwr Cyhoeddus –

 

Gethin Jones (Asiant) (O BLAID) – Mae’r cais yn ymwneud â gosod pedair uned llety gwyliau ar dir wrth ymyl cartref yr ymgeisydd. Y weledigaeth yw creu profiad gwyliau unigryw i ymwelwyr Bryniau Clwyd a’r AHNE. Fel teulu ifanc nod yr ymgeiswyr yw tyfu ac arallgyfeirio i greu rhywbeth arbennig yn y gymuned.

 

Drwy gydol y broses gynllunio mae’r unedau wedi’u gosod yn strategol i fanteisio ar sgrinio ac i leihau’r effaith weledol ar yr ardal. Mae’r ymgeiswyr wedi canolbwyntio ar gadw a gwella’r ecoleg bresennol a chydnabod arwyddocâd diogelu bioamrywiaeth. Nid yw Ecolegydd y Sir na’r Swyddog Llwybrau Troed wedi mynegi unrhyw wrthwynebiad i’r cais. Yn ystod y broses gynllunio mae’r ymgeisydd wedi buddsoddi llawer o arian yn gweithio gyda’r Water Co Ltd, sy’n beirianwyr dŵr a draenio profiadol ac wedi ateb ymholiadau Cyfoeth Naturiol Cymru ynglŷn â’r cais. Mae Cyfoeth Naturiol Cymru wedi cadarnhau eu parodrwydd i roi trwydded i fwrw ymlaen â’r gwaith trin bychan ar y safle unwaith y mae’r datblygiad wedi dechrau. Mae’r ymgeisydd yn rhagweld cynnydd yn refeniw busnesau lleol fel siopau, tafarndai a llefydd bwyta lleol. Byddai’r cais hefyd yn cyfrannu at yr economi ehangach gan greu cyfleoedd cyflogaeth.

 

Trafodaeth Gyffredinol –

 

Gofynnodd y Cynghorydd James Elson am eglurhad ynghylch y gwrthdaro rhwng polisïau PSE5 a PSE12 y CDLl.

 

Eglurodd y Prif Swyddog Cynllunio fod Polisi PSE5 yn ymwneud â datblygiad sy’n rhoi budd i’r economi wledig a bod PSE12 yn ymwneud â safleoedd gwersylla a charafanau statig a theithiol. Mae’r cais gerbron y Pwyllgor yn ymwneud â chabanau. Mae’r swyddogion wedi pwyso a mesur pethau’n gytbwys wrth benderfynu pa bolisi sy’n cefnogi’r cais. Mae’r swyddogion wedi dod i’r casgliad y gellir lleihau effaith weledol y cais ar y tirlun drwy amod tirlunio. O ran goleuadau arfaethedig y safle, mae amod wedi’i gynnwys yn y cais sy’n gofyn am gytundeb pellach cyn gosod unrhyw oleuadau. Mae ymateb gan y Swyddog Hawliau Tramwy wedi dod i law, ac yn cadarnhau eu bod yn cytuno â’r cais ar yr amod nad oes unrhyw niwed i amwynder yr ardal. Ar ôl pwyso a mesur mae’r adroddiad ar y cais yn dangos bod y swyddogion yn cefnogi polisi PSE5.

 

Diolchodd y Cynghorydd Delyth Jones i’r swyddogion am gyflwyno adroddiad cynhwysfawr a’r sylwadau hwyr. Gan gyfeirio at y gwrthwynebiadau i’r cais, holodd y Cynghorydd Jones a oedd y broses ymgynghori gywir wedi’i dilyn.

 

Dywedodd y Prif Swyddog Cynllunio fod y wybodaeth fwyaf diweddar yn ymwneud â goleuadau a chynllun draenio yn ymateb uniongyrchol i sylwadau ymgyngoreion statudol. Ym marn y swyddogion mae’r partïon perthnasol wedi cael cyfle i ymgynghori ynghylch y gwrthwynebiadau sydd wedi’u cyflwyno. Mae trigolion wedi cael cyfle i wneud sylwadau ac wedi’u hysbysu yn unol â’r ddeddfwriaeth ac felly, mae’r swyddogion yn fodlon eu bod wedi dilyn y broses gywir.

 

Holodd y Cynghorydd Jones am yr amodau sydd yn eu lle i’r ymgeisydd ddangos y galw am y datblygiad yn yr AHNE.

 

Eglurodd y Prif Swyddog Cynllunio, gan gyfeirio’n ôl at bolisïau PSE5 a PSE12, nad oes amod lle mae’n rhaid i ymgeiswyr ddangos y galw am y cais yn yr ardal ond mae ar yr ymgeisydd angen dangos y budd i’r economi wledig.

 

Mynegodd y Cynghorydd Arwel Roberts ei syndod bod yr AHNE yn cytuno â’r cais o ystyried eu statws Awyr Dywyll. Cyfeiriodd y Prif Swyddog Cynllunio at amod 10 yn yr adroddiad sy’n sicrhau bod unrhyw olau yn cael ei bylu i osgoi effeithiau negyddol ar ystlumod a bod hynny yn cael ei gydnabod yn statws Awyr Dywyll yr AHNE.

 

Mynegodd y Cynghorydd Chris Evans bryderon ynghylch cadw cofnod o ymwelwyr i safleoedd gwyliau o’r fath a gofynnodd am wybodaeth ynglŷn â phwy sy’n gorfodi hyn. Dywedodd y Rheolwr Rheoli Datblygiadau fod Llywodraeth Cymru, fel rhan o’u polisïau cynllunio cenedlaethol, yn annog twristiaeth drwy gydol y flwyddyn. Cyfrifoldeb ymgeiswyr a gweithredwyr safleoedd gwyliau yw sicrhau bod ymwelwyr yn defnyddio’r safleoedd at ddibenion gwyliau yn unig, felly mae’n rhaid iddyn nhw wirio bod ymwelwyr yn talu treth y cyngor ar eiddo arall. Dyma’r drefn safonol ar draws y sir gyfan. Mae hyn yn fater gorfodaeth cynllunio a chyfeiriwyd at amod 3 y cais a fydd gobeithio yn sicrhau aelodau bod hyn yn cael ei reoli.

 

Dywedodd y Cynghorydd Huw Hilditch-Roberts fod llawer o ddiwydrwydd dyladwy wedi’i roi i’r cais ac roedd yn teimlo’n hyderus fod y swyddogion wedi ystyried yr hyn y mae’r cais yn ei gynnig a’r lleoliad. Mae Arolwg Busnes Sir Ddinbych wedi amlygu galw am lety i dwristiaid yn yr ardal, sy’n denu dros 250,000 o ymwelwyr bob blwyddyn.

 

Cynnig –

 

CYNIGIODD y Cynghorydd Huw Hilditch-Roberts fod y cais yn cael ei gymeradwyo. EILIODD y Cynghorydd Alan James.

 

Mynegodd y Cynghorydd Williams (aelod lleol) ei gefnogaeth i’r cais gan ddweud bod y cabanau gwyliau a gynigir yn y cais yn boblogaidd iawn yn yr ardal a bod galw amdanynt. Byddai’r cais hwn yn dod ag arian i’r economi leol.

 

Pleidlais –

O blaid – 19

Yn erbyn – 0

Ymatal – 0

 

PENDERFYNWYD y dylid CYMERADWYO’R cais cynllunio yn unol ag argymhelliad y swyddog.