Eitem ar yr agenda

Ystyried adroddiad gan y Cyfarwyddwr Corfforaethol: Moderneiddio a Lles (copi’n amgaeëdig) a oedd yn argymell ymateb terfynol y Cyngor i’r ymgynghoriad “Mae Gofal Iechyd yng Ngogledd Cymru yn Newid”.

Dosbarthwyd copi o adroddiad gan y Cyfarwyddwr Corfforaethol: Moderneiddio a Lles, a oedd yn argymell ymateb terfynol y Cyngor i’r ymgynghoriad cyhoeddus ‘Mae Gofal Iechyd yng ngogledd Cymru yn newid’, â phapurau’r cyfarfod.  Dosbarthwyd copi yn cynnwys diweddariad o’r newidiadau i ymateb y Cyngor yn y cyfarfod.

Cyflwynwyd yr adroddiad gan yr Aelodau Arweiniol Gofal Cymdeithasol a Gwasanaethau Plant, y Cynghorydd R.L. Feeley, a diolchodd i amryw o unigolion a chyrff am eu cymorth yn llunio’r ymateb. Esboniodd y  Cynghorydd Feeley bod “Mae Gofal Iechyd yng ngogledd Cymru yn newid” ac Adolygiadau Gwasanaeth eraill sy’n cael eu hystyried gan Fwrdd Iechyd Prifysgol Betsi Cadwaladr yng Ngorffennaf 2012, yn cynnwys cynigion ar gyfer newidiadau arwyddocaol i wasanaethau iechyd ar draws gogledd Cymru. Cynhaliwyd proses ymgynghori ffurfiol ar y cynigion rhwng 20 Awst a 28 Hydref a bod cais i’r Cyngor gytuno’n ffurfiol ar yr ymateb arfaethedig yn Atodiad I i’r adroddiad. 

Roedd manylion am y saith prif faes a adolygwyd gan Fwrdd Iechyd Prifysgol Betsi Cadwaladr yn ystod y ddwy flynedd ddiwethaf yn yr adroddiad. Cyflwynwyd adroddiad ar adolygiadau “Mae Gofal Iechyd yng ngogledd Cymru yn newid: adroddiad ar gynigion newid gwasanaeth” wedi’i gyflwyno i Fwrdd Iechyd Prifysgol Betsi Cadwaladr ar 19 Gorffennaf 2012.

Roedd y Cyngor wedi derbyn gwybodaeth gefndir, crynodeb y cynigion, copi o’r ddogfen ymgynghori ac ymateb drafft i’r cynigion a luniwyd gan Weithgor o’r Pwyllgor Craffu Partneriaethau yn flaenorol. Roedd yr Aelodau wedi cael cyflwyniad gan gynrychiolwyr y Bwrdd Iechyd hefyd, a chyfle i ofyn cwestiynau ar faterion allweddol. Yn dilyn trafodaethau yn y Grwpiau Aelodau Ardal, cyfarfodydd Clwstwr Cynghorau Tref a Chymuned, cyfarfodydd ymgynghori ffurfiol a drefnwyd gan Fwrdd Iechyd Prifysgol Betsi Cadwaladr a gweithgareddau ymgynghori a drefnwyd gan y Cyngor Iechyd Cymuned roedd yr ymateb drafft i’r ymgynghoriad wedi’i ddiwygio yn dilyn cyfarfod arall o Weithgor y Pwyllgor Craffu Partneriaethau. Darparodd y Cyfarwyddwr Corfforaethol: Moderneiddio a Lles grynodeb o’r prif newidiadau, fel a ganlyn, a nodwyd yn yr adroddiad:-

·        yr angen am Grŵp Strategol ar gyfer Sir Ddinbych i alluogi trafodaeth am fanylion gweithredu’r cynigion (paragraff 1.4)

·        cryfhau’r geiriad o ran yr angen i sicrhau bod gwasanaethau amgen yn eu lle cyn cau’r gwasanaethau sy’n bodoli eisoes (paragraffau 1.5, 1.6.4, 1.8.2, 2.3) a datblygu gwasanaethau ar gyfer gofalwyr (paragraff 1.9.2)

·        cynnig bod y Bwrdd Iechyd yn ystyried datblygu Inffyrmari Dinbych ac Ysbyty Rhuthun fel ‘cyd-ganolfan ysbyty’ a’r swyddogaethau cysylltiedig (paragraff 1.7)

·        cefnogaeth benodol i ddarparu Gwasanaeth Mân Anafiadau yn Llangollen (paragraff 1.8.3)

Cadarnhawyd bod gweithio agos ac integredig â gwasanaethau iechyd, yn enwedig mewn ardaloedd lleol, yn ffurfio rhan allweddol o waith y Cyngor i ymateb i newid demograffig, a bod y Cynllun MAWR wedi nodi’r amcanion ar gyfer cydweithio effeithiol i gefnogi teuluoedd. 

Roedd manylion am y costau potensial i Fwrdd Iechyd Prifysgol Betsi Cadwaladr wedi’u cynnwys ym mharagraff 4.7 yr adroddiad i’r Cyngor ar 11 Medi. Esboniwyd, yn y broses o newid, yn enwedig wrth i wasanaethau gael eu trosglwyddo i’r gymuned, gallai’r cynnydd mewn costau gael ei drosglwyddo i awdurdodau lleol. Cyfeiriwyd yn benodol at ofal cymdeithasol i oedolion a’r goblygiadau posibl o ran darpariaeth cludiant. Roedd Bwrdd Iechyd Prifysgol Betsi Cadwaladr wedi cynnal proses sgrinio Asesu’r Effaith ar Gydraddoldeb ar eu cynigion, a byddai’n gwneud rhagor o waith cyn cyflwyno’r cynigion terfynol i’r Bwrdd. 

Eglurwyd, oherwydd nad oedd costau’r newidiadau arfaethedig wedi eu cyfrifo’n llawn, nad oedd yr effaith ar wasanaethau’r Cyngor yn glir. Byddai angen ystyried materion fel darparu cludiant, a byddai risg y byddai cost ychwanegol darparu mwy o wasanaethau yn y gymuned yn syrthio’n anochel ar dimau gofal cymdeithasol y Cyngor. Byddai camau gweithredu allweddol i leddfu’r risgiau a nodwyd yn cynnwys cynhyrchu cynlluniau gweithredu yn nodi’r costau’n fanwl ar gyfer y newidiadau arfaethedig, a fyddai’n cael eu trafod gan Grŵp Strategol dynodedig. Byddai hyn yn galluogi gwneud yr effaith yn glir a thryloyw, a chaniatáu trafodaeth lawn â’r Awdurdod Lleol ynghylch meysydd sy’n rhyngweithio â chyfrifoldebau’r Cyngor, a sut y dylid trefnu ac ariannu patrwm newydd y gwasanaethau.

Mynegodd y Cynghorydd S.A. Davies bryderon am ddilysrwydd y broses ymgynghori, gan gyfeirio’n benodol at yr ansicrwydd ynghylch dyfodol yr uned mân anafiadau yn Llangollen.    

Pwysleisiodd y Cynghorydd J. Thompson-Hill bwysigrwydd sicrhau nad oedd gwasanaethau’n cael eu hatal nes bo gwasanaethau amgen wedi eu darparu ac yn weithredol. Mynegodd bryder am amgylchiadau ariannol Bwrdd Iechyd Prifysgol Betsi Cadwaladr a chwestiynodd ei allu i gyflawni’r cynigion yn unol â’r amserlen arfaethedig. Tynnodd y Cynghorydd Thompson–Hill sylw at ganlyniadau potensial y cynigion yn Sir Ddinbych, gan gyfeirio’n benodol at yr effaith posibl ar grantiau cefnogi refeniw’r Cyngor a ffynonellau ariannu allanol eraill. Cyfeiriodd at effaith andwyol trosglwyddo’r gost i Sir Ddinbych ar angen i’r Cyngor fabwysiadu safiad cadarn ar y mater hwn.

Eglurodd y Prif Weithredwr bod Cyfarwyddwr Gweithredol Cynllunio Bwrdd Iechyd Prifysgol Betsi Cadwaladr wedi rhoi gwarant na fyddai gwasanaeth yn cael ei gau cyn sefydlu un newydd, a phetai hyn yn digwydd byddai am gyfnod o ddyddiau yn hytrach nag wythnosau.  Cafwyd sicrwydd hefyd na fyddai costau’n cael eu trosglwyddo ac na fyddai disgwyl i’r Awdurdod Lleol ymdrin ag unrhyw gostau ychwanegol o ganlyniad i’r newidiadau. Pwysleisiodd y Prif Weithredwr y byddai’n bwysig i Gyngor Sir Ddinbych fabwysiadu safiad cadarn wrth sicrhau bod Bwrdd Iechyd Prifysgol Betsi Cadwaladr yn cyflawni ei gynigion yn unol â’u datganiadau. 

Cadarnhaodd y Cyfarwyddwr Corfforaethol: Moderneiddio a Lles bod cydgysylltu rhwng Adran Eiddo Bwrdd Iechyd Prifysgol Betsi Cadwaladr ac Adran Gynllunio’r Cyngor o ran y cyfnodau ailddatblygu yn gysylltiedig ag adeiladau Bwrdd Iechyd Prifysgol Betsi Cadwaladr yn ardal y Rhyl a Phrestatyn.

Yn ystod y drafodaeth ddilynol cafwyd yr atebion a ganlyn gan y Cyfarwyddwr Corfforaethol: Moderneiddio a Lles i’r cwestiynau a’r materion a nodwyd gan Aelodau:-

- mynegwyd y farn y byddai Bwrdd Iechyd Prifysgol Betsi Cadwaladr yn fodlon ateb cwestiynau ar sail tystiolaeth.   

- esboniwyd bod y Gwasanaeth Gofal Ychwanegol yn y Cartref yn wasanaeth gofal iechyd ychwanegol a ddarperir yng nghartref defnyddiwr y gwasanaeth, a’i fod yn wahanol i’r Gwasanaeth Gofal yn y Cartref.

- mewn ymateb i gais gan y Cynghorydd J.A. Davies, cadarnhawyd y gallai Cyngor Sir Ddinbych bwysleisio pwysigrwydd darparu ysbyty newydd yn y Rhyl pan yw’n cyflwyno’r achos busnes ffurfiol i Lywodraeth Cymru. Pwysleisiodd y Cynghorydd R.M. Murray bwysigrwydd sicrhau bod unrhyw strwythur newydd a gyflwynir yn llwyddiannus cyn cael gwared ar y gwasanaethau presennol. 

Esboniodd y Cynghorydd Feeley bod Bwrdd Iechyd Prifysgol Betsi Cadwaladr wedi pwysleisio nad oedd y newidiadau arfaethedig wedi eu llywio na’u llywodraethu gan ystyriaethau ariannol yn unig, ond gan y newid cynyddol mewn demograffeg, adeiladau’n anaddas i’w pwrpas a’r problemau yn ceisio denu’r staff clinigol uchaf ar gyfer meysydd meddygaeth penodol. Rhoddwyd cadarnhad bod mwyafrif y meddygon lleol yn cefnogi’r newidiadau arfaethedig yn y gwasanaethau.

Gofynnodd yr Aelodau i’r Cyfarwyddwr Corfforaethol: Moderneiddio a Lles gyfleu eu gwerthfawrogiad i’r staff am eu gwaith caled. 

PENDERFYNWYD – bod y Cyngor yn cytuno ar yr ymateb i’r ymgynghoriad, wedi’i gynnwys yn Atodiad 1 i’r adroddiad, i’w gyflwyno i Fwrdd Iechyd Prifysgol Betsi Cadwaladr.