Eitem ar yr agenda
ADOLYGU TAIR TRWYDDED I YRRU CERBYDAU HACNI A CHERBYDAU HUR PREIFAT
Ystyried adroddiad cyfrinachol gan Bennaeth y Gwasanaethau
Cynllunio, Adfywio a Rheoleiddio (copi’n amgaeëdig) yn gofyn i’r aelodau
adolygu tair trwydded i yrru cerbydau hacni a cherbydau hur preifat am fethu â
chydymffurfio â gofynion y Cyngor i sefyll prawf gwybodaeth gyrwyr yn
llwyddiannus.
Cofnodion:
[Cafodd yr eitem hon ei symud ymlaen ar y
rhaglen gyda chaniatâd y Cadeirydd]
Cyflwynodd y Swyddog Trwyddedu (JT) adroddiad
cyfrinachol gan Bennaeth y Gwasanaethau Cynllunio, Adfywio a Rheoleiddio (a
ddosbarthwyd ymlaen llaw) yn gofyn i’r aelodau ystyried addasrwydd tri Gyrrwr,
rhifau 040298, 040448 a 040740 (adroddiadau unigol cyfatebol yn Atodiad 1 – 3
yn eu tro i’r prif adroddiad) i barhau fel gyrwyr trwyddedig ar ôl iddynt fethu
â chydymffurfio â gofyniad y Cyngor i ymgymryd â phrawf gwybodaeth gyrwyr y
Cyngor o fewn yr amserlen a bennwyd.
Ystyriodd yr aelodau’r amgylchiadau unigol yn
ymwneud â phob Gyrrwr ar wahân, gan drin pob achos ar ei haeddiant fel a ganlyn
–
(1)
Gyrrwr rhif 040740 (Atodiad 3) – Dyddiad
Adnewyddu 31 Rhagfyr 2011
Anfonwyd 5 nodyn atgoffa at y Gyrrwr ers
dyddiad adnewyddu ei drwydded ond ni wnaeth unrhyw ymdrech i gysylltu â'r
swyddogion. Ar 6 Mehefin, hysbyswyd y Gyrrwr y byddai’r mater yn cael ei
gyfeirio at y Pwyllgor Trwyddedu er ystyriaeth.
Roedd y Gyrrwr yn bresennol i gefnogi ei achos
ac yn ystod ei gyflwyniad siaradodd yn erbyn y prawf a oedd yn ei farn ef yn
annigonol ac yn methu â chyflawni ei bwrpas o asesu’n ddigonol addasrwydd
unigolion i fod yn yrwyr trwyddedig. Dywedodd ymhellach, i gefnogi ei gais am
drwydded, iddo gyflwyno amrywiol dystysgrifau a thystlythrau a oedd, yn ei farn
ef, yn profi ei addasrwydd ar gyfer cyflogaeth o’r fath, gan fynd y tu hwnt i’r
prawf gwybodaeth gyrwyr. Aeth y Gyrrwr ymlaen i leisio nifer o gwynion
ynglŷn â’r hyn a welai fel diffyg gweithredu gan yr Adran Drwyddedu wrth
ddelio ag amrywiol bryderon a godwyd ganddo mewn perthynas â thrwyddedu tacsis.
Gofynnodd y Cadeirydd i’r Gyrrwr gyfyngu ei gyflwyniad i’r rhesymau pam nad
oedd wedi ymgymryd â'r prawf gwybodaeth yn llwyddiannus yn unol â’r gofynion.
Ailadroddodd y Gyrrwr ei farn bod y prawf yn annigonol ac nad oedd yn cyflawni
ei bwrpas.
Cymerodd yr aelodau’r cyfle i holi’r Gyrrwr
ynglŷn â’r achos a chadarnhawyd iddo fethu ag ymateb i unrhyw nodyn
atgoffa i sefyll y prawf gwybodaeth a anfonwyd gan yr Adran Drwyddedu.
Sefydlwyd, trwy beidio â sefyll y prawf ac wrth ymddangos gerbron y Pwyllgor
Trwyddedu, ei fod yn protestio yn erbyn yr hyn a gredai ef oedd yn diffyg
gweithredu gan yr Adran Drwyddedu o ran ymateb i’w bryderon a’i gwynion mewn perthynas
â thrwyddedu tacsis. Ailadroddodd y pwynt hwnnw eto wrth wneud ei ddatganiad
terfynol i’r pwyllgor. Ychwanegodd ei fod yn teimlo nad oedd wedi ei drin yn
deg gan yr Adran Drwyddedu yn ei drafodaethau gyda hwy, a’i fod wedi ei
aflonyddu gan Swyddogion Trwyddedu. Cadarnhaodd y Swyddog Trwyddedu (JT) ei bod
yn ymwybodol bod y Gyrrwr wedi codi pryderon ac ymholiadau gyda’r Adran
Drwyddedu, a bod y swyddogion wedi gwneud eu gorau i ddelio â hwy.
Ar y pwynt hwn, ymneilltuodd y pwyllgor i
ystyried y cais ac fe –
BENDERFYNWYD gohirio ystyried addasrwydd Gyrrwr rhif 040740 i roddi cyfle pellach
i’r Gyrrwr sefyll y prawf gwybodaeth. Byddai methiant ar ran y Gyrrwr i sefyll
y prawf gwybodaeth yn llwyddiannus erbyn cyfarfod nesaf y pwyllgor (5 Rhagfyr
2012) yn arwain at ddwyn y mater yn ôl gerbron y pwyllgor i’w benderfynu.
Y rhesymau
dros benderfyniad y Pwyllgor Trwyddedu oedd –
Tra’n cydnabod bod gan y Gyrrwr bwynt i’w wneud mewn perthynas â
materion trwyddedu, nid gwrthod sefyll y prawf gwybodaeth, a oedd yn berthnasol
i bob gyrrwr, oedd y ffordd i brotestio. Roedd angen i bob gyrrwr trwyddedig
sefyll y prawf ac ni ellid cael amgylchiadau eithriadol a fyddain rhwystro’r
Gyrrwr rhag sefyll y prawf. Aelodau’r busnes oedd wedi galw am y prawf ac roedd
yn rhan o’r gofynion i ddod yn yrrwr trwyddedig. Byddai methu â chwblhau’r
prawf yn llwyddiannus erbyn cyfarfod nesaf y Pwyllgor Trwyddedu ar 5 Rhagfyr
2012 yn arwain at y Pwyllgor yn rhoi ystyriaeth o ddifrif i ddirymu trwydded y
gyrrwr oherwydd bod yr Ymgeisydd wedi methu â dangos arddangos ei fod yn berson
addas a phriodol i ddal trwydded.
Cyflwynodd y Cadeirydd benderfyniad y
pwyllgor a’r rhesymau dros y penderfyniad hwnnw i’r Gyrrwr.
(2)
Gyrrwr rhif 040298 (Atodiad 1) –
Dyddiad Adnewyddu 31 Awst 2011
Anfonwyd chwe nodyn atgoffa at y Gyrrwr ers
amser adnewyddu ei drwydded ac ar 6 Mehefin 2012 cafodd ei hysbysu y byddai’r
mater yn cael ei gyfeirio at y Pwyllgor Trwyddedu. Ar ôl cais aflwyddiannus gan
y Gyrrwr i basio’r prawf gwybodaeth, roedd y Swyddog Trwyddedu (JT) yn falch o
adrodd bod y Gyrrwr ers hynny wedi ail-sefyll y prawf yn llwyddiannus.
PENDERFYNWYD cydnabod cwblhad llwyddiannus y prawf gwybodaeth i yrwyr gan yrrwr
rhif 040298 a pheidio â chymryd unrhyw gamau pellach.
Y rhesymau
dros benderfyniad y Pwyllgor Trwyddedu oedd –
Roedd y Gyrrwr nawr wedi cydymffurfio â
gofyniad y Cyngor i ymgymryd â phrawf gwybodaeth gyrwyr yn llwyddiannus ac
felly ystyriwyd nad oedd angen cymryd camau pellach.
(3)
Gyrrwr rhif 040298 (Atodiad 2) –
Dyddiad Adnewyddu 31 Awst 2012
Anfonwyd chwe nodyn atogffa at y Gyrrwr ers
dyddiad adnewyddu ei drwydded ond ni wnaeth unrhyw ymgais i gysylltu â
swyddogion. Ar 6 Mehefin 2012 hysbyswyd y Gyrrwr y byddai’r mater yn cael ei
gyfeirio at y Pwyllgor Trwyddedu i’w ystyried. Ni chafwyd unrhyw ymateb gan yr
ymgeisydd ac nid oedd yn bresennol yn y cyfarfod.
Ar y pwynt hwn, ymneilltuodd y pwyllgor i
ystyried yr achos ac fe –
BENDERFYNWYD atal trwydded Gyrrwr rhif 040448 nes bydd wedi cwblhau’r prawf
gwybodaeth gyrwyr yn llwyddiannus. Byddai methiant gan y Gyrrwr i sefyll y
prawf yn llwyddiannus erbyn cyfarfod nesaf y pwyllgor (5 Rhagfyr 2012) yn
arwain at ddod â’r mater yn ôl gerbron y pwyllgor i’w benderfynu. Byddai
cwblhau’r prawf yn llwyddiannus o fewn y cyfnod atal yn arwain at ddileu’r
ataliad.
Y rhesymau
dros benderfyniad y Pwyllgor Trwyddedu oedd –
Ystyriai’r pwyllgor bod y Gyrrwr wedi cael
digon o gyfle i sefyll prawf gwybodaeth gyrwyr a’i fod wedi dangos amarch tuag
at y pwyllgor trwy fethu â mynychu’r cyfarfod i gyflwyno ei achos. Felly
ystyriodd y pwyllgor ei bod yn briodol atal trwydded y Gyrrwr nes byddai wedi
llwyddo yn y prawf gwybodaeth. Byddai methiant ar ran y Gyrrwr i sefyll y prawf
yn llwyddiannus yn arwain at ddwyn y mater yn ôl gerbron cyfarfod nesaf y
pwyllgor pan roddid ystyriaeth o ddifrif i ddirymu ei drwydded oherwydd nad
oedd yn berson addas a phriodol i ddal trwydded.
Dogfennau ategol:
- Restricted enclosure Gweler y rhesymau pam fod dogfen 5./1 yn gyfyngedig
- Restricted enclosure Gweler y rhesymau pam fod dogfen 5./2 yn gyfyngedig
- Restricted enclosure Gweler y rhesymau pam fod dogfen 5./3 yn gyfyngedig
- Restricted enclosure Gweler y rhesymau pam fod dogfen 5./4 yn gyfyngedig