Eitem ar yr agenda
ADRODDIAD CYNNYDD ARCHWILIO MEWNOL
Ystyried adroddiad
gan y Pennaeth Archwilio Mewnol (copi’n amgaeëdig) sy’n rhoi diweddariad
ar gynnydd diweddaraf y gwasanaeth Arhwilio Mewnol o ran cyflwyno gwasanaeth, rhoi sicrhad, adolygiadau
a gwblhawyd, perfformiad ac
effeithiolrwydd o ran hyrwyddo
gwelliannau.
9.50am – 10.05am
Cofnodion:
Cyflwynodd Pennaeth
y Gwasanaethau Archwilio Mewnol (PGAM) adroddiad (a gylchredwyd yn flaenorol) i
ddiweddaru aelodau ar gynnydd diweddaraf y Gwasanaeth Archwilio Mewnol o ran
cyflenwi gwasanaeth, darparu sicrwydd, adolygiadau a gwblhawyd, perfformiad ac effeithiolrwydd
gyda gyrru gwelliant.
Fe amlygodd y
Pennaeth Gwasanaethau Archwilio Mewnol rannau arbennig o’r adroddiad fel a
ganlyn –
- cynnydd gyda chyflenwi’r Strategaeth
Archwilio Mewnol ar gyfer 2012/13
- adroddiadau archwilio mewnol diweddar a
gyhoeddwyd ynglŷn ag Ysgol Dinas Brân, Llangollen a Darpariaeth Dysgu
Cymunedol Oedolion – Llywodraeth Cymru 2011 – 12
- ymateb rheolaeth i faterion a godwyd
gan Archwilio Mewnol
- Perfformiad Archwilio Mewnol a mesurau
allweddol.
Nododd Aelodau’r
cynnydd da a wnaethpwyd yn erbyn y Strategaeth Archwilio mewnol a’r angen i
adolygu’r Strategaeth fel y bo’n briodol er mwyn adlewyrchu blaenoriaethau
cyfnewidiol y Cyngor. Roedd y pwyllgor
yn falch hefyd o nodi’r ddau adroddiad archwilio positif a dderbyniwyd ers eu
cyfarfod diwethaf yn dangos cyfraddiad sicrwydd uchel. Cyfeiriodd Pennaeth y Gwasanaethau Archwilio
Mewnol at nifer o adroddiadau archwilio a oedd yn agos at eu cwblhau ac a
fyddid yn cael eu cylchredeg i aelodau’r pwyllgor yn fuan. O ran ymateb rheolaeth i faterion a godwyd
gan Archwilio Mewnol nid oedd yna unrhyw gamau’n dal ar ôl ar hyn o bryd nac
wedi mynd dros y terfyn amser o dri mis ac roedd y system yn gweithio’n
dda. I gloi cyfeiriwyd at y mesurau
allweddol a oedd ar y targed i’w cwblhau.
Yn ystod ystyriaeth
o’r adroddiad fe eglurodd Pennaeth y Gwasanaethau Archwilio Mewnol faterion
penodedig mewn ymateb i gwestiynau aelodau arnyn nhw, yn enwedig o ran statws a
chylch gwaith gwahanol aseiniadau archwilio.
Fe drafododd y pwyllgor hefyd nifer o faterion penodol efo Pennaeth y
Gwasanaethau Archwilio Mewnol fel a ganlyn -
- fe ystyriodd aelodau’r chwe risg uchel
yn y Gofrestr Risgiau Corfforaethol ac fe adroddodd PGAM ar gynnydd y
gwaith yn y meysydd unigol hynny. Fe
atgoffaodd aelodau y byddai’r Gofrestr yn cael ei diweddaru’n rheolaidd a
byddai Archwilio Mewnol yn asesu a oedd y risgiau’n cael eu rheoli’n
gadarn ac yn cael sylw. Trafodwyd y
ddau risg canlynol yn fanylach –
-
y risg
nad oedd seilwaith TGCh strategol yn galluogi gwelliant ac yn cynorthwyo newid
-roedd Swyddfa Archwilio Cymru wedi gwneud peth gwaith ar y Strategaeth TGCh a
fyddai’n lleihau swm y gwaith a fyddai’n ofynnol gan y Gwasanaethau Archwilio
Mewnol
-
y risg
fod yr amser a’r ymdrech a fuddsoddwyd mewn cydweithio’n anghymesur â’r
manteision a wireddwyd - fe amlygodd aelodau bwysigrwydd y darn yma o waith a
phryderon fod rhai meysydd cychwynnol o gydweithio wedi dod i ben, a’r angen i
sicrhau fod cydweithio’n berthnasol ac yn briodol. Esboniodd
PGAM fod gwaith Archwilio Mewnol yn cael ei gynllunio fel rheol dri mis
ymlaen llaw heb unrhyw ddyddiad dechrau wedi ei ddyrannu ar gyfer yr archwiliad
hwn hyd yma. Roedd yn ymwybodol fod rhai
gwasanaethau wedi cynnal hunanasesiadau ar weithio cydweithredol y gellid eu
defnyddio. Esboniwyd bod y prosiectau
cydweithredol cynharach wedi eu dechrau heb y prosesau cadarn a oedd wedi eu
cyflwyno ers hynny dan y Fframwaith Partneriaeth. Roedd
achos busnes ac asesiad gan y Bwrdd Cydweithredol yn ofynnol ar gyfer
prosiectau newydd. Ychwanegodd
Cynrychiolydd Swyddfa Archwilio Cymru (AV) ei bod yn bwysig sicrhau eglurder a
mapio prosesau ar gyfer trefniadau partneriaeth a’r ffordd yr oedden nhw’n cael
eu rheoli.
- O ran Cludiant o’r Cartref i’r Ysgol
(gwasanaeth cydweithredol rhwng Sir Ddinbych a Chonwy) esboniodd y PGAM y
gofynnwyd i Archwilio Mewnol edrych ar y gwasanaeth efo Tîm Archwilio
Conwy oherwydd materion ariannol a nodwyd yng Nghonwy. Fe sicrhaodd y pwyllgor fod gwasanaeth
Cludiant Cartref i’r Ysgol Sir Ddinbych yn dda a bod unrhyw broblemau a
nodwyd yn rhai yn ardal Conwy. Mewn
ymateb i gwestiynau
cadarnhaodd PGAM na fyddai unrhyw
anawsterau ariannol a brofwyd gan Gonwy’n effeithio ar Sir Ddinbych ac y
byddai’r adroddiad archwilio terfynol ar gael yn gyhoeddus. Nodwyd y cafwyd peth cyhoeddusrwydd
negyddol ynglŷn â gwasanaeth Conwy a mynegwyd pryderon y gallai enw
da Sir Ddinbych ddioddef drwy gysylltiad unwaith y cyhoeddid yr adroddiad. Er mwyn lliniaru’r potensial o
gyhoeddusrwydd negyddol awgrymwyd y gallai datganiad i’r wasg neu ddull
tebyg fod yn ddefnyddiol a bod papur briffio i’w roi i aelodau. Awgrymwyd hefyd y dylid ystyried
perfformiad gwasanaeth pan fyddid yn asesu rhinweddau cydweithredu. Cytunodd
PGAM i godi rheolaeth y materion hynny’n uniongyrchol â'r Pennaeth
Priffyrdd a Seilwaith ar y Cyd a chyfeiriodd at y bwriad o gyflwyno
adroddiad archwilio terfynol i Bwyllgor Archwilio Conwy ar Fedi 25. Felly cytunodd aelodau y byddai’n
amserol i’r pwyllgor hwn ystyried yr adroddiad yn eu cyfarfod ar Fedi 26.
- Cyfeiriwyd at effaith y diwygio lles ar
y sir a chadarnhaodd y Rheolwr Archwilio fod gwaith wedi ei wneud yn
Refeniw a Budd-daliadau ynglŷn â hynny. Roedd Penaethiaid Refeniw a
Budd-daliadau a Chyllid ac Asedau wedi bod mewn cyfarfodydd y Grwpiau
Aelodau Ardal i rannu gwybodaeth ystadegol ac i drafod yr effaith ar bob
ardal. Roedd gwybodaeth felly ar
gael i’r holl aelodau.
I gloi
dywedodd PGAM y dylid dwyn unrhyw
faterion y dymunai aelodau eu codi i sylw Archwilio Mewnol neu’r maes gwasanaeth
perthnasol i ymchwilio iddyn nhw yn y lle cyntaf.
PENDERFYNWYD –
(a) yn
amodol ar sylwadau’r aelodau uchod, derbyn a nodi’r adroddiad ar gynnydd y
Gwasanaeth Archwilio Mewnol
(b) cyflwyno’r adroddiad archwilio terfynol ar y gwasanaeth Cludiant o’r
Cartref i’r Ysgol i gyfarfod nesaf y pwyllgor ar Fedi 26, 2012.
Dogfennau ategol:
- CorpGov 050912 Internal Audit Progress 2012-13 - Sept 2012 Report-W, Eitem 6. PDF 129 KB
- Corp Gov 050912 Internal Audit Progress 2012-13 - Sept 2012 App 1, Eitem 6. PDF 204 KB