Eitem ar yr agenda
ADRODDIAD O DDIWEDDARIAD ARIANNOL
Ystyried adroddiad gan y Cynghorydd Julian Thompson-Hill,
Aelod Arweiniol Cyllid ac Asedau (copi’n amageedig) yn manylu’r sefyllfa
ariannol ddiweddaraf a’r cynnydd mewn perthynas â’r strategaeth gyllidebol a
gytunwyd.
Cofnodion:
Cyflwynodd y Cynghorydd J.
Thompson Hill yr adroddiad i’r Cabinet a oedd yn amlinellu cyllideb refeniw y
Cyngor a’i arbedion ar gyfer 2012/13. Rhoddodd grynodeb fanwl o’r adroddiad a oedd
yn cynnwys y Cynllun Cyfalaf, y Cyfrif
Refeniw Tai, a’r Cynllun Cyfalaf Tai, nododd beth oedd ffurf y cyllidebau a
nododd hefyd y strwythur adrodd nôl i’r flwyddyn sydd i ddod. Cadarnhaodd nad
oedd ar hyn o bryd unrhyw wyriadau sylweddol o’r strategaeth gyllideb y
cytunwyd arni ar gyfer 2012/13 fel y’i diffiniwyd yn y Cynllun Ariannol Tymor
Canolig, y Cynllun Cyfalaf a Chynllun Busnes y Stoc Tai.
Mae’r
rhagolygon mwyaf diweddar o’r gyllideb refeniw, Atodiad 1, yn dangos gorwariant
bach ar draws holl wasanaethau, gan gynnwys ysgolion a chyllidebau
corfforaethol. Roedd hefyd yn cynnwys crynodeb o’r Cyfrif Refeniw er
gwybodaeth; fodd bynnag, dyma gronfa ar wahân nad yw’n rhan o gyllideb
refeniw'r Cyngor. Mae Atodiad 2 yn rhoi diweddariad yn dangos cynnydd yn erbyn
yr arbedion a’r pwysau y cytunwyd arnynt fel rhan o’r broses gosod y gyllideb.
Cytunwyd ar gyfanswm arbedion net o £3.443m ac roedd £1.774m wedi’i gyflawni
gyda £1.669m ar y gweill. Roedd yr adroddiad yn tynnu sylw at amrywiannau
allweddol o’r gyllideb neu dargedau arbedion, risgiau neu arbedion potensial
ychwanegol allai godi drwy’r flwyddyn, ac yn darparu diweddariad mwy
cyffredinol ar y Cynllun Cyfalaf a’r Cyfrif Refeniw Tai.
Roedd
yr adroddiad yn amlinellu’r sefyllfa o ran y Gyllideb
Refeniw a rhoddodd y swyddogion grynodeb mewn perthynas â’r canlynol: Cyfathrebu,
Marchnata a Hamdden, Gwasanaethau Cynllunio, Adfywio a Rheoleiddio,
Gwasanaethau Oedolion, Gwasanaethau’r Amgylchedd, cyllidebau Moderneiddio
Addysg a Gofal
Cwsmeriaid ac Ysgolion. O ran y Cynllun Cyfalaf, roedd yr alldro oedd wedi'i
amcangyfrif yn £3.8m ar ddiwedd Gorffennaf yn erbyn Cynllun y
cytunwyd arno o £37.3m. Roedd atodiad 3
yn crynhoi’r cynllun presennol, a sut ddylid ei ariannu, ac roedd Atodiad 4 yn
darparu trosolwg o brosiectau cyfalaf mawr.
Cyfeiriwyd yn arbennig at Gyfathrebu, Marchnata a Hamdden ac esboniwyd bod
y gyllideb i Ganolfan Plant Integredig Rhyl, Canolfan Oaktree wedi bod dan bwysau ar ôl colli £80k o arian grant. Er bod y
gwasanaeth yn gweithredu i leihau gorwariant, roedd yn debygol y byddai’r
cyfleuster yn gorwario o £40k a chytunwyd y byddai hyn yn cael ei ariannu’n
gorfforaethol y flwyddyn ariannol hon.
Byddai pwysau ar flynyddoedd i’r dyfodol yn cael sylw yn y broses herio
gwasanaeth a gosod y gyllideb.
Roedd
rhagolygon diweddaraf y Cyfrif Refeniw Tai a’r Cynllun Cyfalaf Tai wedi’u
crynhoi yn yr adroddiad, ynghyd â’r Sylwebaeth Economaidd a Diweddariad
Rheolaeth y Trysorlys. Esboniwyd y
byddai hwn yn gyfnod ariannol heriol i’r Cyngor, ac y byddai methu â chyflawni
strategaeth y gyllideb y cytunwyd arni yn rhoi pwysau pellach ar wasanaethau yn
y flwyddyn ariannol hon ac yn y dyfodol. Hysbyswyd aelodau y byddai monitro a
rheoli cyllideb effeithiol ynghyd ag adrodd yn fuan ar unrhyw amrywiannau yn
helpu sicrhau bod y strategaeth ariannol yn cael ei gwireddu.
Cyfeiriodd
y Cynghorydd Feeley at elfen ariannu prosiectau Harbwr y Foryd ac Amddiffyn
Arfordir Rhyl a’r angen posibl i
ddefnyddio arian wrth gefn. Esboniodd y Cynghorydd Thompson-Hill bod elfennau
risg fel arfer yn fwy amlwg yn ystod camau cynnar prosiectau o’r fath, ac y
byddent yn lleihau’n sylweddol wrth i’r gwaith fynd rhagddo. Esboniodd y Prif
Weithredwr y byddai adroddiad diweddaru yn cael ei gyflwyno i’r Bwrdd Prosiect
yn ddiweddarach yn y dydd.
Mewn ymateb i bryderon a godwyd gan y Cynghorydd D.I. Smith ynghylch sefyllfa’r Honey Club,
a’r diffyg cynnydd mewn perthynas â’r cais a gyflwynwyd i Lywodraeth Cymru am
ganiatâd ardal gadwraeth i ddymchwel yr adeilad, a oedd bellach mewn cyflwr
ansefydlog ac o bosibl yn anniogel. Amlinellwyd manylion o’r opsiynau a’r
canlyniadau amrywiol, a chadarnhawyd y byddai’n drosedd dymchwel yr adeilad heb
ganiatad priodol. Fodd bynnag, roedd holl gamau posibl wedi’u cymryd i
liniaru’r holl risgiau, ac roedd ceisiadau pellach wedi’u cyflwyno i Lywodraeth
Cymru yn gofyn am y caniatâd priodol i ddymchwel yr adeilad. Cytunodd Aelodau y dylid cyflwyno adroddiad gwybodaeth yn amlinellu’r
cynnydd mewn perthynas â’r Honey Club i’r Cabinet.
Mewn ymateb i gwestiynau
gan yr Arweinydd, rhoddodd y Pennaeth
Cyllid ac Asedau fanylion o’r amserlenni a’r agenda dan sylw i ymdrin â
materion yn ymwneud â’r Cynllun Cyfalaf, a’r arbedion potensial o’r Rhaglen
Gydweithio.
Yn dilyn trafodaeth bellach:-
PENDERFYNWYD – bod y Cabinet:-
(a)
yn nodi’r cyllidebau a’r targedau arbedion
i’r flwyddyn a’r cynnydd a wnaed yn erbyn strategaeth y gyllideb y cytunwyd
arni, ac
(b)
yn derbyn adroddiad gwybodaeth ar y
sefyllfa a’r cynnydd mewn perthynas â’r
Honey Club.
Dogfennau ategol:
- Finance Update Report, Eitem 5. PDF 305 KB
- Finance Update App 1, Eitem 5. PDF 25 KB
- Finance Update App 2, Eitem 5. PDF 15 KB
- Finance Update App 3, Eitem 5. PDF 7 KB
- Finance Update App 4, Eitem 5. PDF 205 KB