Eitem ar yr agenda

Ystyried adroddiad gan Reolwr y Bartneriaeth Diogelwch Cymunedol (copi ynghlwm), sy’n manylu ar gyflawniad y Bartneriaeth o ran cyflawni ei chynllun gweithredu ar gyfer 2021/22 a’i chynnydd hyd yma o ran cyflawni ei chynllun gweithredu ar gyfer 2022/23.  

 

Cyflwynodd yr Aelod Arweiniol Tai a Chymunedau yr adroddiad (dosbarthwyd ymlaen llaw). Atgoffodd y Pwyllgor mai dyma adroddiad blynyddol y Bartneriaeth Diogelwch Cymunedol - mis Ebrill 2021 i fis Mawrth 2022. 

 

Eglurodd y Pennaeth Gwella Busnes a Moderneiddio bod Diogelwch Cymunedol yn cael ei reoli o fewn y gwasanaeth Gwella Busnes a Moderneiddio, ond eu bod yn gweithio’n agos â nifer o adrannau eraill, gan gynnwys Gwasanaethau Ieuenctid, Cynllunio a Gwarchod y Cyhoedd a Diogelu ac ati. 

 

Roedd cynllun gweithredu Partneriaeth Diogelwch Cymunedol Conwy a Sir Ddinbych yn rhan o gynllun rhanbarthol a ddatblygwyd ar draws Gogledd Cymru, dan arweiniad Comisiynydd yr Heddlu a Throsedd. Lluniwyd cynllun ar sail dadansoddiadau blynyddol. Yn lleol, roedd y cynllun yn cael ei reoli gan Bartneriaeth Diogelwch Cymunedol Conwy a Sir Ddinbych.

 

Cyfeiriodd y Rheolwr Diogelwch Cymunedol at yr Adroddiad Cryno Perfformiad (atodiad 1), gan amlygu:

 

Blaenoriaeth 1: Lleihau Trosedd ac Anrhefn yn Sir Ddinbych trwy weithio mewn Partneriaeth - roedd y statws perfformiad ar ddiwedd 2021/22 yn dderbyniol;

Blaenoriaeth 2: Lleihau aildroseddu - roedd y statws perfformiad ar ddiwedd 2021/22 yn dderbyniol; a

Blaenoriaeth 3: Blaenoriaethau Lleol – roedd y statws perfformiad ar ddiwedd 2021/22 yn dda.

 

Gwelwyd newid ers y cyfnod adrodd blaenorol yn sgil y cynnydd mewn troseddu ieuenctid a cham-drin/stelcian domestig.

 

Roedd Blaenoriaeth 1 yn ymwneud â chydweithio â phartneriaid e.e. Awdurdod Gwasanaethau Tân ac Achub Gogledd Cymru, yr Heddlu, Gwasanaethau Prawf, Iechyd, gyda’r nod o:

 

·       Lleihau troseddau sy’n seiliedig ar y dioddefwr;

·       Lleihau Ymddygiad Gwrthgymdeithasol;  

·       Lleihau cam–drin domestig a thrais rhywiol a

·       gweithio gyda chydweithwyr ar gynadleddau ac asesiadau risg aml asiantaeth i reoli troseddwyr ailadroddus.

 

Blaenoriaeth 2 – y nod oedd lleihau aildroseddu trwy weithio gyda’r:

·       Gwasanaeth Prawf (oedolion yn aildroseddu);

·                                 Gwasanaeth Plant a Phobl Ifanc / Gwasanaethau Ieuenctid; a

·       chydweithio i atal troseddau cyfundrefnol.

 

Blaenoriaeth 3 - Tynnwyd sylw at flaenoriaethau Lleol a Rhanbarthol yn aml gan aelodau etholedig neu Heddlu Gogledd Cymru, wrth iddynt dderbyn nifer o alwadau e.e. yn ymwneud ag eiddo trwyddedig, ymddygiad gwrthgymdeithasol ac ati.

 

Blaenoriaeth 1 – Lleihau Trosedd ac Anrhefn yn Sir Ddinbych trwy weithio mewn Partneriaeth.

 

Yn gyffredinol, roedd perfformiad y Bartneriaeth yn dderbyniol  oherwydd y cynnydd parhaus yn y nifer o ddioddefwyr cam-drin, stelcian ac aflonyddu domestig a adroddodd am ddigwyddiadau o’r fath. Er bod y cynnydd canrannol yn ymddangos yn uchel, roedd yr union niferoedd yn isel. Roedd enghreifftiau o weithio mewn partneriaeth ar gyfer ymdrin â’r flaenoriaeth hon yn cynnwys ymgymryd â’r mesurau canlynol:

 

·       Codi ymwybyddiaeth am droseddau sy’n seiliedig ar y dioddefwr trwy’r cyfryngau cymdeithasol, mynychu digwyddiadau a sicrhau bod gwybodaeth ar gael ar wefannau partner.

·       Arolygon cartref a busnes a gynhelir gan gynghorwyr lleihau trosedd a Swyddogion Cymorth Cymunedol yr Heddlu er mwyn helpu atal lladradau.

·       Darparu offer gwella diogelwch a chyngor atal trosedd (Cloeon/barrau drysau ac ati).

·       Cymryd rhan yng nghyfarfodydd Cynhadledd misol Asesiad Risg Amlasiantaeth, gan adolygu achosion dioddefwyr cam-drin domestig a gweithredu cynlluniau gweithredu.

·       Anfonodd Sir Ddinbych nifer o ddatganiadau i’r wasg ynghylch cam-drin domestig trwy gydol y flwyddyn a newidiwyd lliw Pont y Ddraig i ddynodi cefnogaeth yr Awdurdod Lleol ar gyfer Diwrnod y Rhuban Gwyn ar 25 Tachwedd 2021. Cynhaliwyd gwylnos gyda phartneriaid yn yr arena ddigwyddiadau yn y Rhyl i ddangos cefnogaeth o ran atal trais. 

·       Hyrwyddwyd llinell gymorth Byw Heb Ofn Cymru Gyfan, a dderbyniodd 192 galwad gan breswylwyr Sir Ddinbych. 

 

Roedd cyfarfodydd gweithgarwch prosiect gydag asiantaethau partner yn trafod:

·       Caethwasiaeth Fodern;

·       Llinellau Sirol;

·       Rheoli Troseddwyr Integredig;

·       Cam-Drin Domestig; ac 

·       Ymgyrchoedd Drinkaware.

 

Blaenoriaeth 2 – Lleihau achosion o aildroseddu.

 

Gwelwyd gostyngiad mewn pobl dros 18 oed yn troseddu, ond cynnydd o ran pobl ifanc. Bu i’r bartneriaeth ganolbwyntio ar:

 

·       Gymryd rhan mewn rhaglenni rheoli troseddwyr lleol;

·       Hyrwyddo datrysiadau cymunedol a chyfiawnder adferol wrth ddatrys mân broblemau;

·       Mynychu cynadleddau cyfiawnder adferol fel cyfaill beirniadol;

·       Nodi ymddygiad gwrthgymdeithasol ailadroddus; a

·       Sefydlu fforwm pwrpasol yn y Rhyl i ganolbwyntio’n benodol ar drosedd ac anrhefn.

 

Blaenoriaeth 3 – Blaenoriaethau Lleol

 

Roedd statws perfformiad cyffredinol y flaenoriaeth yn dda. Roedd y bartneriaeth wedi:

 

·       Sefydlu grwpiau amlasiantaeth lleol yn Sir Ddinbych i reoli digwyddiadau ailadroddus o Ymddygiad Gwrthgymdeithasol;

·       Hyrwyddo’r defnydd o ddatrysiadau cymunedol i ddatrys digwyddiadau ailadroddus o ymddygiad gwrthgymdeithasol;

·       Gweithredu hysbysiadau amddiffyn cymunedol / Gorchmynion Gwarchod Mannau Cyhoeddus; 

·       Eiddo trwyddedig a reolir a thrwyddedau tacsi a gaiff eu gorfodi / monitro;

·       Parhau â gweithrediadau (Mawrth 2022) o dargedu golchi ceir o dan gynlluniau gweithredu caethwasiaeth fodern;

·       Monitro tensiwn cymunedol, protestiadau/gwylnosau - gan gynnwys trosedd casineb gyda chymorth y tîm Cydlyniant rhanbarthol.

·       Gwneud cais am ragor o gyllid trydydd sector ar gyfer gwasanaethau cam-drin domestig ychwanegol yn lleol.

 

Yn gorfforaethol, cyhoeddodd Sir Ddinbych gyfathrebiadau mewnol ac allanol yn ymwneud â hyfforddiant ac ymyrraeth gynnar, gan ganmol gwaith y Bwrdd Diamddiffynedd Rhanbarthol a’r tîm cam-drin domestig rhanbarthol.

 

Gweithredwyd mwy o weithgarwch heddlu o ran economi’r nos -- gan edrych yn benodol ar drais yn erbyn merched a genethod. Roedd y cynllun ‘Gofynnwch am Angela’ ar waith mewn tafarndai yn Sir Ddinbych.

 

Derbyniwyd grant o £5000 grant ar gyfer cyhoeddi nwyddau’r ymgyrch Byw Heb Ofn – balm gwefus, hylif diheintio dwylo a beiros gyda rhif ffôn y llinell gymorth arnynt - wedi’u lleoli’n strategol – ar gyfer y rhai sydd angen cymorth i gael mynediad ato.

 

Dadansoddi Ystadegau Troseddu

 

O’r 13 categori adrodd Trosedd a digwyddiad sy’n ymwneud â Sir Ddinbych, cofnodwyd 7 fel yr uchaf ar gyfer y Flwyddyn hyd Yma, o’u cymharu â’r ffigyrau cyn Covid. Roedd y ffigyrau’n cyd-fynd â’r rhai disgwyliedig ac ni nodwyd unrhyw anghysondebau.

 

Aeth y Rheolwr Diogelwch Cymunedol ymlaen i egluro’r gwahanol gategorïau trosedd a oedd yn cael eu monitro. Fe’u cymharwyd â ffigyrau a gofnodwyd cyn Covid, gan fod y cyfnodau clo wedi effeithio ar y math o droseddau a gyflawnir. O’r herwydd, cafodd tueddiadau eu monitro yn hytrach na ffigyrau.

 

Yn arwyddocaol, gwelwyd cynnydd o flwyddyn i flwyddyn mewn Stelcian ac Aflonyddu. Fe ychwanegwyd Ymddygiad Cymhellol a Rheolaethol at y categori hwnnw, a arweiniodd at gynnydd yn y niferoedd a gofnodwyd.

 

Gwelwyd cynnydd cenedlaethol mewn ymddygiad gwrthgymdeithasol yn ymwneud â phobl ifanc. Roedd y partneriaethau’n gweithio’n agos gyda’r Gwasanaethau Ieuenctid i ganfod yr achos craidd mewn cymunedau lle’r oedd problemau. Roedd cyfarfodydd amlasiantaeth – yn cynnwys aelodau lleol – yn cael eu cynnal er mwyn nodi a datrys problemau.

 

Gan ymateb i gwestiynau’r Pwyllgor, dywedodd y Rheolwr Diogelwch Cymunedol bod:

·       Y manteision o weithio mewn partneriaeth yn cynnwys rhannu adnoddau, cydgyfrifoldebau, cymhwysedd ar gyfer arian grant ac osgoi dyblygu gwaith.

·       Cafwyd ymateb cadarnhaol mewn perthynas ag ymgyrch ‘Gofynnwch i Angela’. Gofynnir i’r Tîm Trwyddedu a oes unrhyw ystadegau ar gael.

·       Cymharwyd ystadegau â ffigyrau rhanbarthol a chenedlaethol er mwyn nodi tueddiadau.

·       Nid oedd sgamiau / twyll ar-lein yn rhan o gategori ystadegau trosedd yr adroddiad – er eu bod nhw’n flaenoriaethau rhanbarthol i’w hystyried gan Gomisiynydd yr Heddlu a Throsedd – byddai ffigyrau ar gael gan fod y Gwasanaeth Safonau Masnach yn gyfrifol am gofnodi ac ymchwilio i ddigwyddiadau honedig o sgamiau a thwyll ar-lein.

·       Yn ogystal â’r adroddiad blynyddol, darparwyd diweddariadau i’r Uwch Dîm Arweinyddiaeth a’r Aelod Arweiniol ar sail chwarterol.

·       Cyflwynwyd y broses o Fonitro Protestiadau/Gwylnosau yn ystod Covid, ond fe’u defnyddir eto ar gyfer monitro  unrhyw densiynau cymunedol.

·       Roedd gwasanaethau’r 3ydd Sector yn rhan hanfodol o’r bartneriaeth wrth weithio gyda phobl ifanc. Darparodd yr Hwb yn Sir Ddinbych a Phrosiect Pobl Ifanc Gorllewin y Rhyl gymorth ac ymgysylltiad gwerthfawr yn sgil digwyddiadau o ymddygiad gwrthgymdeithasol diweddar gyda’r Prosiect Strydoedd Mwy Diogel a

·       Gellid gwahodd Prif Arolygydd Heddlu Gogledd Cymru Sir Ddinbych i gyfarfod y Pwyllgor, y tro nesaf y cyflwynir adroddiad blynyddol y Bartneriaeth Diogelwch Cymunedol.

 

Dywedodd y Pennaeth Gwella Busnes a Moderneiddio Dros Dro bod fforwm Grŵp Diogelwch Cymunedol y Rhyl (a oedd yn cynnwys aelodau lleol) wedi’i sefydlu er mwyn mynd i’r afael â’r nifer o broblemau o ran ymddygiad gwrthgymdeithasol.   Cynhelir y cyfarfod nesaf ym mis Ionawr 2023.

 

Diolchodd yr Aelod Arweiniol Tai a Chymunedau i’r Rheolwr Diogelwch Cymunedol am ei brwdfrydedd a’i hymrwymiad yn y swydd, adleisiwyd hyn gan y Cadeirydd ac aelodau’r Pwyllgor.

 

 

 

 

Ar ddiwedd trafodaeth fanwl:

 

Penderfynodd y Pwyllgor: yn amodol ar y sylwadau uchod –

 

(i)    dderbyn diweddariad perfformiad ac ystadegol Partneriaeth Diogelwch Cymunedol Conwy a Sir Ddinbych ar gyfer 2021/22;

(ii)  cefnogi’r blaenoriaethau a nodwyd gan y Bartneriaeth Diogelwch Cymunedol i’w cyflawni yn ystod 2022/23; ac

(iii)                    â’r bwriad o hwyluso craffu  darpariaeth gweithgarwch diogelwch cymunedol yn yr ardal yn effeithiol, a gwahodd Prif Arolygydd Heddlu Gogledd Cymru Sir Ddinbych i gyfarfod y Pwyllgor ym mis Medi 2023, i gyflwyno Adroddiad Blynyddol y Bartneriaeth Diogelwch Cymunedol ar gyfer 2022/23.