Eitem ar yr agenda
DARPARU CONTRACT GWASANAETHAU GORFODAETH AMGYLCHEDDOL
Ystyried adroddiad gan Bennaeth Dros Dro Priffyrdd, a Gwasanaethau Amgylcheddol (copi ynghlwm) sy’n darparu gwybodaeth ac yn gofyn am sylwadau’r aelodau ynglŷn â’r statws presennol a chyfeiriad arfaethedig gwasanaethau gorfodi amgylcheddol ar draws y sir yn y dyfodol.
10.10am – 10.45am
Cofnodion:
Cyflwynodd yr Aelod Arweiniol Gwastraff, yr
Amgylchedd a Chludiant, y Cynghorydd Barry Mellor, yr adroddiad (a ddosbarthwyd
ymlaen llaw) ochr yn ochr â Phennaeth Dros Dro Priffyrdd a Gwasanaethau
Amgylcheddol a'r Rheolwr Dros Dro Gwastraff ac Ailgylchu. Roedd yr adroddiad yn
rhoi’r wybodaeth ddiweddaraf i’r aelodau ar gynnydd y trefniant hwn drwy
gontract allanol ar ddiwedd cyfnod y contract, ac mae’n manylu ar y trefniadau
arfaethedig yn y dyfodol ar gyfer darpariaeth barhaus y gwasanaethau hyn ar
draws ardal Sir Ddinbych, gan amlygu’r risgiau i’r
trefniant hwn drwy gontract allanol a sut mae’r risgiau hynny yn cael eu
rheoli. Eglurodd yr Aelod Arweiniol, er y gallai'r
penderfyniad i ddyfarnu'r contract fod wedi'i wneud gan y Pennaeth Priffyrdd a
Gwasanaethau Amgylcheddol, dan bwerau a ddirprwywyd iddo, roedd Pennaeth y
Gwasanaeth a'r Aelod Arweiniol yn awyddus i ofyn am farn
yr aelodau ar fanylion y contract, yn enwedig y diwygiadau arfaethedig i'r
contract.
Fe wnaeth y darparwr gwasanaeth ddarparu
patrolau gan swyddogion Gorfodi Amgylcheddol ledled y
sir (tir â mynediad cyhoeddus) er mwyn codi ymwybyddiaeth a chyhoeddi
Rhybuddion Cosb Benodedig (RhCB) ar gyfer troseddau
amgylcheddol lefel isel. Roedd mwyafrif y troseddau yn ymwneud â thaflu sbwriel
a thorri Gorchymyn Diogelu Mannau Agored Cyhoeddus Sir Ddinbych
(Rheoli Cŵn). Fe wnaethant hefyd roi Rhybuddion Cosb Benodedig am
droseddau amgylcheddol eraill gan gynnwys gosod posteri'n anghyfreithlon a
graffiti a gorfodi deddfwriaeth ddi-fwg. Roedd y
darparwr gwasanaeth hefyd yn gyfrifol am ystod o gymorth swyddfa gefn mewn
perthynas â Rhybuddion Penodedig, gan gynnwys rheoli cyfraddau taliadau a
pharatoi ffeiliau achos ar gyfer erlyniadau posibl (am beidio â thalu
Rhybuddion Cosb Benodedig a cherdded i ffwrdd heb dderbyn y ddirwy). Mae hefyd yn ofynnol iddynt fod yn bwynt cyswllt
cyntaf ar gyfer cwynion a sylwadau gan y cyhoedd.
Cafodd y Pwyllgor wybod am amrywiadau’r
contract, sef -
Daeth tri amrywiad i fanylion contract 2019 i
rym ar 10 Hydref 2022:
(i)
Ymestyn y contract presennol am 24 mis
(Amrywiad Sylweddol) tan 9 Hydref 2024.
(ii) Ehangu cwmpas y contract drwy gynnwys dau faes ychwanegol o orfodi amgylcheddol – i ddechrau drwy ddau gynllun peilot chwe mis. (Nid yw’n cael ei ystyried yn amrywiad
sylweddol);
(iii) Cynnwys cymal “terfynu er hwylustod”, sy’n galluogi’r contractwr i
derfynu’r contract gyda 12 wythnos o rybudd, pe bai’r contract yn methu â bod
yn ymarferol yn fasnachol iddynt. (Nid yw’n cael ei ystyried yn amrywiad
sylweddol);
Trafododd Aelodau’r canlynol mewn mwy o
fanylder:
·
Codwyd pryderon ynglŷn â nifer
isel o batrolau a gofnodwyd ar gyfer ardaloedd mwy gwledig y sir, h.y ardaloedd Dyffryn Dyfrdwy, Dinbych a Rhuthun, gan fod
rhai aelodau’n teimlo bod y patrolau’n canolbwyntio ar ardaloedd twristiaid ar
hyn o bryd. Teimlai’r Pwyllgor bod angen dull Sir Ddinbych
cyfan i’r contract newydd. Cadarnhaodd swyddogion bod y mater hwn wedi’i nodi
ac roedd yn rhan o drafodaeth barhaus ar hyn o bryd rhwng y Cyngor a’r cwmni.
·
Roedd gan y Pwyllgor bryderon mewn
perthynas â chost a maint yr elw ar gyfer y cwmni sy’n darparu’r gwasanaeth.
Roedd Aelodau’n bryderus y gall hyn wthio’r cwmni i fynd ar drywydd ffynonellau
elw yn hytrach na delio â’r materion a oedd yn achosi
pryder i drigolion, taflu sbwriel a baw cŵn. Eglurodd y swyddogion y byddai’r cynnig i
godi lefelau dirwy mewn perthynas â throseddau baw cŵn yn gobeithio atal
troseddau o’r fath a lleihau’r lefelau o droseddau o’r fath yn y dyfodol. Roedd
baw cŵn yn cael ei ystyried gan y cyhoedd fel trosedd yn erbyn pobl a
chymunedau, felly roedd yn bwysig bod dirwyon yn cael eu pennu ar lefel i helpu
atal ail droseddu wrth hefyd addysgu troseddwyr parhaus am effaith y drosedd.
Cytunodd y pwyllgor bod addysgu pobl yn hollbwysig, a byddai perthynas waith
dda gyda’r Tîm Cyfathrebu’n hollbwysig i fynd i’r afael â’r
mater yn effeithiol.
·
Cyfeiriodd yr aelodau at y posibilrwydd
y byddai rhai pobl yn osgoi cael eu dal a chael dirwy wrth fynd â’u cŵn am dro yn ystod oriau anghymdeithasol pan na
fyddai swyddogion yn bresennol. Eglurodd swyddogion nad oedd ganddynt reolaeth
uniongyrchol dros ble a phryd y byddai gorfodi’n
digwydd, ond roedd trafodaethau’n mynd rhagddynt gyda’r darparwr gwasanaeth i geisio addasu ei oriau gwaith i redeg o 7am tan 7pm bob
dydd.
·
Codwyd y mater o ran nifer y biniau
sydd ar gael ac a oes unrhyw ddull o gael biniau ychwanegol mewn ardaloedd
gwledig. Dywedodd swyddogion eu bod wedi defnyddio ymholiadau a chwynion C360 i
bennu a oes angen biniau newydd neu ychwanegol mewn rhai ardaloedd.
·
Codwyd y mater mewn perthynas â hen
arwyddion a’r angen i adnewyddu arwyddion ledled y sir. Nododd swyddogion bod y
mater yn cael ei adolygu ar hyn o bryd, a’u bod yn edrych ar Caru Cymru (Cadwch
Gymru’n Daclus yn flaenorol) fel ffynhonnell cyllid
posibl ar gyfer arwyddion newydd.
·
Ynglŷn â'r
ffioedd cyfreithiol sy'n gysylltiedig ag erlyn troseddwyr am beidio â thalu
Rhybuddion Cosb Benodedig, dywedwyd wrth yr aelodau y byddai'r Cyngor yn
adennill yr holl gostau drwy system y llys ynadon.
·
Cadarnhawyd bod swyddogion Gorfodi Amgylcheddol y Cyngor yn delio â digwyddiadau tipio
anghyfreithlon, y cynnig yn y contract penodol hwn oedd i’r cwmni (District Enforcement)
ategu gwaith Tîm Gorfodi Amgylcheddol y Cyngor drwy
ymgymryd â dyletswyddau megis gwirio bod y busnes yn meddu ar y trwyddedau
gofynnol a bod ganddynt drefniadau ar waith i waredu eu gwastraff yn gyfreithlon.
·
Dywedodd y Cynghorydd Martyn Hogg ei
fod yn cytuno â’r contract arfaethedig a’i
amrywiadau, ond byddai’n orfodol i’w ddarpariaeth gael ei fonitro’n agos a
dylai data hanfodol fod ar gael i amlygu llwyddiant y busnes.
Yn dilyn trafodaeth fanwl a thrylwyr gan y
Pwyllgor:
Penderfynwyd: - ar ôl ystyried y wybodaeth yn yr adroddiad, cefnogi’r amrywiad contract
arfaethedig i ymestyn y trefniant allanol presennol gyda District
Enforcement i 9 Hydref 2024, ac yn amodol ar y
sylwadau a wnaed yn ystod y drafodaeth:
(i)
cadarnhau a chymeradwyo’r Adroddiad
Penderfyniad Dirprwyedig ‘Adolygiad o Symiau Dirwyon Rhybuddion Cosb Benodedig
Cyngor Sir Ddinbych ar gyfer Troseddau Amgylcheddol’
fel y gall y Cyngor barhau i ddarparu patrolau gorfodi
amgylcheddol trwy drefniant sy’n niwtral o ran cost (fel y manylir yn Atodiad 1
yr adroddiad); a
(ii) argymell bod cynllun cyfathrebu yn cael ei lunio a’i ddechrau gyda’r bwriad
o sicrhau bod trigolion, busnesau’r sir a’r holl gynghorau dinas, tref a
chymuned yn cael gwybod am y newidiadau arfaethedig cyn eu rhoi ar waith.
Dogfennau ategol:
- Environmental Enforcement Contract Report 271022, Eitem 5. PDF 298 KB
- Environmental Enforcement Contract Report 271022 - App 1COMPLETE incl WBIA, Eitem 5. PDF 1 MB
- Restricted enclosure Gweler y rhesymau pam fod dogfen 5./3 yn gyfyngedig
- Environmental Enforcement Contract Report 271022 - App 3, Eitem 5. PDF 632 KB
- Environmental Enforcement Contract Report 271022 - App 4, Eitem 5. PDF 527 KB
- Environmental Enforcement Contract Report 271022 - App 5, Eitem 5. PDF 175 KB