Eitem ar yr agenda
MESUR LLYWODRAETH LEOL (CYMRU) 2011
I ystyried adroddiad gan y Pennaeth Gwasanaethau Cyfreithiol a Democrataidd (copi’n amgaeëdig) am newidiadau i Gyfansoddiad y Cyngor yn sgîl Mesur Llywodraeth Leol (Cymru) 2011 sy’n cynnwys creu Pwyllgor Archwilio, Pwyllgor Gwasanaethau Democrataidd a threfniadau ar gyfer penodi cadeiryddion pwyllgorau Trosolwg a Chraffu.
Cofnodion:
Cyflwynodd y Pennaeth Gwasanaethau Cyfreithiol
a Democrataidd (P:GC&D) ei adroddiad (a gylchredwyd yn flaenorol)
ynglŷn â newidiadau i Gyfansoddiad y Cyngor a oedd yn ofynnol yn ôl
darpariaethau Mesur Llywodraeth Leol (Cymru) 2011 i gynnwys sefydlu Pwyllgor
Archwilio, Pwyllgor Gwasanaethau Democrataidd a threfniadau i benodi
Cadeiryddion Pwyllgorau Trosolwg a Chraffu.
Esboniodd y P:GC&D fod yr adroddiad yn
delio â nifer o ddarpariaethau gorfodol i aelodau eu hystyried ac roedd yna
ddisgwyliad y byddid yn eu gweithredu yng nghyfarfod y Cyngor Blynyddol. Fe ystyriwyd y canllawiau statudol drafft
lle’r oedd yn gyson â’r Mesur. Ond, os
oedd y canllawiau drafft yn sylweddol wahanol i’r drafft mae’n bosib y byddai
angen adolygiad pellach. Fe ymhelaethodd
y P:GC&D ar adrannau perthnasol y Mesur a’r oblygiadau i’r Cyngor o
ymgymryd â’r gofynion gorfodol hynny yr oedd angen eu hadlewyrchu yng
nghyfansoddiad y Cyngor.
Yn ystod
cyflwyniad yr adroddiad fe fanteisiodd aelodau ar y cyfle i godi cwestiynau ac
egluro materion arbennig efo’r P:GC&D a’r cyfreithlondebau sy’n ymwneud â
gweithredu’r darpariaethau statudol. Fe
ystyriwyd pob un o’r materion canlynol yn eu tro -
Sefydlu Pwyllgor Archwilio
Fe ystyriodd y
Cyngor enw, maint a chyfansoddiad y pwyllgor a’i delerau gorchwyl. Nododd Aelodau fod swyddogaethau’r Pwyllgor
Llywodraethu Corfforaethol presennol yn debyg iawn i’r rheiny a oedd yn ofynnol
gan y Mesur ar gyfer Pwyllgor Archwilio.
O ystyried hynny ac effeithiolrwydd y pwyllgor presennol, ac er mwyn
effeithlonrwydd fe gytunwyd i’r Pwyllgor Llywodraethu Corfforaethol barhau (gan
ymgymryd â’r swyddogaethau sy’n ofynnol gan y Mesur) a’i fod yn cael ei
ddynodi’n Bwyllgor Archwilio i’r diben hwnnw.
Yn unol â’r rheol gyffredinol mewn cyfraith llywodraeth leol fe gytunodd
y Cyngor â’r argymhelliad i’r pwyllgor fod â chydbwysedd gwleidyddol. Rhoddwyd ystyriaeth hefyd i gynyddu maint y
pwyllgor a ymddangosai’n fychan o’i gymharu â’r Cyngor llawn, efallai hyd at un
ar ddeg o aelodau’n unol ag aelodaeth pwyllgorau craffu. Fodd bynnag, y
consensws oedd y byddai’r aelodaeth bresennol o chwech o gynghorwyr yn ddigonol
i ymgymryd â’r dyletswyddau sy’n ofynnol yn y Mesur ynghyd â’r aelod lleyg
annibynnol gorfodol. Cefnogai’r Cynghorydd
Julian Thompson-Hill ymarfer disgresiwn i gynnwys Aelod Arweiniol perthnasol y
Cabinet fel aelod wrth ystyried y swyddogaethau gofynnol sydd wedi eu nodi yn y
Mesur. Fe ystyriodd y Cyngor rinweddau’r
cynnig hwnnw ond yn gyffredinol, er mwyn bod yn gwbl annibynnol, ni ddylai’r
pwyllgor gynnwys unrhyw aelodau craffu nac aelodau cabinet o fewn ei
aelodaeth. Mewn ymateb i gwestiynau fe
nododd y P:GC&D y broses recriwtio ar gyfer yr aelod lleyg a chadarnhaodd y
dylai’r aelod lleyg fod yn annibynnol ar y Cyngor heb unrhyw deyrngarwch
gwleidyddol hysbys ac ni ddylai fod yn gyn Gynghorydd na Swyddog y Cyngor. Roedd Aelodau’n gefnogol o aelod lleyg
annibynnol ar y pwyllgor ac o ystyried y penderfyniad i ddynodi’r Pwyllgor
Llywodraethu Corfforaethol yn Bwyllgor Archwilio i ddibenion y Mesur cafwyd peth
trafodaeth ynglŷn ag a ddylai aelod lleyg gael hawliau pleidleisio ar
swyddogaethau eraill y bydd y pwyllgor yn ymgymryd â nhw ac a oedd y tu allan
i’r rheiny sy’n ofynnol gan y Mesur.
Roedd y Cynghorydd Alice Jones yn dadlau’n arbennig o blaid hawliau pleidleisio
llawn gan y teimlai y byddai’n ymrannol pe na fyddai gan yr aelod lleyg statws
cyfartal ag aelodau eraill y pwyllgor.
Fod bynnag, barn y mwyafrif oedd y dylid cyfyngu ar hawliau
pleidleisio’r aelod lleyg i’r swyddogaethau hynny a nodwyd yn y Mesur a bod
materion eraill i’w neilltuo ar gyfer y cynghorwyr hynny a etholwyd i’r safle
hwnnw. Fe eglurodd y P:GC&D y safle
cyfreithiol o ran hawliau pleidleisio gan ddweud y gall holl aelodau’r Pwyllgor
Archwilio, yn cynnwys yr aelod lleyg, bleidleisio ar unrhyw gwestiwn a fydd i’w
benderfynu gan y pwyllgor. Byddai unrhyw
ymataliad rhag pleidleisio ar faterion sydd y tu allan i gylch gwaith y
swyddogaethau a osodwyd allan yn y Mesur, yn gorfod cael cytundeb yr aelod
lleyg. Mewn termau ymarferol gellid rheoli
busnes y pwyllgor i wahanu swyddogaethau’r Pwyllgor Archwilio fel y’u diffinnir
yn y Mesur oddi wrth swyddogaethau llywodraethu corfforaethol eraill. Fe addefodd y gellid amddiffyn cyfyngu
cyfranogiad yr aelod lleyg i swyddogaethau’r Pwyllgor Archwilio’n unig.
Sefydlu Pwyllgor Gwasanaethau
Democrataidd
Fe ystyriodd y
Cyngor sefydlu’r pwyllgor, ei faint, ei gyfansoddiad a’i delerau gorchwyl. Nododd Aelodau fod y Mesur wedi mynegi’n glir
ofynion a swyddogaethau’r Pwyllgor Gwasanaethau Democrataidd a bod yn rhaid
cael cydbwysedd gwleidyddol. Dywedodd y
P:GC&D ei bod yn annhebygol y byddai’n rhaid i’r pwyllgor gyfarfod fwy nag
unwaith y flwyddyn. Yn dilyn cynnig gan
y Cynghorydd Joan Butterfield, a eiliwyd gan y Cynghorydd Barbara Smith fe
gytunodd aelodau’n unfrydol i sefydlu’r pwyllgor gydag un ar ddeg o aelodau, yn
wleidyddol gytbwys yn unol â’r pwyllgorau craffu.
Penodi Cadeiryddion y Pwyllgorau
Craffu
Fe ystyriodd y
cyngor ddyraniad Cadeiryddion y Pwyllgorau Craffu fel y’i darparwyd gan y Mesur
mewn amgylchiadau lle’r oedd yna ddau neu fwy o grwpiau gwleidyddol a
phwyllgorau craffu lluosog fel yn Sir Ddinbych.
Wrth esbonio’r broses o benodi, ychwanegodd y P:GC&D y gallai’r
Cyngor fabwysiadu system ddyrannu wahanol ac amlinellodd y gweithdrefnau y
byddai’n rhaid eu dilyn. Nid oedd yna
unrhyw gyfeiriad at benodi Is-gadeiryddion yn y Mesur ac fe awgrymwyd bod
penodi Is-gadeiryddion i fod yn fater i’r pwyllgorau hynny. Fe eglurodd y P:GC&D y diffiniad o
‘grŵp gwrthwynebol’ fel grŵp sydd heb gynrychioliad yn y Cabinet.
PENDERFYNWYD
–
(a) bod
y Pwyllgor Llywodraethu Corfforaethol yn cael ei ddynodi’n Bwyllgor Archwilio i
ddibenion Mesur Llywodraeth Leol (Cymru) 2011 a bod y Telerau Gorchwyl i’r
pwyllgor hwnnw fel y’i mynegir yn Atodiad 2 i’r adroddiad yn cael ei
fabwysiadu’n amodol ar (1) gyfeiriad i adlewyrchu, lle bo hynny’n bosib, fod
busnes y pwyllgor i’w reoli i wahanu swyddogaethau’r Pwyllgor Archwilio fel y’u
nodir yn y Mesur oddi wrth swyddogaethau llywodraethu corfforaethol eraill, a (2)
drwy gytundeb, bod cyfranogiad yr aelod lleyg annibynnol i’w gyfyngu i
swyddogaethau’r Pwyllgor Archwilio;
(b) bod
aelodau’r Pwyllgor Archwilio i’w penodi gan y Cyngor ar sail cydbwysedd
gwleidyddol;
(c) sefydlu
Pwyllgor Gwasanaethau Democrataidd yn cynnwys un ar ddeg o aelodau, yn
wleidyddol gytbwys a mabwysiadu Telerau Gorchwyl y pwyllgor hwnnw fel y’u nodir
yn Atodiad 3 i’r adroddiad;
(d) mabwysiadu’r
egwyddorion i’w cymhwyso i benodiad Cadeiryddion y Pwyllgorau Craffu fel y’u
nodir ym mharagraffau 4.26 i 4.30 yr adroddiad
(e) awdurdodi’r
Pennaeth Gwasanaethau Cyfreithiol a Democrataidd i wneud y newidiadau
angenrheidiol i Gyfansoddiad y Cyngor i adlewyrchu’r diwygiadau sy’n ofynnol
gan Fesur Llywodraeth Leol (Cymru) 2011 fel y’u nodir yn (a) i (d) uchod.
Dogfennau ategol:
- Mesur Lleol, Eitem 8. PDF 92 KB
- Local Gov Measure App 1, Eitem 8. PDF 52 KB
- Local Gov Measure App 2, Eitem 8. PDF 80 KB
- Local Gov Measure App 3, Eitem 8. PDF 33 KB