Eitem ar yr agenda
GOSOD RHENT TAI A CHYLLIDEBAU REFENIW TAI A CHYFALAF 2021/22
Ystyried
adroddiad gan y Cynghorydd Julian Thompson-Hill, Aelod Arweiniol Cyllid,
Perfformiad ac Asedau Strategol (copi’n amgaeedig) yn gofyn am gymeradwyaeth y
Cabinet i godi rhent blynyddol tai cyngor Sir Ddinbych ac i gymeradwyo'r Cyfrif
Refeniw Tai a Chyllidebau Cyfalaf ar gyfer 2021/22 a’r Cynllun Busnes Stoc Dai.
Penderfyniad:
PENDERFYNWYD –
(a) mabwysiadu
Cyllideb y Cyfrif Refeniw Tai ar gyfer 2021/22 (Atodiad 1 i’r adroddiad) a
Chynllun Busnes y Stoc Dai (Atodiad 2 i’r adroddiad);
(b) cynyddu rhent
anheddau'r Cyngor yn unol â Pholisi Llywodraeth Cymru ar gyfer Rhent Tai
Cymdeithasol i rent wythnosol cyfartalog o £93.89 i’w weithredu o ddydd Llun 5
Ebrill 2021;
(c) nodi’r adroddiad
ychwanegol (Atodiad 3 i’r adroddiad) ar Arbedion Effeithlonrwydd,
Fforddiadwyedd a gwerth am arian, a
(d) bod y Cabinet yn
cadarnhau ei fod wedi darllen, deall ac wedi ystyried yr Asesiadau o Effaith ar
Les (Atodiad 4 yr adroddiad) fel rhan o'i ystyriaethau.
Cofnodion:
Cyflwynodd
y Cynghorydd Julian Thompson-Hill yr adroddiad a oedd yn gofyn am gymeradwyaeth
y Cabinet ar gyfer cynnydd rhent blynyddol Tai Sir Ddinbych, Cyfalaf y Cyfrif
Refeniw Tai a Chyllidebau Refeniw ar gyfer 2021/22 a'r Cynllun Busnes Stoc Dai.
Fe arweiniodd y
Cynghorydd Thompson-Hill yr aelodau drwy’r adroddiad gan fanylu ar ffigurau’r
gyllideb a thybiaethau o ran lefel incwm a gyfrifwyd er mwyn gallu cyflwyno
gwasanaethau refeniw, y rhaglen buddsoddi cyfalaf i gynnal safonau ansawdd tai
ac i ddatblygu’r rhaglen adeiladu newydd.
O ran y cynnydd rhent blynyddol cyhoeddodd Llywodraeth Cymru bolisi
rhent pum mlynedd ym mis Rhagfyr 2019 ar gyfer rhent tai cymdeithasol ac mae
setliad y rhenti wedi'u cyfrifo gan ystyried y polisi a’r mecanwaith hwnnw ar
gyfer codi rhent. Y cynnydd ar gyfer
2021/22 oedd 1.5% gan arwain at rent wythnosol cyfartalog o £93.89 (cynnydd o
£1.38 mewn rhent wythnosol cyfartalog). Nid oedd cynnig i ddefnyddio’r tâl dewisol
o hyd at £2 yr wythnos ar gyfer eiddo.
Yn rhan o’r broses gosod rhent, rhoddwyd ystyriaeth i fforddiadwyedd
tenantiaid, gwerth am arian ac asesiad o effeithiolrwydd cost. Roedd adolygiad blynyddol Cynllun Busnes y
Stoc Dai y dangos ei fod yn parhau’n gadarn ac yn ariannol hyfyw ac roedd digon
o adnoddau ar gyfer cefnogi’r gwasanaeth tai ac anghenion y stoc am
fuddsoddi.
Tynnodd y Swyddog
Arweiniol – Tai Cymunedol sylw at yr angen i gydbwyso lefel mewn cynnydd rhent
er mwyn gallu talu costau yn y dyfodol yn erbyn fforddiadwyedd tenantiaid. Yn sgil lefel chwyddiant, dyma oedd y cynnydd
rhent isaf ers peth amser, ac i denantiaid sy'n derbyn budd-dal tai, byddai’r
hawl i fudd-dal yn cynyddu i dalu am y cynnydd mewn rhent. Roedd y taliadau gwasanaeth cyfartalog, er yn
amrywio rhwng eiddo, wedi gostwng rhywfaint.
Wrth ystyried yr
adroddiad, trafodwyd y materion canlynol ymhellach gyda’r Cynghorydd Julian
Thompson-Hill a’r Swyddog Arweiniol – Tai Cymunedol -
·
Dywedodd
y Cynghorydd Mark Young ei fod yn adroddiad gonest oedd yn nodi’n glir y
rhesymau dros gynyddu rhent, ond gofynnodd am ragor o sicrwydd ynglŷn â'r
elfen fforddiadwyedd, yn enwedig o ystyried y gostyngiad posibl mewn taliadau
Credyd Cynhwysol a'r caledi ariannol roedd tenantiaid yn eu hwynebu.
Cafodd
wybod waeth beth yw lefel y Credyd Cynhwysol, os ydi tenantiaid yn gymwys i
gael budd-dal byddai unrhyw gynnydd yn y rhent a thâl gwasanaeth yn cael ei
gynnwys. Rhoddwyd sicrwydd bod y
gwasanaeth wedi bod yn cefnogi tenantiaid yn rhagweithiol ac roedd telerau
ad-dalu fforddiadwy’n cael eu cynnig os oeddynt yn mynd i ddyled, heb fygythiad
o weithred gyfreithiol. Rhoddwyd
teyrnged hefyd i Cyngor ar Bopeth Sir Ddinbych am ddarparu cefnogaeth werthfawr
a chyngor am gyllidebu i denantiaid.
Roedd gan Landlordiaid Cymdeithasol Cofrestredig yn Sir Ddinbych yr un
cyfrifoldebau o ran safonau datgarboneiddio a buddsoddi mewn stoc dai, ond
rhenti’r Cyngor oedd yr isaf, ond yr un safon o wasanaeth a ddarperir. Roedd data’r llynedd yn dangos bod rhenti’r
Cyngor ar ochr isaf y raddfa o ran rhent targed Llywodraeth Cymru, ac mae’n
debygol y bydd rhagor o denantiaid yn disgyn o dan y rhent targed eleni, gan
ddangos gwasanaeth ardderchog am gost isel i denantiaid.
·
er ei
bod yn gwerthfawrogi’r angen am adolygiad blynyddol a’r achos dros gynyddu
rhent, roedd y Cynghorydd Bobby Feeley yn cwestiynu amseru’r cynnydd yng
ngoleuni’r caledi ariannol a achoswyd gan y pandemig, ac fyddai hi’n bosibl i
oedi’r cynnydd tan y flwyddyn ganlynol.
Cafwyd
eglurhad nad ydi’r ddeddfwriaeth yn caniatáu hawlio incwm yn ôl-weithredol a’r
flwyddyn nesaf dim ond CPI +1 oedd posibl ei ystyried, a’r tâl dewisol o £2 o
bosibl, ond byddai’n gosod cynnydd uwch ar denantiaid mewn un blwyddyn yn
hytrach na’i ymestyn dros ddwy flynedd.
Byddai hefyd yn arwain at lai o incwm yn y flwyddyn ariannol nesaf a
fyddai o bosibl yn effeithio ar hyfywedd Cynllun Busnes y Stoc Dai wrth symud
ymlaen. Roedd lles tenantiaid yn
ystyriaeth allweddol ac roedd y cynnydd wedi cael ei drafod gyda Ffederasiwn
Tenantiaid a Phreswylwyr Sir Ddinbych.
Fe nodwyd y byddai’r cynnydd yn cael ei gynnwys gan y budd-dal tai mewn
dros dau draean o’r achosion, a byddai gweddill y tenantiaid yn cael eu cefnogi
gymaint â phosibl. Yn y gorffennol,
roedd y cynnydd mewn rhent werth tua £800,000 y flwyddyn, ond byddai’r cynnig
presennol tua £240,000 a byddai rhent di-symud heb unrhyw gynnydd yn arwain at
golled yn agos at £1miliwn mewn pedair blynedd.
Byddai hyn yn effeithio ar fuddsoddi yn y stoc dai a darpariaeth
gwasanaeth i denantiaid. Er yn
gwerthfawrogi’r cynnydd i denantiaid, roedd y rhent dal yn llawer is na lefel
rhent targed Llywodraeth Cymru.
·
o ran
polisi rhent pum mlynedd Llywodraeth Cymru ar gyfer rhenti tai cymdeithasol, fe
ailadroddwyd bod y polisi yn cytuno ar gynnydd rhent blynyddol o ddim mwy na
CPI +1% gyda ffi £2 yr wythnos yn ychwanegol ar gartrefi unigol ar yr amod nad
oedd y rhent yn cynyddu mwy na CPI +1%.
Roedd
awdurdodau lleol eraill yng ngogledd Cymru hefyd yn codi rhenti gyda rhai yn
bwriadu defnyddio’r cynnydd £2 wythnosol
yn hytrach na CPI+1%. Roedd rhenti
targed Llywodraeth Cymru wedi codi 11.5% dros y pedair blynedd diwethaf, ond
dim ond 9% oedd y cynnydd yn rhenti’r Cyngor dros y cyfnod hwnnw. Wrth ystyried y cynnydd arfaethedig mewn
rhent, mae lefelau rhent Sir Ddinbych yn parhau i fod yn llawer is na rhent
targed Llywodraeth Cymru. Cyfeiriwyd
hefyd at y buddsoddiad yn y stoc dai yn cynnwys gwneud eiddo yn fwy effeithlon
o ran ynni a fyddai’n arwain at filiau tanwydd is i denantiaid.
·
Mynegodd
y Cynghorydd Glenn Swingler bryderon am y terminoleg a ddefnyddiwyd yn yr
Asesiad o Effaith ar Les gan gyfeirio at y pryder y byddai gan Tai Sir Ddinbych
nifer anghymesur o aelwydydd tlotach yn sgil ei rent is.
Roedd y Swyddog
Arweiniol yn derbyn y pwynt a chytunodd i ail eirio’r ddogfen. Fe eglurodd bod yr Asesiad o’r Effaith ar Les
wedi cael ei gynnal gyda thenantiaid ac roedd yna bryder blaenorol ynglŷn
â’r dull roedd cymdeithasau eraill wedi’u cymryd o ran asesiad fforddiadwyedd a
chymhwyster ar gyfer tenantiaethau wedi dyddio.
Rhoddodd y
Cabinet deyrnged i waith gwasanaethau tai, mewn partneriaeth gyda Cyngor ar
Bopeth Sir Ddinbych wrth gefnogi tenantiaid i reoli eu cyllid yn effeithiol ac
i wneud y mwyaf o’u hincwm, a’r ymagwedd sensitif i ddelio â thenantiaid sydd
mewn trafferthion ariannol. Ar ôl
ystyried ffigurau’r gyllideb a’r cynnydd arfaethedig mewn rhent, ac ar ôl
ystyried fforddiadwyedd i denantiaid a’r lefel o fuddsoddiad yn y stoc dai yn y
dyfodol, roedd yna gefnogaeth gyffredinol i’r argymhellion.
PENDERFYNWYD -
(a) mabwysiadu
Cyllideb y Cyfrif Refeniw Tai ar gyfer 2021/22 (Atodiad 1 i’r adroddiad) a
Chynllun Busnes y Stoc Dai (Atodiad 2 i’r adroddiad);
(b) cynyddu rhent
anheddau'r Cyngor yn unol â Pholisi Llywodraeth Cymru ar gyfer Rhent Tai
Cymdeithasol i rent wythnosol cyfartalog o £93.89 i’w weithredu o ddydd Llun 5
Ebrill 2021;
(c) nodi’r adroddiad
ychwanegol (Atodiad 3 i’r adroddiad) am Effeithiolrwydd Cost, Fforddiadwyedd a
Gwerth am Arian, a
(d) Y Cabinet yn cadarnhau eu bod wedi darllen, deall ac
wedi ystyried yr Asesiadau o Effaith ar Les (Atodiad 4 yr adroddiad) fel rhan
o'i ystyriaethau.
Yn y fan hyn (11.25am) cymerodd y pwyllgor egwyl
am luniaeth.
Dogfennau ategol:
- HOUSING RENT SETTING REPORT, Eitem 7. PDF 234 KB
- Housing Rent Setting Appendix 1 202122, Eitem 7. PDF 182 KB
- Housing Rent Setting Appendix 2 202122 doc, Eitem 7. PDF 221 KB
- Housing Rent Setting Appendix 3, Eitem 7. PDF 341 KB
- Housing Rent Setting Appendix 4 WBIA, Eitem 7. PDF 106 KB