Eitem ar yr agenda
ARCHWILIAD BLYNYDDOL O DDIOGELU PLANT MEWN ADDYSG – FFRAMWAITH SICRHAU ANSAWDD
Ystyried adroddiad (copi ynghlwm) gan Arweinydd y Tîm, Gweithwyr Cymdeithasol Addysg, sy’n amlinellu gweithgareddau atgyfeirio ysgolion i’r Gwasanaethau Plant dros y flwyddyn ysgol ddiwethaf, yn diweddaru’r Pwyllgor ar y Cynllun Gweithredu Amddiffyn sy’n ymwneud â threfniadau mewn addysg a’r hyfforddiant a gynigir i ysgolion.
Cofnodion:
Cyflwynodd
Arweinydd Tîm Gweithwyr Cymdeithasol Addysg (ATGCA) adroddiad (a gylchlythyrwyd
yn flaenorol) yn diweddaru’r Pwyllgor ar weithgaredd diogelu o fewn addysg ac
ar y cynllun gweithredu diogelu yr ymgymerwyd ag ef mewn ymateb i adroddiad
Cyngor Sir Benfro Medi 2011. Gofynnwyd
i’r Pwyllgor am eu cymeradwyaeth a’u cefnogaeth i’r camau a gymerir yn y
dyfodol i fynd i’r afael â’r meysydd gwan a glustnodwyd yn yr archwiliad
blynyddol o ysgolion ac i fynd i’r afael â materion diogelu ar draws
gwasanaethau.
Eglurodd ATGCA
i’r Pwyllgor fod newidiadau arwyddocaol wedi digwydd yn ystod y 12 mis
blaenorol yng Nghymru. Yn dilyn
adroddiad Cyngor Sir Benfro (Medi 2011), a ddefnyddiwyd fel templed o feysydd
sy’n peri pryder, codwyd materion at lefel Gweinidogol. Ysgrifennodd y Gweinidog at bob Awdurdod Lleol
yn gofyn am i archwiliadau gael eu gwneud.
Mae pob
atgyfeiriad yn cael ei gopïo’n awtomatig i’r ATGCA i’w archwilio. Os nad yw’r atgyfeiriad yn cael ei ystyried
yn ddigon difrifol i gael ei drin gan yr Uned Diogelu, neu fod y rheswm dros yr
atgyfeiriad yn aneglur, mae’r ATGCA yn cysylltu â’r ysgol i gael gwybod y
rhesymau paham y gwnaed yr atgyfeiriad.
Roedd rhaglen dreigl o hyfforddiant blynyddol yn cael ei darparu’n awr
ar gyfer pob ysgol. Anfonir manylion
staff sy’n methu mynychu hyfforddiant yn ôl i’r Pennaeth i sicrhau y gwneir yr
hyfforddiant o fewn y flwyddyn ysgol.
Roedd prosiectau
a gyflenwir drwy gyllid Cymorth ar ran yr Awdurdod Lleol hefyd wedi’u gwneud yn
ymwybodol o bwysigrwydd materion diogelu a’r angen i ddatblygu polisïau
diogelu. Roedd hyn wedi arwain at wneud
archwiliad o bolisïau amddiffyn a diogelu plant yr asiantaethau.
Gan fod cyllid Cymorth yn dod i ben, eglurodd y Cyfarwyddwr Corfforaethol,
Demograffeg, Lles a Chynllunio (CC: DLlCh) y byddai contractau newydd a
ddyfernir dan y fenter Teuluoedd yn Gyntaf yn pennu’r angen am brosesau AD i
ddelio â materion amddiffyn plant ac y byddai diogelu’n ffurfio rhan o’r broses
monitro contractau.
Cyhoeddodd Dr
Dawn Marjoram, Aelod Cyfetholedig mai’i
diddordeb arbenigol oedd plant gydag anghenion arbennig ac roedd plant
anabl yn arbennig o agored i gael eu cam-drin.
Gofynnodd Dr Marjoram a oedd staff sy’n gweithio mewn ysgolion anghenion
arbennig a hefyd staff mewn ysgolion prif ffrwd, sy’n delio â phlant anghenion
arbennig, yn derbyn hyfforddiant penodol, yn arbennig y staff hynny a oedd yn
gofalu am blant gyda phroblemau cyfathrebu.
Cadarnhaodd yr ATGCA fod yna staff gyda gwybodaeth arbenigol yn gweithio
mewn ysgolion ac y byddent yn gallu adnabod unrhyw amgylchiadau a oedd yn achos
pryder. Cyflëwyd yn y sesiynau hyfforddi
nad cyfrifoldeb y staff yn unig oedd diogelu’r plant ond ei fod hefyd yn
gyfrifoldeb yr Awdurdod Lleol, a oedd yn cynnwys llywodraethwyr ysgolion. Roedd gan y gwasanaethau allweddol o fewn
Cyngor Sir Ddinbych yr wybodaeth berthnasol i ddelio â phroblemau.
Cadarnhaodd
CC:DLlCh fod y Cyd-Banel Asesu Risg yn cyfarfod ddwyaith yr wythnos a bod
cynrychiolwyr Addysg, Gwasanaethau Cymdeithasol, yr Heddlu ac Iechyd yn
mynychu’r cyfarfodydd hyn. Roedd
gwybodaeth yn cael ei chydgasglu ynghylch y math o gymorth y gall plentyn neu
deulu fod â’i angen, fel y gallai tîm gael ei adeiladu o gwmpas y teulu i’w
cefnogi.
Holodd Dr
Marjoram os oedd plentyn o du allan i’r sir yn cael ei addysgu mewn ysgol yn
Sir Ddinbych, sut fyddai hyn yn effeithio ar y broses? Eglurodd ATGCA fod yna system glir i ddelio â
phlentyn o’r tu allan i Sir Ddinbych.
Roedd disgwyliad gan y tîm rheoli y byddid yn cysylltu â’r Awdurdod
Lleol, roedd hyn yn sicrhau bod Sir Ddinbych yn bod yn rhagweithiol ac nid yn
adweithiol. Roedd y tîm rheoli wedi
mynychu hyfforddiant Lefel 2 yn ddiweddar er mwyn mwyhau ymwybyddiaeth yn
cynnwys pan fyddir yn penodi cynrychiolwyr i gyrff llywodraethol.
Eglurhaodd ATGCA fod yr archwiliad yn cael ei gyflwyno i’r Bwrdd Diogelu
Plant. Yn dilyn cyfarfod y Bwrdd, roedd
unrhyw broblemau’n cael eu hymgorffori wedyn o fewn y rhaglen hyfforddi.
Cwestiynodd y Cynghorydd Gwilym Evans y system TG a oedd yn ei lle ar hyn o
bryd a pha un a oedd yn ddigonol i ddelio â’r problemau fel y bônt yn
codi. Eglurhaodd ATGCA petai problem yn
codi ynghylch y system TG, mai rhyngwyneb arall fyddai cysylltu dros y
ffôn. Roedd gan bob ysgol rifau cysylltu
ar gyfer Gwasanaethau Plant i alluogi atgyfeiriad llafar. Felly, ni fyddai problemau gyda’’r system TG
yn achosi unrhyw oedi yn yr atgyfeirio.
PENDERFYNWYD dan
Adran 100A Deddf Llywodraeth Leol 1972, gwahardd y Wasg a’r Cyhoedd o’r
cyfarfod ar gyfer y mater canlynol am y rheswm ei fod yn debygol o olygu
datgelu gwybodaeth eithriedig fel y’i diffinnir ym Mharagraffau 12 ac 13 Rhan 4
Atodlen 12A Deddf Llywodraeth Leol 1972.
RHAN II
Roedd
hyfforddiant yn cael ei ddarparu hefyd ar gyfer staff Hebryngwyr Croesfannau Ysgol, a oedd wedi’i
addasu’n arbennig i gwrdd â’u hanghenion, a staff Gwasanaeth Cerdd Ysgol
William Mathias yng Nghonwy a Sir Ddinbych.
Mae rheolwyr a staff Canolfannau Hamdden wedi cael hyfforddiant. Roedd staff y Gwasanaeth Ieuenctid i fod i
gael hyfforddiant o fewn y mis nesaf.
Holodd John Saxon, Aelod Cyfetholedig, a oedd Penaethiaid yn derbyn
hyfforddiant ychwanegol. Cadarnhaodd ATGCA fod Penaethiaid yn derbyn
hyfforddiant lefel 1 a lefel 2 hefyd.
Roedd hyfforddiant Lefel 1 a 2 yn rhoi ymwybyddiaeth ehangach o ddiogelu
o amgylch ysgolion, e.e. staffio, recriwtio, AD a lles plant.
Cafwyd trafodaeth ynghylch cludiant ysgol a hebryngwyr. Cadarnhaodd ATGCA fod ei staff yn gweithio’n
agos â’r Adran Drwyddedu. Gofynnodd Dr Marjoram
a oedd strwythur yn ei le ar gyfer hebryngwyr ac os felly, y dylai fod yn ei le
ar gyfer gyrwyr tacsis/bysus ysgol hefyd.
Cadarnhaodd ATGCA fod gyrwyr tacsi, wedi’u trwyddedu gyda Sir Ddinbych,
yn cael archwiliad CRB manylach. Roedd
archwiliadau CRB yn cael eu gwneud ar bob gyrrwr bws hefyd gan yr Adran
Cludiant Teithwyr. Hefyd os oedd yna
yrrwr tacsi gwaharddedig o sir arall, byddai’r wybodaeth yma’n cael ei hanfon
ymlaen gan sicrhau nad oedd y gyrrwr gwaharddedig yn gallu gweithio mewn sir
arall. Roedd prosesau o’r fath i’w
gwneud yn fwy trwyadl a chadarn ar ôl cyhoeddi Gweithdrefnau Amddiffyn Plant
Cymru Gyfan. Holodd y Cadeirydd, y Cynghorydd Dewi Owens,
ynghylch gyrwyr tacsis sy’n gweithio heb hebryngwr ysgol. Eglurhaodd ATGCA nad oedd hi’n orfodol i
hebryngwyr ysgol fynd gyda phob plentyn sy’n teithio mewn tacsi.
Gofynnodd John Saxon, aelod Cyfetholedig a oedd pob bws/coetsh ysgol wedi’u
ffitio â chamerâu. Nid oedd ATGCA yn
gwbl siŵr ynghylch y pwynt hwn ac awgrymodd y dylid gofyn am eglurhad gan
Reolwr Adran Cludiant Teithwyr i gael gweld a oedd hynny’n wir. Awgrymodd Dr. Marjoram hefyd fod angen edrych
i mewn i blentyn yn diogelu plentyn ar gludiant ysgol.
Cadarnhaodd ATGCA
i’r Pwyllgor ei bod yn rhaid i bob ysgol ymgymryd ag archwiliad blynyddol, ym
mha un yr oedd 127 o gwestiynau ag angen ymatebion. Roedd yr wybodaeth yma’n cael ei hanfon at
ATGCA, a oedd yn archwilio’r wybodaeth wedyn.
Fe wnaeth y Pwyllgor:
BENDERFYNU
yn amodol ar y sylwadau uchod:
(a)
nodi’r camau a gymerwyd hyd yn hyn i fynd
i’r afael â materion diogelu ar draws gwasanaethau, a chymeradwyo camau yn y
dyfodol i fynd i’r afael â’r meysydd gwan a glustnodwyd yn yr archwiliad
blynyddol o ysgolion i fynd i’r afael â materion diogelu ar draws gwasanaethau;
a
(b)
gofyn i lywodraethwyr ysgolion fonitro’n
rheolaidd fod gan holl staff a gwirfoddolwyr eu hysgol archwiliadau diogelu
cyfredol perthnasol yn eu lle a’u bod wedi cael yr hyfforddiant diogelu sy’n
berthnasol i’w swydd.
Dogfennau ategol:
- Safeguarding Report 190412, Eitem 5. PDF 96 KB
- Safeguarding Report 190412 - App 1, Eitem 5. PDF 48 KB
- Restricted enclosure Gweler y rhesymau pam fod dogfen 5./3 yn gyfyngedig
- Restricted enclosure Gweler y rhesymau pam fod dogfen 5./4 yn gyfyngedig